لعنات العشق "الجزء الرابع من سلسلة العشق"

الفصل الاخير "الجزء الاول"

نوفيلا
لعنات العشق
الحلقه الخامسه والاخيره "الجزء الاول"
.............
وصلوا علي القصر وكان الكل واقف برا مستنيين رجوعهم بس اتصدموا من غيث اللي شايل عشق .. جريوا ناحيته وليث قرب من ابوه واتصدم من شكل عشق اخدها منه لحد ما غيث نزل ورجع شال عشق تاني .. قربت نورسين منهم وشهقت بصدمه وخوف من منظر عشق وغيث صرخ في الحنود :
_اطلبوا الحكيمه فورا
اتكلمت نورسين بخوف شديد :
_ مالها عشق يا غيث
بس غيث مردش عيلها او مكنش سامعها اصلا .. دخل القصر جوا وهو شايلها وكمل لحد الجناح الخاص بيهم .. حطها برفق وخوف علي السرير وفضل جنبها و وليث وعمر جم وقفوا جمبه ومراد اللي وصل بعده ووقفوا كلهم والكل قلقان علي عشق وعلي حالتها ...
جت الحكيمه وطلبت انهم يطلعوا برا ..  طلعوا كلهم باستثناء غيث اللي رفض يطلع معاهم وهم قدروا ده.. رفعت الحكيمه هدوم الملكه وشافت الجروح اللي في جسمها وبصتلها بصدمه .. افتكر غيث وهي بتحارب مع الجنود في المعركه وبعدين وهي بتحارب جنود شفيق من شويه وندم انه ماخدش باله من جروحها ...
بدأت الحكيمه تحط الاعشاب علي الجروح برفق وتطهرها وغيث بيبص عليها بحزن لانه هو اللي ماخدش باله من الدم اللي كان ع هدومها من البداية ..هو اللي وصلها لكده!
بعد شويه خلصت الحكيمه اللي بتعمله وبصت لـ غيث وهي شايفه قلقه اللي مشفتش حد قلقان علي مراته بالطريقه ديه زيه واتكلمت بابتسامه :
_ ملكتنا قويه يا جلاله الملك متقلقش شويه وهتفوق هو بس كان ضعف بسبب الدم اللي فقدته انا عالجت ليها جروحها كلها وهعدي علي المطبخ الملكي ابلغهم بالاكل اللي يجهزوه لـ الملكه.
حرك غيث راسه بخفوت من غير ما يرد عليها وهو ماسك ايد عشق وطلعت الحكيمه برا ودخل الباقي بعد ما هي خرجت ووقفوا كلهم حوالين عشق .. اتكلم ليث بقلق وهو بيبص علي عشق بحزن :
_مالها يا بابا؟ هتبقي كويسه صح؟!
حرك غيث راسه وهو بيتكلم  :
_الحكيمه قالت  انها كويسه وهتفوق كمان شويه.
اتكلمت ريحانه بتردد وهي بتبص علي هدوم عشق :
_ اعتقد انها لازم تقلع الهدوم اللي عليها دم دي يا جلالة الملك.
بص غيث علي هدومها وبعدين اتكلم بثبات :
_ عارف .. بعد اذنكم عايز ابقي مع مراتي شويه .
بص عليه الموجودين بشفقه علي حالته وطلع الكل بهدوء وهم عارفين الحاله اللي فيها غيث كويس .. قعد جنبها وهو بيبص عليها بحزن وقلعها هدومها بهدوء وجاب قماشه مبلوله وحركها علي جسمها كله وهو بيشيل الدم اللي عليه ..جواه الم غريب مش قادر يتحمله حاسس انه فوق طاقته .. خلص اللي بيعمله ولبسها هدوم نضيفه وقعد جمبها ومسك ايدها من تاني .. بعد فتره حس بيها وهي بدأت تفوق فـ قام بعيد عنها .. فتحت عينها ببطء وهي بتبص حواليها وشافته واقف بعيد اتكلمت بابتسامه ضعيفه :
_ واقف بعيد ليه يا جلاله الملك؟
قرب منها غيث بسرعه وكأن كان مستني منها الاشاره ديه ومسك وشها بلهفه وهو بيتكلم بسرعه شديده  :
_انتي كويسه صح .. جسمك فيه حاجه بتوجعك .. حاسه بإيه؟
اتكلمت عشق وهي بتحط ايدها ببطء علي ايده واتكلمت بصوت هادي :
_ انا كويسه يا جلاله الملك متقلقش عليا.
