لعنات العشق "الجزء الرابع من سلسلة العشق"

الفصل الأخير " الجزء الثاني"

نوفيلا
لعنات العشق
الحلقه الخامسه والاخيره "الجزء الثاني "
.........................
طلع الاخين برا وفضل غيث جمب عشق .. بصتله عشق واتكلمت بصوت هادي  :
_غيث!
بصلها غيث بسرعه وهو منتظر انها تقوله انها سامحته لكنها اتكلمت بنبره بارده :
_اتفضل اطلع لاني مش عايزه اقعد معاك في مكان واحد!
بصلها غيث بدهشه وهو بيتكلم :
_نعم؟
_زي ما سمعت يا جلالة الملك انا مش هسامحك بسهوله .. مش عشق اللي بتسامح بالسهولة ديه يا جلالة الملك انت اتعمدت تكسر عشق وكسرتها .
قالتها بنبره جامده وهي بتبصله اتكلم بتبرير :
_انا مقصدتش اكسرك ولا مره يا عشق!
_بس عملتها .. حتي لو مقصدتش انت عملتها يا جلالة الملك وكسرتني  قصاد نفسي.. وده مش هقدر اسامحك عليه بالسهوله اللي انت متوقعها مني فـ اتفضل اخرج.
قالتها بجمود شديد ومن نظراتها عرف غيث انها مش هتتراجع عن اللي في دماغها ابداً .. طلع برا واول ما طلع لقي عمر واقف جمب الباب واول ما شافه اتكلم بشماته :
_بقالي ساعه واقف مستني طلعتك البهية وعشق تطردك.
بصله غيث بغيظ شديد وللحظه نسي انه ملك وله وزنه وجري ورا عمر اللي كان بدأ يجري بالفعل وبيضحك واتكلم غيث بغيظ شديد :
_والله لاندمك يا عمر والله!
..........................................................
دخل مراد الاوضه اللي فيها ريحانه وهو بيبص جوا بفضول عشان يشوفها .. وقفت ريحانه بسرعه من فوق السرير اول ما شافته واتكلمت بهدوء :
_امير مراد .. خير؟
_عايز اتكلم معاكي يا ريحانه!
قالها مراد بهدوء وهو بيبص ليها .. اتكلمت ريحانه هي متحفظه بنفس نبرة الهدوء :
_اتفضل .
_ايه ده بالسرعه ديه؟
قالها مراد بدهشه مقدرش يمنعها .. بصتله ريحانه بعدم فهم فـ اتكلم بتوضيح :
_اصل انا افتكرت انك هتمنعي وانا هقعد اطلب بس متوقعتش انك هتوافقي .
رفعت حاجبها وبعدين راحت قعدت علي الكرسي وهو دخل وراها وقعد قصادها علي الكرسي وبدأ يتكلم :
_اولاً انتي لسه مراتي!
_عارفه
قالتها بهدوء مستفز بالنسباله فـ اتكلم بدهشه :
_عارفه؟
حركت راسها بإيجاب وهي بتتكلم بشرح :
_لانك مطلفتنيش رسميا عند الشيخ مجرد كلمه قولتها وكان ممكن تتراجع فيها وانا واثقه انك اتراجعت .
سكت وهو مش عارف يقول ايه بس اتكلم في تساؤل :
_ليه كنتي واثقه اوي اني هتراجع؟
قامت من مكانها وهي بتروح ناحيته ومالت عليه وهي بتبص في عينه واتكلمت بصوت واثق :
_لانك بتحبني يا سمو الامير.
شافت تأثير كلامها عليه بأنه فضل ساكت مش عارف يرد من قربها هي عارفه انها اكتر واحده بتأثر في مراد .. بعدت عنها بابتسامه انتصار بأنها لسه بتأثر فيه ورجعت علي كرسيها تاني واتكلمت :
_كمل سمعاك
فاق علي صوتها وبدأ يكمل كلامه وهو حاسس ان في حاجه غلط :
_اسف اني وجعت قلبك .. بس انا .. انا متجوزتش كارمن وكمان مكنتش بخليها تقرب مني مسمحتلهاش اصلا .. مكنتش عايز اطلقك وزي ما قولتي لاني بحبك مقدرش اسيبك يا ريحانه .. انا رجعتك في وقتها اصلا .. سامحيني علي اللي عملته بس كان كله عشان خاطر نقضي علي الفتن اللي كانت بتدور في المملكه والاكتر انه بقي باسمي انا فـ كان لازم نقضي عليهم .
