:أنت مبتسمعش بقولك طلقني
_بزعيق..هو أنت مبيعجبكيش العجب ولا الصيام في رجب
:وكمان بتزعقلي يا معتصم.. ايوا ايوا أظهر على حقيقتك كمان وكمان، اديك بتزعقلي واحنا كاتبين الكتاب امال لما اتجوز هتعمل فيا ايه يا أستاذ يا محترم
_هخـ...
:ايوا ايوا هتخنقني بسلك الشاحن عشان المصاريف صح وتقعد تقولي لمي عيالك دول وروحي عندك امك أنا عارفه أنا عارفه والله دا مش منظر واحد هيتجوز قريب وزمانك كمان هتقعد في البيت معزز مكرم وتنزلني اشتغل أنا والعيال ولما نجي بليل توقفنا جمب بعض كدهوو وأنت تكون قاعد على الكنبه وتقعد تشخط فين وتقول بقااا دي الفلوس اللي جبتوها بس وفجأة تقوم تقف بطولك دهوو وتخلع الحزام من بنطلون البدله وتنزل ضرب فينا و جنة تقعد تقولك خلاص يا بابا خلاص أخر مره والله وأدم يقعد يقولك متضربهومش يا بابا اتكلم معايا أنا عشان أنا الراجل بتاعهم بعد موت ابويا تقوم أنت سافخو حتت قلم كدهوو وتقولوا بتموتني بالحياا يا حيوان اهي دي اخر تربيتك ياهانم وتكمل ضرب فينا و....
_ششششش استني بس أنا هكون لابس بدله ليه اصلا وكمان يا هبله ازاي ادم هيقولي متضربوهومش يا بابا وبعدها يقول اصل انا الراجل بتاعهم بعد موت ابويااا امال بابا الاولاني دي بتعمل ايه
:اولا ماهو اكيد مش هتلبس حزام مع بنطلون بجامه يعني ثانيا عادي انت اللي قولت ل ادم يقولك بابا ومتركزش على حاجات تافه لو سمحت
_طب ماشي كل دا عشان قولت هخـ ومكملتش طب على فكرا بقاا كنت هقولك هخليكي مبسوطه و...
:يا أخي بطل كدب بقاا شويه مش شايف مناخيرك اللي كبرت من كتر الكدب هتخليني مبسوطه ازاي وانت شايف أن عيوني عاديه يعني مش شايف فيها أي حاجه كدا ولا كدا
_هشوف ايه يعني الدبور قرصك مثلا فـ ورمت ولا حاطه البتوع دول اللي بيغيرو لون العين
:معتصم بجد أنت معنتش بتحبني زي الاول أنا عارفه والله كلهم نصحوني وقالولي بلاش هوو مش هو دا اللي هيسعدك وأنا قولتلهم لاااا دا هو دا اللي بحلم بيه و هيسعدني وفي الاخر تشوف عيوني عاديه
معتصم يا حبيبي المفروض متشوفش أحسن من عيوني ولما أجي اكلمك وش في وش كدا أو حتى فديو كول والقيك سرحت واقعد اشوحلك بـ ايدي كدا واقولك سرحت في ايه تقولي سرحت في جمال عيونك مش عشان عايز أنام وعندي شغل بكرا يا أستاذ يا متعلم يا بتاع المدارس
_خلاص يا نور أنا أسف
:أسف..؟!
بعد كل دا ورايح تقولي أسف ليه مفكرني معنديش كرامه.. وسع كدا لو سمحت
_هتعملي ايه
:هكون هعمل ايه هلم قلبي المتكسر اللي أنت عمال تدوس عليه... و وسع كدا بقاا وكفايه تدوس على قلوب الناس بنات الناس مش لعبه في ايدك يا أستاذ ترضاها على أختك
