#معجزات_الحب
(1)
الكاتبه:Beba pink
واتباد "BebaPink89"
روايات العنود Beba Pink
في وحده من زناقي " قُرجي" الضيقه كان الحاج صالح فاتح السياره و يصلح فيها ، لحظات و قام راسه و بصوت عالي قال ..
صالح : ترا اعفسي ع الفرينو يابنت ..
صفاء تضغط برجلها بالقوه عدة مرات و رجلها التانيه برا من السياره ..
صالح حط المفتاح من يده و قال : كويس كويس اهي صلحت و الامور مليحه ..الكاتبه:Beba pink
صفاء طلعت من السياره و نزلت راسها جيهة المحرك و قالت ..
صفاء : ياودي تحسها مزال مسمعه السياره وما صلحت ..
صالح : اي مزال تبي هلبا .. المهم تتحرك يابنتي ..
صفاء : تي كيف يابوي راهو الشماعي راقي عليهم الزيت ، يعني المحرك باع و روح ..
صالح : المهم تتحرك ماعندي باش نصلحها .. توا نهاية الشهر تخلصي و نصلحو اللي نقدرو عليه ..
صفاء : تم يا حويج ..
صالح : هيا سلم بنتي بري لأمك و اختك قوليلهم يلا يسقدو روحهم بيش نرفعكم لحوش جداكم ..
هزت صفاء راسها و هي بتخش للحوش مرت من قدامها ميار بنت جيرانهم ، راكبه في سيارتها الفخمه ، درست قدام حوشهم و نزلت شبحت لصفاء من فوق للوطه بتقزز .. قامت حاجبها و خشمها و تلفتت تبي تخش للحوش .. بينما صفاء قعدت تشبحلها و النار فعيونها ..
صفاء : اهي جت الغوله ..
ميار تلفتت شهقت بدلع و قامت شاربها الفوقي بتقزز و قالت : زعما فيه غوله اكتر منك ..
صفاء اشرت عليها : إيه انتي ..
ميار ضحكت بدلع و قالت : هههههه المهم وقت يكلموني يعرفوني انثى مش انتي .. الخلقه بنت و الاخلاق ذكر حتى اللي يشوفك مايعرفك بنت ولا ولد ولا من هادوكا الجماعه هههه
صفاء بصوت حاد : بتصكري فمك ولا نجي نسكرهولك .. شكلك مزال ماشعفتيش من اخر طريحه ..الكاتبه:Beba pinkالكاتبه:Beba pinkا
ميار خافت و رعشت خاصة بعد ما تذكرت طريحة صفاء ليها ..
خبطت رجلها ع الارض بعصبيه و خشت لحوشهم و سكرت وراها الباب ..
بينما صفاء عضت اصبعها بقهر و خشت لحوشهم عشان اتنادي امها و اختها زي ما وصاها بوها ..
صفاء خشت و هي تسب بصوت واطي ..
سلوى : شن صار صلحتوها السياره ؟
صفاء قارنه حواجبها و العصبيه واضحه عليها ..
سلوى : خيرك صافي شن فيه ..
صفاء : هالتافهه ميار الكلبه الفصعونه .. تبي طريحه اقسم بالله لو نحصل عليها نفعصلها رقبتها بين ايديا ..
سلوى : اوووه منك انتي و ميار من لما صغار تتعاركو .. امتى بتعقلو ..
صفاء و هي تقلد في مشية ميار : مانحبهاش مشيتها تتلوى زي الحنش اللي عنده اسهال و ع اساس بنت عز و تدلع بسيارتها .. اوووف هالزناقي اللي يغمو القلب حتى جنان مافيش .. حوشها مقابل حوشنا غصبا عني مضطره نشوف خليقتها هي و سيارتها اللي ادرس فيها امقابله بابنا .. يارب يمشطوها منها ..
سلوى : حي خيرك .. معقوله هكي تدعي عليها .. خافي ربك ..
صفاء : سكري فمك انتي يا زمزاكه .. ولا نسيتي لما تعاير فينا و تقوللنا بوكم بياع الخضره "و باااابي دكتووور
" قالت كلمتها الاخيره و هي تقلد في صوت ميار "
سلوى : مانسيت .. بس ربي يهديها و خلاص ..
صفاء بي غل : لكن شوفي الفرق بينا و بينها .. هي بنت فاشله و تافهه و عايشه عاله على بوها و اني نخدم و بشهادتي و نعاون في بوي .. اني الولد اللي بوي ماجاباش ..
سلوى : ربي يحفظك لينا صافي فعلا انتي عماد الحوش .. بوي مش مسميك الا راجل الحوش ..الكاتبه:Beba pink
صفاء : خلينا توا من هالكلام و بري جهزي روحك انتي و امي صلحناها السياره ..
