#للروحِّ_حسّان2
{الفصل_الأول}
{#اللقاء🌷}
"أنه الوقت المناسب..للقائك والنظر إلى مقلتيك.."
_يا الله على جمال صوته وضحكة مرته وهي خجلانة ومنزلة راسها..وهو كان لسه مواصل يغني ويبتسم ليها...فجأه كل الناس صفقت ليهو❤...ألق "صحبتي" قالت:- قليل جداً في زمنا ده نشوف زوجين لسه بينهم روح الحب دي...فجأه جا في بالي الكلام الكتبته في دفتري..إني ما ح تتزوج إلا شخص شايف عيوبي مميزات..!!....وصلنا حلفا...نزلنا من القطر مرخميين وكسلانيين..هناء قالت لينا:- بما إني جيت هنا قبل كده نطلع على فندق (..)ناخد راحتنا وبعدها العاوزة تطلع تلف بلففها..أروى قالت ليها:- واااااو شكلي كده ح أحب المنطقة دي جدااا...عهد قالت ليهم :- نبطل رغي ويلاااا...قبل نتحرك جات مارة بينا المرة الأنا نومتا طفلها،،،قالت لينا عندكم أهل هنا يا بنات؟؟ قولنا ليها لالا جايين سياحه حكاية كم يوم بس.قالت لينا بالجد❤حبااابكم والله..أتفضلوا أقضوا أيامكم معاي..هناء بقت تعاين ليها مستغربة وأنا كذلك...عهد قالت ليها:- مشكوورة يا ستي❤بس نحنا ح ننزل في فندق..قالت لينا :- لالا عليكم الله..حلفتكم انزلوا معاي..زوجي زاتو ما هنا..في مصر..معاي أختي الصغيرة بتقرا في الجامعة والبيت واسع وفاضي...م تخجلوني وانزلوا معاي..ولا نحنا ما قدر المقام؟؟ قولته ليها:- العفووو يااخ م كده بس..قالت لي صلوا على النبي وارحكم..الضيوف عندنا بنعتبرهم أهل❤....
{السودااانين محل ما يقبلوا أهل كرم بالجد}
_بعد إصرار منها وافقنا ومشينا....كانت ساكنه في حته وسط ما قريبة من المحطة ولا بعيدة...بيتها بسيط وغالب عليه الطابع البلدي❤...ضيفتنا في غرفة فيها تلاتة سراير...شربنا موية وعصير...وكل واحدة نامت في سرير إلا عهد لانها ضعيفونة نامت معاي😂...نمنا نوم مبالغ فيه و..صحينا قريب الساعة 9...عفاف"ست البيت" جات وقالت لي صحيتوا!!! جهزتا ليكم عشاء..ولو في واحده عندها مشكلة مع أكل الليل..في حليب طاازج وفواكه...ألق قالت ليها أنا بس لو لقيت كباية حليب م عاوزة شي تاني...قالت ليها ما طلبتي حاجه❤طمنا أهلنا علينا...وبعدها دخلنا الحمام بالدور غيرنا ملابسنا وقعدنا في الحوش..الجو كان معتدل...ختت الصينية قدامنا وبدينا اكل...جات أختها "زهراء" قعدت تونس فينا وتحكي لينا عن جامعتها وكده..بتدرس السنة التالتة كلية تربية...قالت لينا طبعا بكرة عندنا يوم مفتوووح...حنه خريجيين بالرطانة...عاينتا ليها مستغربة بس ما إتكلمتا...قالت لينا ما تستغربوا ههه..هنا أجواء الحنن والتخاريج غييير❤..قولته ليها بسرعة :- ممكن نمشي معاك بكرة؟؟ قالت لي جدددا...ارح طوالي...كنت ما ناوية امشي..بس شجعتوني..عهد قالت ليها بنحب الحاجات الجديدة عشان كده..المهم حننكم ظابطة ولا اي كلام ؟؟ قالت ليها والله ح تعجبكم انا واثقة...ألق قالت لينا أمشوا انتو انا وهناء ح نمشي السوق بكرة...قولته ليها:- لا ياخ نمشي كلنا مع بعض..عهد قالت لي خليييهم..ح يندموا😆..نمشي انا وانتي وأروى ويوم تاني نخطط للسوق.....!
