لعنات العشق "الجزء الرابع من سلسلة العشق"

الفصل الثالث

نوفيلا
لعنات العشق
الحلقه الثالثه
...............
_مترجعوش غير لما تلاقوا جلالة الملكه انتوا فاهمين!
قالها غيث بحده وهو بيبص لـ جنوده اللي حركوا راسهم بخوف منه ومشيوا بسرعه .. قعد غيث علي الكرسي بتاعه بقلة حيلة وهو  حاسس كأن هم الدنيا كله اتغلب منه دلوقتي .. اتكلم بوجع :
_روحتي فين بس يا عشق !؟
دخلت ريحانه القصر بعد ما عرفت بخبر اختفاء عشق وكان معها شادي اللي قدر يلحقها امبارح وفضل معها لحد ما هديت .. اول حد قابلها كانت وعد اللي اتكلمت بدهشه  :
_ريحانه انتي هنا بجد!
راحتلها ريحانه بسرعه وهي بتتكلم بقلق :
_الملكه عشق راحت فين يا وعد؟
حركت وعد راسها بعدم معرفه وهي بتتكلم بأسي :
_محدش يعرف .. من بعد ما الملك طلقها وهي مشيت.
اتكلم شادي المره ديه بصدمه :
_نعم .. الملك والملكه اتطلقوا ؟!!
بصتلها ريحانه بصدمه واتكلمت :
_امتي ده حصل؟
_بعد ماانتي مشيتي امبارح الملك والملكه طلبوا الشيخ وعملوا اجراءات الطلاق ومحدش فاهم حاجه.
_الملك فين؟
قالها شادي بتساؤل وهو بيبصلها .. قرب ليث منهم وهو بيتكلم :
_الملك نزل في قاعة التدريب الخاصه بيه !
حرك شادي راسه وهو بيسبهم وراح ناحية الملك .. اتكلم ليث مع ريحانه بابتسامه :
_ازيك يا ريحانه .
حركت ريحانه راسها بسلام من غير ما ترد وهي عينها معلقه وراهم .. بص ليث ووعد وراهم لقوا كارمن واقفه وهي كمان بتبص لـ ريحانه جامد .. كان اول حد يبعد عينه هي ريحانه وهي بتتكلم :
_اسفه بس انا ممكن افضل هنا لحد ما نقدر نلاقي الملكه .
_انتي بتسألي يا سمو الاميره؟؟ انتي ليكي في القصر زينا كلنا .
قالها ليث بعتاب فـ اتكلمت ريحانه ببسمه باهته :
_كان ليا يا سمو الامير دلوقتي بقي حق غيري !
مشيت من قصادهم وراحت ناحية قاعة التدريب الخاصه بالملك .. وقفت بصدمه وهي شايفه شادي ومراد رافعين سيفهم قصاد بعض وكل واحد بيبص للثاني بغضب وغيث مش موجود بينهم .. جريت عليهم بسررعه وهي بتتكلم برعب :
_شادي شادي انت بتعمل ايه نزل سيفك .
_امشي يا ريحانه .
قالها شادي وهو لسه باصص ناحية مراد اللي متحركش للحظه .. صرخت فيه :
_قولتلك نزل سيفك .. انتوا مش في حرب.
_هو اللي عمل الحرب ديه مش انا !
قالها شادي بغضب ومراد اتكلم بغضب مماثل :
_قولتلك ملكش دعوه بينا .
كانوا لسه هيتخانقوا تاني بس جيه سيف وقع سيوفهم هما الاثنين علي الارض وصاحبه بيتكلم :
_والله عال .. سبتوا ايه لعامة الشعب عشان يعملوه !
بصوا هما الاثنين علي عمر ونورسين اللي واقفين بيبصوا علي الموقف بغضب شديد .. اتكلمت نورسين بحده :
_بدل ما ترفعوا سيوفكم علي بعض روحوا ارفعوها في وش عدوكم .. مش هو ده اللي اتربيتوا عليه!
