صباح الخير هاا خيرج اشو صافنة
ااصباح النور حبيبي لا سلامتك ماكو شي
زين اني مستعجل الريوك كامل ؟
اي حبيبي كامل هسة بالعجل احضرة اشو مستعجل ..؟
اي عندي مؤتمر واحتمال اتأخر انتي لاتنتظريني
اي براحتك
نزلت باستعجال كملت السفرة وصحتلة حبيبي امجد كملت الريوك
هاا اشو صيحين من صباحيات الله
صباح الخير نجوى
صباح الخير شبيج اصيحين
لا ماصحت بس كان امجد مستعجل يريد يطلع
صباح الخير نجواياتي حبيبتي
صباح العسل حبيبي ونور عيوني تعال تريك لاتتأخر
اي حبي عاشت ايدج
اني بقيت صافنة الى متى ابقة اتصنع الرضا وداشوف يومية هيج مواقف ...كمل ريوك وطلع كالعادة يومية الشغلة واني التهيت بترتيب البيت وتنظيفه مكان عدنة هواي شغل لان عائلتنة صغيرة لكن اغلب اذا مو كل الشغل علية
كملت وصعدت الغرفتي اول ماادخل مقابيلي الكنتور صاج تسكامة كبير ومن جهة اليمنة قريب عالباب الجرباية وعلى جهة اليسرى شباك كبير مطل على السطح كنت اخلي من جهة السطح عالشباك
سنادين ورد ونباتات دائمة الخضرة
لاني كنت اعشق النباتات واحس براحة نفسية
بمجرد النظر الهة
جوة الشباك مخلية قنفة كنت دوم اكعد
عالقنفة واطلع للشباك وابقى افكر او فقط اصفن مع اصوات العصافير تاخذني الى قبل اربع سنوات
كنت ادرس سادس وكنت شاطرة بطبيعتي احب
الدراسة لذلك كنت شاطرة وطلعت معدل جيد جداً
بس مقدمت مجرد عرفت معدلي ٨٥
اذكر من اخذت النتيجة كنت طايرة من الفرح
والسعادة مكنت افكر بغير شي
رجعت البيتنة كان من بيوت النجف القديمة
كان اول الدخول حوش واسع ودايرة غرف ودرج بنص البيت وفوك الغرف مطلة عالبيت
دخلت واول مافتت رفعت بوشيتي وصحت بابا بابا
طلع بابا هاا بنتي شكو احجي
كتلة بابا نجحت نجحت
كال الله يغفرلج ولا يبليج ابلية طاح كل حيلي
مبروك حبيبتي بابا ان شاء الله اشوفج بااحسن حال
بست ايدة تسلم بابا ربي يحفظك الي
بابا وين حوراء اريد افرحهة مو خطية ظلت مشغولة علية
بابا اختج بعدهة مجاية من تستلم نتيجة تجي
تعالي نكعد بالحوش عالماتجي سويلي جاي وتعالي
اي يابة تامر هسة اجيك
جبت الجاي يابة هذا الجاي وكعك
تعالي بابا اريد احاجيج بموضوع
تفضل يابة اسمعك
شوفي بنيتي محاجة الف وادور وانتي تعرفين طبعي
وتعرفين مقامج انتي واختج عندي
انتم الاثنين الهوة الاتنفسة واني ظليت بلا زواج
حتة مايوم احد يغثجن
اي يابة نعرف ربي يحفظك
بابا لاتقاطعيني اني بحكم عملي وبحكم وضعي الاجتماعي
وانتي اعرف اني رجل دين عندي موقعي يحكم ويحتم علية مااعيش مثل باقي الناس
وانتي ماشاء الله عليج واعية وفاهمة ربيتج احسن
تربية بعدج طفلة ودرسين مثل طلاب المقدمات والسطوح بدراسة الحوزة
بنتي مجاي اشوف دراستج الاكاديمية راح تزيدج
معرفة فوق معرفتج
انتي اخذتي اكثر مما تحتاجين من خلال دروس
الحوزة .
شوفي بنيتي اني مااجبرج ولايوم راح اجبرج
بس عندي رجاء ان لهنا وتنتهي دراستج
لان ذهابج للكلية راح يصير مؤشر علية اني بغنة
عنه تعرفين احنة بمجتمع بيه عقول
متفاوتة مو كل شخص ينظر نظرة ايجابية
البنت رجل دين بالكلية وانتي بعد بكيفج
لالا لا يابة بكيفك اهم شي عندي رضاك
طحت على ايدة اشمهة وابوسهة
ياريحة الجنة يابة ماكو شي عندي اهم
من رضاك وثق بطيب خاطر
ربي يرضا عنج ويرزقج خير الدنيا والاخرة
......
اني فاطمة البنت الكبرى لشيخ واستاذ حوزة كرس كل حياته لخدمة الدين بين القراءة والدراسة وعمل بحوث وتدريس طلاب و.....وتربية بنتين ماتت امي واني عمري ثلاث سنوات بعد ولادت اختي حوراء
بعدين عرفت السبب امي كان عدهة فقر دم يلازم
فترة الحمل كان ياثر عليهة بشكل
تظل ايام متكدر ادكوم وتتحرك
ويبقى والدي ايام يعتني بيهة وبينة ويقوم بواجبنة
خطية كان يتعب من الدراسة للبيت
نوب مدارات امي
بعد ولادة امي ظلت تنزف اخذهة والدي لاكثر من
دكتورة بس معرفوا السبب
الى ان قبل الاربعين توفت
كانت وفاة امي صدمة كبيرة على ابوية
بحيث بقى ملازم غرفته عدة ايام بلا ميطلع
ولايدري بينة وين ماوين
ولو هو كان مطمئن احنة بايد خالاتي
فقد امي خلة مسؤليات والدي اكثر
وزاد همة بس هو متخلة عنة ولا حسسنة
بفقدهة جان كل همة راحتنة
باعتباري البنت الكبرى كنت المقربة والمحببة الى قلبه
كان يعاملني كالصديق
درسني بالبيت دروس حوزة
مقدمات وبعدين سطوح
طلاب الحوزة يعرفون ذن المراحل ومدى صعوبتهن
بس والدي درسهن الي وحببهن الي
بوسائل مبسطة وكلما اكبر يزيد تعقيدهة
كانت كلش صعبة لكن كدرت ادرسهن
واني الحمد ذكية ورثت الذكاء من والدي
و ورثت حسن الشكل من امي
اني مكنت جميلة لكن كل من شافني مدح جمالي
طولي ١٦٠ حنطية عيوني واسعة بس من اضحك
اخدودي اتضيع عيوني هههههه
حاجبي بني طويل مرسوم رسمة حلوة
شعري النص ظهري
وباقي مواصفاتي عادية
كان يتقدمولي بس والدي مينطيني ....
يتبع....
