˺ من المذكرات ⸀ رواية تعتمد على السرد والوصف اكثر من المحادثات ، الشخصيات حـ يبانو بالتدريج بعد كل بارت . بتاريخ 1.1.2021 🤍. ————————
" أمطرت حبـاً " - إحني لازم نتعلمو إن نـخلو الشمس تـشرق كـل يوم داخلنا قبل ماتشرق في حياتنـا، نتعلمو إن نـخلو ظلام الليل للأمس ونـوقفو ونصنعو فجر قلوبنـا من جديد وكل يوم. فـاقت على صوت العصفور اللي واقف على حافـة شباكها وكأنه قـاعد كل يوم يعلن في مراسم استقبال يـوم معبي بلطف ربي، وقفت وكملت ترويقتها ولفت شـال صوف عليهـا وطلعت لـوسط الجنان وفي يدهـا كوب كـاكاو دافي ونسمات ديسمبريه بـارده زايـره المكان ، قعمزت على الكرسي اللي يقابله الـكوخ الصغير اللي خلاته موطنها الجديد، رفعت عيونها ومر فبالها اللي صار
-" تعرفي! وأنا سارح في هدوئِك خيالي فيك مشي في كُوخ صغير فُوق جبل أخضر واسع وعُيونـك، ومزروع فيه الورد اللي يحبه قَـلبك واللي يشبه ضِحكتك، وليلته معبيه نُجوم مضويه الظلام زي تقعميزتِك فـ وسط طريقِي، تفاصِيلك خدتلي قَلبي وتبي دنيا برُوحها بيش نعيشهَا
-وأنـا خاطري يكُون عندي معاك حوش صغير معزول على زحمة الدنيا ، معبي بالورد وتُوصل الشمس بخفه لكل ركن فيه، خُضرة في كُل مكان وسمي واسعه معبيه بالغيوم، شُرفه فيها كرسيين يميلو بـزاويه محسوبه يطلّو على عيونك الحلوه، حُب ودفي في كُل تركينه والبساطه طاغيه على كُل التفاصيل ، حوش ميعرفش طريقه إلا اللي نحبوهم ، مش محتاجه حتى خريطه.. خطوط كـف يدك المتـلاقيه مع يدي حـ يكفـوا 🤍.
-ما لفتش إنتباهي من جيهتك لا حلاوة مبسمك ، ولا حتى شعرك اللي ياخد العقل ولا عيونك اللي يخلو حتى القلب يميل ، تصدقي حتى نقره الزين اللي على خدك اليمين لا.. اللي شدني ليك مش شالك اللي حلو على الآخر و لا كيف عاطيك وقار و حضور ، و لا حتى الكاريزما والرقه اللي عندك ، اللي لفتني إنك بنت واعية فطنه ، طموحه و فارضه روحك ، حنينه وعيونك معبيات بالمستقبل ،
فكرة مش عادية وحتى مش مألوفة ليها وقت في راسي إنّ نمس قلبك ، يعني كونك إنك متخشش تحت أي تصنيف في علاقتي بيك وماحد عنده جهد يعرف قداش غلاك عندي وإنّ يبيله هلبا حسبه اللي بيفكر كيف عيونك يخدروا في خلايا جسمي ، أنت الصاحب الثابت الوحيد والمُقرب وحتى كان عجبك ولالا المُحبب ، معاك مافيش بكل أصناف تعودت..مليت..نسيت ولا حتى مانقدرش كرامتي ، عافس على القواعد كلهم ومقعمزلي في قلبي تدغدغ فيه ،
"فوسط زحمـة الطريق الباهته والنـاس اللي ميبانـش منهم غير ظلهم الأسود وفجـأه ومنغير مقدمات انمدتـلي يد دافيه خدتـني من كـل الضياع لـمكان هـادي زي اللي أنـا فيه توا ، وفكـل خطوه مشيتهـا من وقتهـا ويدي متعلقه في إيده كـان ينبت وراي حاجات حلوه زي عيونـه".
ربي حيبعتلنـا ديمـا الشخص الصح في الوقت الصح حتى لو عاندنـا بس نصيبنـا مكتوب وسيورنـا نـاخدوه مهما كـان. فـات الوقت بسرعه وجي ليـل الكوخ اللي ظـلامه معبي نـجوم وهلالـه مش زايده الا جمـال.
حنونـه بالكميه اللي تسد تدفيك في ليلة بـارده ، ملامحها يشبهو الهدوء اللي يجي بعد عاصفه كبيره ، أي هي هكِ ياودي حتى كان شدت في يديها سكين الشر ما ليشي بيها أي علاقة ، المنظر حيولي بالزبط و كأنه "الجمال مُسلح"
في تركينتهـا ملتفه بغطاء مدفيهـا وفيدها نقـالها وتـكتبله بقلبهـا قبل طرف صبعهـا،
"اليوم الاول في الـكوخ مشي، فـات اول يوم بشكل حلو بس مش حنخلي انطباعـه يغلب على بـاقي الأيام ؛ مـه ديما لهفـة البدايات غير! بدايـة كـل شي حلوه وكـامله وتعمي فينـا على حقيقه بـاقي الأيـام . يومي الأول في واقع خيالك عشته وكـان زي ماوصفتني فيـه، نتمنى مـن وسط قلبي أن ايـامي كلهن يكونو زي خيالـك القنين فيـا".
بعتتهـا ومفـاتوش دقايـق وفـز قلبهـا برساله منه ،قرتهـا بكل تفاصيلهـا وكملتهـا وابتسامه مش قـادره تفارقهـا.. سكرت عيونها ورقدت.
-" انتِ كيف قـادره تخلي حتى حروفك دافيه ويطمنو فـ قلبي لـهدرجه؟ لهفـة الشي الصادق مش حتموت ولا انـا حنسمح نخلي شي فيك ينطفي وحنخلي روحي تـولع ليك. أول يوم ليـا من غير ما نتـأمل حنية عيونـك، أول يـوم من غير تفاصيل ضحكتك ، أول يوم منغير صوتـك اللي يضويلي في ظلامي ، ممكن أول يـوم يخدعنـا ويمر بسرعه بس لـو هك هيـا حـ نتمنى ان خدعتـه تـقعد لتسعة أيـام جايـه . متخـافيش! سكري عيونـك وارقدي انتِ قـاعده فـ قلبي! ♥️" .
الحاجه اللي محدش يختلف على وجودها المهم في حياتنـا هيا الأحساس بـالآمان ، أنـك تحس أنّ مكانـك محدش حياخده غيرك مهما بذل مِـن مجهود ، وإنّ مفيش زيك ولا حيكون فيه ومهما طلع شخص تـاني حيتقابـل بالرفض ، إن غيابك كفيل بـأنه ميخليش اليوم يمشي طبيعي ، أنّ مشاعرك في مكان مقدس مش حتنقص ولا تتغير مهما صار ، وأنـك مهما تعبت ولا طفيت حتنشاف الأحسن في كُـل مره ومره 🤍.