جريت كارمن عليهم بسرعه وهي بتقرب من مراد واتكلمت :
_مراد .. تعالي .
بصت ريحانه علي ايدها اللي ماسكه بيها دراع مراد ومراد بيبص علي ريحانه اللي مركزه علي ايد كارمن .. غمضت ريحانه عينها وبعدين قربت من شادي وهي بتمسك ايده وهو داس علي ايدها بعد ما هو كمان شاف كارمن ومراد .. اتكلم شادي باعتذار :
_بعتذر منك جلالتك .. اسف جلالة الملكه.
بص مراد لـ ريحانه لاخر مره وهي مبصتلوش وبعدين بص علي لـ عمر وهو بيتكلم :
_اسف يا جلالة الملك .. اسف جلالة الملكه .
شدته كارمن من قصادهم وهو مشي معها وريحانه بتبص عليهم بوجع شديد بس متكلمتش .. قرب منها عمر وهو بيتكلم بابتسامه :
_اهلا بيكي يا ريحانه .
قربت منه ريحانه وهي بتحضنه من غير كلام وهو حضنها بهدوء .. بعدت عنه وراحت حضنت نورسين اللي فضلت تحك ايدها علي ضهرها وهمستلها :
_كل حاجه هتكون تمام متقلقيش.
حركت ريحانه راسها بتفهم وبعدين مشيوا هما الاثنين لـ جوا القصر واتقابلوا مع ليث و وعد وراحوا كلهم ناحية غيث عشان يشوفوا هيعملوا ايه ...
دخلوا جوا وكان مراد قاعد وجمبه كارمن اللي لاحظوا انها قعدت بعيد عنه .. قعدوا كلهم قصاد غيث اللي ظهر عليه العجز فجأه واتكلم عمر :
_يعني انت معندكش فكره هي ممكن تكون راحت فين يا غيث؟
حرك غيث راسه بنفي وهو بيتكلم :
_بعت الجنود لـ مملكه الفرس ومكنتش هناك .. بعتهم علي الكوخ بتاعنا ومكنتش هناك .. حتي بعتهم علي مملكتك ومكنتش هناك .. معرفش راحت فين .
_هنلاقيها يا مولاي .. اكيد الملكه محصلهاش حاجه.
_انا واثق في كده والا مكنش زماني قاعد في مكاني .. عشق مش سهل حد يقدر يأسرها .
قالها غيث بثقه وهو باصص ناحية ريحانه اللي اتكلمت .. اتكلمت نورسين :
_وانا كمان واثقه من كده عشان كده مش خايفه عليها .
سكتوا كلهم ومحدش عنده حاجه يقولوها .. حتي عمر اللي كان عايز يعاتب غيث مقدرش من هيئته اللي هو عليها ..بص مراد ناحية ريحانه اللي كانت بتبصله هي كمان واتقابلت عينهم في نظره صامته بس اعظم من اي حديث وكانت عين وعد وكارمن متابعينهم اوي وكل واحد فيهم جواه ميت سؤال !
.........................
بعد مرور شهر ...
دخل الجندي بسرعه وهو بيقطع المجلس الخاص بغيث واسرته واتكلم :
_باعتذر منك سموك .. بس فيه حاجه مهمه انت لازم تعرفها .
بصله غيث باستغراب وهو بيتكلم :
_فيه ايه؟
_الجنود لقوا الملكه عشق كانت في احدي القوافل اللي معديه وقدروا يمسكوها قبل ما تهرب منهم .
وقف كل اللي ف المجلس واولهم غيث اللي بيبص عليه بصدمه من ان عشق ظهرت تاني .. طلعوا كلهم برا ولقوا عشق واقفه لابسه .. زي الجواري!
رفعت عشق راسها ليهم وهي بتبصلهم كلهم واتكلمت بهدوء :
_عرفت انكم عايزني جيت .