بص غيث في عيونها بس شاف الصدق فيهم اللي خلاه يهدي بس بعدين اتكلم بغضب :
_ انتي ازاي عملتي كده يا عشق ها .. تخاطري بحياتك يا عشق .. عارفه لو كان الكلب ده عملك حاجه .. انتي عارفه كان ممكن يحصل فيا ايه؟ عارفه لو جرالك حاجه انا كان ممكن يحصلي ايه ايه عشق ؟
بصتله عشق وهي بتسأله  بابتسامه :
_كان هيحصل  ايه؟
بصلها غيث واتكلم بعتاب وهو بيدوس علي ايدها بحنيه :
_انتي بجد بتسألي يا عشق .. انا كان ممكن اموت وراكي يا عشقي لو حصلك حاجه!
كانت هتطمنه انها سليمه وانها هتفضل جمبه مهما حصل بس اتراجعت للحظه واتكلمت ببرود ووجع بين كلماتها هو حس بيه جدا :
_بس انت ماموتش لما طلقتني يا جلاله الملك!
بص ليها غيث وبعدين ابتسم بهدوء وهو بيتكلم :
_انا استحاله اطلقك يا عشق!
بصت له عشق جامد وهو قرب منها اكتر وقعد واتكلم بتوضيح :
_دايماً يا عشق انت ناسيه حاجه .. ان انا دايما سابقك بخطوه وفاهمك .. من ساعة ماانتي جيتي قولتيلي انك عايزه تدخل مراد ابننا في اللعبة ديه عشان تشيلي من عليه التهم وانا رفضت .. شوفت في عينك الاصرار زي ما هو مقلش فـ عرفت انك مش هتتراجعي عن اللي في دماغك يا عشق وساعتها كان لازم انا افكر قبلك في اللي هتعمليه .
_ماشي باعتبار انك كت عارف كل  حاجه ودايما سابقني بخطوه .. ازاي مطلقتنيش والشيخ اللي كان موجود وليه عملت كده من الاول اصلا؟
قالتها عشق بتساؤل وهي بتتعدل في قعدتها بس تأوهت بألم وهو ساعدها بسرعه واتكلم :
_علي مهلك .. بالنسبة للشيخ فـ انا كنت من الاول متفق مع الشيخ في كده لاني كنت عارف انك هتعملي ده يا عشق فـ كنت مجهز كل حاجه مش اكتر والشيخ كان عارف هو هيعمل ايه كويس اوي .. اما بالنسبة لـ ليه اصلا فـ بصي هو تفكير عقيم شويه بس كنت عايزك تحسي زي ما عيشتي مراد.
رفعت عشق حاجبها بصدمه من اجابته واتكلمت :
_تعيشني اللي انا عيشته لـ مراد!!
حرك راسه بتوتر وهو بيتكلم ومراقب ملامح وشها :
_انتي كسرتي قلبه .. اه كنتي بتدوري علي مصلحة الكل بس دايما يا عشق طريقتك غلط دايما لازم بتسيبي اخطاء وراكي ولازم توجعي اللي حواليك او تجرحي نفسك .. وانتي عملتي الاتنين يا عشق .. جرحتي ابنك لما بسببك هو بعد عن ريحانه وخلتيه يرتبط بـ كارمن من تاني .. وجرحتيني لما رميتي بكلامي في عرض الحيط وكأن ملوش اية اهميه ابداً .. وجرحتي نفسك لان الكل بعد عنك وانك بدون قصد خليتي ابنك شايل غضب منك وخلتيني اعمل عليكي اللعبة ديه كلها .
