لعنات العشق "الجزء الرابع من سلسلة العشق"

الفصل الثاني

نوفيلا
لعنات العشق
الحلقه الثانيه
...............
وقفوا كلهم حوالين سرير عشق والكل بيبصلها بقلق .. اتكلمت الحكيمه بابتسامه : متقلقش سموك .. ضغطها وطي بس ملكتنا قويه.
حرك راسه وهو لسه بيبص عليها .. امرها عمر انها تمشي وبعدين اتكلم وهو بيبص لـ غيث :
_ايه اللي حصل ده يا غيث؟
_اللي كان لازم يحصل .
قالها غيث بهدوء .. فـ اتكلمت نورسين باندفاع علي اختها :
_جي تطلقها بعد العمر ده كله يا غيث .. بعد المده ديه كلها جي تطلق عشق .. عشقك يا غيث.
داس علي ايده وهو مش عايز يرد علي نورسين بس عشق هي اللي وصلتهم لكده هو مش بمزاجه ابدا انه يعمل فيها هي اللي بدأت .. بدأت عشق تفوق علي صوت ليث وهو بيتكلم :
_هو ايه اللي بيحصل في القصر .. كل واحد عمال يطلق مراته .
اتكلم عمر بسخريه وهو بيبص لـ ليث :
_طلق بنتي بالمره يا ليث عشان تنضم لـ اسرتك الكريمه.
_عشق.
قالتها نورسين وهي بتجري عليها وغيث لسه بيبصلها وهي كمان بصتله جامد من غير ما تتكلم وبعدين ابتسمت بهدوء وهي بتتعدل من علي السرير .. اتكلمت نورسين بسرعه :
_عشق انتي كويسه فيكي حاجه؟
اتكلمت عشق بابتسامه غريبه علي كل الموجودين :
_انا كويسه يا نورسين ومفيش حاجه .
وقفت عشق وراحت قصاد غيث واتكلمت بنبرة قويه وهي لسه محتفظه بنفس ابتسامتها بس غيث عارف ان ديه مش ابتسامة عشقه ابداُ .. ديه بس مجرد شكل :
_شكرا يا جلاله الملك انك اتحملتني الفتره ديه كلها واني كنت عبء عليك المره ديه بدون ما احس .. اوعدك ان الملكه عشق هتبعد عن حياتك يا جلالة الملك زي ماانت أمرت .. لـ مصلحتنا ومصلحة الممالك .. وانت اكتر واحد عارف يعني ايه وعد مني والا مكناش واقفين هنا دلوقتي .
نهت كلامها وهي بتنحني قصاده بطريقة ملكيه وهو بيبصلها بصدمه مقدرش يخبيها لأنه فعلا عارف انها ما دام قالت كده .. يبقي عشق مش هتكون في حياة غيث تاني ابداً ...
قرب منها مراد بسرعه وهو بيتكلم بغضب :
_انتي بتقولي ايه .. بعد كل ده وانتي بتبعدي .. بتبعدي عنه !
_فيه حاجات لازم تحصل يا سمو الامير .. زي جوازك من الاميره كارمن.
قالتها عشق بهدوء باحت وهي بتبص لـ مراد اللي سكت فجأه .. قرب عمر منها وهو بيتكلم :
_يلا بينا يا عشق من هنا  .. عشان ترجعي علي مملكتك .
حركت راسها بقبول شديد .. قربت وعد من ليث وهي بتتكلم بحزن :
_ليث اعمل حاجه .. الملكه مينفعش تبعد عن الملك ابداً .
اتكلم ليث بشرود شديد :
_بس الملكه عارفه هي بتعمل ايه يا وعد.
بصتله وعد بعدم فهم من كلامه وهو كمان مش فاهم حاجه بس القرار اتحسم بينها وبين غيث مفيش في ايدهم حاجه يغيروها ...
قربت نورسين من اختها وهي بتحارب دموعها واخدتها معها هي وعمر اللي بص لـ غيث بغضب شديد ومشيوا من قصاد غيث اللي متكلمش خالص .. قرب منه ليث وهو بيتكلم :
_انا معرفش فيه ايه بينكم ولا ايه اللي وصلكم لكده .. بس اللي مش قادر استوعبه انت ازاي قدرت تتخلي عنها بعد ما كلنا اتعلمنا الحب منكم انتوا .. ازاي قبلت انك تسيبها بالسهوله ديه هتتحمل راجل تاني غيرك في حياتها .
عند النقطه ديه اتحولت عين غيث لـ غضب عارم وهو بيصرخ في غيث  :
_الزم حدودك يا سمو الامير .