بصلها غيث جامد وهو بيقرب منها .. فهم من كلامها انها جت بمزاجها وده اللي هو كان عارفه .. عشق لو مكنتش عايزه تظهر مش هتظهر .. جريت نورسين عليها هي ووعد وريحانه وهما بيتكلموا بفرحه :
_مولاتي .
ابتسمتلهم عشق بهدوء بس قبل ما حد يحضنها رجعت ورا وهي بتتكلم :
_اسفه بس لا .
بصوا ليها بصدمه من رفضها اللي واضح .. قرب ليث منها وهو بيتكلم :
_جلالة الملكه .. افتقدتك جدا والمملكه كلها افتقدتك .
_معتقدش ان المملكه افتقدتني انا في النهاية مجرد ملكه مشيت واكيد هيجي غيرها .. بس انا كمان افتقدتكم يا ليث.
_اختفيتي ليه يا مولاتي؟
قالها عمر وهو بيبص ليها فـ اتكلمت عشق بتروٍ :
_انا مختفتش .. انا دايما كنت موجوده حواليكم!
بصلها مراد جامد وقبل ما هي تتكلم اتكلم هو :
_حمدلله علي السلامه يا جلالة الملكه .. عن اذنكم .
سابهم ومشي من قصادهم وكارمن بصت لـ عشق اللي فهمت نظراتها وغمضت عينها وبعدها مشيت كارمن .. اتكلمت نورسن بغيظ من كارمن :
_شايفين مكلفتش نفسها حتي انها تسلم علي رجوع عشق.
_رجعتي ليه يا عشق؟
قالها غيث وهو بيبص عليها .. استغرب الكل من سؤال غيث الغريب قربت منه عشق وهي بتبصله :
_عشان مصلحتنا .. ومصلحة الممالك.
_وعشان مصلحة الممالك بقيتي جاريه.
رفعت عشق حاجبها من بنرته الساخره اللي بيتكلم بيها واتكلمت هي بنفس نبرته :
_اهو تغيير يا مولاي الملك.. اصلي مش بمشي غير بدماغي .
قربت منه اكتر وهي بتتكلم بصوت مسمعهوش غيره :
_مراد .. في خطر!
بصلها غيث بصدمه من كلامها وهي رجعت ورا تاني وراحت ناحية شادي اللي كان واقف بعيد واتكلمت:
_ايه يا سمو الامير مش هتسلم عليا انت كمان .
_بحاول استوعب وجودك لسه يا مولاتي وانك ظهرتي.
ضحكت عشق وبعدين سابتهم كلهم وراحت ورا مراد وكارمن ووعد اتكلمت بدهشه :
_الملكه فيها حاجه غلط.
_ديه مش الملكه.
قالها ليث وهو بيبص عليها وهي ماشيه بلبسها الغجري ده وطريقة مشيتها الغريبه .. وقف الكل للحظه وهما بيسمعوا صوت كارمن العالي باسم مراد ومفتكرش غيث غير كلمةعشق مراد في خطر ...
بعد ما مراد مشي مشيت وراه كارمن ع طول وكانت واقفه تبصله من بعيد اتكلم هو :
_عايزه تقولي ايه يا كارمن ؟
قربت كارمن منه وهي بتتكلم :
_ليه موقفتش سلمت عليها زيهم .
_معتقدش اني هفرق معها زي ماانا مفرقتش معها قبل كده.
_انت لسه مشيلها الذنب في انها خليتك ترتبط بيا من تاني.
قالتها كارمن بفضول وهي بتبصله .. ثبت مراد عن اللي بيعملوه وافتكر لما عشق طلبت انها تشوفه
***دخل مراد جناح عشق لاقها واقفه بتبص علي الباب واول ما شافته ابتسمت بهدوء .. اتكلم مراد بابتسامه :
_خير يا ماما .. طلبتيني ليه؟
_ اعتقد انت عارف ان عشان سلامة الجميع لازم نضحي مش كده.
