حاسين بالشعور لمن تحجي وي صاحب الزمان (عج) كأنه والدك، شعور يخلي روحك حيل مرتاحه ويشغل ضميرك، تعالو الليله خل نحجي وي ابونا بهذي الكلمات، بس قبلها اريدك اتغمض وتاخذ نفس وتذّكر ذنوبك وبعدها تصلي على محمد وآل محمد ٤ مرات، هسه يله تعالو خل نحجي وي الابو الحنين ابو صالح امامنا.
بويه ابو صالح شلونك بويه شخبارك، ان شاء الله زين مأذيك حيل انا مو بويه😔 اجيتك اليوم اعتذر واتوب على ايدك مثل ما تاب الحر على ايد جدك الحسين، وعد بوية بعد ما اسوي ليأذيك☹️ ، وداعتك بويه انا من اذنب واتذكر انت تتاذه انا كلش اتاذه واضوج حيل وگلبي ينكسر💔،بس اليوم اول يوم من شهر رمضان بعد كافي قررت اتخله عن كلشي يأذيك، بويه الحياة بدونك مرة ولا طعم بيها، بويه اريد اكلك شي گتلك بي هواي واعيدة اليوم وابقى اعيدة، وداعتك يا بويه ما عندي غيرك، ولا امل عندي بالدنيا بس انت، بويه انت ابو الكرم والليلة اول ليلة من شهر رمصان اريدك تتكرم عليه وما تعوفني للدنيا تاخذني وتردني وتنسيني ذكرك، بويه انا غلطان واليوم جاي اعتذر وانت اهل للعفو والمغفرة اكيد تعفو عني وما تتركني بويه وداعتك اذا تعوفني اضيع وداعتك اضيع😭 بويه بجاهك عند الله ادعيلي خل رب العالمين يصلح حالي ويخليني مثل ما اتريدني انت، بس هذا الي اريده منك بويه، وانا اعرف الطلب رخيص وانت ابو الجود وما ترد ابنك، يا بعد روحي يا بوية❤️، خليني قريب عليك ولا تبعدني عنك بجاه جدتك المكسور ضلعها، بويه ادعو ربي كون يحفظك عن يمينك وعن شمالك ومن فوق ومن تحتك و يشوفنه ظلك ونعيش بدولتك ونكون من المقربين منك بجاه السيدة الزهراء (ع)
خلصت، اقره دعاء الفرج
اللهم. صل على محمد وآل محمد وعجل فرجهم والعن عدوهم 🌺
استغفر الله العظيم واتوب اليه 🌺