_بعتذر جلالتك بس .. انا مجرد ابن مش مستوعب ان والدته بعد العمر ده كله تبعد عنه .. مجرد امير مش فاهم ازاي الملكه تمشي بالسهوله ديه .. مجرد واحد من الرعايا مش عارف ايه اللي ممكن يحصل بعد رحيلها .
قرب مراد من غيث وهو بيتكلم :
_عشق لو مشيت من هنا .. مش هتدخل هنا تاني يا جلالة الملك
_عارف.
قالها غيث ببرود شديد اللي خلا ولاده معندهمش حاجه تاني يقولوها فـ مشيوا هما كمان وسبوه لـ وحده وهو لسه واقف مكانه غمض عينه بألم وهو عارف ان اللي حصل ده مش هينفع يتصلح تاني ابداً .
.................................
دخلت ريحانه القصر بتاعها والكل بيبص عليها باستغراب شديد من عيونها الحمرا .. اول حد استقبلها كان شادي  اللي فرح اول ما شافها بس فرحته بهتت لما شاف منظرها .. جري عليها وهو بيتكلم :
_ريحانه!
بصتله ريحانه وهي بتحاول تبتسم بس مقدرتش وعيطت .. وقف قصادها وهو بيمسك وشها :
_ريحانه .. حصل ايه.. انتي كويسه .. مراد كويس .. حد في المملكه جرا له حاجه؟؟
هزت راسها بنفي فـ اتكلم هو بعصبيه من منظرها :
_امال بتعيطي ليه ؟
_سمو الامير طلقني .
بصلها شادي بصدمه من كلامها واتكلم بعدم تصديق:
_نعم؟ طلقك؟؟
حركت راسها بإيجاب وهي بتتكلم بضحك :
_لا ومش هتصدق .. اتجوز عليا كمان .. اتجوز سمو الاميره كارمن .
اتنفضت شادي وكأن حيه لدغته وهو بيتكلم بغضب :
_كارمن مين؟؟
_هو فيه كام كارمن يعني هي كارمن واحده .. طليقته سابقاً .. مراته حالياً.
نهت جملتها بمراره شديده وبعدين سابت شادي ودخلت علي القصر بسرعه وهي بتتفادي تقابل اي حد حتي الملكه اتخاطتها وهي بتبصلها باستغراب من حالتها ...
دخلت جناحها الخاص بيها بسرعه وهي بتمنع الحراس ان حد يدخل عليها مهما سمعوا وممنوع اي حد يدخل عليها سواء الملكه او الملك او حتي الامير شادي ...
بصت حواليها في الجناح بتاعها وهي بتفتكر لما جم هنا .. في كل مكان ليها معاه ذكريات حلوه .. بصت علي فازه محطوطه جمب السرير بتاعها قربت منها وهي بتبص للزهرة اللي جواها .. زهرة الريحان !
مسكت الفازه وطلعت منها الورده وهي بتبص عليها .. لسه مفتحه ومتقفلتش اتكلمت بهمس مرعب :
_ازاي لسه مفتحه ؟؟ مش هو قال زمان انك شبهي .. ازاي  انتي لسه فيكي الروح وانا لا .. لازم تبقي زيي يا .. ريحانه!
داست علي الورده جامد في ايدها وهي بتقطع اوراقها في ايدها وحاسه ان قلبها هو كمان بيتقطع ميت حته .. رمت الورده علي الارض فجأه وهي بتبص عليها واتكلمت بدموع :
_كده احنا بقينا زي بعض .
وبكل قوتها رمت الفازه بطول ذراعها اللي خلاها تخبط في الحيطه جامد مُصدره صوت عالي جدا .. صرخت قصادها وقربت من واحده تانيه ورمتها بكل قوتها وهي بتصرخ مع صوت كسر الفازه .. مسكت كل حاجه قابله تتكسر وبدأت تحدفها جامد في الارض وهي بتصرخ معها بصوت عالي وهي بتتكلم :
_ليــــــــه يا مراد ليـــــــــه ؟؟ انا مستحقش منك كده .. مستحقش منـك كده!
ورمت اللي في ايدها جامد .. وجعها كان اقوي من انها تسمع صوت الباب اللي بيخبط جامد من برا .. قربت من صورتهم المرسومه علي لوح الخشب الضعيف .. بصت علي البسمه اللي علي وشهم اللي خلاها تعيط جامد وهي بتمسكها تكسرها هي كمان وصرخت بصوت عالي بأسمه وكأن ديه اخر حاجه هي ممكن تعملها .. صوتها بدأ يهدأ بس دموعها مهديتش ابداً .. بالرغم من كل ده هي مهديتش مهديتش ابداً .. قامت فجأه من مكانها وهي بتفتح الباب بتاعها شافت اهلها وراه وعلي وشهم كل ملامح الخوف واللي زادت اكتر من شكلها ...