بصلها مراد بعدم فهم من كلامها  فهي كملت :
_ممكن تضحي عشان اتحاد الممالك يا مراد؟
_تقصدي ايه بكلامك يا جلالة الملكه .. اكيد مستعد اضحي .
_حتي لو كانت التضحيه هي ريحانه!
قالتها عشق وهي بتبصله بفحص .. ظهر علي ملامح مراد الصدمه من كلامها :
_ريحانه!
حركت عشق راسها بالإيجاب وبدأت تشرحله :
_انت شايف الحالات اللي بتزيد في قتل الاطفال .. واللي بيعمل كده مستهدف الممالك التلاته الفرس والفوارس والنصر .. الممالك بتاعتنا .. عايز يضعف اتحادهم ويفرقهم خالص لأن باللي بيعمله ده بيثبت ان الوحده ديه مش هتعمل حاجه واننا اضعف من اننا نحارب اللي بيحصل ده.
_وايه علاقه ده بريحانه يا مولاتي؟
قالها مراد بحيره .. اتكلمت عشق بنبره بطيئه وهي بتراقب ملامح مراد اوي :
_كارمن الوحيده اللي هتقدر تساعدنا في كده لانها تعرف حد من اتباع القاتل .. لازم كارمن تبقي قدام عنينا يا مراد .. وعشان تبقي قدام عنينا لازم انك .. تتجوزها !
جحظت عين مراد وهو مش راضي يستوعب اللي هي بتقوله .. اتكلم بتوهان :
_ليه لازم اتجوزها .. ليه متقعدش في القصر عادي؟
_لأن لازم كارمن تكون معاك 24 ساعة ومش هتعرف تبقي معها وهي مش مراتك لأن في الاول والاخر هي اميره يا مراد مش جاريه.
_ريحانه هتكرهني!
قالها مراد بتقرير وهو بيبصلها .. داست عشق علي ايدها وهي بتتكلم :
_قولتلك انك لازم تضحي يا مراد .. بس اللي بيحب مش بيكره .. قولت ايه يا مراد .. احنا لازم نقضي علي الشر ده كله.
_جلالة الملك عارف؟
قالها بتساؤل وهو مركز معها فـ اتكلمت عشق ببرود مصطنع بس محدش يقدر يكشفه ابداً :
_مش عارف .. بس هيعرف .. القرار في ايدك يا مراد .. هتحمي وحده الممالك ولا هتبعد نفسك !
غمض عينيه وهو بيتخيل ردة فعل ريحانه علي اللي هيحصل هي استحاله تقبل بده ابداً .. او علي الاقل مش هتقبل بكارمن ! ساب عشق وطلع برا الجناح كله وعشق مرقباه بعينها وهي بتتكلم بأسف :
_اسفه يا مراد .. كل ده عشان حمايتك انت .. عشان احميلك ريحانتك! ***
افتكر مراد لما راحلها تاني يوم ووافق علي اللي هي قالته بس كان شرطه ان لو ريحانه بعدت عنه هو كمان هيبعد عنها وهي قبلت ده .. افتكر اول ما شاف كارمن كانت ضعيفه وكأن كل اللي حصل ده دمرها مش هي دي كارمن اللي كان متجوزها في يوم ابداً ...
اتكلمت كارمن وهي عارفه هو بيفكر في ايه :
_مراد .. انا عارفه ان كل اللي حصل ده صعب عليك  بس ده كان لمصلحتك ومصلحة الممالك ومصلحة ريحانتك يا مراد .. انت شايف انك ضحيت بس محدش ضحي زي الملكه .. وكمان انا والله اتغيرت .. مبقتش زي الاول .. الملكه كانت دايما معايا من غير  ما تعرفوا لحد ما غيرتني علي ايدها .. وكمان انا عندي ليك خبر حلو .. انا عرفت مين اللي ورا اللي بيحصل ده !
