والثقر الباسم كم كان جميل
رغم اثار الزمن والحية البيضاء من قهر الدهر
لكن كان اجمل وجه بعالمي
كال هاا باباتي يانور بصري
ليش هلتفكير وليش هلذبول ادري نريد
نزوجج لو نوديج اعدام
اني ضحكت
كال اي فطومتي والله اشتاقيت الهاي الضحكة
ولج صار اسبوع كولي خطية بابا
خل اشوفة يريد ضحكة جاي كهوة
كتلة ياا بابا سودة علية....
كتلة ياا بابا سودة علية صح اني نشغلت بفكري
عنك ونسيت مواعيد كهوتك المعذرة يابة
بابا اني مو على الكهوة ولا غير شي
بس اني نشغل بالي عليج خلال هذا الاسبوع كليلي
شنو هذا الارهاق الباين على معانيج
ادري هو تفكير لو عركة
هههههه لايابة بس شي صعب فوق تحملي
ليش بابة ادري موديج بجبهة لو راح ازوجج
يابة انت سبب ارهاقي وتعبي
اني ؟!!!!
اي يابة انت
ليش؟!!
يابة اني مااكدر افاركك شلون واحد يفارك روحة
واخاف يطلع ميشبهك اذا ميشبهك
مااكدر اعيش وياه واخاف انفصل واسببلك
باساءة
ااااه كل هذا شايلة عقل فطومة حبيبت بابا
تعالي بابا مو هيج تنقاس الامور
صح انتي تحبيني بس ميصير
اي احد عكسي تختلفين وياه
الناس اطباع وكل انسان وطبعه واخلاقه
اكيد ميشبهني بس مو معناهة موزين
هسة انتي هذي المكتبة شكد تحبيهة
اااووو يابة كلش احبهة هذا عالمي الخاص
زين من تقرين كل الكتب متشابهة بالشكل والمضمون
لا يابة مختلفة
هااا شفتي مختلفة بس كل كتاب ياخذج
العالم خاص كل كتاب اله نكهة كل كتاب
اله انجذاب خاص
كذلك حال البشر كل شخص اله طباعه
وصفاته التميزه عن غيره
وبالنسبة للفراق اني اشرط عليه كل خميس
وجمعة انتي يمي اني مااكدر على فراقج
واختي ؟!!
اختج شبيهة ؟
مااكدر اتركهة بعدهة زغيرة لازم اكون وياهة
خصوصاً بهذي الفترة هي مراهقة
وتحتاج نصح ومساندة
فطومة انتي مالج دخل بااختج اني موجود
ماتركهة مثل ما تركتج لاتخلينة حجة وعذر
هسة شدكولين مو متت من الجوع انطيني جواب
وغديني
ياا بعد عمري يابة هسة اصبلك
تعالي وين راكضة انطيني جواب
هااا بكيفك يابة الشوفة مناسب سويه
عالبركة الله بنيتي
الحد هسة اذكر مرار ذيج اللحظة من
شفت دموع بابا الكنت مااشوفهة بس
بايام عاشوراء وعزاء الائمة عليهم السلام
كانت دموعه بركان بقلبي
حضني وبدت قطرات دمعاتهة تسقط
على خدي حسيت بيهة حارة تلذع
........... ....
مرت الايام وتقدم امجد اجة هو واخته
امجد يم والدي
وهي دخلت علينة يمي اني واختي
طبعاً والدي محب يبلغ احد
الة تم النظرة الشرعية ويصير توافق
وبعدين نسوي كعدة تعارف مع الاقارب
طبعاً اول مدخلت اخته كانت مبوشة رفعت
البوشية كانت امرأة ثلاثينية بيضة
طويلة ذات قوام نحيل بس كان مبين
عليهة الحدية بالكلام والجدية ومكانت
اتجامل
طبعاً اخذتني نظرات وتفحص وكاني
سلعة واكيد ذبت كم كلمة بوقتهة مافهمتهة
بحكم ماعندي اي اختلاط اجتماعي
فمكنت اعرف شتقصد
بعدين عرفت كانت تنتقص مني
كعدت ربع ساعة وبعدين والدي صاح
بابا فطومة البسي العباية وتعالي
اني بوقتهة جمد الدم بجسمي بحيث
متحركت ظليت جامدة
جان نجوى اخت امجد صاحت شنو عيني
وين صفنتي قابل ايظل اخوية منتظر كومي عيني كومي
كلماتهة كانت مثل الصفعة نبهتني
اني هماتين كمت بسرعة طلعت لبست
العباية ورحت عالمكتبة هي مكتبة هي استقبال
الضيوف لكيت بابا منتظرني بالباب
وكان حزين بس مسيطر كال تعالي باباتي ادخلي
مكنت مخلية شي لان مااحب المكياج
وبحكم ماعاقدين ميصير هلشي
بس حجاب وعباتي
بس كنت كلش خجلانة لان اول مرة راح رجال
ينكشف على وجهي
دخلت كلت السلام عليكم
هو بسرعة وكف وكال وعليكم السلام
كان رجل طويل ابيض جسمه متوسط لاسمين
ولا ضعيف عيونة عسلي حتة حاجبة
نفس لون عينه وخشمه طويل بس مو نشاز
لحية بسيطة شي على شي مرتب والنظارات
الطبية مزيدة جماليته
كنت ارجف هذي المواصفات بعدين ركزت عليهن
اني بوقته مشفتة بس لمحة بس بالخطوبة
حفظت شكله
هو كان خجلان بس مو كلش بقة
يتكلم مع والدي ويضحك
بس اني غايصة بالعباية واظم بوجهي
فوالدي كال باب طلعي راسج قابل جاي حتة يشوفني
فاني ضحكت بس علكيف وهو هماتين ضحك
كال باوعي عليه ارفعي راسج
اني هيج شي قليل رفعت عيوني
شفتة يباوعلي بتعجب جان راستن دنكت راسي
كال اني راح اتركم خمس دقائق
اني واكف باب المكتبة
نص جسمي يمكم جان امجد يضحك كال
خوب شيخنة ابقة بعد عليمن طالع اذا نصك
يمنة
ضحك والدي كال لا ميصير لازم انطيكم نص
مجال للتعارف وضحك وطلع
جان يكول اني امجد تعرفين اسمي وتعرفين
عملي بس المتعرفيه طبعي
اني احب الترتيب واحب النظافة بل مولع بيهن
احب شريكة حياتي تكون مرتبة وواعية وذكية
ذات هيئة جميلة وشكل جميل
وانتي ماشاء الله تبارك الذي صور فابدع
بس بعد مسمعت صوتج
اني طبعاً مااحجيلكم بوقته شصار بيه
مادري صخنت مدري هبط ضغطي
اول مرة اكابل رجال وفوكاهة يتغزل بيه
وينك شيخ حسن تعال انقذني
جان يقطع صمتي وكال خاف خرسة يمعودة
وضحك ..
كتلة لا مو من دخلت سلمت عليك شلون خرسة
جان يكول اللهم صل على محمد وال محمد
واخيراً حجيتي مو شيخ حسن هسة يطردني
اريد اتعرف عليج قبل لا انطرد
