💞💎ياقوت💎💞 ( مكتملة )

الجزء 40

                                     🌛 رمضان كريم 🌜

                                   💞 💎 ياقوت 💎 💞 
                                          

خديجة فاقت بكري اليوم اكيد رجعات القراية ورجعات المعاناة ثاني ما كرهاتش لوكان ماتت ولا هاد العيشة عندها كلشي وخاصها كلشي قمة التناقض ولكن راه بصح كتحس براسها خاصها كلشي وماعندها حتى شي حاجة
احلام خلف الباب غادي تاكل جنابها بالفقصة: خديجة واااا خديجة حلي الباب وزيدي يلاه راه قرب وقت المدرسة
حلات داك الباب وزادت معاها للطبلة باش تفطر لقاتهم كلهم فايقين بزز منهم ايه خاص يفيقو حيت لالة خديجة غادية للمدرسة وخاصها تفطر وهادشي غادي يكون الى كانت جماعة عينيهم مبجقلين بالنعاس ومزال ما فيهم جوع ولكن راه الاوامر هادو اما خديجة هي اصلا ما باغياش تفطر ولكن شكون خلاك
ح.زهرة بابتسامة عريضة: زيدي اا بنتي زيدي تفطري الله يرضي علييك الفطور مهم للصحة
خديجة غير كتصوط بحال الرابوز ما عندها ما دير ولات خايفة تقلق زهرة وترضها هاد الاخيرة لوالديها وتولي عايشة العيشة ديال ياقوت ولا كفس كاع عمرو عينيها بالدموع وبدات كتاكل بدون شهية غير باش زهرة تفرح وما تقلقش بدا كلشي كياكل بلا حتى شهية من غير زهرة لي فرحانة حيت داكشي لي باغيا هو لي كاين وكيدار
باقي خديجة كتخشي ففمها قفزاتها زهرة: يالاه اا بنتي نووضي نوضي لا تعطلي على للمدرسة ديالك
وقفات رشيدة مسكينة بلا عوين: أنا نشوف عليلو واش سخن الطموبيل باش يوصلها
خديجة بلقات عينيها بعدم رضى: انا ماا بقييتش بغيت نمشي فديك اللوطو راه طرازها قديم كلشي كيبقا يضحك عليا
ح.زهرة خسرات الملامح ديالها: كيييفاااش ثااني كلشي كيضحك عليك وماال الطموبيل علمزويناتها باقي مزيانة
خديجة كتحرك يديها: هاديك اللوطو قديمة نفضل نمشي فالطاكسي وما نمشيش فهاديك اا مااماا
ح.زهرة بامر: دبا غادي تمشي مع عليلو وحتى لمن بعد ونشوفو بلان هااد الطموبيل اما الطاكسي اا بنتي ما غاديش تركبي فيها يالاه سيري مع عليلو (شافت ف منار) يالاه اا مناار سيري معاها ما ترجعي حتى تحرك الطموبيل
وقفات منار معصبة من هاد العيشة لي عايشين مهليا فيهم اييه ولكن راه كيعيشو عذاب نفسي بحال الى مكلفين بشي حماق ممنوع الخروج ممنوع ياكلو فالزنقة لا تشوفهم خديجة وتبغي تاكل حتى هي من الزنقة اي حاجة ممنوعة غير باش خديجة ما تبغيش بحالها حياتهم واقفة على خديجة وشنو كتبغي خديجة وشنو خاص دير خديجة وباش خاص تتاثر خديجة
مشات للمدرسة راكبة مع عليلو لي هو الشيفور جديد شاب موجز ما لقاش خدمة الا هادي لي لقاتها ليه شي عمته كان شاب اسمر بملامح سوداء حرشة وشرقية الاسم الحقيقي دياله هو علي

كملات العرض او المقترح ديالها واخيرا واخا خدا منها مجهود مضاعف وكبير بزاف عمرها دارت راسها وعقلها فشي حاجة حتى لهاد المرة ساعداتها صاحبتها بالحق غير فشي حوايج بساط اما العمل الكبير والكثير كان ديالها وقفات وهي كتشوف فداكشي لي وجدات وحتى فالروينة لي دارت
شروق عكس صاحبتها ياقوت تماما كتخدم وتقرى وتلقا راحتها اكثر وسط الروينة قلبات عينيها من حالة هاد المكتب ديالها كيف رضاتو
شروق كترجع شعرها اللور: هووووف اا شرووق هوووف دبا شكون غادي يجمع هاد الروينة (ضربات راسها بشوية) اكيد انا شكون غادي يجمعها بفففف
جمعات روينتها ووقفات كتقاد ثاني البيرو من اول وجديد حتى تقسم ظهرها وقفات هازة العرض بين يديها وقصدات المكتب ديال الاب ديالها وصلات للكاتبة دياله تبسمات ليها ابتسامة صفرة
شروق ميقات فيها بلا ما تعيق: احممم همم كون تشووفك مااماا ياا ختي كوون تشووفك كون قربلات هاد الشركة على ظهرنا
الكاتبة تبسمات ليها: مادموازيل شروق بغيتي مسيو الرايس
شروق بنفس الابتسامة: ايييه ياا الحبيبة الى بغيتي زعمااا أنا نتسنى اا لالة حتى تعلميه
الكاتبة بلا ما تفهم حتى لعبة مشات تعلم سي محمد الرايس الاب ديال شروق لي تعصب على هاد الكاتبة جديدة حيت الاولى عندها اجازة ولادة داكشي باش بلاصاتها هادي خرجات وجهها تعكري منه لعند شروق لي فهمات البلان
الكاتبة باباتسامة: تقدري تفضلي سمحي ليا
شروق بابتسامة: لا اا الحبيبة درتي غير خدمتك
دخلات شروق ومشات تنشرات فوق الكرسي لي قدام باها حطات الملف قدام باها وواحد لا كلي صغيرة فيها العرض وبدات كتنش على راسها قائلة: مسيو الرايس ما غاديش طلب ليا شي عصير
محمد هز الملف كيشوف فيه باعجاب مخفي: رااك عارفة بلي هذا العرض الاول من مئة غادي يهزو عشرة وغادي تقدمو جوج ديال العروض ثاني منهم غادي يتهزو جوج ديال الشركات وحدة غادي دير شراكة مع الفرع الرئيسي ولي فالرتبة الثانية غادي دير شراكة مع الفرع لي عندهم هنا ولكن راه بحال بحال بنفس الامتيازات
شروق بافتخار بنفسها كتشوف فباها حتى خلاته يتيق فراسه: وااا سي محمد الى تهزينا من هاد المية ما يقولها حد لحد اشمن عشرة واشمن جوج واشمن ميريكان ولا مغرب يهديك الله ا مسيو الرايس
عارفها كضحك عارفها بينها وبين الجدية فالعمل غير الخير والاحسان داكشي باش كتموت على الخدمة مع شركة روان لي هي شركة ديال شابة اسمها "روان" نيت كتخدم بالنشاط والضحك هي والgروب ديالها