_بصي لـ عيينك كويس؛ وأنتِ هتفهمي إنها سبب كفيل إني أحبك.
'سبتها ومشيت، بقالي فترة بحاول أتكلم معاها بس هي مش مدياني فُرصة، واللهِ مش واخد الموضوع لِعب أو رايح أكلمها عشان أتسلى بيها، أنا فعلًا بحبها ولو قدامي مليون أختيار هفضل اختارها على طول، دايمًا ساكنه قلبي وعيوني وهي أبعد الناس عنهم، ومعقول مفيش ولا طريق راضي يجمعنا !
تاني يوم كُنت رايح الجامعة وأنا مقرر إني مش هسيبها تضيع مني وهيجي يوم وهتبقا في بيتي وارفع دبلتها في وش الناس كلها وأقولهم أهي بقت بتاعتي أهي، لما وصلت مدورتش كتير ورُحلتها ع المكان اللي بتقعد فيه دايمًا، ساعة ما شافتني لمت كُتبها وكانت ماشية فـ وقفت قدمها..
_ممكن تسمعيني، واللهِ أنا مش جاي أتسلى بيكِ، واللهِ يا نـور بحبك
:عديني لو سمحت
_بصي يابنت الحلال أنا راجل دُغري ومبحبش اللف والدوران، هما كلمتين سمعتيهم و وافقتي يبقا نتعرف على بعض ولو عرفت أخليكِ تحبيني هاجي أنا والحاج نشرب الشاي مع والدك ولو موفقتيش ومعرفتيش تحبيني دي حاجة ترجعلك وأنا مش هجبرك تحبيني بس بردو هاجي وهتقدملك أنا ملقتكيش بالسهل عشان أسيبك بالسهل..
'سكتت شوية ومكلمتش، قولت مبدهاش بقا وأكيد البُونية مسكوفة تتكلم
_هعتبر سكوتك موافقة، إنهاردة بعد مُحضراتك هستناكِ بعربيتي عند المدخل الرئيسي هنروح نتغدا برا ونتمشى شوية على البحر، وعاوزك بس تثقي فيا وتعرفي إني عُمري ماهجرحك وهحافظ عليكِ
'لقتها ابتسمت ومشْيت، ورُوحت ع المُحاضرة وكان لسه بدري شوية فحكيت لـ عُمر صاحبي على كل حاجة..
-ياصاحبي مش معنى إنها وفقت يبقا تبدأ خروجات وكلام ملهوش لازمه دلوقت، كل حاجة وليها وقت وليها ضوابط وأنت حتى مختش خطوة شرعية عشان أقولك دا أنت مسمُحلك بكذا وكذا، والكلام دا مش بيتقال دلوقت عاوزها يبقا كُنت بدل ما تقولها نخرج نتغدا ونتمشى كُنت خد رقم والدها وقولها إنك هنشوف أنسب وقت وتيجي، إنما أنت كدا بادئ كل حاجة بحرام و "ما بُني على باطل فهو باطل" و...
بعصبية خفيفة: إيه يا عُمر إيه يا حبيبي إهدي كدا وبراحة شوية قولتك أنا اتفقت معاها وخلال السنة دي هحاول أخليها تحبني وأول ما أتخرج واعرف إنها حبتني هروح أتقدملها
-يابني أفهم هي المفروض أصلًا ميكونش ليها علاقة بالموضوع دا غير إنك تاخد منها رقم والدها بس إنما الاتفاق دا ميكونش معاها، الإتفاق دا مع والدها مش تروح تتفق معاها هي !
_عُمر بقولك إيه متصدعنيش، اتفاقي معاها كان اتفاق عادي مش اتفاق الجواز والفرح نفسو، وحل عني بقا عشان أنت سديت نفسي
'قُمت مشيت قبل ما الدكتور يجي عشان معدش ليا نِفس إني أحضر أصلًا
-رايح فين يا يوسف ؟ الدكتور زمانو جاي