صفقت سلوى بفرح و مشت تجري لامها .. بينما صفاء قالت بصوت عالي ..
صفاء : ردي بالك تحطي حاجه في خليقتك نوريك راهو .. اغسلي وجهك و يلا ..
سلوى من بعيد بملل : بااااااهي ..
خشت صفاء حطت عليها عبايتها و وشاحها بشكل مهمل ، و قفت ع المرايه و قعدت تشبح لملامحها و هي تتذكر في كلام ميار ..
""هههههه المهم وقت يكلموني يعرفوني انثى مش انتي .. الخلقه بنت و الاخلاق ذكر حتى اللي يشوفك مايعرفك بنت ولا ولد ولا من هادوكا الجماعه هههه""
حطت صفاء يدها على بشرتها الشاحبه اللي واضح انها في عمرها ما اهتمت بيها ولا حتى رطبتها في يوم .. شوي آثار حبوب مع حواجب بشكلهم الطبيعي شفايف جافه و عيون عمرهم ما شافو كحل .. ركزت شوي في وجهها ..
صفاء : شكلي في البدايه لما حملت بيا امي كان الدكتور يقوللها ولد .. غير في الاخير انقلبت بنت ..
حولت نظرها من وجهها لجسمها .. حركت ايدها و جبدت العبايه من ظهرها و ضيقتها عليها ..
صفاء : جسمي الحاجه الوحيده اللي تذكر فيا اني بنت .. بس وجهي عليا الطلاق الا ولد هي ..
قطع عليها نقاشها عن هويتها صوت بوها و هوا ينادي فيهم .. ردت عبايتها زي ماكانت و طلعت ركبت بسرعه مع عيلتها عشان يمشو لحوش جداهم ايباتو معاها ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
بينما ميار غيرت حوايجها و قعمزت في دارها تتصفح في النت و في حجرها قطوستها ..الكاتبه:Beba pink
ولما سمعت صوت سيارة جيرانهم ولعت بصوتها المزعج .. حطت القطوسه ع السرير و وقفت تراقب من الروشن ..
ميار بصوتها الرقيق : اووووف امتى يكمل حوشنا الجديد و نطلع من هالمكان .. معاش نتحمل اني ازعاج سيارتهم تقول جرار .. ولا بنتهم المستذكره صفاء .. حسوده و عنيفه و بيئه .. بنت الخضار .. تافهه ..
تابعتهم بعيونها لين اختفو و رجعت لسريرها .. لحظات و خشت عليها امها ..
فاطمه : شنو حبيبتي .. بتتغدي ؟
ميار : لاااا ماما مانبيش .. شوي و بنطلع ..
فاطمه قربت منها و باستها: وين بتطلعي بنيتي ..
ميار : موصيه على حوايج للشتا من برا .. بنشوفهم وصلو ولا لاا ..
فاطمه : كان شريتي من هني .. فيه ك..
قاطعتها ميار : لااا مامااا .. المحلات هني اخخخي ..
فاطمه وقفت جنب الباب : زي ماتبي يا عمري .. يلا اني طالعه مع صاحباتي نتلاقو ع العشي ..
ميار : ماما ..
فاطمه : نعم ميموو..
ميار : امتى بتكمل الفيلا متعنا نبي نطلع من هالمكان ..
فاطمه : قريب ان شاء الله .. يمكن شهر و نحولو ..
ميار شقلبت عيونها فوق و قالت : اووففف هلباااا ..
فاطمه قامت كتوفها : الله غالب .. يلا .. سلام ..
ميار : بااااي ماما ..الكاتبه:Beba pink
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
صفاء 23 سنه البنت الكبيره للحاج صالح .. الراجل اللي حالته على قده .. و لانه ربي ما عطاه اولاد ربى صفاء كأنها ولد .. اكتسبت منه صفات الرجوله و قعدو تصرفاتها و حركاتها و كأنها ولد رغم جمالها البسيط اللي يبي شوي اهتمام عشان يطلع و يبرز .. صفاء تخدم في شركة للأدويه.. و اختها التانيه سلوى عمرها 20 سنه عكس اختها هاديه و ما تحب المشاكل و تحب تهتم بنفسها و ب انوثتها تحب ولد خالها من لما صغيره بس هوا يعامل فيها كانها اخته و مش حاس بمشاعرها تجاهه ..
