بيوم بالليل كاعدين..' شفت مالك مشغول وشارد صفنه تجيبه وصفنه تاخذه.
شبيه حبيبي شنو الشاغله عني معقولة كل هالفترة ابالك موضوع و ماتثق بزوجتك حبيبتك وماتشاركني همك
صفن بوجهي شوية... بعدين. ...
ليال اريد اكلج شي بس اخاف تضوجين وتنشغلين
شكو مالك خوفتني
ماكو حبيبتي بس سلمان هم رجع ظهر من جديد بعد الكسره الي كسرته بيه من الصفقة الاخيرة رجع وكف ع حيله بمساندة ناس كبار... وخايف لا يزعجنا اويحاول يأذينا وبصراحة هذا السبب الاكبر الي خلاني احول بيتنا حتى لايندل
وبشنو يزعجنا حبيبي اوي الله ياخذه خلي يولي
حبيبتي اني ماخايف ع نفسي بس هذا نذل خايف يأذيني بيج
اني من كال هيج كلش انصدمت
واي مالك ليش ليش شلون يعني
اهدأي حبيبتي اهدأي وتعالي بحضني... معقولة تخافين وانتي بحضن مالك... اموت ومااخلي يمس من ام قتيبة شعراية اتشاقه وياج ياروحي
اسم الله عليك حبيبي من عمري ع عمرك يانبض گلبي
ظل مالك ليلتها يتشاقه عود يضيع السالفة بس اني كلش انشغل بالي عليه...
ومرت الايام صرت ثكيلة ومابيا اتحرك... وخلصت الثامن وبعد مادخلت الشهر التاسع بأسبوع واحد صار عندي اوجاع
كعدت الصبح حسيت بألم فضيع بسرعة صحيت مالك
حبيبي اصحى أاااااي مالك كوم أااااي
خطية فززته وكعد
ها ها ليال شكو منو وياج
مالك فدوة صحصح عندي وجع يمكن صار وكت الولادة
جنت اصيح وابجي... ههه خطية هو هم انثول مايعرف شيسوي بسرعة بدل واخذني للمستشفى وصلت اهناك وفجأة مابقى عندي اي الم فحصتني الدكتورة كالت هاي تقلصات الحمل مو ولادة... ورجعنا للبيت وتكرررت الحالة 3 مرات ههههه...
اخر مرة مالك جان بالدوام خابرته اصيح خطية بس ماانجلط
الووو مالك مالك الحك والله هالمرة كلش يأذي
خب حظي ولج والله بالي وين راح من سمعتج تصيحين... ليال حبي روحي مددي هسه يروح الوجع
عاااااااا لك شمدد الوجع يگطعني
اي بال 3 مرات الي راحت هم جان الوجع يگطعچ ياروحي والله ماألي وجه ادخل المستشفى ولج حتى الامن بالباب عرفوا سالفتنا
مالك تجي لو اطلع اصيح برة ااااييييييي
ليااال لياال حبيبي زين جاي اني ادري انتي ضايجة تريديني ارجع بس روحي مددي رويحتي ربع ساعة واوصل
استعجل مااااالك استعجل والله هالمرة....
طوووووط طوووووط طووووط
عزززززززاااا سدها بوجهي وين اولي ربي
صدك جان الموقف كوميدي ومن شدة التوتر والالم حتى تيهت التواليت واني محصورة... وفجأة شي حار بدا ينزل مي وسخ
عزززززززاااا العززززززاج ليال ولج هاي شنوووو
شسوي هسه واي واي مالك وينك راح اموووت
وجان يدخل مالك للبيت بكل برووود... اني شفت ابتسامته الباردة بس مااكلته بسنوني...
مالك شنو هالبرووود واني الوجع كسرني اتحرك سويلي شي
شافني وشاف وجهي مصفر لا صدك هالمرة غير
وج ليال هاي مي راس طاك عندج لج خرب كعدي كعدي اهناا لا لا ظلي واكفه حبيبي لا تعالي كعدي بس ادخل السيارة لا لا لا تعالي روحي جيب غراضج
ماااااااالك اني دأموووت انت شدتخربط هسه اروح لواجي لواكعد لو اوكف رسيني
صعدني مالك بالسيارة كوة كعدت وبالطريق فاتحة الشباك واصيح... ومن مالك يريد يهديني جنت اعظ ايده لحد ماوصلنا المستشفى زوركتها اله خطية
وصلنا مباشرة اخذوني لصالة الولادة...
من خلوني ع السرير المتحرك خفت كلش كلش
كل وحدة من النسوان شفتها وياها وحدة لو امها لو اختها لو حماتها... الا اني بوحدي اترجيتهم يخلون مالك يدخل وياي ضحكوا علي ((حقهم مايعرفون مالك كلشي الي جان امي وابويا واخوتي وكل عشيرتي))
بجيت هوايا بس مو من الوجع بجيت من حسيت ماألي احد وهاي اول مرة احس بالوحدة شكد صعبة اثاريها المرة بلايا اهل... ولو اموت خلص كأني لاجيت ولا رحت من الدنيا
هههه من اتجمعن الممرضات الدكتورة كمت اني وملابس العملية اركض جني مخبلة لازمة بطني واصيح مااريد اجيب.. اركض والممرضة تركض وراية والنسوان خربانات ضحك لزمتني الممرضة وج ماما بكل عقلج انتي شنو مااجيب ترى الطفل يتعب ويختنك...
لا لا عفية ابني... بجيت ورجعتني لمكاني ضربوني ابرة توسع وبين مابدا الوجع من جديد كلتلهم اني يتيمة ماعندي احد من هاي خايفة.
والدكتورة تكلي ادفعي حيل اني اتنفس حيل جنت اسمعها تكول ولج بربوك اكلج دفعي لو اتنفسي عليمن تضحكين انتي .
وبعد هوايا من ادفعي واوكفي وجيبي وودي هااا اجا راسه اااااي ااااااي وبعد..... وجااااااان يطلع قتيبة
فدوة سمعت صوته وهو يبجي ماادري شنو صار بيا جنت ابجي من الفرحة واكللهم انطوني ابني اريد اشمه... هم هماتين اتعاطفوا وياي وبجوا ع بجيي
بعد ماكملوا ترتيب وتنظيف نقلوني لغرفة خاصة وسلموني لمالك... فدوة لعينة الفرحة جانت تنط من عينه...
حضني وباسني
كافي حبيبتي كافي بجي شوفي ابنا بحضنا والحمدلله ع سلامتكم يااغلى من روحي
اليوم فرحتي بالدنيا مابدلها... ربي اكرمني... بولد ومن حبيبتي بعد شريد احمدك واشكرك يارب
يووووومة فدوة عيونه كبار عليا بس ملونه بلون عيون مالك.. هواي ملامحه من مالك
ورجعنا للبيت جنا اني ومالك مثل المجانين يوميا نراقب قتيبة بكل حركاته وهو چنه عجينة فعلا غير حياتنا للأحلى بس فدوة لعينه شوية جان نحيس وماينام جنت ابقى اسهر وياه
بالليل مرات اغفى فيجي مالك ياخذه هو ينيمه ويغطيني ويعوفني بالغرفه ارتاح...
جنا نصور قتيبة يومية وهو عبالك بزونه صغيرة نكول من يكبر نشوفها اله
بقينا مرتاحين شهر من عمر قتيبة ونسينا سلمان..
لكن للأسف ماجنا نعرف شضام النا
يتبع....
