السلام عليكم كيف حالكم شني اموركم
طبعا كل سنة وانتم بخير ورمضان كريم ❤
اليوم بنحكو علي رمضان وعادات الليبين فيه بصراحة هادا احلى شهر
///////////
بالنسبة للولاد👱♂️
طول اليوم وهوا راقد مايندري اعليها امنين زارقة ينوضلك قبل اذان العصر بالشوي يلبس السورية في الشارع ويقعد قايمها اهم حاجة في الموضوع يبان شرط التوتة الي لابسه هههه ويمشي يصلي ويروح ويبدا عاد في العياط ساعتي وين تيشرتي وين وكان كلمتوه يبدا ايعيط صايم مايكلمني حد ايحسسك انه هوا بس صايم وبعدين يمشي يغسل هديكا السيارة لين اتصدي من الميه وهيا شهر كامل كل يوم يغسل فيها لين كبدها اطيب وبعدين يركب ياذن المغرب يمشي يولع هداكا الدخان قبل كل شي وبعدين يمشي يفطر ويصلي وبعدين يولع هديكا السيارة ويطلع هوا وصحابه واهني ^ بعد العشاء افعل ماتشاء^
//////////////
بالنسبة للبنات🧕
اتنوض الصبح اضم هداكا الحوش واتخش للكوجينة تبدا اتطيب وقلي وزيت ونار وعجينة وحالتها حالها ويد اهني ويد غادي وما تطلع من الكوجينة الا وقت الصلاة ولا علي اذان المغرب المهم توتي هديكا السفرة من جميع الانواع والاشكال ولا يخلو الامر من عياط الولد تيشرتي وين وحجاتي وين وهيا تقعد تمشي وادور اعليهم وحالتها حالة مسكينة اتحسها وحدة جاية من الصومال والمهم تبدا لابسة قفطان قديم بش كان تلبز عادي ههههه
المهم بعد مايفطرو تمشي تغسل الماعين واتسيق الكوجينة واضم حوستها واطيب القهوة وتكعمز ترتاح شوية وبعدين تلبس وتطلع تتدهور في الصالات
وحتي هيا نفس الشي ^ بعد العشاء افعل ماتشاء^
//////////
نفهمكم شني ^ بعد العشاء افعل ماتشاء^
طبعا بعد اذان العشاء كانه مش رمضان معاكسات وارقام تنحذف يمين ويسار ولبس عار ويتبع في بالسيارة ...... الخ
المهم بش مايصيرش بعد العشاء افعل ماتشاء
البنات البسو كويس لما تتطلعو انتم في رمضان البسي عباية ولبس مستور وساوي وشاحك والله ماك ميتة كانه درتي هكي واحترمي نفسك ونقصي صوتك ومتتضحكيش بصوت عالي
والولاد مش لازمك اتعاكس وتسهر في اليل اتكلم في البنات الي عاكستهم بعد الفطور اقرا قران اربح اجر احسن ماتاخد ذنوب حتي في رمضان والسيارة مش مقايلتك السيارة متغسلهاش لانه النظافة من الايمان اغسل سيارتك واطلع انته وصحابك لكن المعاكسات فوتها
//////////////
شاركوني رايكم في الموضوع واعطوني افكار الي مواضيع تانية
وكل سنة وانتم طيبين ورمضان كريم
الكاتبة: لولو حبيب
أنت تقرأ
ظواهر سلبية في مجتمعنا الليبي
Short Storyالكتاب هادا حنحكو فيه علي ظواهر سلبية في مجتمعنا الليبي ولازم احني نصلحوها نطرحو فيه الظاهرة ونعطو اسبابها وكيف نقدرو نصلحو هادي الظاهرة وننهوها من مجتمعنا في الكتاب هادا نهدرز اني والمتابعين نتناقشو كل واحد يعطي رايه في الموضوع ويساعدنا كيف نصلحو...
