أجنحة الشيطان

البارت الثالث و العشرين

#أجنحة_الشيطان
#بقلمي_غفران_الزبيدي

#البارت_الثالث_والعشرين

علي :- ليليان اختاري يا اني يا سيف

رويدا :- علي ما داشوف وضعها كافي اسكت

علي :- اذا اخترتي ابوج تعوفيه ومن يجي ابنج تذبيه عليه و نطلگج اوك عادي اقبل.... واذا اختاريتي سيف تنسين عندج أب

ليليان :- شنوووو

صفنت على أبويه و حسيته مو ذاك الاب الحنون الجان مساندني طول حياتي حسيته غير انسان و امي وأخويه صافنين و مصدومين كذلك

كمت وكفت على حيلي و تجرأت و حجيت وجهاََ لوجه ويا ابويه
ليليان :- هههه تدري شغلة.... انت حرمت سيف من اهله و هسه تريد تحرم ابن سيف من أمه

ما حسيت الا ضربني كف فر رأسي فر و هي ضربة وهي صرخة

علي :- روحي... روحي ولي من خلقتي

بعد ما استوعبت الصدمة طلعت ركض من البيت ما عرفت شصار بعدها بس كلت بداخلي الله يسامحك يا بابا شكد ناوي تكسرني بعد 💔

رحت رجعت للمستشفى و شفت شهد هناك وأمير واكفين بانتظاره يخرج من صالة العمليات

تقدمت شهد و حضنتني واني ما انطيت اي ردة فعل

شهد :- الله يصبرج حبيبتي ان شاء الله يگوم بخير و سلامة

ليليان :- امين

و رحت كعدت و انتظر وياهم..... مر ساعة و بعدها طلعوه من صالة العمليات ركضوا امير و شهد يشوفوه واني ظليت جامده بمكاني يمكن أصابني البرود  من كولشي حواليه لدرجة انه اشوف سيف طالع من الموت ولا ابالي...

سمحوا لشخص واحد انو يشوفه بس طبيت اني و كعدت يمه و كلت :- سامحني سيف عاللي راح اسويه بس مجبورة والله

كمت من يمه و طلعت و شفت عبدالرحمن و تواجهنا و كال :- اللهم لا شماته بس من جان تحت حمايتي ما جان يصيرله شيء... لا و القوي بالموضوع انو ابو المرأة اللي ترك الشغل بسببها هو سبب وضعه

ليليان :- ههه انت خاله وتحجي هيج بس تريد الصدك كلامك صح بس نسيت شغلة

عبدالرحمن :- شنو هي؟

ليليان :- انت مجرم و انت اللي علمته عالاجرام و وصلته لهاي الحالة و حرمته من انسانيته و حياته و أحلامه و خليته يعيش على دم الناس و نسيت كلنا لله راجعون و هناك قيامة و حساب

و عفته و طلعت و رجعت للبيت لكيت شكو غراض يحتاجها سيف بالمستشفى و خليتها بجنطة و دزيتها مع السايق و رجعت اني لميت اغراضي و بقية ذهبي و فلوسي و طلعت من البيت بسيارتي و كلت هاهيه لا سيف ولا ابويه بعد ما اريد بشر
لان محد حس بحالي ولا احد رحمني وكلما اكول على شخص زين...... بالتالي يصدمني