ظليت اتگلب بمكاني لحد ماغفيت ويا ماغفيت حلمت بصافي...
جاية للشقه تكول ليال انتي ليش ماتسمعين الكلام اني زعلانة منج وزعلانه عليج موكتلج الحب موألنا..
وراها اترخصت كالت اني رايحة اشوف اسراء والدنيا ليل مااكدر بوحدي راح اخذ مالك ويايا يوصلني... حاولت امنع مالك يروح بس شكد صيحت ماسمعني
اني خفت كلش لان جنت واعية ان صافي متوفية....
تالي ماحسيت الا مالك حاضني واني ارجف واصيح وابجي...
كال صوتج جاي لغرفتي وانتي تصيحين بأسمي خفت لا حرامي داخل عليج... شكو حبيبي اهدأي شفتي كابوس؟؟
ظليت الليل كله قلقة ومخنوگة وماحجيت لمالك...
ومالك عود جاي يواسيني هو نام بحضني لحد ماصبح الشمس لكيته صاحي من وكت علمود دوامه... مخليلي وردة حمرة ع ورقة مكتوب
(( ارجع الظهر اريد غدا....... احبج))
(ايبااااااااه اذكرت واتألمت من اول مرة نمت مع مالك الصبح جان هم مخليلي ضرف بس مو بيه وردة.. جان بيه اجر الليلة... گطیعة الله لايرجع ذيج الايام)...
بقينا ع هالحال الشهر والشهرين لحد ماكملنا ست اشهر...
الي صار بهالأشهر... اتعلقنا ابعض كلش كلش وحبنا لبعض يكبر جان يوم بعد يوم... مشكلتي الوحيدة جانت من ينزل يغيب اسبوع واحيانا اسبوعين صح جنا نتواصل بس مو مثل ماهو يمي... ومن يرجع اسأله شكو ماكو ع بيته واهله وهو يكعد يحجيلي ع بناته وزوجته واشوف السعادة بعيونه لان حياته بدت تستقر جان يحجيلي ع فرحته ان زوجته حامل بولد وهو منتظر يوم بيوم يمتى يشرف ولي العهد.. چنت اضوج واغااار واخاف افقده لان هو صار بالنسبة ألي الامان الوحيد بس ماجنت ابين اله اني ضايجة حتى لايأثر ع علاقته ابيته خاصة اني بنفسي اقنعته لايطلك زوجته بوكتها من قرر خاطر بناته ...
جان گلبي ينعصر واني اسمعه بس ارسم الابتسامة ع وجهي... واقنع نفسي مهما يكون هي ام بناته وهي زوجته كدام العالم... .
هو جان يحاول يعوضني من يرجع.. يطلعني يونسني وابد ماجان يكسر خاطري
اتغيرت لخاطر مالك بهواي شغلات وطبعا جان احسن ألي... ملابسي... طريقة كلامي واسلوبي..
بعد الست اشهر حسمنا قرارنا ع الزواج الرسمي واتزوجنا. لكن طبعا بالسر .. الشي الوحيد الي نبهني عليه مالك سالفة الخلفة.. جان رافضها تماما ومحذرني
اني رغم جنت اتحسر ع كلمة ماما من طفل احتاجه يملاء الفراغ الموجود بحياتي واحلم اني اكون عائلة مثل العالم بس مااكدر اكسر كلمه مالك وازعله
وبعد زواجنا بشهرين.... صار وكت الدورة مالتي بس مااجتني اتاخرت اني جنت متوقعة والذنب مو ذنبي بس مالك ماسيطر ع نفسه اكثر من مرة بذاك الشهر يتقربلي وهو شارب... صراحة بداخلي جنت اتمنى يغلط هيج غلطة... جنت اتمنى يصيرلي طفل منه بيه ريحته قطعة منه بحضني من يغيب هو
وانتظرت كم يوم وراها وصيت ام صباح تجيبلي شريحة الاختبار من الصيدلية..
