( اللهم هون ) بقلم قمر الزمان
بيوم اتصلت بيه الهام وكالت جايين عليهة خطابه وتريدني وياها اني هم كتله الانور وكلي روحي هم جماعه اقارب ابويه خطبوهة وجوي الناس شافوهة وصار القبول من الطرفين وتمت خطبه اختي الهام
ويا فرحة امي من زوجتنه حته يفرغ البيت الرجلهة ومشت مراسيم خطوبه وزواج حسب الاصول وراحت الهام البيت رجلهة
واني يمر عليه الشهر ورة الشهر وحمل ماكو والاسئله ازيد وانور ميقبل اراجع
وضعنه اني ويا مستقر
جمعله شكم فلس من شغله وبلش بناء بالقطعه اهلة ماعدهم مانع نطلع بيت وحدنه اصلاً يكيفون حته يخف البيت من الاعداد هههههههه
وصار سنه على زواجي
فد يوم اجة انور من شغله كالمعتاد تلكيته بس مو ذاك الملكة مثل كل يوم وهوة استغرب دايغسل ايدة عالمغسله قبل لا يدخل للحمام
- شخيرج اليوم مو على بعضج
- مابيه شي احضرلك الغدة بين ما تسبح
- لا اكو شي خاف جايتج الشهريه وهالمكلوبه الخلقه
- اذا تعرف سبب معاناتي ليش متخليني اراجع
- خل اتغدة اجلي كل كلام بعدين
سبح وتغدينه وصعد الغرفته ياخذله غفة ساعه ويكعد المغرب مرات يجون علي جماعته مرات يتعلل ويانه مرات يسير على عمامة وهيج كاظيهة بس اليوم لا طلع ولا احد سير علي ولا نزل تعلل يم اهلة كعدلي كعدة بالغرفة هههههه اله اعرف شبيج
- تعالي فهميني منو مسمعج حجي واليوم كالبه الموجة
- انور ترة مليت لا انته الي مخليني اراجع ولا اهلك الي دايجوزون من الحجي والسؤال عن الحباله
- والله يا حميدة اني علمودج ماريدج اظلين مكابله الدكاترة وادويه وهواس ها حبلت ها ماحبلت هاا اغير الدكتورة هاا كالولي على خوش دكتورة وظلين تعبانه
النه قسمة بالجاهل الله سبحانه يزرعه
- اي هم ربك كال اسعى يا عبد
يجوز حاله بسيطه يجوز من اول علاج يجوز ما خلف
- باعي من هاي الحجي ماريدج ترحين شنو ما خلف شنو هالفال الموزين
- هاك شفت من مجرد كلمه انته ضجت شحال اني الي كل شهر هالسؤال ينسأل الي من غير الكرايب من غير كل من شافني وسألني هااا ما حبلتي
جر نفس وكلي الي يرضيج سوي هذا هوة شوفي خواتي وين يراجعن وروحي وياهم
ما كلت لا نزلت مباشر اتصلت بحماتي الچبيرة وبلغتهة تحجزلي بهاي الفترة الهام اختي حبلت بأول طفل الهة شكد فرحتلهة حبيبتي راح اصير ام يوم الالي
ورحنه اني وحماتي عالموعد للدكتور ومن وصل سرانه دخلت وشرحتلهة حالتي كتلهة صار سنه ماديصير عدي جاهل كالت صعدي دافحصج
فحصتني وشافتني نظيفه ماكو شي
وطلبت مني سونار وتحاليل رحت سويت التحاليل ورحت للسونار
اشوف دكتورة السونار اتفر بالجهاز منا وتودي منا واني وحماتي نسأل هاا دكتور بشري وهية ساكتة تالي كملت فحص وكالت الدكتورة تفهمكم
والله خلصت التحاليل واخذنه السونار ورحنالهة دخلنه نطيتهة الاوراق وظلت مركزة بيهن وساكتة
تالي نطقت ويا ريتهة ما نطقت ولا حجت ولا كالت
ماما انتي مع الاسف ميصير عندج اطفال رحمج طفولي ميكبر ابد وهيج حالات تصير ولاديه يعني من ولادتج رحمج هذا وضعه للاسف
اذا اكول السمة وكعت على راسي قليل
اذا اكول نشگت الگاع وبلعتني قليل
اذا اكول هتزت كل شعرة بيه موجودة قليل
شكول وشحجي انلصمت وحته الدمع بالعين نشف اسمع حماتي تحاجيهة وتستفسر منهة والدكتورة تجاوبهة واني صافنه شلون ابلغ انور بهيج خبر شلون عمتي وعمي اذا سمعو
مكتوبلج يا روح تتلوعين استحسفت يا زمن تشوفني مرتاحة
رجعت واني الحسبات تاخذني وترجعني وصلت للبيت وتخيلو تلكتنه عمتي وسمعت هيج خبر من بتهة اني ما حجيت شحجي شكول
لو من رجع انور وشاف البيت متوتر حسباله صاير شي تلكيته مثل كل مرة
الله يساعدك
- ويساعدج هاا بشري رحتي اليوم للدكتورة مو عدج حجز
- اي رحت كمل غداك ونحجي
- يا الله خير ان شاء الله
كمل غدا وكعدنه وحجيتله الوضع كلة ماضميت علي شي اول شي صفن تالي كال
لا حول ولا قوة الا بالله هذا المقدر ومكتوب الحمد لله على كل حال
لا تيأسين اسألي على غير دكتورة وروحي شوفي كلامهة يجوز هاي الدكتورة غلطانه يجوز التحاليل غلط
استغفر الله استغفر الله هذا الجنت خايف منه هذا الجنت محسب حسابه ليش ماردتج ترحين ودوخين من هيج اخبار توكلي على الله ولا تنقهرين ترة كله مقدر ومكتوب
بس كلامة ما ريحني ولا طيب جروحي وهم سمعت كلامة ورحت على غير دكتورة والمصيبه نفس الكلام رحمي طفولي
ماله چارة
ذبيت حمولي على رب العالمين وكعدت وسكتت بس الناس شيسكتهة ومنين اجيب احساس للبشر وكلة حس بيه وكافي تهيج جروحي
خلال فترة كمل بناء البيت وكال نحول بي بعد بيتنه وخلص وهنااا عمتي اشتغلته
مكعدهة بيت وحد ادري من جهالك من ولدك من بناتك كافي الغرفه عليهة وزوج الثانيه وخلف الك بزر
اووووووووو اشكال من هذا الكلام بس هوة يطبب منا يطلع منا يمكن اني لوما طبعي الهادئ جان انفجرت من زمان محد يحس بحد
الهام اختي اجاها الولد وامي وي رجلهة غركانه وابويه ابيته وعائلته واخويه ماخذته الحياة بتلاهبهة واني وكف بيه المركب
بقلم قمر الزمان 💋
رابط وات باد https://my.w.tt/PVgEuohnMcb
