#حب_الراعي ❤️ جديد في الحلقه 9 👣 🐑 ❤️
" عبير " لقيت رساله من يوسف انصدمت كان مكتوب فيها ( عالساعه 6 قبل الشروق 🌅 نلقاك نايضه )
دقات قلبي سريعه انا دغري اتصلت بيه جاني صوته
يوسف : همممم
عبير : ليش 6 ؟؟
يوسف : بعدين تعرفي
عبير : بس انا نكون راقده شنو يوعيني في هالوقت عندك علم اني نرقد 4 ونص
يوسف : شنو اديري صاهره لاعند هالوقت لازم ترقدي 11 او 12 علي الاقل ونلقاك حدايا نايضه
عبير : كيف نرقد 11 مستحيل مش متعوده وانا نصهر يا مع صديقاتي نهدرز او نتفرج او نقرا كتاب بس
يوسف : باهي إذا قتلك علي شاني نوضي
عبير تنهدت : يوسف انا نصهر هضا روتيني عيلتي واحله فيا بالايش انوض الصبح كيف تبيني 6 انكون عندك ههههه نجيك وانا راقده والله شنو
يوسف : يلي عندي قلته وسكر في وجي
تأففت لا عاد مش عدل بدينا في جو التحكم زي خطيب حنان اووف مش متعوده نرقد بدري اه منك يا يوسف وبحتت في الساعه توا 9 احسن حل نعدي اندير كاكو لان يخلي الواحد ينعس ويرقد عديت للكوجينه ودرت كاكو وقعدت في غرفة المعيشه ولعت التليفزيون وصهرت بروحي وماما وبابا في غرفتهم يرقدو بدري عكسي انا متعوده نصهر اه منك كيف حانوض بدري بس وتمددت عالكنبه ومرت ساعتين ومزلت نايضه طفيت تليفزيون وقعدت نتاوب خشيت لغرفتي وخشيت في بطانيه وغمضت اعيوني وكل اشويه نتقلب يمين ويسار اوووف قعدت بالوضع هضا حتى غفيت رقدت
وطبعا دايره منبه يوعيني 6 الا 10
" يوسف " نضت 5 زي عادتي وانا نبتسم حانشوفو يا كسوله اتنوضي او لا صار 11 تنوضي توا تشوفي وابتسمت عديت توضيت وراجيت الفجر وبعدها صليت وبحتت في الساعه توا 5ونص قعدت في نفس المكان يلي ديما نقعد فيه وقعدت معايا عبير فيه وقعدت انراجي فيها لو جات مستحيل انخاف انها تخليني اكيده حاتجي علي شاني زي ما قلتلها امس وابتسمت واعيوني عالسماء
" عبير " نضت من صوت المنبه فجأه وطفيته ورديت نبي نرقد اخرا وبعدها نطيت بسرعه انا درت المنبه عشان انوض بحتت في الساعه 6 الا 5 اوووف عديت نجري للحمام غسلت وجي من النوم وعديت لغرفتي طلعت جاكه فيها طربوش ولبستها عالتوته وعديت للكوجينه وفتحت الباب التاني يلي يطلع برا فتحته بهدوء ورديته وطلعت نجري بسرعه حتى وصلت لاعند يوسف لقيته قاعد ويراجي فيا خديت نفس وقربت قعدت جنبه : انت مجنون
يوسف عطاني اميه وكان يبتسم خديتها وشربتها ودقات قلبي سريعه من الجري
عبير : ليش هك
يوسف مابش ايرد ويبحت فيا
عبير : رد عليا ليش مستعجل ان تشوفني
يوسف شير عالسماء : حبيت اتشوفي معايا الشروق يا كسوله 🌅
عبير انصدمت : وعيتني وخليتني انصبي ونجري عشان انشوف الشروق وقفت دوتي فجأه وكنت بكل نعسانه حطيت ايدي علي راسي
يوسف : ما قتلك كسوله تحملي وخلاني نبحت في السماء وفجأه طلعت الشمس الله علي منضرها يهبل قعدت نبحت فيها ولكن يوسف يبحت فيا انا فطنتله
يوسف : انتي شمسي ❤️ بدونك حياتي مظلمه
عبير دقات قلبي سريعه : اول مره نشوف الشروق 🌅
يوسف : ومش اخر مره لو وعيتي بدري زي اليوم
انا بحتت فيه : انتّ
يوسف : انا شنو ؟
عبير : انت ودرتني بجديات يعني الشخص الوحيد يلي خلاني انوض هو انت علي شانك وعيت وجيتك
يوسف قعد هايم فيا وانا نحكي ونعسانه وكل اشويه نغمض في اعيوني ونتاوب
يوسف : عبيري
انا بحتت فيه : شنو
يوسف : صليتي
عبير : لا مزال جيت بسرعه بس
يوسف : لا معقوله هك صبي هيا
عبير : وين انصبي
يوسف صبا وانا لحقته لف وبحت فيا : توضيتي
عبير : لا غسلت وجهي بس
يوسف : اخ منك وطلع اميه من البير وأشر انجي لاعنده وجيته قعد يصبلي من الدلو وانا نتوضا ونرعش كانت اميه مسقعه بكل ويوسف ساكت بعد كملت وانا نرعش اشر نخش للبراكه