اتجاهلتهم ومشيت من قدامهم بسرعه وهي بتجري باقصي سرعتها وجري وراها  شادي اللي بينده عليها :
_ريحانه .. اقفي .
وقفت جمب الحصان بتاعها وبصتله وهي بتصرخ في وشه :
_ريحانه ماتت .. انسي ريحانه بقي  انسها زي ما هو نسيها !
ونطت علي الحصان بتاعها بسرعه وهي بتجري بيه برا القصر .. نادي شادي بصوته كله :
_جيبوا الحصان بتاعي فوراً .
وبعد دقيقه بالظبط كان الحصان قصاده .. طلع علي الحصان بتاعه وهو بيجري ورا اخته وبيتوعد لـ مراد بألم كبير زي اللي حسسه ليها بالظبط !
...............................
دخلت وعد مع ليث جناهم الخاص ووعد بتتكلم :
_انا مش قادره اصدق اللي حصل يا ليث .. الملك والملكه اتطلقوا وكمان مراد وريحانه !
اتكلم ليث بتعب وهو بيقعد علي الكرسي اللي موجود :
_ولا انا كمان فاهم اللي بيحصل ده من ايه .. علاقات البيت ده اتدمرت .
اتكلمت وعد بمرح لما شافته مهموم وقربت منه :
_الا احنا لسه يا ليثي وكمان عمر ونورسين .
_يا شيخه بعيد الشر عايزانا ننضم كلنا للمجموعه ديه يعني .
قالها ليث بغيظ من كلامها فـ اتكلمت وعد وهي بتقرب منه بطريقه عامة الشعب :
_وانا ليا غيرك مين يا سيدي.
ضيق ليث عينه وهو بيبص عليها لاقها بترمشله بطريقة مضحكه اللي خلاه يضحك علي شكلها وهي ابتسمت انها قدرت تفرحه .. قعدت جمبه وهي بتحضنه :
_هتعيد كل حاجه يا ليث وهيرجعوا لـ بعض .. ثق في كلام وعدك.
ضمها ليث جامد من غير ما يتكلم وهو باصص في نقطه بعيده مش عارف ايه اللي جي تاني بس الاكيد انه مش هيكون خير ابداً !
...................................
كانت عشق فوق الحصان وهي ماشيه بيه بسرعة عاليه بعد ما رفضت انها تقعد في نورسين في خودجها وبعد شوية اختفت من قصاد عينهم كلهم بسبب سرعة حصانها وكأنها بكده بتطلع فيه غضبها ووجعها من اللي حصل  .. بدأت سرعة الحصان تهدي شوية وهي بتدخل وسط الغابه وقربت من كوخ بعيد ووقفت الحصان ونزلت من عليه ...
مشيت ناحية الكوخ ده وفتحته ودخلت فيه .. الكوخ الخاص بيها هي وغيث .. الكوخ اللي بينعزلوا فيه عن العالم كله .. وقفت في نص الكوخ وهي بتتكلم بصوت ضعيف :
_صاحبك سابني .. بعد كل ده اتخلي عني بسهوله اوي وكأني ولا شئ .. نسي الحب اللي كان بينا ونسي كل حاجه عملتها عشق في يوم .. مشفش بس غير اني عارضت اوامره .. المره الاولي اللي عارضت فيها اوامره بعدتنا عن بعض .. للدرجادي انا كان سهل يتخلي عني .. انا بسهوله اتباع؟!
غمضت عينها بألم وهي بتعيط بهدوء شديد وقعدت علي الارض بقلة حيلة وهي مش قادره تعمل  حاجه .. طاقتها خلصت من قبل ما تبدأ معركتها .. اللي كان قادر يقويها دايما هو نفسه اللي كسرها .. اتكلمت بصوت هامس موجوع :
_ليه فجأه حسستني اني عندي ميت سنه يا غيث ليه سبتني لوحدي بالطريقة ديه ؟
قامت من مكانها وهي بتمسح دموعها وبصت علي المكان لأخر مره وقربت من جزء معين في الكوخ وفجأه شدت سيفها اللي كان بلون الكوخ ومحطوط عليه القش .. اتكلمت بصوت باهت مفهوش حياه :
_صاحبك اتخلي عني بالرغم اني بعمل كل ده لـ مصلحتنا ومصلحه اللي حوالينا .. بس انا للأسف مش هعرف استغني عنه لحد بس ما اخلص .. وبعدها مش هيشوف عشق تاني !
