بيوتات اهلنة

البيت الثاني

#بيوتات_اهلنة

( البيت الثاني ) بيت جميله

الطفل مرات من يشوف حاله كدامه يعتبرة شي عجيب وغريب يجوز عد الكبار طبيعيه بس الطفل الزغير يشوفة اعجوبه مثلاً

جميله بيتهم اول بيت بالفرع بس مقابيل بيت الخبازة يعني الخبازة بيتهم ركن ومقابيله بيت جميله همات ركن

جميله جنت دائماً اصفن بيهة هية شابه بيضه طويله شعرهة دوم اميشته وقبل جانو قليل الي يميشون شعرهم بعتبار هالشي غالي او مو اي وحدة اسوي بس الي مستواهم هاي لايت

وجان وجهة مليان حفر مخربه حب الشباب والي يخليني اصفن بيهة دومهة مدندشه ذهب مليانه توكف تلمع من كثرة الذهب رجلهة ضابط وعدة سيارة برازيلي وتخيلو ضابط والنجمات وهوة جميييل بشكل طول وقيافه وترتيب  وسيارة برازيلي اول ما نزلت وزعتهة الدوله للضباط اذكر لونهة احمر جديدة تلمع

شتان بين الاثنان جميله ورجلهة اخذ بيهم صفنه

هوة يخبل وهية ما لايكتله ابد وظل صافنه ومحيرني هوة شلون ذوله مزوجين عقل جاهل مافهم شي 
طبعاً بيت اهلهة نفس الفرع قريبين عليهة

وكل ما اشوفهة حامل جابت منا حبلت منا كل ما توكف بالباب بطنهة شعلوهة وهية طويله تبرز  مدري منو مقشمرهة وكايللهة الضابط يلزم بالجهال 

ومايوم شفتهة تضحك وجهة دوم معبس وحقنه اتدردم علينه جيف اكو قطعه فارغه بظهر بيتهة وحنه نروح نلعب هناك وهية تضوج بيتهة بي باب جانبيه تطلع عالصفحة الثانيه من الفرع مع العلم احنه مو يمهة بس بعد سوله 

بس هوة رجلهة من ينزل من السيارة والبدله الزيتوني والمسدس صفح وبذاك الوكت بالثمانين الضابط يگرگ بس هوة الرجال الله شاهد ما يأذي احد بحاله يروح يجي بحاله مدري اني اشوفه بحاله لان جاهلة وما افهم كل الي اعرفة

جميله رجلهة ما مناسبهة ابد ولو على وكت هسة الحبايب ما يقصرن ما يخلن الجميله رجل ياخذنة

  ودوم اصفن بيهة شون مدلله مكعدهة يم اهلهة وبيتهة جبير ومدندشه ذهب  ورجلهة حلوو  يمكن يعتبر حسد هذا كلامي بس اني ماعرف لان جاهلة

رغم حالتنه زينه وما معتازين بس عقل طفله اظل صافنه بيهة ونوب خشمهة يابس على شنو ماعرف ماشفتهة يوم واكفة اله وهية تتلاغه وي احد يمكن غرور النجمات صايبهة

ماااا علينه بيهة  🙄🙄

بصف بيت جميله بيت ام هارون هذول ناس بحالهم ابداً ما يختلطون بأحد عدهم ولد ثنين الجبير اسمة براء والثاني هارون بس يصيحولهم بيت ام هارون براء  من الي ( صم وبكم ) لا يحجي ولا يسمع يمكن بسبب حالته متقبل تخلف ام هارون بس جان شاطر ناااااار كلة يطلع من الاوائل خالي اهلة مدرسه خاصه للصم والبكم همة كلهم العائلة مميزين يعني  صفاتهم مشتركة من الأب والأم والأولاد