سالـفة مفيدة وحلوة ----------------------- يگولون أگو مره ضاجت من رجلها بسبب مشاكل بيناتهم وطلبت منه يطلگها هوه ماقبل ورفض يطلگها هي هم ثاني يوم راحت للسيد الوجيه واشتكت عنده من رجلها ولزمت أيد السيد وحبتها بس يخلصها منه طبعا السيد عاقل وصاحب حظ وبخت ومايرضى بالطلاگ لأن الطلاگ مو شي سهل فحاول وياها بكل طريقة حتى يردها لرجلها وهي ماتقبل السيد من شاف المره مصرة على الطلاگ گلها ميخالف أطلگچ منه بس عندي شرط عليچ گالتله مـولاي أشرط وأنه موافقه گلها أريدچ تسويلي غدة باچر وكون الغده التسوينه مابيه شي من بيتچ تلمينه من نسوان السلف وحتى الملح هم تطلبينه گالتله صار وچنك على غده هيه هم من الصبح دارت على نسوان السلف تلم بغده السيد طبعا هاي من تروح لبيت جيرانها تسولف سالفتها لجارتها وشلون رجلها موزين وياها وظالمها جارتها من تسمعها هم تشكي همها وظلم رجلها وشلون يغلط عليها ويكتلها وهاي عادة النسوان وحده تشكي ضيمها للأخرى من يتلاگن المهم هاي المره وره مالمت غدة السيد وسولفت سالفتها لنسوان السلف وسمعت سوالفهن شافت أشو رجلها مثل باقي الزلم ويجوز أحسن منهم لأن اليشوف مصيبة غيره تهون عليه مصيبته
طبخت الغده وشالته وأخذته للسيد بمضيفه گالتله مولانا هذا غداك تاكله هني وعافيه بس أنه بعد بطلت ماريد أطلگ من رجلي هذا أبو بيتي وعزتي ومهابتي وحتى من يغلط عليه هم قابله بيه .. طبعا قصد السيد من طلب الغده مو الأكل ﻻ بس رادها أطب البيوت وتشوف وتسمع بنفسها وتعرف شلون عايشه الناس . ------------------------------------ ✍ العبرة من السالفه :
ماكو اليوم زوج كامل المواصفات ولا أكو مرة كامله والعوائل إللي الله ساترها وعايشه ومتجانسه مو لأن حياتهم مثاليه مثل مانتصور لا ، لأن هذه العوائل يردون يعيشون بسلام ويربون أطفالهم
طبعا هذا مو تبرير لسوء أخلاق بعض الأزواج والزوجات بس تره همه نفس الناس إللي عاشوا قبل وعاشوا هسه وبيهم صفات زينة وموزينه وهمه بشر ويغلطون ويصيبون لكن گبل العلاقات أقوى وتستمر أكثر اليوم تشوف كثرة نسبة الطلاق وخاصة بين الشباب وبنسبة عاليه فلا الزلم تغيرت ولا النسوان تغيرت بس إللي تغير هوه الرغبة بالستر وفهم معنى الحياة الزوجيه وقيمتها مشكلة شبابنا الانفتاح إللي صار وصاروا يصدگون بالمسلسلات والروايات والعلاقات بمواقع مختلفه
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
اللهم صلِّ على محمد وآل محمد وعجل فرجهم والعن عدوهم
