طلعت نادية اجت منفوشة وتتمغط
كالت اووف شنو هذا امجد لا يتعب لا يمل
الله يساعدج عليه شلون متحملة كل هلسنوات
ولو هو كال بس وياج اني هيج هههههههوطلعت ،،
اني وكفت الكمة بلعومي لاتقبل تطلع ولاتقبل
تنزل مثل زواجي لا اكدر انفصل ولا اكدر استمر
بدت دموعي لا ارادين تنزل
دخلت نجوى بسرعة مسحت دموعي وسويت
نفسي طبيعية
كالت نادية تعالي عيني ايدج بالمطبخ سوي
ريوك اني بقيت فاكة حلكي نجوى تطلب
من نادية ولا صاحتلي ولا امرت علية
شكو شنو القصة
اجت ناادية حبي تعذريني مااسوي اكل الاحد
اني مو خدامة وتباوع علية
واذا اريد اسوي اسوي بس المجودي
من يكعد واكيد يتاخر فديتة كاعد ومكعدني
لصبح ههههه هسة هو تعبان ومشت
طبعاً نجوى صارت اعصاب بس مكدرت
تحجي وامجد موجود
العرفتة بعدين ان نادية لاعبة لعب بمشاعر
نجوى تدلع وتتنعوص كدامهة
وامجد هيج كال وهيج سوة هذا الشي وين يصرف عد نجوى
اني بحياتي مشافت شي مني وشادة
وياي هنوب شوف شسوي يوومة غير اطك
خلصت اجازة امجد وبدة يداوم
وبدت معاناتنة وية نادية ساعة تشد وياي
ساعة وية نجوى
ونجوى طبعاً متقصر تعد وتصف وياهة
اني جنت اتركهم واصعد الغرفتي
اكعد عالقنفتي واباوع على نبتاتي وعصافيري
احاول اروح بعالم غير وانسة كلشي
بهاي الفترة كام يجيني امجد يوم يمي و
يوم يم نادية بيومي نص اليل ويبدي
الباب يندك او تبدي الاتصالات
جان يرفض وهي تزيد اني اسمع بس اسكت
احس كلامي اهانة الي مو نصرة
وبالاخير يلبي رغبتهة ويتركني وينزل
الحد مصار هلشي عادي عندة
مرة كاعدة بالمطبخ طبعاً الطبخ علية هذا شي
منتهين منة شكد حاولت نجوى وياهة
مفاد رادت تكسر خشمهة بشغل بس
نادية جداً صلفة مااصور اكو احد يكدر
يغلبهة انسانة عجيبة بين الدلع والتغنج والتموع
والكلام المعسل يطلع السانة طولة متر
مو السان بل سيف بتار
محد ياخذ منهة لاحق ولا باطل
كاعدة وجان تدخل تتموع كدامي تحاول
تعكرصفوتي. وكالت ياالله اشو اني دايخة
ومالي نفس اكل معقولة
اطلع حامل ههههههه
انتي شدكولين هاي اعراض حمل لو لا
ولو انتي شمعرفج هو انتي شايفة ريحة الطفل
اني حجايتهة سجينة ونبتت بنص كلبي
شكد جانت تغثني نجوى بس مثل مغثة
نادية مشفت ولا راح اشوف
ردت اطلع جان تدخل نجوى باوعتلي بغضب
انتي الى متى اظلين ساكتة انتي شنو ماعندج احساس كرامة
اني مو ماعندي احساس بس اني عندي دين
واعتبر ردي عليهة اهانة الي لان مو بمستواي
اني كلت هيج ومااحس الة نادية طافرة علية
ولج شنو اني مو بمستواج يانص مرة
لو بيج خير ماامجد بوس ادية حتة اقبل
بيه يكلي ما ساعدتني ماعدهة مشاعر طابوكة
نايمة جواي ونهدت علية من شعري اشلع
وعلى بطني ركع اني اول مرة بحياتي انضرب
بس محسيت بوجع الضرب بكد ما وجعني كلام
امجد انهاريت وكعدت بلكاع
ونجوى هدت على نادية وصارن مالخ من الروس
وبشافعات يلة خلصت العركة
اني صعدت بغرفتي وبديت اجمع غراضي
حسمت امري بعد مالي بقاء بهذا
البيت اجة امجد دخل بالبداية
كالمعتاد عالنادية شوية وكبت الصيحة
طلعت اباوع من الصالة الكبال غرفتي عالجوة
واشوف امجد هاد على نجوى ليش
هيج كاتلة نادية ونجوى تصيح وامجد يصيح
اخر شي كال مو انتي اكلتي راسي
حتة ازوج على فاطمة ومتي حتة تخليني
اكرهة هاي اني ازوجت ليش شديتي
وياهة كالت تروح فدوة الفاطمة اربع
سنوات مسمعنالهة صوت وماطلع منهة بس
الطيب الة هاي جايبهة مادري منياشرع
كال هاا هسة فاطمة طلعت زينة وقبل شجانت
بهاي الهوسة والحجي لبست واخذت جنطتي ونزلت
كان قرار محسوم بس لازم اكسر حاجزالخوف
لازم اجمع قواي واحجي واواجه
نزلت همة كلهم باوعولي وسكتوا
كتلة الله يساعدك امجد
هلة فاطمة هاي شبيه وجهج وشنو هاي الجنطة
عادي ماكو شي مو مهم جراح البدن بكد مامهم
جرح الروح هاي الاثار يوم يومين تروح
بس كلي هذا واشرت على كلبي شيطيبة
شنو هلحجي شبيج انتي منو وياج
نبت نجوى هاي مرتك الشفية نهدت عليهة كتل
باوع بغضب النادية ولج هاي شمسوية
وجاية ساعة تتمسكنين
اني شعلي مدكول الاطمة هي ونجيوة نهدن علية
لان كلتلهن اني حامل
شنو انتي حامل
اي اني حامل ويردن يوكعن ابنك
ورجعت الهوسة من جديد اني خليت وطلعت
طبعاً والدي منتظرني بالباب اني خابرتة قبل
لا انزل
طلعت ورحنة مشاف وجهي جنت مبوشاية
وصلت حاولت مااخليه يشوفني بس مكدرت
من شافني كام بس يصيح شبت من العصبية
هاي شنو ولج شمسوين بيج شنو ماعندج
ابو اني ميت ويضربوج اليوم امجد امسح بيه
الكاع والله وذات الله بعد يحلم تكونين اله مرة
راد يطلع وهو عصبي خفت لايصير بيه شي
واموت بس بابا يصير بيه شي بسببي
كوة هدئتة وكتلة بعد امجد خلاص انتهة من حياتي ماكو داعي للمشاكل انت باشر بانفصالي احاجيه واني ابجي وهو هم حظني وكام يبجي اني السبب عبالي ادمي وزوجتج
الة طلع مو رجال ولا كد كلمتة
لايابة انت شعليك اي احد تسألة عن استاذ امجد
يحلف براسة بكد ما انسان محترم بس
بعد متعرف معدن الانسان الة تعاشرة
والدي بدة يدز ناس على امجد ...
يتبع....
