#هاتفي_المفقود
الجزء الاول
الكاتبه اماسي الليل ( مريم يوسف.
)
بابا وين صرتي مو خليتي بالي عليج والله يا بابا تلفوني ضاع وبقيت ادور عليه وما لگيته
وين ضيعتي بابا /بالمول اظاهر من نزلت من السياره واكع مني لان مبقيت مكان ما دورت عليه بالسياره وبالصيدليه وسألت حارس الكراج ورحت على الامانات كلت بلكت احد لگاه ماكو
المشكله ادك عليه مطفي
قصتي بدت سنه ٢٠١٠
اعرفكم بنفسي اسمي سالي عمري بداية القصه ٢٧ سنه منفصله قبل سنتين يعني كان عمري ٢٥ سنه بوقتها
اما قصتي ويا طليقي اتزوجنا عن حب بالاردن تعرفت عليه بالجامعه وجنت معميه بالحب لدرجه جنت اسمع من هوايه طلاب يحاولون يحذروني منه ومن خيانته الي خلال فتره الخطوبه بس اني جنت ساده عيني واذني لان حبيته لدرجه وتعلقت بي اتزوجنا بالجامعه اخر سنه جنت فرحانه وسعيده الى درجه متنوصف اجلنا موضوع الاطفال الى ما بعد التخرج وهالشي جان رحمه من رب العالمين ورا سنه ونص زواج والدي تمرض ورحت بقيت يم اهلي كم يوم ورجلي كان عنده علم ما اكدر ارجع للبيت خلال هالايام لان ابويه وامي كبار بالعمر واني وحدي باقيه وياهم بعمان وراح اعرفكم بعائلتي بعدين
المهم بيوم احتاجيت شغله من بيتي وشفت بابا شويه احسن گتلهم اروح ساعة وارجعلكم
رحت للبيت تقريبا ساعه ١٠.٣٠ اعرف برجلي هيج وقت مو بالبيت ويا جماعته بالكافيهات لذلك ما دكيت عليه كلت اروح وارجع بسرعه حتى ميصور اني راجعه راح ابات ويجلب بيه
المهم رحت للبيت فتحت الباب حسيت من وضع البيت اكو احد
بس البيت من الامام كله مطفي الاضويه ومن دخلت جوه كلها مشتغله استغربت المهم رحت لغرفتي فتحت الباب وجانت هاي الصدمه رجلي ويا اعز صديقاتي ومتزوجه ورجلها صديق رجلي طلعت من البيت ركض بدون وعي ولا نزلت دمعه من عيني سقت سيارتي واني مخدره مثل الي دا احلم ورجعت للبيت ما حجيت شي اهلي حسوا بيه شي گلولي شكو ابويه حالته متسمحله ينقهر او ينصدم
گتلهم ماكو شي طبعا رجلي يركع تلفونات من طلعت الى ثاني يوم العصر
گلي اني هسه راح اجي اشرحلج
دزيتله مسج ما اريد اشوف وجهك وورقتي توصلني خلال ايام بدون فضايح لان ما اريد اهلي يتأذون
وبالفعل ورا كم يوم وصلتني ورقة طلاكي واخذت كل حقوقي كامله بس كل القوه الي جانت عندي بجيت بچي مو علمود رجلي لا بچيت لان جنت غبيه وغافله عن سوالفه والكل جانوا ينبهوني وهو سافل واني جنت معميه لكن الحقيقه هالموقف الي شفته بي خلاني اتقزز منه وما اكدر اباوع بوجهه حتى بالمحكمه حسيت نفسي بس اريد اخلص منه يمكن الي يشوفني يحس اني قويه بالفعل اني قويه من برا لكن من جوه انسانه محطمه
والسبب قصتي قبل مجيئنا لعمان
اني من عائله مكونة من اب تاجر وعنده شركة مواد بناء
وام دكتوره واخوه ٢محمد خريج طب اسنان وعايش بلندن ومتزوج بت خالي وعنده اطفال ٢ولد وبنيه واحمد التؤام مالتي الي هو چان اقرب انسان الي واخت لينا اكبر مني ب٤سنوات مخطوبه ، بعد السقوط انخطف اخويه احمد وطلبوا من عدنا فديه جانت كلش چبيره لان يعرفون ابويه حالته الماديه زينه لكن تعرفون اغلب الناس الي عدها فلوس قبل تشتري املاك وتبقي مبلغ يعيشهم بالبنگ لان باقي الفلوس تشتغل بالسوگ وبالتجاره لذلك ابويه انضنك بس راد يجمع المبلغ لان الي عنده ما يسد عشرين بالميه من المبلغ الي مطلوب منه اضطر يبيع املاك بفلس ونص لان ماعدنا وقت منطينا العصابه مهله لذلك اداين الباقي من عمي وگله تدخل ويايه شريك بالاملاك العندي بكد المبلغ الي اخذته منك