سكت عن كلامه وهي بتبص عليه بس مش قادره تتكلم حتي .. غمضت عينها وهي بتتكلم بصوت ضعيف :
_في الوقت اللي انت عايز توجعني فيه انا مكنتش محتاجه غيرك جمبي يا غيث لأن زي ماانت بتقول محدش فاهمني زيك .. في الوقت اللي انت بكل هدوء طلبت فيه الشيخ وعملت اجراءات الطلاق عشان تبعد حتي لو مكنش بجد .. انا مكنتش عايزه غير اني اعيط في حضنك انت من اللي حصل .. انا دايما متهوره لانك معايا وعارفه انك هتحميني دايما وهتصلح اللي انا بعمله .
_وانتي ليه تغلطي اصلا من الاول يا عشق ليه مش من الاول متمشيش صح!
قالها غيث بعتاب وهو بيبصلها فـ اتكلمت هي بألم ودموعها بدأت تنزل :
_عشان انا عايزاك دايما معايا .. عشان متحسش مره اني هقدر اكمل لوحدي لاني مش هقدر .. انا مش عايزه قرارتي تبقي كلها صح .. انا عايزاك انت يا غيث اللي تصلحهالي عايزاك انت طول حياتي اللي ترشدني وتعلمني .. انا .. انت فعلا وجعتني يا غيث انت دايما اللي قادر يعمل فيا كل حاجه وانت عارف ده .. انت وجعتني .
خلصت كلامها وهي بتفرد جسمها من تاني علي السرير وبتعيط بصوت مكتوم وهو قرب منها وحضنها وهو بيتكلم بأسف عليها :
_انا اسف يا عشق اسف .
_وعشق مش هتتقبل اسفك يا غيث .. امشي وسبني!
قالتها بصوت خافت وهو رفض وطلع جمبها وحضنها بين دراعه وهي حتي مش عندها القوه انها تقاوم مجرد انها تعبت من المقاومه وعيطت جامد بين دراعه وهي بتتكلم :
_انا مش عايزه اكون ملكه .. مبقتش عايزه اشيل مسؤليه حد تاني .. انا تعبت.
باس راسها بحب وهو بيتكلم بصوت دافي :
_المملكه مش هتفضل من غيرك يا عشق .. المملكه لسه ثابته عشان انتي فيها .. انت اقوي من كده.
_انا مش قويه مش قويه .. انا ضعيفه والله انا ضعيفه "رفعت راسها وهي بتبصله وعينها حمرا " انا وحشه اوي صح .. مستحقش حد في حياتي .. عشق غبيه اوي .
رجعت عيطت تاني وهو لأول مره يحس انه غلط لما سابها تعيش كل ده لوحدها .. انه لاول مره ميكونش صح في قراره مع عشق .. غمض عينه بألم عليها وهو لسه حاضنها برفق عشان الجروح اللي في جسمها متتفتحش من جديد وسابها تطلع كل اللي في قلبها يمكن بعدها تفوق ...
بعد شويه دخلوا عليهم من جديد وهم بيبصوا علي عشق اللي في حضن غيث .. اتكلمت نورسين بحرج :
_عشق كويسه يا غيث؟
فاق غيث علي صوت نورسين وبص عليها وهو بيحرك راسه بنفي واتكلم بهدوء :
_اطلعوا برا وسيبوني معها .
بس نورسين مسمعتش لـ كلامه و قربت نورسين منهم بسرعه ومعها ليث ومراد .. اتكلمت نورسين وهي بتبص علي عشق اللي دافنه راسها في صدر غيث  :
_عشق حبيبتي .. فيكي ايه؟
رفعت عشق راسها وهي بتبص علي الموجودين وكلهم اتصدموا من منظرها ركزت عشق نظرها علي ولادها اللي بيبصوا عليها بصدمه من حالها ودفنت راسها في حضن غيث تاني فـ اتكلم غيث المره ديه بصوت عالي :
_قوتلكم اطلعوا برا بقي اطلعوا .
  قرب عمر من نورسين وهو بيهمس بعد ما شاف حالة غيث :
_عشق محتاجه جوزها وولادها يا نور .. تعالي.