ميار البنت الوحيده على ثلاث اولاد .. خوتها كلهم عايشين برا دكاتره و مهندسين .. بوها دكتور كبير و عنده مصحه و حالته الماديه فوووق الريح .. و هي نقطة ضعف بوها يحبها و ما يتحمل فيها دقة الشوكه .. ميار في عمر صفاء .. قاريات مع بعضهم و مايحبوش بعضهم ابدااا .. ديما مشاكل و عرايك في الشارع و ديما الغلبه تكون لصفاء لانها زي الذكوره ..
ميار عكس صفاء في كل شي .. مليانه جمال و انوثه و دلع و دلال ، صوتها مشيتها حركاتها تصرفاتها قادره بيهم تحتل قلب اي راجل مهما كانت رزانته .. و من ضمن الحاجات اللي فيهم عكس صفاء هي انها فااااشله في حياتها .. لا نفعت في دراسه لا في عمل ولا شي .. متكله على بوها و بس ماعندها اي هدف غير اللبس و الماركات .. يعني باختصار بنت دماغها اجوووف .. بنت طبقيه لابعد الحدود تعامل في الناس على مظاهرهم و مادياتهم و بس !
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
في الليل كانت سلوى تغسل في الماعين في حوش جدها .. و في الصاله صفاء و بوها و ولد خالها مقعمزين يهدرزو على السيارات و اسعارهم و طروفهم ..
صفاء حطت طاسة الشاهي الخضره ع الارض و قالت : تي يا عبدو طروف السيارات في السوق كلهم صينيات يمشيك شهر و بعدها تجيه الحاله و يوقف ..الكاتبه:Beba pink
عبدو : انتي شن تبي سيارتكم بالزبط ..
صفاء : كلها تبي .. نمشو بيها بصحة الوجه ..
عبدو : تو نشوفلكم رابش اسعاره مليحه و اللي نقدر عليه نجيبه ..
صالح يضحك : الرابش اغلى من الجديد ره
صفاء : فكني منهم يمشو في بضايعهم ضروري يعطولك معاه طروف تانيه انت ماتبيهمش اصلا ..
ضحك عبدو على كلامها ..
بينما صالح وقف : يلا اني بنروح توا .. غدوه بنوض بكري بنلحق على سوق الخضره ..
صفاء : حتى اني بنمشي نرقد نعست ..يلا تصبحو على خير ..
ودعهم صالح و مشى روح .. بينما صفاء خشت عشان ترقد جنب امها .. و عبدو خش للمطبخ بيشرب ..
انخلعت سلوى لما شافت عبدو خاش ..
عبدو مبتسم بعفويه : خلعتك ..
سلوى ارتبكت و قلبها ينبض من ابتسامته اللي تموت فيها : آ.. اي .. قصدي عادي ..
عبدو فتح الدولاب و طلع طاسه عباها ميه و قعد يشرب .. و سلوى مركزه في حركاته و في تفاصيل وجهه حتى و هوا يشرب و عيونها قلوب ..
عبدو ما انتبهلها ولا حتى حس بنظراتها العاشقه ليه .. حط الطاسه و طلع .. بينما سلوى حطت يدها على قلبها و فتحت الروشن طلعت راسها تتنفس حست روحها تبي اكسجين .. و كأنه عبدو سحب كل الاكسجين معاه و طلع ..
خدت نفس و اتكت بظهرها ع الحيط و قالت في خاطرها ..
سلوى : لعند امتى يا سلوى بتقعدي تحبي فيه من طرف واحد .. ضروري عبدو يعرف بالحب اللي في قلبك .. ضروري تتحركي و تنشطي قبل ماتجي اللي تاخده منك و انتي تتفرجي .. بس .. اني خايفه .. افرضي لو رفضني ولا صدني .. لالالا مش حنقدر نعترفلا بشي .. نقعد ب احترامي افضل من اني انطيح من عينه ..
سكرت سلوى الروشن و خشت للدار اللي فيها امها و اختها ..
القت امها راقده .. بينما صفاء تقيم في شعرها كعكه فوق ..
صفاء بصوت واطي : كان امي مش حالفه عليا ما نقص شعري راهو من زمان حلقته رقم3 ..الكاتبه:Beba pink
سلوى تساوي في فراشها : شعرك اصلا هادي الحاجه الوحيده اللي مخليتنا نتذكرو انك بنت ..
صفاء وقفت تطفي في الضي : اصلا علاش ربي خلقني بنت .. اااخ لو جيت ولد ..راهو مش هكي حالنا ..
سلوى : شن درتي يعني ..
صفاء : هلبا حاجات ..
سلوى : مش حنسألك شن هما لاني نعسانه و نبي نرقد .. مانبيش يجوني هالات و يخرب شكلي ..