اتجاهل مراد كل حاجه هي قالتها واتكلم بسرعه :
_مين اللي ورا كل ده يا كارمن ؟
_اللي وراه اسمه ...
سكتت كارمن فجأه وهي بتبص بعيد .. شايفه واحد واقف وماسك في ايده سهم .. جحظت عينها برعب وهي شايفاه موجهه علي مراد ومراد بيبصلها بعدم فهم ..جريت كارمن عليه وهي بتصرخ بصوتها كله :
_ مـــــــــــــراد!
وقفت قدامه بسرعه وقبل ما هو ياخد رد فعل كان السهم دخل في قلبها وهي اتصلبت قصاده .. بصلها مراد بصدمه من اللي حصل وهي وقعت علي الارض بس قبل ما تلمس الارض كانت ايده شالتها وهو بيبصلها بصدمه وحرك راسه وبيهمس : لا لا
رفع راسه وهو بيبص علي المكان اللي انضرب منه السهم .. شاف الشخص الملثم اللي واقف فوق القصر وعينه باين عليها الغضب .. بصله بغضب كافي انه يقتله ونزلها علي الارض ببطء وقف ومن غير ما يتحرك حدف سيفه بدقه وفعلا كان دخل في قلب الراجل اللي ملحقش حتي يهرب ووقع الارض قصادهم كلهم ...
نزل مراد تاني لـ كارمن وهو بيشيل راسها بين ايديه والكل اتجمع حواليهم باصين للمشهد بصدمه ومحدش مستوعب ايه اللي حصل .. جري ليث وعمر ناحيه الراجل اللي وقع علي الارض لو مكنش سيف مراد قتله فـ وقوعه من فوق القصر كان كافي انه يقتله ...
قربت منهم عشق اول واحده وهي بتبص لـ كارمن بألم .. صرخت عشق في الجنود اللي اتجمعوا بحده :
_جيبوا الحكيم فــــــوراً
قربت ريحانه منهم وهي بتبص علي مراد اللي بيبص علي كارمن بخوف اتكلم مراد بحنيه :
_متقلقيش هتعيشي مش هتموتي بالطريقه ديه.
عيطت كارمن بين ايديه وهي بتبص عليه وعلي ريحانه اللي واقفه جمبه واتكلمت بصوت متقطع :
_انا مش .. هعيش يا مراد .. اسفه اني سببتلك كل اللي حصل ده .. وبعدتك عنها .. سامحني .. متنسنيش يا مراد ارجوك .. انا برغم كل ده .. انا حبيتك .. متنسنيش!
حرك مراد راسه برفض لكلامها وهو بيحارب نفسه انه ميضعفش قصاد الموجودين وصرخ فيهم :
فيــــــــن الحكيـــــــــم ؟؟
بصتله لاخر مره وبعدين وقعت ايدها جنبها وجسمها تقل علي ايده .. بصلها مراد بصدمه ماتت .. ماتت بسببه  .. هي حمته بروحها وماتت هي .. بالسرعه دي ماتت .. حركها جامد ف ايده وهو بيصرخ :
_لا يا كارمن مش هتموتي بسببي لاا .. مش هتعيشيني بذنبك طول الحياه لااا .. قومي قومي لسه الرحلة بتاعتا مخلصتش قومي!
سكت  وهو بيبصلها وهي مغمضه عينها وكأنه بدأ يفوق من الصدمه اللي كان فيها .. هي فعلا ماتت .. قربت عشق منه وهي بتحط ايدها علي دراعها بعطف بس هو نفضها بسرعه ورفع راسه واتكلم بغضب :
_ابعدي عني .. انتي سبب كل ده ابعدي !
بعدت عشق عنه بسرعه وهي بتبصله جامد بألم خفي .. اتكلمت عشق بلامبالاه مصطنعه:
_هي ماتت يا مراد خلاص.
حطها مراد علي الارض ووقف قصاد عشق وهو بيتكلم بحده :
_انتي ايه .. انتي مين اصلا ؟ بتتكلمي ببرود كده ازاي؟ 
_مراد اهدي.
