معجزات الحب

الفصل الثامن

#معجزات_الحب

(8)

واتباد "BebaPink89"

روايات العنود Beba Pink

فاقت صفاء من نومها و هي مصممه على الشي اللي بديره رغم انه مش من عوايدها بس قررت تخش الحرب ضد علي و ماتبيش تخسر .. زي ما نرفزها امس ببرود تبي حتى هي تنرفزه ببرودها ..

غسلت و جهها و وقفت ع المرايا تشبح لشكلها ..
صفاء : سلوى ..
سلوى مقعمزه تمشط في شعرها : شنو ؟..
صفاء متوتره : نبي .. روج ..
سلوى حطت المشط و قالت بصدمه : شنوووو ..
صفاء : نقصي صوتك فضحتي امنا ..
سلوى شهقت : اختي بتقعد بنت ..
صفاء بصوت حاد: ضمي فمك و بسرعه جيبي اللي قلتلك عليه ..
سلوى : المشكله صوتك هالحاد و اسلوبك الذكوري كيف بتغيريهم ..
صفاء : و من قالك نبي نتغير .. جيبيلي الروج يلا ..
سلوى مشت فتحت شنطتها و جابتلها لونين ..

صفاء : اما منهم نختار ..
سلوى : هدا .. لونه وردي بنوتي يطلع عليك ..
صفاء مدت شواربها و قالت : يلا ديريلي ..
سلوى فتحت الروج و اول مابدت تحط قعدت تضحك ..
صفاء تنرفزت : تعرفي تسكري خليقتك ولا نوريك ..
سلوى تحاول تمسك ضحكتها : باهي باهي ..

دارت صفاء روج خفيف و دارت بلاشر خفيف و لبست عبايه و وشاحها الازرق اللي علي قاللها ماتلبسيشي و خطت فمها باش مايشوفها بوها او امها او حد في الشارع حست روحها تقول مرتكبه جريمه .. رغم انه اللون هااادي .. و ركبت في سيارة بوها نزلت المرايا و قعدت تشبح لشكلها ..
صفاء بفرح : حي .. تغير شكلي ..
لما حست انه بوها بيطلع ولعت السياره و مشت للعمل ..

بينما سلوى رجعت رقدت لانها امس كانت سهرانه ع النت مع عبدو اللي بدا يعجب بيها و باسلوبها اكتر و اكتر ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ميار في الصبح لما طلعت من الدار فرحانه .. مالقتش بشير و اضايقت لانها كانت تبي تشوفه قبل ما يطلع .. بس القت فطورها جاهز في المطبخ و جنبه ورقه صغيرونه مرسوم عليها قلب و مكتوب فيها :
"نحبك ميورتي "
ابتسمت وخدت الورقه دستها وحست روحها مرتاحه و ماتبيش تفكر في اي شي يزعجها و يخرب عليها فرحتها ..
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠الكاتبه:Beba pink
عبدو فاق من نومه على اتصال علي صاحبه ..
علي : تي وين يا راجل من بكري و اني نتصل ..
عبدو : تأخرت في السهر ..
علي : مش من عوايدك ..
عبدو : هدا هو ..
علي : ربي يعقد عسلكم ..
عبدو : هههههه من قالك اني كنت نهدرز مع وحده..
علي : امالا بتسهر بروحك ..
عبدو : غير خلينا من السهر .. شن فيه ع الصبح ..
علي : شي نسأل عنك بس ..
عبدو : باهي اني كويس .. سكر توا خليني نمشي نغسل و نطلع عندي هلبا عمل ..
علي : تمام سلام ..

سكر عبدو و فتح النت طول عشان يصبح على سلوى ع الماسنجر .. اللي اول ما وصلها الاشعار فاقت ..
عبدو : صباح الورد ساره 🌹
سلوى : صباحك سكر عبدو 😊
عبدو : امتى فقتي
سلوى : توا
عبدو : يعني توا بتنوضي تفطري اوك
سلوى : حاضر
عبدو : بس نبي منك طلب 🙂
سلوى : شنو
عبدو فكري في موضوع الرقم نبي نهدرز معاك صوت و نتعرف عليك اكتر ..
سلوى : ان شاء الله ..
عبدو : يلا سلام
سلوى : سلام ..