صدمة جانت كلش بالنسبة الي من شفت منظر صافي احس عبالك اتيتمت من جديد... انهاريت من البجي والكل بجى بقهر عليها لان هي رغم الظاهر القذر الي جانت تعيشه بس بداخلها جان اكو شي نظيف وطيبة تحتوي الكل رغم ان هي مانصفها الزمن..
سلمان بعيطه وحدة سكت الكل الا اني ظليت ابجي والطم واصيح اتقرب مني صاح بوجهي انجبي وانلصمي بس اني هم ماسكتت ماجنت اكدر اسيطر ع روحي ماحسيت الا اجاني كف منه وكعت ع وجهي وبدا يضربني برجله وين ماتوصل...
بس الي انقذني منه هو مالك وكف بوجهه ودفعه طبعا زلم سلمان مستحيل ماقبلوا وشهروا اسلحتهم وسلمان منعهم.. استغربت ان سلماااان الحوووت يسمح لمالك ان يامره
اخذوا صافي هم ودفنوها مع اسراء واحنا طبعا لانطلع لانعرف وين المكان...
بقيت عازلة روحي بغرفتي اشرب اسكر وادخن لروحي احجي ويا روحي والمكان مر الشهر والشهرين بلا شغل صار عبالك مهجور..
بدا الرجل يخف عليه...
لحد ما اجا مالك ذاك اليوم...
فجأة دفع باب غرفتي ودخل... شلت راسي گوة باوعتله مااهتميت رجعت كملت كاسي
لزمني من شعري وسحبني للحمام وذبني اني وملابسي جوا الدوش وفتح المي
واني مثل الطين وين مايذبني ابقى اتنكعت بالمي البارد لحد ما صحصحت
كال كومي كدامي ع السريع...
كتله مااطلع لاي مكان مالي خلك اجازة من الشغل
كال شوفي ولج ماعندي خلك اكعد اسمع دلال الكحاب.. انتي من اليوم بعد ماتشتغلين اهنا
كتله شنو قصدك الحوت طردني
لا الحوت باعج واني اشترريت... شغلج راح يصير بس بالمكان والوكت الي اني اريد...
اني بقيت مصدومة شنو ذاك يبيع وهذا يشتري
صحت عليه وهو شنو حتى يبيعني ليش اني ملكه وشنو انت تشتري فهموني شنو هي سوك خضرة
ضحك بأستهزاء... كال لاسوك نسوان... وكومي كدامي ورايا شغل مافاضيلج
((مالك الرومانسي الحباب ع الفراش مو نفسه مالك بتعامله اليومي مع الناس ))
عاندت ورفضت اروح وياه ابتسم وطلع بكل هدوء كلت يلا خلصت... مباشرة دخلو رياجيل اثنين من جماعته وسحلوني سحل للسيارة ضليت اصيح واضربهم ماكو فايدة
طلعنا من المنطقة بأتجاه المدينة سيارتين سيارة اني والزلم الاثنين وسيارة شخصية اله... اني ظليت اباوع من الشباك اتذكرت من اجيت جنت متأملة حياتي تصير ألي حتى لو حياة قذرة المهم أني امشي نفسي.. بس الظاهر ماكو امل المنحوس منحوس
وصلنا يم عمارة سكنية وكفنا مالك نزل من سيارته واجاني من الشباك كال شوفي ولج هسه تنزلين مثل الاوادم بلا حجي زايد وصياح والله يكون اخر يوم بعمرج
نزلت لزم ايدي وكال صيري طبيعية صعدنا للطابق الثالث طلع مفتاح فتح باب الشقه ودخلنا
شقة تخبل اثاث خرافي بيه سألته هاي ألك.. كال اي شقتي من اداوم اهنا ابقى المهم سمعيني ليال
اوامر الحوت تنسيه بعد خلص
طلعة من الباب ماكو لو تموتين ولاتفتحين الباب لأحد افتهمتي شغلج بس تديري هالمكان شغلج ب بأوامري وبالذات الي ولو مو هواي احتاجج
كتله بس هذا المكان مابيه شي شسوي ابقى اهنا وع اي اساس تسجني بيه
كال انجبي ولا كلمة بس تسمعين وتنفذين.. الشغل يصير بس من اني موجود ويا اصدقائي.. تخدمين وترتبيلنا الكعدة وانتي ساكته
بصراحة ماافتهمت ليش اني دون البنات اختارني وشيسوي بيا بهالسجن المهم ماكو بيدي شي غير التنفيذ دلاني ع غرفة كال هاي راح تكون غرفتج
كتله بس ترى اني جايه بطرك ملابسي الي عليا
باوعلي نظرة شلون ماجان وعافني وطلع اني ظليت متسمرة بمكاني دقايق هم رجع
كال وين موبايلج انطيته طلع الشريحة وانطاني الجهاز كتله زين هسه انت تسد الباب عليا لا احد وياي ولا موبايل شلون بالله احتاجيت شي
بس هو طلع ولا اندار ولاعبالك سمع حيل اتنرفزت وظليت اسبه واسب سلمان
افتريت بالبيت كلت بلكي الكالي شي البسه ماكو بغرفة النوم دخلت فتحت الكنتور فارغ ماكو حل بيدي غير اني اسكت لحد ماادبرلي طلعة منا جنت كلش تعبانة مددت ع الجرباية ماحسيت ع نفسي الا ع صوت مالك فزيت كوة مفتحة عيوني
وهو يصيح ليال وينج.. وينج تعالي اخذي الغراض من ايدي طلع من غرفة النوم للصالة المنظر جان يضحك صدك
مالك بس صوت بلا صورة بيده كومة اغراض رحت اساعده واخذت من ايده..
كلت شعجب جنابك متسوك ماجان انطيته لرياجيلك كال ممكن تنجبين اخذي هالغراض ورتبيهن هاي الشريحة رقمج الجديد بيه بس رقمي وماينضاف بيه غيره وماتخابريني لو تموتين بس اني اخابر وياويلج الكاه مشغول او ماتردين احتمال عندي خطار بالليل
مالك بس اني
انتي جب ولاكلمة اذا عندي نيه اجي اخابرج
بس اني محتاجة اغراض انت ماتعرفها
انتي ماتعرفين تسكتين مو
كالها وطلع هم بلا مايسمعني
وحدي بالشقة شسوي
فتحت التلفزيون كلبت ماكو شي رجعت ع العلاليك كلت ارتب وانصدمت
مالك ماعايف شي الا ومذكره حتى الملابس الداخلية... والقياسات مضبوط جايبهن وملابس نوم وللبيت الوان واشكال وبدلات سهرة
