أمطرت حباً.

اليـوم التاسع.

ماقبـل الآخيره ♥️.
اليـوم التاسع .

زمان كانو عايشين في حياه ملونـه ويشوفو في أفـلام أبيض وأسود ، توا إحني اللي عايشين في حياه بـاهته ونشوفو في أفـلام ملونـه !
شوارعنـا ناقصها الحب والفن ، ناقصها الثقافه والوعي والناس البشوشه ومبدأ الإبتسامه صدقه ، ينقصها ناس متدخلش في خصوصيات حد ، شوارعنـا ناقصها حياه .

بلادنـا بدت تحضن في الشر بكل ما عندها من قوه ، لدرجه إنه الحب الحقاني فيها سِـر يقعد طول عمره مدفون في قلوب اللي يحبوا ، على العكس الكره بالزبط هو أكثر حاجه واضحه.

- يوم بـارد والغيوم فيه حاضنه ضي الشمس ، الندوه المغطيه أوراق الشجر وقطرات من المطر على الورد تتسابق من توصل الأرض أسرع ، نسمة ادغدغ القلب وصوت العصافير المعبي المكان ، الشتي يفوز ديما بإنه يداوي كل جروح الفصول التانيـه 🤍.

بعد ليله رقدتها في كوخها رغم إصرار الخاله إن تزيد تقعد عندها لكن تالا تسبلت إنها تعودت على مكانها وتبي توليله... ولاقاعده تستنـا!

على الكرسي اللي جنب الروشن وسانده جمالها على كفة إيدها وتتأمل في الجو الحلو ، فكره تجيب وفكره ترفع في إن كيف حتكون حياتها وشن مزال ممكن يصير .

-محدش عارف شن ممكن حتكون النهايه لينا ولا ضدنا ، يقولو إن ‏في الحُب ‏مش حتتوقف عن كونك الحبيب ‏والعيله والملجئ وممكن تكون غربـة شعور ، ‏ممكن يكون الغرق والنجاة في نفس الوقت ، يكون الضربه اللي توجع واللي يداويها ، مش حتتوقع النهايه بس غالباً الحب القوي يفوز.. ولا زعما هدا في القصص والخيال بس!

خدت نقالها وفتحت على الصور بعيونها اللي لمعو من الشوق ،

"ليـا دقايق مش عـارف قداش ليهم فـاتو وأنـا سارحه فيك ، كـانو ديما يقولو إن حتى للعيون كـلام وإنهم مرايـا للقلب وأنـا كـ شخص يحب نـظرات العيون ويحب يفهمهم مشفتش قبـل زي نـظرات عيونـك !
مش فـاهمه كيف أنت قـادر بـ نـظره بـحلاوة عيونـك إنهم يـاخدو في عقلي ومعاش يخلو حتى للوقـت قيمه ، بعيونـك المتأملـه ليـا وبـشبحتك الحنونـه والدافيه اللي تحضن في قـلبي أنت تخصني حتى بعدد رموشك "

" بنتي ♥️ ،
من زمان هلبا حاطك في هالقلب ، مسكنك في الروح بعيد على النسيان ومش في قاموس اللامبالاة ، ما تنحطيش في مقارنـه وفدا قربـك الدنيا كلها وبتقعدي ديما فيا مربوطة بيا زي إسمي ، أنـا معاش قدرت على غيابـك ، اليـوم آخر ليله بروحك جـايك بكرا ملهوف وداسلك حب الدنيا كلها في قلبي "

" جـاي وحتقعد لأمتى! "

" إلى مالا نهايـه ولـ ماوراء الشمس ، للآبد وللي بعده ، أنـا جاي طالب قربـك لآخر عمري وشاريه حتى بغلاوة الروح ♥️"

"نخاف يكون البعد هوا صانع هالحب والشوق الكبير ، نتمـنى ما تحسش بالملل مني و لا تتعود عليـا كأني حاجه عادية ، كأني إسم سمعته وحفظته ومعاش جديد عليك ، خاطري ما يضيعش إنبهارك فيا و لا تموت شبحتك الحلوه لما تشوفني، ياريت ما تعتبرنيش حاجه مكرره كل يوم و يمشي شغفك من جيهتي ، متمنيه بجد ما يبردش قلبك مني وتنساني.