خلصت كلامها ومسكت سيفها وطلعت برا الكوخ نهائي وهي بتطلع فوق الحصان اللي هي جت عليه وبدأت تمشي لـ مكان غريب سايبه بس الحصان يوديها مكان ما هيروح!
......................................
دخل مراد وكارمن عند غيث زي ما طلب منهم وقعدوا كلهم مع بعض .. اتكلم غيث بهدوء :
_مراد .. انت فعلا هتطلق ريحانه!؟
اندفع مراد في كلامه :
_اكيد لا!
ابتسم غيث ومراد كلامه هدي واتكلم تاني :
_انا بس قولت كده قصادها عشان هي تهدي لكن انا ردتها بعدها علي طول واستغفرت .. ريحانه مراتي لو حصل ايه؟
حرك غيث راسه بتفهم وبص لـ كارمن اللي بتحاول تداري ملامح الحزن اللي علي وشها .. اتكلم غيث :
_وانتي يا كارمن .. موافقه علي جوازك من مراد .. عشق مشيت واعتقد مفيش داعي لـ كل ده وكل حاجه ترجع زي ما كانت.
اتكلمت كارمن بهدوء شديد :
_العفو منك جلالتك بس انا قطعت وعدي لـ الملكه ولا يمكن اخالف فيه .. هساعدها لأخر نفس فيا حتي لو مش مع الامير مراد.
اتكلم مراد هو كمان وهو بيبص لـ غيث :
_وانا كمان مش بعد كل اللي خسرناه ده هتراجع ابداً .. هي بدأت ولازم ننهي مش نهرب!
ابتسم غيث بقوه علي اصرار مراد اللي بيشبه عشق فيه وعلي نظرته اللي شبهها اللي بتداري اللي جواها حتي لو فيه ايه مش بتفضحه ابداً .. بص غيث  لـ كارمن :
_تقدري تمشي يا كارمن!
_عن اذنك جلالتك.
قامت وقفت وطلعت من القاعه كلها وغيث رجع بص لـ مراد واتكلم:
_عايز تقول ايه يا مراد؟
بصله مراد للحظات وهو مش متفاجئ ان والده فاهمه لانه قاله قبل كده انه شبه عشق عشان كده بيقدر يفهمه .. اتكلم مراد بعتاب :
_ليه طلقت امي .. هي مكنتش تستحق كده.
اتنهد غيث جامد وهو بيتكلم :
_ده اللي لازم يحصل .. وجود عشق حاليا غلط
_انت قادر تحميها !
قالها مراد باندفاع وهو بيتكلم فـ اتكلم غيث بـ حده :
_ولو مقدرتش احميها .. ساعتها هعمل ايه؟ هفضل مشيل نفسي الذنب طول عمري!
_وانت كده بتحميها ؟
قالها مراد بتساؤل ورد عليه غيث بهدوء :
_ايوه.
_عشق مش هتعرف تتصرف من غير غيث.
قالها مراد بنبره ذات مغزي .. اتكلم غيث بنفس نبرته :
_ولا ريحانه هتقدر تتصرف من غير مراد.
سكتوا هما الاثنين وقام مراد وقف بس قبل ما يطلع لقي ليث داخل عليه وعلي وشه كافة معالم الغضب .. اتكلم غيث باستغراب  :
_فيه ايه يا ليث؟
شاور ليث علي الباب ودخل منه رسول واتكلم ليث قبل ما يتكلم :
_انا نزلت تحت لما لقيت في دوشه خصوصا ان الحارس جالي لانك قولتلهم انك في اجتماع خاص مع الامير مراد ومينفعش حد يقاطعك .. نزلت ورحتله وعرفت هو جي ليه .
_انت بتتكلم بالالغاز ليه يا ليث؟
قالها غيث وهو حاسس بقلق غريب في قلبه بس مكذذبه .. شاور ليث للرسول بمعني انه يتكلم .. اتكلم الرسول وهو بيبص في الارض :
_جلالة الملك عمر بيبلغ ان جلالة الملكه عشق اختفت من عندهم وحاليا هم بيبحثوا عنها وبيطلب من حضرتك لو تقدر تساعده.
اتنفض غيث من علي الكرسي بتاعه وهو بيبص للرسول بعدم تصديق .. هو سمح انها تروح معاهم لانه عارف انها هتكون بأمان مع عمر .. مش هو ده اللي خطط له ابداً ان عشق هتبعد ...
ميعرفش ليه بص لـ مراد اللي لاقاه بيبصله بعتاب شديد وكأنه بيقوله هو ده الحمايه ولأول مره يحس غيث انه تايه وانه اتخذ اكبر قرار لما ساب عشق تمشي من قصره !
...................................
..... يتبع
#Nemo