المهم جمعنا الفديه وباليوم المحدد اتصلوا حتى يستلمون وبلغوا بعد الاستلام ابنك العصر يمك
وبالفعل سلمهم ابويه المبلغ على طريق ابو غريب ورجع للبيت ينتظر وقلبنا مثل النار الى ان صار العصر سمعنا صوت عياط. طلعنا للشارع لگينا اخويه محمد مذبوح وشامري على رصيف يم حاوية الزبل وجيرانه من طالعه دتذب الزباله متعرفه على الجثه
الصدمه الي مريت بيها من شفت اخويه مذبوح و امي مثل المخبله وابويه صارت عنده جلطه سببت عنده شلل اني شلت هم كل واحد بيهم ونسيت نفسي الى ان صار عندي مرض نفسي ابچي يوميه بليل وتجيني كوابيس واحلام ابقى اعيط
امي وابويه فوگ مصيبتهم گالوا خلص نطلع لعمان
اول ما وصلنا ودوني على دكتوره نفسيه وبقيت اتعالج عدها اشهر يله صرت زينه وبعدها قدمت على كليه وجنت هسه طالعه من الحاله الي جانت عندي جان اخويه احمد صديقي ومن فقدته فقدت هوايه امور لذلك اول ما بدا بسام يتقربلي بالكليه تعلقت بي وملى عليه الفراغ العاطفي الي احمد جان مالي وهالشي كدرت اميزه بعد ما انفصلت عرفت اني ما حبيت بسام جان مجرد انسان تعلقت بي بعد صدمه وفراغ عاطفي حاولت اوهم نفسي بي وبحبه وتعلقي بي
كل صدمه امر بيها تخليني اصير اقوى المهم اختي لينا جانت مخطوبه وخطيبها بأستراليا من طلعنا لعمان ورا سنه ونص طلعت تزوجت هناك يمه واخويه محمد ومرته حضروا العرس بدل من عدنا
لكن امي اصرت ا تسوينالها حفله صغيره تعزم بيها الاقارب والمعارف بيناتنا بالبيت
يعني مابقالهم غيري حتى من اتزوجت بقيت يوميه اروح اطمئن عليهم
الى ان انفصلتوايقنت سبب زواج بسام مني ما كان بدافع الحب لان الي يحب ميكدر يخون بس لان بنيه شريفه وهو انسان مسقط وميأمن باي وحده تصير مرته من لگى وحده مثلي نظيفه وطاهره گلك هاي العب براحتي من وراها واني مأمن راح تصون شرفي ولان جنت واجهه مشرفه اله ولاهله و لان اهلي متمكنين ماديا ومن عائله مثقفه وواصله واني الحمد لله جميله وهوايه تقدمولي بس قلبي اعمى اختار الشخص الغلط
حاولت بعد الانفصال امسح كل ماضي مؤلم بحياتي
اول اهتماماتي امي وابويه
اشتغلت بصيدليه بمول بعمان وابويه شغل فلوسه ويا جماعه والحمد لله امورنا تمام
اخويه محمد وعائلته يزورونا بالعطل المدرسيه الصيفيه والشتويه
ولينا كل كم شهر تزورنا لان اهل زوجها بعمان قريبين على بيتنا
واخو زوجها الولد شامل دائما يسأل علينا
حسيت بي اكثر من مره عينه عليه الولد كلش مؤدب وابد ما فديوم سمعني حجايه بس من تصرفاته ويايه عرفت عنده مشاعر تجاهي لكن اني كرهت شي اسمه رجال وزواج وجربت حظي مره وما افكر اعيدها طول عمري اخذت نصيبي وفشلت
افكر بمستقبلي واهلي افضل
بيوم كعدت مستعجله لان عندي دوام وتأخرت عن الصبدليه واني دا اسوق بالطريقاتصلت على البنيه الي تشتغل ويايه انطيتها خبر الشارع زحمه خليت التلفون بچيب القمصله وصلت للمول دا ادور مكان اركن شفت سياره دتطلع من مكانها رجعت شويه دا انتظرها تطلع ويا ما طلعت السياره كسر عليه واحد واخذ المكان ومبتسم اني بقيت دايسه على الهورن معصبه المهم طلعت سياره ورايه هو اشرلي عليها معناها روحي اطبگي هناك ويضحك لفيت ورحت ركنت سيارتي بس فايره اريد اروح ارزله المهم نزلت ما لگيته رحت للصيدليه اول مدخلت
صباح الخير اماني