كان ملاحظ ملامحها الثابته الهاديه اللي متغيرتش .. اتكلم بشك :
_انتي كنتي عارفه صح؟
ابتسمت ريحانه بهدوء اللي  خلاه يتأكد من انها عارفه وهمس باسم امه بغيظ شديد وهي دايما بتسبق الاحداث .. اتكلم مراد من جديد وهو عارف  ان اللي جاي بالطريقة ديه اصعب :
_وردك ايه يا ريحانه ؟
اتنفست ريحانه بهدوء شديد وهي قاصده توتر اعصابه وقامت وقفت وبدأت تتكلم :
_ردي علي ايه بالظبط يا مراد ؟ علي انك فضلت انك توجع قلبي مقابل المملكه حتي مفكرتش انك تقولي .. ولا انك قولت بكل جبروت ان كارمن مراتك وانت باصص في عيوني يا مراد .. ولا علي انك دخلتها الجناح الخاص بينا مع انك كان ممكن تشوف ليها مكان تاني .. ولا علي انك قبلت حتي انك تطلقني حتي  لو عشان تسكتني يا مراد وكأنك بتقولي اني ولا حاجه .. ولا علي أنك سبتني امشي وانا قلبي واجعني ومهنش عليك تيجي ورايا .. ارد علي ايه بالظبط يا مراد؟
خلصت كلامها بألم متنكرش ان عشق قالت ليها علي كل حاجه بس المواجهة معاه اصعب بكتير اوي .. وقف مراد وكان هيتكلم بس هي اتكلمت :
_عارف انا فعلا عرفت من الملكه عشق كل حاجه بس بعد ما اتوجعت .. فـ اليوم اللي الكل كان بيدور عليها فيه هي جاتلي انا وحكتلي كل حاجه .. بعد ما قلبي اتكسر بسببك ميت حته يا مراد .. كان هيحصل ايه لو انت اللي حكتلي علي الاقل مكنتش اتوجعت اوي كده .. وبتقولي بكل بساطه اسف اني وجعت قلبك .. لا يا سمو الامير انا مش متقبله اسفك ابداً علي الاقل مش دلوقتي.
سكتت وهي بتلف وشها بعيد عنه وهي بتحارب نفسها انها متعيطش بس مقدرتش ودموعها بدأت تنزل .. قرب منها وهو بيحط ايده علي دراعها واتكلم بندم :
_ريحانه!
_ارجوك امشي يا سمو الامير لو سمحت .
قالتها بصوت خافت وهو باصص ليها واتكلم بنبره اسفه:
_انا اسف.
_امشي لو سمحت.
قالتها ودموعها بدأت تنزل اكتر اللي خلاه يبعد عنها بسرعه .. للدرجه ديه هي مش عايزه وجوده .. مشي من المكان بسرعه وهو عارف ان اللي جاي مش هيبقي سهل ابداً وان ريحانه مش هتتنازل بسهوله ابداً .. اول ما مشي هي لفت مكان مهو مشي ومسحت دموعها بهدوء شديد وارتسمت ابتسامه علي شفايفها وهي بتتكلم :
_والله لاندمك يا مراد .
وطلعت من الاوضه بتاعها وراحت ناحية اوضة عشق وهي عايزه تقعد مها وتطمن عليها لأنها نسيت تسأل مراد قبل ما يمشي .
........................................
دخل عمر الجناح عند نورسين وهو بيضحك وهي شافته اتكلمت باستغراب ممزوج بابتسامه علي هيئته :
_في ايه؟
_غيث حاليا لا طايقني ولا طايق المملكة باللي فيها.
قالها عمر بشماته في غيث ونور بتبص عليه ولاحظت انه بينهج فـ اتكلمت بدهشه :
_عمر .. انت كنت بتجري؟؟
ضحك عمر تاني وهو بيفتكر شكل غيث لم استوعب انه بيجري  في نص القصر قصاد الخدم والحرس ووقف مصدوم من اللي بيحصل وعمر بيضحك علي شكله واول ما شاف عمر نسي كل حاجه تاني وجري وراه من جديد لحد ما هو كمان فضل يضحك مع عمروبعدين اختفي عمر من قصاده وراح لـ نورسين دلوقتي...