بصتله نورسين وعينها مليانه دموع علي اختها ومشيت معاه واخد ريحانه ووعد وطلعوا كلهم برا ما عدا ليث ومراد اللي مقدروش يسيبوها .. اتكلم غيث وهو بيبصلهم بشر :
_انا مش قولت اطلعوا .
اتكلم ليث بصوت حازم :
_مش هنقدر نسيب امنا بالطريقه ديه!
سكت غيث لم سمع همس عشق انه يسيبهم.. قرب ليث ومراد من امهم وقعدوا جمبها اتكلم ليث بمرح وهو بيمسك ايدها:
_ايه يا جلالة الملكه انتي وحشك الملك ولا ايه؟
رفعت عشق راسها وهي بتبص لـ ليث .. اتكلم مراد هو كمان وهو بيحضن راسها وهزر :
_فوقي بس كده امال مين هيصالحني علي ريحانه ده انا خايف اقرب منها والله.
ضحكت عشق علي كلامه وبعدين عيطت وغيث مراقب ولاده بصمت لكن لسه قاعد جمبها .. اتكلم ليث بسرعه :
_لا متقوليلش الشويه اللي غبتي فيها عن القصر خليتك ام عاديه بتفرح تعيط تزعل تعيط .
_انا مكنتش ام كويسه ابداً مستحقش كل ده.
اتكلم مراد وهو بيبوس راسها :
_مين قال كده ؟ انتي اعظم ام في الدنيا ومعتقدش ان حد ممكن يلاقي زيك اصلا .. احنا اللي منستحقش حبك ده كله والله يا ماما .
رفع ليث ايدها وهو بيبوسها بحنيه واتكلم :
_انتي مينفعش تفكري في الكلام ده اصلا لان احنا لو فضلنا نقولك علي كل الحاجات اللي عملتيها في حقنا حلو مش هنخلص لان كمان مفيش حاجه وحشه .. الا حاجه واحده الصراحه في حقي!
بصتله عشق بتساؤل فـ قرب منها جامد ومراد وغيث بيبصوله بفضول واتكلم :
_انك خليتي ابويا عم الوحش اللي قاعد ده.
ضحكت عشق علي كلامه فـ اتكلم غيث بغيظ  :
_انا وحش .. شايفه ابنك يا عشق .. طب حاسب بقي انت وهو خلاص خلصنا ابعدوا عن مراتي .
_مراتك مين ؟ انت مش طلقتها ؟
قالها مراد بدهشه فـ رد عليه غيث بغمزه :
_لا .. زي ماانت مطلقتش ريحانتك كده يلا مع السلامه ولو حد دخل بقطع رقابيكم !
قالها بتهديد ليهم فـ اتكلم مراد بسرعه :
_هنمشي .. بس انا عندي سؤال عارف انه مش وقته والله بس عايز اسأله .. ايه اللي حصل من اكتر من عشرين سنه ؟
سكت غيث وعشق وهما بيبصوا علي مراد اللي بيبصلهم .. اتكلمت عشق بهدوء قدرت تحصل عليه من ولادها :
_طفل في القصر هنا مات!
_طفل مين .. انتوا بتقولوا ايه؟
قالها ليث باستغراب شديد وهو مش فاهم حاجه .. بص غيث لـ عشق وبعدين رجع بص لـ مراد وغيث واتنهد :
_ابن نورسين وعمر!
جحظت عيون مراد وليث وهتفوا في نفس اللحظه :
_نعــــم؟
_مات مسموم هنا في القصر عشان يتقال ان اللي سمه هو الملك غيث .. نسيوا ان احنا الاربعه كيان  واحد ومفيش حد يقدر يهز ثقتنا في بعضنا.
قالها غيث وهو بيبص لـ عشق اللي عينها اتوحشت وعرف انها بتفتكر اللي حصله وبدأ هو كمان يحكيلهم اللي حصل ...
***كان الكل واقف حوالين نورسين اللي لسه مش قادره تستوعب صدمة ابنها .. كان من شويه بس بين ايدها ازاي اخدوه منها .. ازاي بعد عنها بالسرعه ديه .. كانت عشق واقفه جمبها وهي بتبص علي ابنها اللي في حضن الملكه ريهام امها .. معقول ابنها كان ممكن يكون مكان ابن نورسيني .. اذا كان الالم ده كله وهو مش ابنها اومال لو كان ابنها مجرد الفكره كانت صعبه عليها ...
