أجنحة الشيطان

بارت الثاني

#أجنحة_الشيطان
#بقلمي_غفران_الزبيدي

#البارت_الثاني

ريم :- اسمي ريم عمري 30 سنة تزوجت و عمري 15 سنة ابويه جان يخلينه نكمل ابتدائية و بس و من نصير 15 سنة لازم نتزوج اني و خواتي ..... جان قاسي ويانه كلش و يضربنا و يهينه بحجه انو ديربينا عالصح و انو البنت مثل الزجاج اذا انكسر ما يتصلح... جان دائما محسسني اني و خواتي احنا على غلط و ممكن نحب و نسوي علاقات باي لحظة انفلات رغم انو العشيرة كلها جانت تحلف برأسنا و باخلاقنهو ما عدنا اي غلط لو زله بس عقليته المتخلفه جانت هيج لحد ما تزوجت... اني كأي بنت عبالي دشوف فارس احلامي اللي يخلصني من هذا الجحيم بس.......

ما كدرت المرأة تتماسك اكثر و نزلت دموعها و اني حيل انقهرت و لزمت ايدها و كتلها :- كملي اذا تكدرين
ريم :- زوجي بمعاملته السيئة الي حولني خدامه عنده ضرب و اهانه و مسبه رغم اني الله شاهد ممقصره بشيء تجاهه خلفت 3 اولاد و اني بفترة حملي شفت الويل ومن جبت كذلك والله ما تهنيت بيوم واحد ابداََ وياه

ليليان :- زين و اهلج و اهله شنو موقفهم؟

ريم :- اهلي ميقبلون بنت مطلگه او بالاصح ابويه ما يقبل واهله محد يكدر يحجي وياه شيء لان جان معيشهم

ليليان :- و ما حاولتي تغيرين منه شيء؟

ريم :- حاولت و سويت و اتفننت و ما يفيد يتقرب مني ليأخذ اللي يريده و بعدها ما يشوفني كدامه اصلا

ليليان :- لا اله الا الله.... طيب و شنو التغير هسه؟

ريم :- اولهم ابويه اتوفى و بقية اهلي يريدوني حتى اخواني كالوا تعالي و ثانياََ الاولاد كبروا و اصغر اول ابتدائي هسه و اني تدربت عالخياطة يعني اكدر اصرف على نفسي

ليليان :- تدرين هوايه تأثرت بكلامج يالله شلون كدرتي تتحملين كل هذا شلون! ؟ و عفيه اهلج ما يكولون خطيه هاي البنيه شنو ذنبها تعيش هيج و بإي حق!؟

ريم :- الله وحده يعلم 💔

نزلت دموعي عليها و حسيت نفسي اني داعيش بمكانها محد يكدر يتخيل شنو حسيت وكتها و شلون كسرة خاطر بداخلها و اللي داشوفه كدامي امرأة من حطام تتأمل المستقبل اللي راح تعيش بيه بكل بساطه ويا اولادها
خلصنه حجي اني وياها و طلعت الحرمه من مكتبي و بعدها طب حازم بنت عمي 😒 و بعد السلام والكلام

ليليان :- اييي شنو تشرب شطلبلك؟

حازم :- ايي ليلو يعني سويتي اللي برأسج و فتحتي المكتب

ليليان :-ولو ابن عمي ماكو مبروك ؟

حازم :- و ع شنو عيني؟ نزلنا رأسنا بالارض و بالأخص اني

باوعت باستهزاء و رفعت حاجبي و كلت :- وليش عاد؟

حازم :- لعد اني انفضح بين الشيوخ و اولادهم و يكولولي خطيبتك تشتغل محاميه ليش خلصوا الزلم