_اديني خليت غيث  عمل شوية رياضه !
قالها عمر باستفزاز شديد فـ اتكلمت نورسين بعدم استيعاب للي بيقوله عمر :
_رياضه ده بجد .. حرام عليك يا عمر دول راجعين من حرب وملحقش يرتاح حتي .
بص ليها عمر بعدم اهتمام وبعدين قرب منها واتكلم بهدوء شديد :
_بصي بعيد عن اي حاجه .. بس انا مبسوط ان كل الحاجات ديه خلصت وان الامور هترجع طبيعيه زي الاول وقدروا انهم ينهوا علي الحرب ديه كله .. اينعم انا متأكد ان عشق وريحانه هيجننوا غيث و مراد بس بردو يستحقوا .
حركت نورسين راسها بمعني مفيش فايده في عمر بس اتكلمت بارتياح :
_اهم حاجه انهم يرجعوا لـ بعض .. انت متعرفش انا متضايقه عشانهم ازاي وكل واحد فيهم بعيد عن التاني .
_هيرجعوا لـ بعض متقلقيش .. وحشتيني يا نوري .
ابتسمتله نورسين بخجل من كلامه وهو ضحك بقلة حيلة بعد العمر ده كله ولسه بتتكسف منه! اتكلمت نورسين فجأه :
_ثانيه ثانيه معني ذلك ان غيث اتطرد من عشق انها لوحدها وممكن تحتاج حاجه .. انا هروح لها .
وسابته ومشيت بسرعه من قصاده وهو بيبص عليها بزهول وتمتم بغيظ شديد :
_يعني حتي وانتي تعبانه يا عشق داخله في حياتي ده ايه الظلم ده!!
اتنفس جامد وهو بيتوعد لـ نورسين بس لما عشق تخف او لا قبل ما تخف عشان متستقواش عليه!
.......................................
دخل ليث الجناح الخاص بيه وهو بيبص علي وعد اللي واقفه جمب الشباك وماسكه في ايدها السهم والقوس في الايد التانيه وبتبص علي نقطه معينه وفجأه رمت السهم وهي لسه بتبص هناك .. قرب منها ليث وهو بيبص في نفس المكان اللي هي واقفه فيه لقها كانت مركزه علي شجره بعيده وقدرت تجيبها ...
بص ناحيتها بإعجاب شديد وهو بيتكلم :
_مكنتش اعرف انك اتطورتي اوي كده!
_مكنتش فاضي يا ليث .
قالتها بتوضيح بنبره هاديه جدا .. بص ليها ليث باستغراب من نبرتها وهو بيتكلم :
_مالك يا وعد ؟
بصتله وعد بابتسامه باهته من غير ما تتكلم وده عصبه اكتر واتكلم :
_واضح ان مضايقك اوي .. مالك؟
_انت مكنتش مهتم بيا يا ليث!
قالتها وعد بعتاب وهي بتبصله ف اتكلم بدهشه :
_افندم؟ ديه مشكلتك معايا؟ اني مكنتش مهتم بيكي ؟
ابتسمت وعد من تاني وهي لسه بتبصله :
_صح ديه مش مشكله .. كأني مقولتش حاجه.
_وعد انا مبحبش طريقة الكلام ديه .. ههتم بيكي امتي في عز كل حاجه حصلت ها ؟
قالها ليث باندفاع وهو بيبصلها فـ اتكلمت هي باتهام :
_في وسط كل حاجه انت نستني انا .. اهتميت بكل حاجه حوالينا ونستني انا يا ليث .. وكأني مش موجوده .. انت اديت لكل حاجه حقها وجيت عندي انا ونستني وكأني ولا شئ .
_انا عارف انك هتقدري ده.
قالها بتبرير فـ اتكلمت هي بضيق  :
_ديه المشكله .. انك انت اقنعت نفسك باللي انت عايز تقنعها .. هاجي عليها وهي هتتحمل وهتقدر .. بعد ما كنت معيشها انها اولي اهتماماتي مش حتي خلتني في اخر اهتماماتك ده انت محتني خالص من الخانه ديه يا ليث.