رجع عمر ومعاه غيث بعد ما دفنوا الطفل الصغير وعمر ساكت مبيتكلمش .. قرب من نورسين وبص ليها جامد وحضنها من غير ما يتكلم .. زي ما تكون خدت الاشاره انها تنفجر .. صرخت بالم وقهر علي ابنها اللي ملحقتش تعيش معاه وهو بيحضنها جامد كل ما صوت صراخها يزيد .. وبيحاول يتماسك عشان يقدر يجيب حق ابنهم اللي مات غدر ...
وقفت عشق جنبها بدموع ووجع مش قادره حتي تنزل دموعها لانها لازم تبقي صامده ساكته عشان ترجع حق ابنها .. مش هي اللي ولدته بس هي حاسه بشعور نورسين وده كافي يخليها تقتل اللي عمل كده .. قرب منها غيث وهو بيمسك ايدها اتكلمت عشق بوعيد وهي بتبص علي حالة نورسين :
_ صدقيني يا نورسين مش هادي اللي حصل ده بالساهل
بعدت نورسين وشها من حضن عمر وهي بتبص لـ عشق واتكلمت بوجع ام فقدت ابنها وغضب:
_لا يا عشق ابني محدش غيري هيجبله حقه .. والله لاندمهم علي اللي عملوه وهخليهم يعرفوا مين هي الملكه نورسين كويس اوي!
كان غيث امر الجنود انهم ميخلوش حد يدخل الممكله ولا حد يطلع منها بس للحظه شك في اللي في القصر لان محدش يقدر يعمل كده غير اللي في القصر فـ اتكلم بحده وهو بيأمر الحراس اللي واقفين قصاده :
_اللي هيطلع برا القصر بس تيجبوه فورا انتي فاهمين لا حد دخل ولا يخرج !
حركوا راسهم بسرعه ومشيوا من قدامه بسرعه خوفا من غضبه اللي ظاهر في عينه .. وهو بص لنورسين وعمر اللي لسه حاضنها بحزن ووجع .. بعدت عشق عنه وهي بتتنفس بسرعه كعادتها لما بتتعصب وغير ذلك اختناقها من الدموع اللي محبوسه جواها وراحت وقفت في نص القصر والكل بيبص  عليها مستغربين واتكلمت بصوت عالي حاد :
_انا عايزه كل اللي في القصر يقف قصادي هنا كله.
قرب منها غيث وهو بيراقب اللي في القصر بيتجمعوا كلهم قصادهم ونورسين وعمر قربوا منهم ومش عارفين عشق هتعمل ايه  .. اتكلمت عشق بتهديد وهي بتتحرك قصادهم وعينها بتفحص كل واحد من اللي قصادها :
_ اللي عمل العمله السودا دي مش هينفد من تحت ايدي انت فاهمين مش هيطلع من هنا حي وعارفين اني مبترجعش ف كلمه قولتها عقابكم كلكم شديد ولو وصل اني اقتلكم كلها مش هتردد فدا الامير الصغير اللي انتوا قتلتوه .
_احنا ملناش ذنب جلالتك.
قالها حد من الخدم اللي موجودين فـ صرخت عشق في وشه :
_امال هو مات ازاي؟ انا اللي قتلته !! اللي قتل واحد منكم وانا واثقه من كده وواثقه اكيد ان حد منكم عارف صدقوني مش هرحمكم.
قرب منها غيث وهو بيحاوطها من كتفها واتكلم بحده وهو بيشير لـ حد من الحرس :
_انا عايز بيوتهم كلهم تتهدم النهارده وكلهم هيترموا في السجون .