صفاء : لانك تافهه و سطحيه و تفكري في بشرتك و الدوه الفارغه ..
سلوى قامت راسها و سنداته على يدها و قالت بصوت واطي : توا لما تحبي و تنحبي حيقعد كل همك انك تكوني بمظهر حلو قدام حبيبك ..
صفاء ضحكت لين عيونها دمعو ..
سلوى استفزتها ضحكت اختها و قالت : الحق فيا اني اللي دايرتك اختي و نهدرز معاك زي الخوات ..
قلبت سلوى وجهها بعصبيه .. بينما صفاء هديت شوي من ضحكها و شافت للسقف و استرجعت كلام سلوى و قالت في خاطرها : نحب و ننحب ..
لحظات و رجعت تضحك مره تانيه على تفكير اختها لانها ولا في عمرها فكرت تحب او انه حد يمكن يحبها في يوم .. هي تضحك و المستقبل يضحك عليها من جهه تانيه !!
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
عبدو ولد خال صفاء شاب محترم و كويس عمره 27 سنه
متربي مع جدوده لانه امه توفت لما ولداته. وبوه توفى بعدها بسنوات . عايش في حوش جدوده حتى بعد توفو .. و عمته ام صفاء و سلوى يجو يباتو معاه مره مره و يضمو في الحوش و يزورو فيه و يشوفو فيه شن ناقصه ..
كانت الساعه 12 ليل لما اتصل بيه صاحبه و رد عليه ..
عبدو : اووو عليووه ..
علي بصوته الرازن : عبدو شنجو ..
عبدو : مليح ..
علي : اسمعني شكلي بنبات عندك اليوم ..
عبدو : ان شاء الله خير ..
علي : السياره دارتها بيا قريب من حوشكم ، و الوقت ليل مانبي نتعب حد معايا .. تستقبلني ولا نبات في سيارتي ؟
عبدو : تي عيب ياراجل .. تعالى تعالى الحوش حوشك..
سكر عبدو التليفون و هوا يحك في لحيته ..
عبدو : نسيت انه عمتي و بناتها في الحوش .. يلا عادي .. هوا بيرقد في المربوعه و هما الداخل .. مش مشكله ..
ربع ساعه و وصل علي و خش للمربوعه قلع جاكته و قعمز بتعب ع الصالون ..
عبدو : نجيبلك عشي ..
علي : لالا متعشي ..
عبدو : خيرها سيارتك ..؟
علي : مش عارف..
عبدو : تي بيعها ولا لوحها عنك انت راجل ربي ناعم عليك جيب موديل جديد و ارتاح منها ..
علي بشرود : ايه ..
عبدو : يلا نوض ريح روحك اهو فراشي واتي ارقد فيه و اني توا نجيب بطانية تانيه و نرقد ع الصالون ..
هز علي راسه و سكت .. زي عادته كلامه قليل مايحبش كثرة الكلام ..
علي هوا صاحب عبدو عمره 28 سنه تاجر ذهب و عمله شخص عملي لأبعد الحدود شخصيته قويه و مايحب يكرر كلامه ولا يحب حد يقوله لا .. عايش بروحه في حوشه بعيد عن حوش العيله اللي قعد فاضي بعد وفاة بوه وجدوده و زواج امه .. يمكن من اكثر الاشياء اللي خلاته يتعلق بعبدو هوا تشابه قصتهم مع اختلافات بسيطه .. الوحيد اللي يحبه لله مش عشان مصلحه زي باقي الشباب اللي يعرفهم ..
يعني حياته شبه فارغه من البشر و العلاقات الاسريه .. حياته كلها عمل .. عمل و بس ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
في الصبح الساعه 9 فاقت صفاء اول وحده زي عادتها .. و هي طالعه من الدار مرت من قدام المدخل شافت منظرها ..
كانت لابسه لبسة حوش مخلطه كل قطعه من توتة شكل ..السروال ازرق و الماليه صفرا و منظرها مبهدل و الكعكه شبه طايحه و خصلات من شعرها ملويات و مشفشفات ..
صفاء بصدمه : بسم الله .. انخلعت من خليقتي ..
تنهدت بي لا مبالاه و خشت للمطبخ بتحط الشاهي ع النار قبل ما تخش الحمام وتغسل ..
بينما عبدو في الوقت هدا فاق من نومه و خش للحمام عشان يغسل .. الكاتبه:Beba pink
ولعت صفاء النار ع الشاهي و طلعت بتخش للحمام بس تذكرت انه عبدو مزال مافاق عشان يجيب خبزه ..
صفاء : نخش انوضه هالحيوان مزال ماجابلنا خبزه .. و اني الجوع بياكلني ..