_انتي عايزه تتخانقي معايا يا وعد .. انا مش قادر اتخانق .. وع العموم يا وعد انا اسف .
قالها ليث بإيجاز وهو بيبص عليها بملل لاحظته هي بسهوله اللي خلاها تبعد عنه وتطلع من الجناح كله وهو بيبص عليها بنفاذ صبر وبص علي القوس اللي كانت ماسكاه ورماه جامد في الارض بغضب من اللي حصل !
...............................
_يعني انتوا الاثنين جايين ليا انا !!
قالتها عشق بزهول وهي بتبص علي ريحانه ونورسين اللي قاعدين قصادها بابتسامه بلهاء .. وقبل ما حد يرد دخلت وعد واتكلمت عشق بنبره ساخره :
_اهلا تعالي كانوا مفتقدينك.
قعدت وعد معاهم بوجوم وهم بصوا ليها باستغراب واتكلمت ريحانه باستفسار :
_مالك يا وعد؟
_اتخنقت مع ليث.
غمضت عشق عينها بتعب من اللي حواليها دول .. اتكلمت نورسين بصدمه :
_اتخانقتي معاه ليه؟ ضايقتيه في ايه؟
_انا اللي ضايقته!
قالتها وعد بصدمه من كلام نورسين فـ حركت نورسين راسها بإيجاب واتكلمت :
_ايوه اكيد انتي اللي ضايقتيه لانه ولا مره زعلك.
_هو انتي معايا ولا معاه؟
_معاه طبعاً لاني عارفه بنتي!
_شايفه يا عشق!!
قالتها وعد بغضب من نورسين اللي واقفه في صف ليث .. بصت ليها عشق جامد وبعدين ارتسمت علي وشها ابتسامه نورسين عرفتها كويس واتكلمت :
_انتي زعلانه من ليث مش كده؟
حركت وعد راسها باستغراب .. بصت عشق لـ ريحانه واتكلمت :
_وانتي عايزه تربي مراد صح؟
حركت ريحانه راسها وهي بتبص لـ وعد بعدم فهم .. كملت عشق هي بتبص لـ نورسين :
_والاثنين ولادي اصلا مش كده!
_ناويه علي ايه يا عشق؟؟
اتسعت ابتسامة عشق وبدأت تقولهم علي خطتها بما انها هي  كمان متخانقه مع غيث .. اتكلمت ريحانه ووعد بابتسامه شر :
_احنا موافقين!
بص الكل علي نورسين اللي اتكلمت بتردد :
_طب انتوا متخانقين انا مش متخانقه مع عمر!
برق الكل ليها وهم شايفينها عايزه تطلع بعيد عنهم .. اتكلمت نورسين بسرعه :
_خلاص .. انا معاكم !
هللت وعد وريحانه بفرحه وعشق همست بصوت مش واصل ليهم:
_اهلا بيكم في ارض عشق!
...........................................
بعد مرور اسبوعين ...
كان غيث وعمر ومراد قاعدين مع بعض وكان عمر ومراد باصين لـ غيث بغيظ شديد متغيرش من اسبوعين .. اتكلم غيث بزهق من نظراتهم :
_بطلوا تبصوا ليا كده وانا كان مالي ماانا زيي زيكم!
اتكلم عمر بغيظ شديد وهو بيشاور علي نفسه :
_انا بعد العمر ده كله .. انا جلالة الملك عمر اللي بيترعب منه الناس اقابل ملكتي في السر انا .. انا مش عارف  اقرب من مراتي بسبب مراتك .. ده انا روحت المملكه ورجعت وهي لسه مفكتش الحصار .
_هي متخانقه معاك انت يا جلالة الملك ذنبنا ايه كلنا؟
قالها مراد بضيق وهو بيبص علي غيث اللي بيبص عليهم بدهشه واتكلم :
_دلوقتي بقيت انا السبب .. علي اساس ان انا مش عارف اقرب من عشق بسبب اللي قاعدين معها دول ؟؟ وبعدين ما كل واحد يروح ياخد مراته انا مالي!