كان غيث ملاحظ حركات اثنين واقفين مش علي بعضهم والحارس اللي كان بيتكلمه كانت عينه بتدور في كل مكان .. في لحظه اتقدمت واحده من الخادمات اللي واقفين بخوف من ردة فعلهم .. محدش فيهم هيقدر يواجههم هم بيعدلوا اه بس لما حد يجي عليهم بيمحوه .. ومين هي عشان تستحمل غضب الملكه عشق وجوزها اللي اشد بالاف المرات من غضب الملكه نورسين حتي لو كان اللي مات ده مش ابنها ...
لاحظتها نورسين بسرعه في قربت منها وهي بتتكلم بشر :
_تعرفي مين اللي عمل كده؟
حركت الخادمه راسها بخوف وهي شايفه الملكه المعروفه بالطيبه بالشكل  ده واتكلمت :
_ايوه انا عارفه مين اللي عمل كده!
بصت عشق ليها بنظرات ناريه بس قبل ما تقرب ناحيتها كانت نورسين ماسكه وش البنت دي بقوه بين ايدها وهي بتبص عليها بشر واتكلمت بنبره حاده:
_مين اللي عمل كده في ابني انطقي؟؟
صرخت الخدامه من الالم وهي بتبص علي اللي بتبص ناحيتها بغضب شديد ممزوج بالخوف من اللي جي واتكلمت وهي بترفع صباعها ناحيتها واتكلمت :
_حليمه.
زقتها جامد علي الارض بس قبل ما تقع كان الحراس اللي شاور ليهم غيث ماسكينها .. مشيت نورسين بسرعه الناحيه اللي شاورت عليها البنت ديه وهي بتدور علي حليمه بينهم  .. برقت حليمه برعب و كانت هتجري بس غيث كان مراقبها من الاول واول ما شافها هتهرب قرب منها بسرعه ولحقها ومسكها .. شهقت برعب لما شافته بيمسكها  قابلها بنظرات قاتله وبدون مقدمات ضربها بالقلم جامد وقعت عليه ف الارض وشفايفها بتنزف .. قربت منها نورسين بسرعه ومسكتها من شعرها وخبطت راسها في الارض وايدها سبقتها وهي بتضربها بالقلم والكل بيتفرج بصدمه وخوف من اللي جي جرتها ليها وقربتها من وشها وصرخت في وشها :
_انطقي يا بت مين اللي قالك تعملي كده .. مين اللي قالك تقتلي ابني يا حيه؟
وكانت مع كل جمله تقولها تضربها علي وشها بجنون وغضب والثانيه بتصرخ من الالم .. كانت عشق بتبص علي الخدامه بتفشي وعمر كل ده ساكت مراقب الموقف بسكوت تام .. صرخ غيث في الخدم اللي واقفين بيتفرجوا برعب وامرهم انهم يمشوا وفعلا الكل اختفي ومبقاش فاضل غير عمر وغيث ونورسين وعشق والبنتين والحراس ...
ضربتها نورسين بالقلم تاني لما لقيتها بدأت يغمي عليها وصرخت ف وشها :
_ انتي هيغمي عليكي .. بقولك انطقي؟
اتكلمت حليمه برعب وهي بتبص علي منظر نورسين :
_ انا اللي عملت كده لوحدي
_ وليكي عين يا وقحه يا حيه تتكلمي كده قدامي بتقوليها في وشي!
ساعتها نورسين مشافتش قدامها كل اللي قدامها منظر ابنها وهو بيموت بين ايدها وهي مش قادره تعمله حاجه .. ضربتها جامد علي وشها وعشق اول ما حست انها هتموتها اخدتها من ايدها جامد وعمر قرب علي نورسين بسرعه وهو بياخدها من بين ايد عشق وبيحضنها صرخت في حضنه :
_قتلت ابني يا عمر قتلته .
غمض عمر عينه بألم هو حاسس بيها لانه حاسس بنفس الوجع ويمكن اكتر هو دفن ابنه بإيده .. دفنه من قبل حتي ما يسمع منه كلمة بابا .. قربت عشق من حليمه وصرخات نورسين بتغذي روح القتل في عشق واتكلمت بنبره شر :
_مين كان معاكي في جريمتك الوسخه دي؟
سكتت وهي بتعيط وبس وبتبص لعشق بخوف بل برعب .. اذا كان ده اللي عملته نورسين فـما بالك باللي ممكن تعمله عشق .. ضربتها علي وشها :
_انطقي
اتكلمت بنبرة مرتعشه :
_جوزي!