قالها ليث فـ اتكلم مراد وهو مش حاسس باللي بيقوله :
_لا .. انا مش  هفضل هادي .. انتي بس وجودك في حياتي عشان يخربها .. في  الاول جوزتيني منها وطلعت ابشع واحده دخلتيها في حياتي .. بعدين دخلت ي في حياتي ريحانه وانتي قاصده ده .. بعدين رجعتي دخلتي كارمن في حياتي تاني .. قولتلك هخسر ريحانه قولتيلي اهم حاجه مصلحة الممالك ولازم التضحيه .
بصت رحيانه لـ عشق بصدمه والكل بصلها بدهشه من كلام مراد ماعدا غيث اللي عرف ان عشق خسرت الكل في اللحظه ديه واولهم مراد!
كمل مراد بنفس النبره الغضبانه :
_خلتيني رجعت تاني اتجوزها عشان بس مصلحتك انتي .. انتي بس بتلعبي بحياتي من ساعة ما اتولدت .. اهتمي بنفسك شويه بعيد عني بقي .. انا للحظه اتمنيت لو انتي اللي مكانها دلوقتي كانت حياتي هتتغير.
كل حاجه كانت بتجرح في قلب عشق الا اخر جمله ديه اللي قتلتها .. ابنها اتمني موتها قصادها .. شهق الكل من كلام مراد تكلم غيث بصوت عالي :
_مراد انت نسيت نفسك  ولا ايه؟
قرب منه ليث وهو بيتكلم بحده مع مراد :
_كل ده عشان كارمن ؟!!
قربت منه عشق بخطوات بطيئه وهي بترفع الخنجر اللي كانت شايلاه معها وقربت من مراد ومسكت ايده وهي بتحط فيها الخنجر واتكلمت بصوت ميت :
_مينفعش يبقي نفسك في حاجه يا سمو الامير .. اخلص مني!
بص مراد لـ الخنجر اللي في ايده وبعدين بص لـ عشق اللي عينها بلون الدم وفي اللحظه دي بس استوعب هو قال ايه كويس اوي .. لأول مره تنزل دموع عشق قصاد حد غير غيث وهي بتتكلم :
_مالك يا سمو الامير .. معاك كامل الحق انك تعمل كده.
_عشق.
قالها غيث بصدمه من هيئتها اول مره يشوفها ضعيفه بالشكل ده .. اول مره تظهر ضعفها قصاد حد .. رفعت هي الخنجر وحطته علي قلبها وهي بتتكلم :
_انا في حياتي ما اتحكمت في حياتك يا مراد .. انا بس يمكن طريقتي كانت غلط .. بس انا دايما كنت خايفه عليك .. وانا مجوزتكش كارمن اول مره .. انت اللي اتجوزتها عشان نعمل صلح مع مملكتها .. انا بالرغم من كل حاجه غلط انت بتعملها كنت بدعمك .. انت واخوك  .. وانا مدخلتش ريحانه حياتك .. انت اللي دخلتها برغبتك انت ريحانه كانت جايه لمهمه معينه وانت اللي حبيتها مش انا اللي اجبرتك .. الحاجه الوحيده اللي انا فعلا اتدخلت فيها هي ارتباطك من كارمن المره ديه واللي محصلش .. الشيخ مكنش شيخ حقيقي لاني عارفه قد ايه انت بتحب ريحانه ومش هتقدر تخلي حد تاني  ياخد اسمك غيرها وكارمن كانت عارفه ده انت بس اللي مكنتش عارف وكنت هقولك اول ما كل حاجه تخلص .
سكتت وهي بتبص علي الارض وايدها بدأت تترعش وبعدين بصت لـ غيث وهي بتتكلم بنبره مفهماش غيره :
_انا فعلا فشلت اني اكون ام زي ما فشلت اني اكون ملكه يا جلالة الملك.