اماني :صباح النور
سالي :الدكتور (صاحب الصيدليه )وصل
اماني :لا لساتو يمكن يتأخر اليوم
سالي :الحمد لله /انشغلت بعدها بالمراجعين للظهر مثل كل يوم اتصل على اهلي اطمئن عليهم ادور التلفون ماكو مابقيت مكان المهم طلبت تلفون اماني اطمئن على اهلي لان أصورت التلفون بالسياره ولان الصيدليه عليها شغل مكدرت اروح اجيبه وابقي اماني وحدها واليوم الدكتور ماكو لذلك اخذت تلفونها وخابرت على اهلي
هلو بابا شلونكم
الاب :الحمد لله شو داگه من تلفون اماني /من شفت رقمها بقى بالي عبالي بيج شي
سالي /لا بس نسيت تلفوني بالسياره ومكدرت اروح اجيبه وكلت هسه تقلق عليه
الاب:اي والله هسه امج قبل دقايق سألتني سالي خابرت گتلها لا
سالي :يله حبيبي راح اروح عندي مراجع مع السلامه
الاب :مع السلامه
بعدها خلص دوامي طلعت للسياره لگيت على جام السياره واحد راسم قلب وكاتبلي كل هالجمال وسيارتج وسخه
صدك بهذا اليوم جنت كلش تعبانه ومعصبه من بدايته وحسيت كل شويه تجيني مغثة وهاي وحده منهم فتحت باب السياره ادور التلفون ماكو مابقيت نبشت السياره تنبيش ما لگيته
رجعت للصيدليه ماكو رحت على السكيورتي الي يفترون يم باب كل كراج هم ماكو ورحت على ادارة المول بلكت احدلاگي مسلمه للامانات ماكو تلفت اعصابي لان تلفوني نوكيا N7 مابي رمز ومنقهرت على التلفون بس بي صوري وجانت بي صور عرسي وصور اني وبسام حتى بملابس النوم مثلا كاعده بحضنه وعندي صور مال حفلة لينا جانت بس نسوان واني لابسه بيها فستان يادوب مغطي جسمي قصيره كلش وتنشد على الرگبه والظهر كله طالع وفديوات اركص بيها بالحفله وكومه صور ما اتذكر شنو بس اعرف بي صور الي بملابس ووضعيات مو مال احد يشوفها
تخبلت اخر شي شفت نفسي تأخرت رجعت للبيت بقيت ادك على التلفون من تلفون ابويه كله مغلق وهذا الحجي تلفوني جان مليان شحن بقيت لتالي الليل ادك على رقمي مغلق
بقيت اريد انام مكدرت من القلق والتفكير المهم دكيت اخر محاوله شو رقمي دك وبعدها انغلق
ورا نص ساعه وصلتني مسج من رقمي على رقم ابويه الي دا ادك منه مكتوب بيها
(شكد شايف جمال واغراء بس الي شفته بالصور طير عقلي )
من قريتها انجنيت وكمت ابچي دكيت التلفون مغلق
دزيت مسج كلت بلكت من يفتحه يشوفها
كتبتله الله يخليك رجعلي التلفون وشكد تريدانطيك مكافئه لان التلفون يخص زوجتي واتفق وياك اخليك المكافئه بمكان تروح تستلمها وتسلم التلفون حتى تأمن اني ما اعرفك
كلت بلكت يعرف المسج من رجال وتلفون زوجته يخاف ويرجعه ويطمع بالمكافئه
بقيت انتظر يجيني اشعار المسج وصلت ماكو طبعا رحت للدوام ثاني يوم مطفيه وبالي مو يم الشغل وكم مره اغلط بين ادويه الزبائن والدكتور انتبه عليه گلي في مشكله سالي
جاوبته اعذرني عندي ظرف بالبيت شاغل تفكيري ومدا اكدر اركز زين اوعدك راح انتبه اكثر
الدكتور : خلص روحي للبيت ارتاحي مافي مشكله انا واماني نسد مكانك اليوم
سالي :اتشكرت منه لان انسان كلش راقي هو عمره ب ٤٠ وتزوج صديقتي ضحى جانت تشتغل ويايه بالصيدليه اكبر مني ب٦سنوات وكلش علاقتي بيها قويه والدكتور حبها واني صرت الوسيط بينهم الى ان تم الزواج ومن يومها الدكتور كلش علاقتي قويه بي لان زوجته صديقتي المقربه وصارت علاقتي بيهم عائليه
رجعت للبيت ركض على تلفون بابا لگيت ماكو مسج ولا المسج الي دزيته واصل بقيت كل شويه اشوف المسج وصل لو لا
