اللهم هون

الثاني

تكملة

( اللهم هون )    بقلم قمر الزمان

بعد  ما رجعلهم ابويه موافقه تمت الخطوبه

جاب اهلة وعمامة طبعاً خطبتي صارت بيت ابويه وقرو الفاتحة وتفقو باقي الترتيبات على النسوان

وبيوم جتي امه وأخته الچبيرة واخذوني جهزوني وشترولي حلقه ومحبس وتراچي وملابس بيت وطلعه ومكياج وسيتات النوم وبعض النواعم وحنه هم اخذناله نيشان بسيط

سوولي كعدة نيشان لبسني الحلقه والتراچي وخواته ركصن وهوسن اني عندي اختي الهام هية كلشي الية عدي خوات من ابويه بس زغار وعلاقتي بيهم مو مثل الهام هاي شريكتي بكلشي

ومن خلصو الحفله وطلعو تحزمنه اني والهام ونظفنه البيت

قبل جية رجل امي حته ندخل غرفنه ونقفل بابنه لا يشوفنه ولا نشوفة

ويوم ورة يوم وصار گطعان  مهر محكمة والسيد وتحدد موعد الزفة بهاي الفترة  شكم مرة اجة زارني  الخطيب كعدنه سولفنه شوي ويروح هوة هم ما يرتاح يجي بيت امي لا امي تتقبله ولا هوة يتقبلهة

ومشت الايام سريعه واليوم الزفة
رجعت من الصالون اني والهام اجة علينه ابويه اخذنه وزفتي طلعت من بيت امي وعلى عمة عينهة ابويه واكف بالزفه مالتي وهوة سلمني بيد رجلي

رجلي اسمة أنور يشتغل بالبناء خلفه وحسب ميكولون شغله توب

بيوم الزفه تعاهدنه على الوفاء والمحبه كلي

حميدة اني متعوب وريدج راحة الي

وانه كتله اريدك سند وكون الك كلشي

ومرت ايامي وي انور بسعادة وهدوء كان الي فعلاً سند وكنت اله الراحة الي يدور عليهة

يجي من شغله اتلكا بكلمة الله يساعدك

حمامه جاهز هدومة جاهزة غدا جاهز

ويه بيت عيالي اني ما مقصرة عمتي وزعت علينه الشغل بين بناتهة وبين چناينهة احنه ثلاث چناين بالبيت اخلص شغلي وكعد وي البنات سوالف وشغلات الى ان يجي انور من دوامه عاد اني التهي  وياا

حبيته وحبني ودللني ماقصر وياي بشي الله شاهد فعلاً كان الامان الي واخيراً لكيت الاستقرار والله عوضني عن التمرمر بين بيت ابويه وبيت امي

اني بطبعي هادئة مطيعه خدومة مو احمد بنفسي بس هية هاي كينونتي   ورة زواجي طلب مني انور البس عباا واني ما رفضت بالعكس رجلي ومن حقة يحافظ عليه

افتقد الهام اختي سودة عليه ظلت وحدهة بيت امي بيوم العرس مالتي بچت بچي كتلهة ولج راح تخليني ابطل

اوووف للي ماله بيت يلمة ان شاء الله تجيهة القسمة وتزوج هية هم وتخلص

انور عندة قطعه ارض مشتريهة من زمان وكلي بس اجمعلي شكم فلس وابنيهة ونطلع ما نبقه ساكنين وي اهلي الصراحة همة الناس ما مأذيني طيبين وتعاملهم حلو وياي واني هم مداريه الزغير والچبير

وشهر ورة شهر وعمتي تسأل هااا ماكو شي هالشهر وگلهة  لا عمة ماكو

بس يوم كاعدين اني وياا بليل وسألته

- انور هم تفكر بالخلفه

- ليش لعد وحد اني من الناس هم اريد جاهل نلعب علي

- مو اكول اشوفك ساكت ما تسأل

- وشكو بيدي هاي امر ربج شوكت يقسم النه

- عود كلت اروح هذا الشهر للدكتورة

- كعدي وسكتي يا دكتورة هوة كله صار ثلاث اشهر من ازوجنه منو ضاحك عليج

- والله انور هاي عمتي كل شهر تسألني  هاا ماكو شي واني انحرج عود كلت اروح للدكتورة اشوف ليش تأخرت بالحباله

- لا تعيديهة ازعل عليج وامي من تحجي كليله عمة بيد الله مو بيدي هوة شوكت يقسم النه حميدة خلينه مرتاحين والجاهل يجي وين رايح يا بت الناس

وهيج مرت ايامي مرات اشتاق للهام وروح البيت امي اشوفهن الهام سودة عليه اطير بيه بس امي جن بارود جواهة ماتعود تخلص الزيارة لان الافندي رجلهة يضوج من عدنه احنه بناتهة وهية ادور خاطرة انوب صايرة مراهقه وكله ستريجات تلبسله عبالك زغيرة

واجة اليوم الي تنخطب بي الهام

بقلم  قمر الزمان 💋

رابط وات باد  https://my.w.tt/PVgEuohnMcb