حادثة غيرت حياتي
(اللهم صل وسلم وبارك علي سيدنا محمد وعلى اله وصحبه وسلم)
روني محمد
حكايتنا بتبدأ في طيارة محملة بالركاب متجهة الي احدى الدول الأوربية.....
كانت الرحلة على وشك الاقلاع والكل مشغول في الي اول مرة يسافر فخايف وفي الي نايم وفي الي مش مهتم يعني كل واحد في عالم مختلف... اما المضيفات فكانت بتشيك عالركاب بتتاكد من ربط الاحزمة لفت نظرها ان واحد من الركاب شكله تعبان وبيفك الكرافت بتاعة بدلته لاحظت ارتباكه وانه مربطش الحزام قربت منه وقالت
المضيفة : من فضلك اربط الحزام بتاعك...
راكب بتعب : كح كح ..... هي .... الطيارة هتطلع ..... امتى كح كح ؟
المضيفة : عشر دقايق حضرتك والطيارة هتبتدي تتحرك...
الراكب : كح كح ممكن كوباية ميه..
المضيفة : حاضر لحظة وبتكون عندك... هو حضرتك تعبان ؟
الراكب : كو. .. كويس يلا بس بسرعة...
بعد دقائق
-: كح كح هوا هوا... نفس.. نفسي مش قادر..
المضيفة : حضرتك كويس اتفضل الميه..
-: همووت هوا عاوز هوا الفلوس... الفلوس...
الكل بدا يقف ويقرب من الراجل الي كان مزعور وخايف ومفيش حاجة بيرددها غير كلمة واحدة.... الفلوس.. الفلوس
واحدة من الركاب قالت
-: الراجل شكله بيموت... لا حول ولا قوة إلا بالله...
راكب اخر : اتشاهد قول الشهادة.... يا جماعة مفيش دكتور هنا ؟
راكب : وسع وسع يابني انت وهو ... انا دكتور خليني اشوف الحالة
الكل وسع للدكتور عشان يقدر يكشف عليه
الدكتور بعد ما شافه غمض عنيه وقال
-: ان لله وان إليه راجعون البقاء لله..
الكل اترعب ولحظة صمت سيطرت على الجميع... الي مات ده يبقى رجل اعمال مشهور... اتعرف عنه انه محب للمال وللنساء... كان بيمتلك ملايين الدولارات في البنوك ده غير الشركات والمصانع بتاعته..
واحد من الركاب ردد بعض الايات القرائنية اثناء نقل رجال الإسعاف ليه
-: " وجاءت سكرة الموت بالحق ذالك ما كنت منه تحيد "
الأية هزت الجميع في منهم الي اتأثر وفي منهم الي مهتمش.. اما أنا فالأية دي خلت جسمي كله ينتفض تخيلت نفسي مكان الراجل الي مات.... كتير كنت بسمع عن رجل الاعمال المشهور "قاسم ابو المجد " ويشاء القدر اني اقابله ويوم ما اقابله يموت....
(انا هبة بشتغل مضيفة طيران ، كنت عالرحلة الي مات فيها رجل الاعمال " قاسم أبو المجد " ، اليوم ده عمل نقلة كبيرة في حياتي ... وفاة الراجل ده قدامي خلاني اعيد حسباتي وافكر ، هل لو جه اليوم وموت ، هل هلاقي الي يلقني الشهادة ولا هلاقي نفسي بردد الحاجة الي عشت عليها)