_اسمه ايه؟
بس قبل ما تنطق قرب غيث وهو بيشد السيف من الحارس اللي واقف قصاده وحطه علي رقبته وهو بيتكلم بنبره مخيفه :
_مش لازم ترد عليكي يا عشق هو واقف من بدري في وسطينا ومش قادريتحرك.
المره ديه عمر اللي ساب نورسين وراح ناحيته وبصله جامد وبكل الالم والغضب اللي جواه ضربه في وشه جامد .. وقع الحارس علي الارض من المفاجأه وعمر مدلوش فرصه يستوعب ونزل علي الارض يضرب فيه وهو بيصرخ :
_ انتوا عارفين انتوا عملتوا ايه يا ولادالكلب انتوا قتلتولي ابني يا زبـــــاله حرمتوني من ابني .. سمتوه ليه يا ولاد الكلب ..عملكم ايه عشان تموتوه عملكم ايه؟
وضربه جامد اكثر من مره وغيث متملكش نفشه وضربه مع عمر لحد مبقاش فيه مكان سليم .. اتحركت نورسين من مكانها واخدت سيف كان مع الحارس  اللي واقف بيتابع الملوك واللي بيعملوه وهو اتصدم من اللي عملته ...
قربت من حليمه وهي بتتكلم بنبره هاديه مخيف :
_انا لاخر مره بسألك مين اللي قالك تعملي كده؟
_الملك شفيق.
قالتها حليمه بسرعه شديده وهي خايفه من السيف اللي مع نورسي .. لحظها ان نورسين مكنتش مركزه بس عشق اللي كانت مركزه في الاسم قوي .. اتكلمت نورسين من تاني وهي بتوطي بوشها ناحتها واتكلمت بنبره تشبه فحيح الافاعي :
_ انتي سميتي ابني من غير قلب ولا رحمه صح .. خلصتي عليه بكل برود وكنتي فاكره انك هتنفدي مش كده من غير ما حد يكشفك صح .. بس لا انتي قتلتيه ولازم انتي كمان تموتي .. وزي ما وجعتي ابني  وكان بيصرخ بسببك انا مش هقتلك ع طول لازم اخليكي تتعذبي زي ما هو اتعذب  .
جحظت عين حليمه وهي حاسه ان ديه نهايتها وهتفت برجاء :
_ابوس ايدك يا مولاتي سامحيني
_ اسامحك وابني .. ابني اللي قتلتيه وهو لسه ملحقش يعرف حاجه قتلتيه بدم بارد .. صدقيني مش هرحمك ابداً
ومسكت سيفها ومسكت شعرها وقطعته خالص وهي بترميه في وشها .. وبعدين مسكت جسمها وحركت عليه السيف بسرعه مسببه ليها جروح والم وهي بتصرخ تحت ايدها .. ضحكت بشماته :
_حاسه بوجع صح ده لسه البدايه
وعملت نفس حركتها تاني وتالت ع جسمها كله لحد ما عشق قربت منها .. ساعتها نورسين اديتها السيف .. بصت عشق علي جسم حليمه اللي كله بينزف وهي شايفه قصادها منظر ابنها مكان ابن نورسين وبدون تردد غرزت السيف في قلبها بحقد .. صرخت حليمه صرخة الموت وبعدين فرقت الحياه للأبد .. وعمر وغيث كل وحد مسك سيفه .. قطع غيث رجله الاثنين وايده .. قرب عمر من راسه وافتكر منظر ابنه فـ ايده وهو مش قادر يعمله حاجه افتكره وهو بيكفنه بإيده ومش عارف حتي ينفس عن وجعه ده .. وبدون اية تردد قطع راسه بس ببطئ شديد عشان يتألم كويس واصبح المكان ده مكان دم وبس !!