وجربته وطلع فعلا حمل جنت طايرة من الفرح جنت احس حياتنا اني ومالك هسه تكمل..
نسيت روحي ونسيت رغبة مالك وتنبيهه لان اصلا مو ذنبي... وانتظرت الفرصة الي افاتح مالك بالموضوع... يمكن يفرح من يصير كدام الامر الواقع... ويمكن يضوج شوية وراها يتقبل... وهو بالتالي ابنه...
بيوم رجع بالليل ضايج شفته شوية فسألته شكو كال مشاكل بالدوام لاتشغلين بالج حبيبتي
احجيلي شسويتي اليوم... جتج ام صباح لو لا
اي گليبي اجت المغرب راحت.. و..
شبيها رويحتي بلسانها حجي.. ردت احجي كام يتحارش بيا يبوسني ويكرص عابتله ولزم أيدي يوديني للغرفة.. حاولت اوكفه احجيله ماقبل وكلما اريد انطق يخلي ايده ع حلكي.. استسلمت كلت من نخلص عود اكله....
خلصنا ردت اكوم اغسل ماقبل مالك سحبني حضني كلش شفت هاي الوضعية اتخيلتها انسب وقت ابشره بيه..
مالك حبيبي اكو موضوع اريد افاتحك بيه بس اريد تتمالك اعصابك...
شكو رويحتي لاتشغليلين بالي
نبض گلبي انت مااعرف شلون اني... كمت اتلعثم بالحجي...
المهم.... اني الدورة اتأخرت عليا هالشهر...
من سمع مالك هالحجاية كعد وعاف حضني... اي شنو يعني... ليال الشي الي تلمحين عليه مستحيل اتصرفي
يعني شلون اتصرف مالك ... مالك اتنرفز حيل لدرجة فقد اعصابة... وكام يحجي ويفشر
انتي تريدين تخليني كدام الامر الواقع... مو احجي
مالك حبيبي ع كيفك افهمني اني صح احب يصير عندي طفل بس مستحيل اتجرأ اخليك كدام الامر الواقع... هاي ذنبك انت تذكر حبيبي؟؟ كم مرة...
ليااااااال... لياال حمل ماكو واذا صار سهوا تتخلصين منه افتهمتي
مالك ارجوك خلينا نتفاهم حبيبي..
ليال لاتكفريني هذا الموضوع مابيه تفاهم
مالك مرة افهمني مرة حس بيا وبالي اتحمله علمودك... اني دخلت حياتك ماخربتها مثل غيري مايوم قارنت نفسي بزوجتك ولايوم حرضتك ع بيتك ولايوم طلبت منك شي فوك طاقتك انت وحياتك وبيتك وزوجتك وبناتك دائما افضلهم عليا...
لكن عمرك حسيت بالفراغ الي اعيشه بغيابك
عمرك حسيت بنار غيرتي الي اكتمها وانت تحجيلي ع حمل زوجتك... ليش اني مو هم بشر اريد اصير ام.. اريد اشبع عندي هالغريزة.. اريد رحمي هالجزء من جسمي يشيل قطعة منك
لياااال اني اسبح واروح انام... النقاش بهالموضوع انحسم... اذا اكو حمل... تخلصين منه..
. انتهى
مالك نام بغرفته ماقبل ينام يمي واني ظليت الليل كله لازمة بطني وابجي صدك حسيته ياخذ مني ابني...
الصبح بلا مايصبح عليا او يتريك طلع بس فزيت ع صوت الباب...
اني انجنيت كلشي ولا يزعل مالك.. زعله ثكيل ويتحمل يهملني كم يوم يطللع مع اصدقاء ويلهي نفسه واني اظل اكل بنفسي
كلت ويا نفسي ... يلا ليال هاي لا اول ولا اخر مرة الحياة ماتنصفج
متعودة اتنازل حتى اعيش
اخسر اغلى شي حتى ارضي الي احبه
يتبع...