_يا سلام علي اساس انك مش عارفها .. لو كان الامر سهل كده كنت انت خدتها وريحتنا كلنا .
قالها عمر بسخريه وهو بيبص عليه وسكت الكل لان عمر معاه حق عشق  فعلا مش سهله ..اتكلم مراد بصوت هادي  :
_هو ليث مش ناوي يرجع القصر بقيت نادر لما بشوفه هنا .
_هو حابب كونه اليس حاليا بما انه مش عارف يوصل لـ وعد.
قالها غيث بهدوء وهو بيبص لـ مراد ورجع الكل سكت تاني وهم بيفكروا هيخلصوا من كل ده ازاي والاجابه متمثله في شئ واحد "عشق"!
....................................
_يا عشق هو الحصار ده مش هيتفك بقي .
قالتها نورسين بملل شديد وهي بتبص لـ عشق اللي بتاكل قصادها بهدوء شديد .. اتكلمت وعد هي كمان :
_بصراحه يا مولاتي .. انا اشتقت لـ ليث وبعدين هو مبقاش يقعد في القصر.
بصت عشق ناحية ريحانه واتكلمت بنبره جامده :
_وانتي يا ريحانه موحشكيش مراد؟
بصت ليها ريحانه واتكلمت بهدوء :
_هو الصراحه وحشني .. بس مستنيه الامر منك .
_عايزين ترجعوا يعني!
_ياريت جداً
قالتها نورسين بسرعه علي كلام عشق اللي خلا عشق تبص ليها جامد فـ سكتت .. نقلت عشق الانظار بينهم هما الثلاثه وبعدين اتكلمت بابتسامه :
_هم كده خدوا وقتهم جداً وكل واحد هيتعلم من غلطه ومش هيفكر يغلطه تاني بعدين .. تقدر كل واحده ترجع لـ جوزها .
نطوا كلهم فجأه من الفرحه .. بصت عشق ناحية نورسين واتكلمت بنبرة ذات مغزي :
_اهو ع الاقل هنرتاح من شغل اللصوص ده.
اتوترت نورسين ومشيت بسرعه من قصادهم عشان تروح لـ عمر وبعدين طلعت وراها وعد علي طول وهي ناويه تروح لـ ليث .. بصت عشق لـ ريحانه واتكلمت بابتسامه هاديه :
_كفايه كده علي مراد .. صدقيني زمانه ندم كتير اوي .
اتكلمت ريحانه بابتسامه محبه :
_انا وهو كنا محتاجين الوقت ده واعتقد اننا اخدناه .. عن اذنك يا مولاتي.
مشيت ريحانه وفضلت عشق لوحدها .. افتكرت تاني يوم لما اخدها غيث وطلعوا قصاد الناس وطمنوهم ان كل حاجه اتحسنت وانهم قضوا علي الشر اللي كان مهددهم ومن بعدها هي بعدت عن غيث واخدت البنات معها وكانت لازم تقضي علي الفتره ديه وكل واحد يرجع لـ مكانه !
دخلت نورسين علي مجلس غيث وعمر ومراد واتكلمت بابتسامه :
_اهلا بيكم .
بص عمر علي نورسين اللي واقفه بدهشه وقام بسرعه وهو بيتكلم :
_انتي موجوده هنا فعلا ؟ هو حصل حاجه ولا ايه؟ لـ تكون جلالة الملكه فكت الحصار؟
_هي فعلا فكت الحصار وخلت كل واحده ترجع لـ مكانها الاصلي.
قالتها نورسين بنبرة ذات مغزي وهي بتبص علي غيث ومراد .. بص مراد وغيث لـ بعضهم بسعاده بس اتفجأوا من رد فعل عمر لم مسك ايد نورسين فجأه واتكلم :
_طب يلا بينا من هنا بسرعه مضمنش لو فضلنا هنا شوية كمان ممكن عشق تعمل ايه .. انا هرجع قصري ولو شوفت حد منكم هعدمه في وسط الشعب .
خلص كلامه واخد نورسين معاه وهو بيمشي من المملكه كلها وغيث ومراد ضحكوا علي ردة  فعله وبعدين كل واحد راح لـ مكانه اللي المفروض يكون فيه حالياً!
......................
..... يتبع
#Nemo