وقعت نورسين علي الارض وعيطت جامد وعشق حضنتها جامد ونفس الشئ مع غيث وعمر حضنه غيث بمساعده وهو بيحاول يهون عنه بس هو عارف انه صعب عليه ده وتخيل نفسه مكانه التخيل نفسه صعب ميعرفش رده فعله كان ممكن تكون اي ساعتها بس اللي هو عارفه انه هيكون اصعب منه بكتير و كتير اوي مكنش هيرحم حد ابداً ...
هديت نورسين وبعدت عن عشق وعمر كمان راح لنورسين وحضنها وهي مصدقت وعيطت تاني .. افتكرت ابنها ابن شهر وبس ملحقتش تفرح بيه وهي اللي كانت راسمه احلام وخيالات كلها راحت .. اتكلمت نورسين بدموع :
_احد اخدنا حق ابننا صح يا عمر؟
_صح يا نورسين صح !
قرب غيث من عشق اللي كانت واقفه وجسمها بيتنفض وحضنها وهمس في ودانها :
_عيطي يا عشق العيط احسن لك متخنقيش نفسك
بصتله جامد ودفنت راسها ف صدره وعيطت جامد وهو حضنها بتملك وحزن علي حالها فضل ساكت مستنيها تهدي لوحدها هو اكتر حد عارف هي كانت متعلقه بالطفل ده قد ايه يمكن اكتر من ابنها وفجأه خسرته مكنش عنده حل غير انه يسيبها تطلع حزنها والامها بس ف حضنه هو وبس!!!***
مسح ليث ومراد دموعهم اللي نزلت من الوجع اللي مروا بيه اهلهم قبل كده .. مسحت عشق دموعها واتكلمت هي بشر:
_يومها اقسمت بالله اني مش هسيب حق ابننا يروح ابداً.
_طب ليه مقتلتهوش في ساعتها؟
قالها ليث بوجع وهو بيتخيل المشهد .. فـ اتكلم غيث بفهم :
_عشان مكنش ينفع ناخد بكلام مجرد واحده قاتله .. كان لازم يبقي معانا دليل .. وعدت السنين وانا افتكرت الامر اتنسي بس عشق كانت لسه فاكره واول ما الموضوع اتعلق بـ شفيق من تاني عرفت ساعتها انها مش هتسكت والباقي انتوا عارفينه.
_كان اسمه ايه الطفل ده؟
سألهم مراد بفضول بصت عشق ناحية ليث واتكلم غيث بهدوء :
_ليث.
بصله ليث بدهشه من كلامه فـ اتكلم غيث من تاني :
_عشان كده عمر ونورسين متعلقين بيك لانك شبه ابنهم .. عشان كده احنا كنا بنسيبك تفضل مع عمر براحتك .
_انتوا اتحملتواكل ده ازاي؟
قالها ليث وهو مش قادر يستوعب .. اتكلمت عشق وهي بتبص لـ غيث بنظره ذات مغزي :
_عشان مصلحتنا ومصلحه الممالك كان لازم نتعايش مع اللي حصل وننساه .
فهم غيث انها قاصداه بالكلام ده .. حضن ليث عشق وهو بيتكلم :
_مش بقولك انتي اعظم ام في التاريخ واطيب قلب .
حضنته عشق وبعدين اتكلمت بهمس موجوع :
_افتكر اني تعبانه.
بعد عنها بسرعه وهو بيتكلم بتوتر :
_انا انا اسف .. انا هطلع لـ عمر وكمان عشان اقولهم انك بقيتي كويس .
_وانت اطلع صالح ريحانه يلا.
قالتها عشق وهي بتبص علي مراد .. اتكلم مراد وهو بيبوس راسها وايدها :
_انا بحبك جدا .
ابتسمت عشق بفرحه علي كلمته وهي بتتكلم بحنان امومي :
_وانا بحبك يا مراد .
طلع الاخين برا وفضل غيث جمب عشق .. بصتله عشق واتكلمت بصوت هادي  :
_غيث!
بصلها غيث بسرعه وهو منتظر انها تقوله انها سامحته لكنها اتكلمت بنبره بارده :
_اتفضل اطلع لاني مش عايزه اقعد معاك في مكان واحد!
.................................
..... يتبع
#Nemo