💜 لنتقرب الي الله 💜

💜سؤال هيفيدك💜

س/معملتش حاجة لرمضان..سمعت كل الدروس الممكنة ولسه انا انا نفس الشخص! كنت متخيلة لما شعبان يدخل هتغير ١٨٠ درجة! كنت متخيلة ان على نهاية شعبان هختم مرة على الاقل! مش باقي على رمضان غير ١٠ أيام وانا زي م انا معملتش اي حاجة كويسة! بالعكس..انا قلبي بيموت اكتر! صعبان عليا اني عاوزة اقرب من ربنا مش عارفة! بيقولوا في ناس سبقت ومبيناموش وانا حرفياً مش قادرة اتقدم خطوة! انا خايفة بردو اقول هتغير ف رمضان ورمضان يخلص ومتغيرش! انا خايفة تبقا الفرص ال ربنا بيمنحهالي دي حجة عليا مش ليا! اعمل ايه؟ هلحق اعمل حاجة أصلا؟!!
.......
ج/بسم الله على قلبك،اسأل الله عز وجل أن يهديكِ لِما يحب ويرضى، مبدئياً كدا سيبك من ال بدأوا وختموا ونعتبر ان شعبان لسه بادئ الليلة! ما هو رب اول شعبان هو رب آخر شعبان،إن شاء الله توبتك مقبولة أياً كان وقتها ما دمُت على قيد الحياة وما دامت القيامة لم تقُم بعد، اول خطوة، انسي اللي فات تماماً،انسي تقصيرك وتعالي نبدأ من دلوقت حالاً.. الله هيقبلني؟ ايوه هيقبلك ان شاء الله، مهما كان تقصيري؟ مهما كان تقصيرك.. يعني هعرف ابدأ من دلوقت وادخل السباق ع الجنة؟..هتعرفي ان شاءالله بس انتي خليكي صادقة.

تعالي بقا أقولّك هنبدأ ازاي، اولاً الصلاة،هتجتهدي انك متتأخريش عنها وهتحطيها رقم ١ مهما كانت الظروف! فاهمة!.. ثانياً لو تقدري تلتزمي بالسُنن مرة واحدة،يبقا كويس جداً،مقدرتيش،فهتبدأي من بكرا بسُنة الفجر،وبعد بكرا سُنة الفجر والضهر،وبعده سنة الفجر والضهر والمغرب،وبعدهم من سنة الفجر لـسُنة العشا، وتواظبي عليهم لآخر يوم ف عمرك! مش هقولك لآخر رمضان بس ..

ثالثاً:القرءان،اقرأي من القرءان لحد م تجيبي آخرك، سيبك من السوشيال ميديا والتفاهات دي واستغلي أي وقت فاضي واقرأي! لو قرأتي ٣ أجزاء يومياً،هتختمي ف ١٠ أيام

رابعاً: قيام الليل،هتثبتي ركعتين يومياً لحد م تدخلي رمضان وتنطلقي بقا،المهم تثبتي القيام،انا عاوزاكي تتعاملي مع القيام زي ما بتتعاملي مع الأكل والشُرب،إن مفيش يوم يعدّي من غير قيام! وهتدعي ربنا كتير اوي بكل ال بتتمنيه،وهتدعيه أكتر انه يهديكِ ويثبتك،القيام وسيلة قوية جداً للثبات على الطاعة،لذلك كل ال مبيصلوش قيام دايماً مذبذبين ومش ثابتين ومعندهمش قوة ف دينهم،
خامساً:أذكار الصباح والمساء واذكار الصلاة،اعملي منبّه يفكرك بيهم طول الوقت عشان متنسيش! واوعي تقومي من الصلاة من غير م تختميها بالأذكار، حتى لو هتقرأيها من الورقة او من ابلكيشن على الفون!

اكتر غلطة بنقع فيها ف رمضان ان بعد ما بنعمل الطاعة ال علينا،بنقعد نرتاح ونقول الحمدلله خلصت ال ورايا!.. الحقيقة ان ال وراكِ مبيخلصش! خلصتي وِرد القرءان ال انتي محددة تقرأيه،ادخلي ف الجزء ال بعده،خلصتيه ومش لاقية حاجة تعمليها،ادخلي ف ال بعده بردو، الله عز وجل يقول "فإذا فرغت فانصب" مش "فإذا فرغت فالعب"! اه هنرفّه عن نفسنا شوية،بس متوسعش منك اوي وتنسي نفسك! رفهي خمس دقايق وابدأي تاني ف طاعة جديدة! كل ما تنشغلي بطاعة ربنا هيفتح عليكي ف غيرها! الطاعة مبتخلصش، عارفة يعني اي سباق ع الجنة! يعني فيه ناس حرفياً مبتنامش! اوعي تغفلي! الله يعينك

انا عارفة بتفكري ف اي! بتفكري ف فترة الحيض وانها بتفصلك عن الطاعة وتخنقك ومبتعرفيش تعملي ايه!..طيب بصي،مبدئياً كدا كلنا هذا الشخص،ثانياً ودا الأهم، دا قضاء الله فلازم ترضي بيه،ربنا ال أمرك بالطاعة هو ال قدر إنك تنقطعي عنها ف فترة معينة،فقدر الله وما شاءالله فعل والحمدلله

ثالثاً: مين قالك انك انقطعتي عن الطاعة؟ دا هي الصلاة بس! وبعض اهل العلم بيقولوا يجوز للحائض تقرأ القرءان ما لم تمسّ المصحف،فانتي ماشية زي الفل مش ناقصك غير الصلاة،ان شاءالله هنستبدلها ف الفترة دي بقرءان كتييير وذِكر كتير،وهنيجي وقت كل صلاة نمسك مصحفنا ونقرأ عشان منحسش ان الصلاة سايبة فراغ،هي تسيب فراغ واحنا نملاه بحاجة تانية عادي جداً،ووقت القيام اقعدي ع سجادتك واستغفري وادعي..القيام مش صلاة بس ع فكرة!

رمضان ف الدراسة وكمان فيه شغل بيت بيشغلني عن الطاعة؟
بسيطة جداً، هنجدد النية ^^..يعني هندرس بنية اني بتعلم عشان اخدم الأمة وارفع الجهل عن نفسي وعن غيري،وممكن افيد المسلمين بعلمي دا! كدا طول م انتي قاعدة ف الكلية او المدرسة بتاخدي حسنات ببلاش،يعني طاعة بردوبالنسبة لشغل البيت..هنجدد النية اننا بنساعد امهاتنا ودا بر والدين،واننا بنساعد ف عمل الاكل لأهل البيت يعني نقدر نقول بتشاركي في افطار صائم او مثلا لو انا عملت الاكل دا هم هياكلوه ويتقوّوا بيه على طاعة ربنا عز وجل ودا كله في ميزان حسناتي..وطول بقا ما انتي شغالة ف عمايل الاكل اذكري الله
بردو عداد حسنات شغال اهو ^^ 🌸

#منقول
#الجنة_تستحق