#معجزات_الحب
(9)
روايات العنود Beba Pink
الكاتبه:Beba pink
واتباد "BebaPink89"
كانت فاطمه في الصاله تمشي و تجي و تدعي لربي انه بنتها تكون حيه و مافيها شي .. لعند ماسمعت صوت الباب انفتح و موسى ينادي عليها .. وقتها فاطمه رجليها ما رفعوها قعمزت على الارض و هي تبكي خافت من اللي بيقوله ليها موسى عن بنتها.. لعند ما بان عليها موسى و وراه ميار بصحتها و مافيها حاجه ..
ميار اول ماشافت امها قعدت تبكي وجرت لحضن امها و قعدو يبكو و دارو عزى ..
فاطمه و هي تبكي : الحمدلله ربي رجعك ليا .. الحمدلله ربي رجعك ليا ..
بينما ميار تحضن في امها و تبكي .. حست بالراحه و الامان في حضنها .. و موسى كان يشبح فيهم و دموعه ينزلو تمنى لو حضناته بنته بالطريقه هادي لحد الآن مش عارف سبب نفورها منه يقول في خاطره و يحط في الاعذار ليها و يقول يمكن خايفه او مأثر فيها الاختطاف ..
قعمزت فاطمه ع الصالون و ميار في حضنها تمسح في دموعها و موسى قعمز مقابلهم ..
فاطمه بنبرة أم تبي تطمن عن بنتها: احكيلي يابنتي كيف صار ؟.. و شن دارولك .. دارولك حاجه ؟.. شفتي وجوهم ..
تذكرت ميار وجه بشير و معاملته ليها مسحت دموعها و قالت ..
ميار : لالا .. مادارولي شي ..
شافت فاطمه للمعطف اللي لابسته ميار و قالت : و هذا من وين .. هذا مش متاعك ولا كنتي لابساته لما طلعتي .. احكيلنا يابنتي خلينا نتطمنو ..
موسى قال بتوتر : واحد من الجماعه اللي كانو يدورو عليها لما شافوها كويسه و لابسه كويس قالي أسالها يمكن يكون في حد هربت معاه ب ارادتها ..
ميار شافت لبوها بصدمه و فاطمه قالت بصوت حاد : كان عطيته على وجهه .. اني بنتي متربيه و نعرف اني ربيتها كويس و مستحيل ادير هكي ..
موسى : اني شن دخلني .. حتى الجيران و الناس سمعتيهم شن قالو .. الله غالب مجتمعنا هكي ..
ميار لما سمعت كلامهم غطت وجهها و قعدت تبكي ..
فاطمه بصوت عالي : خلاص اسسسكت .. البنت نفسيتها مش متحمله و انت تزيد فيها ..
لما شاف موسى ميار تبكي من كلامهم قرب منها ضمها ليه بس هي بسرعه وقفت و قعدت تشبحله بوجع و دموعها ينزلو..
ميار بصوت حاد : ما تلمسنيش .. انت السبب في كل اللي صارلي ..بسببك اني انخطفت و بسببك الناس كلت لحمي و اتشوهت سمعتي ..
موسى وقف مصدوم : اني ..؟!!
فاطمه وقفت : شن فيه يا بنتي .. احكي ..
ميار شافت لأمها و بصوت موجوع قالت : خليه يحكيلك يا ماما انه هوا دكتور خان الانسانيه و العهد و فضّل الفلوس على انقاد روح انسان .. بابا اللي كنت دايرته قدوتي في الحياه و الحضن الحنون و القلب الطيب طلع قاتل .. حرم شاب من امه عشان كم الف .. مايعرفش انه الشخص الرخيص عنده غالي عند غيره .. مايعرفش انه ربي في الوجود و حياخد حقهم اليوم ولا غدوه ..
موسى : آآ انتي شن تقولي .. من قايلك هالكلام ..
فاطمه : شن فيه ياموسى .. خيرك يابنتي اهدي و فهمينا ..
ميار مسحت دموعها و قالت : الكلام اللي بنقوله بيقعد بيننا .. و لو عرفت انك وصلته للشرطه او لجماعتك وقتها فعلا حنهرب و مش حتلقاني حتى لو لفيت الكون كله ..
هز موسى راسه بالايجاب و قعد منتبه بكل حواسه للكلام اللي بتقوله ميار ..