كان الكل بيراقب اللي بيحصل بوجع .. اتكلم مراد بندم شديد :
_انا .. انا اسف .
ضحكت وسط دموعها وهي بتمسحهم واتكلمت :
_صدقني ملوش داعي .. انت بس اثبتلي ان في حد كان معاه وجهة نظر في يوم وانا فعلا اللي كنت غلط .. اسفه اني مكنتش ام مثاليه.
حرك مراد راسه بنفي من كلامها قربت منها نورسين بس عشق سابتهم ومشيت بعيد عنهم كلهم وهي بتبدأ تعيط من جديد .. قرب عمر من مراد وهو بيتكلم بغيظ منه :
_انا دلوقتي مش عايز حاجه غير اني اضربك بالقلم يمكن تفوق .. عشق اللي انت بتتمني موتها ديه عملت اللي لو انت عيشت سنين عشان تعمله مش هتعرف .. عشق حميتك انت اكتر من مره .. انت دايما كنت اقرب من ليث لـ عشق بس ازاي انت تاخد بالك من حاجه زي ديه .. انت اللي متستحقش انها تكون امك يا مراد يا خساره تعبها عليك انت .
وسابه ومشي من قصاده ولحقت بيه نورسين اللي بصت لـ مراد بعتاب شديد ومشي معاهم شادي .. بص مراد ناحية غيث واتكلم :
_بابا انا ...
_بالرغم من كل غلطات عشق هي كانت دايما بتكمل بسبب حاجه واحده وجودك انت واخوك جمبها .. عارف ان عشق غلطت في اللي عملته بس هي عملته عشانك انت .. لا عشان الممالك ولا عشان شئ .. اللي بيعمل الفوضي ديه بيعملها بهدف واحد يشوه صورتك انت يا سمو الامير انت وريحانه .. وده الحاجه اللي عشق قدرت انك متعرفهاش .. دايما الحالات اللي بتحصل ديه بيقولوا من ورا الامير مراد ومراته الثورجيه لأنها في الاول كانت محاربه قبل ما تبقي اميره .. عشان كده عشق اخترتك انت عشان تنهي علي كل ده مع ان كان في ايدها انها متدخلش حد منكم .. طريقتها كانت غلط وده الحاجه اللي انا عارفه بس هي مكنتش عايزه حاجه غير حمايتك انت من ايد اللي عايزين يخلصوا عليك!
غمض مراد عيننه بألم وهو بيكتشف كم الغلطات اللي عملاها في حق عشق دلوقتي .. بص عليهم كلهم وبعدين جري من نفس المكان اللي مشيت منه عشق وغيث بص لـ ليث وقرب منه وحضنه واتكلم :
_صدقني عشق بتحبك زي مراد بالرغم من كل اللي احنا قولناه ده .
اتكلم ليث بثقه وهدوء :
_وانا واثق من كده .. لأن امي هي افضل ام في الدنيا حتي لو بتبين انها عكس كده .. استحاله حاجه زي ديه تخليني افكر بطريقة تانيه انا كنت هخسرها مره بسبب تفكير غبي ولو مكناش قدرنا نلحقها كنت هفضل طول عمري عايش بذنب اني مقولتلهاش اني بحبها وان اخر حاجه سمعتها مني اني بكرهها .
افتكر غيث  لما عشق اتسممت وحالة ليث ساعتها وهو بيتمني انها تفوق .. بص لابنه وحضنه جامد كل مره بيكتشف ان ليث مختلف عنهم كلهم بالرغم من جنانه الا انه اعقل واحد فيهم .. مشيوا هما الاثنين ورا مراد وعشق وهما خايفين من اللي جي وريحانه ووعد بيصوا علي الموقف ومحدش عنده حاجه يقولها محدش عارف يواسي علي التاني كل اللي عارفينه انهم باصين لـ جثه كارمن اللي غيرت كل حاجه حتي وهي ميته!
..........................................
..... يتبع
#Nemo