ظواهر سلبية في مجتمعنا الليبي

الظاهرة 8( مصاحبة المتزوجين)

السلام عليكم كيف حالكم شني اموركم عارفة منزلش هلبا اهني الحق قريب نبدا امتحانات ومعنديش مواضيع انزلها لكن اليوم فيه بنت اعطتني موضوع وبنزله
الظاهرة هادي موجودة هلبا بنت اتصاحب واحد متزوج قصدي هيا الكلمة هادي بس اتوقف الدماغ كيف اصلا كيف وين ضميرهم ووين قلوبهم ووين عقلهم
والغلط من الراجل راهو لانه هوا الي يعاكس والغلط من  البنت لانها كيف ترضا تكلم واحد متزوج كيف قصدي خلاص ضاقت الدنيا معاش فيه الا المتزوجين
اني نعرف كل واحد متزوج يصون مرته واهل بيته مش يقعد من فرخة الي فرخة ومرته مسكينة ماتندري علي شي قصدي حتي في الدين حرام اي لو بتتزوج هداكا شرع ربي عادي لكن علاقة وضحك وسهور اليل وفلاخير انته مع مرتك وهيا بتتجوز 
وين ماشيين بيه هادا وتبو ليبيا ايصير منها
تعرفو مرة طالعة اني وبنت خالتي والله راجل مرته جنبه وشاد ولده في غمره ويعاكس بنت خالتي قعدت مصدومة واني ابديت نهزب فيه قتله والله ماتجي راجل مرتك جنبك وتعاكس وولدك في غمرك والله ماك راجل الله وامشيت
قصدي اخيه اللقطة راهو خلي عندك شوي رجولية وكان معندكش رجولية خلي عندك شوي ضمير وقلب وعقل اتفكر بيه
اني نعرف الراجل بنت وحدة تملى عينه مش مليون بنت
وفي النهاية بعد هادا كله يناري علي مرته الي بتتطلق وبتقعد تبكي ليل نهار لانه اتحبه وعالخاطر صغارها ولا بتقعد في الذل والاهانة في حوش راجلها كله عالخاطر صغارها حرام اعليكم والله حرام ياويلكم من ربي احني نحاربو في المعاكسات ومعاش نبوها يطلعونا حتي المتزوجين استغفر الله وخلاص ربي يهدي الجميع
ونصيحة لكل وحدة راجلها ايكلم اعليها ردي بالك تسكتي علي حقك واهم شي كرامتك وكان راجلك مش راجل عادي ومعنداش كرامة اعطيه طريحة بردي علي قلبك وبعدين اطلبي الطلاق الا كرامتك
معا لزيادة عدد المطلقين هههههه نبصر اعليكم مش طلاق
حتي ربي قال ^ انه ابغض الحلال عند الله الطلاق ^
انتي كلمي راجلك وكان فهم ورجع لعقله كويس وكان مرجعش شغلي انتي دماغك وديري اي حاجة ومرات راجلك مسحور هههههه
المهم اني معنديش فكرة علي الموضوع ومعنديش ليه حلول
المهم اعطوني رايكم في الموضوع واعطونا حلول للظاهرة هادي
مع السلامة💖
الكاتبة: لولو حبيب♥️