« رُوحــي المُمزقة رأتــك قَبــل عينَــاي.. »
دخل المدعو جْويعة.. و تبعو الرجل الملثم جار جوليا من وراه.. هادشي داز تحت نظرات شادية الي رفضات تحرك من مكانها.. و المشهد الي قدامها ضرب ليها على الوتر الحساس..
هاهي ضحية جديدة طاحت بين يديهم.. و فاش عتبات داخل القصر فمصيرها تقرر و حياتها تدمرات.. تأسفات شادية على البنت الي مزال صغيرة.. و الي عرفات من نظراتها التايهين أنه محال عندها فكرة شنو كيتسناها..
تحركات شادية كتمشى بهدوء وسط الحديقة.. كانت باغة تستنشق الهواء و خرجات.. و ياريتها ماخرجات و شافت هاد المنظر..
جلسات فوق كرسي خشبي حاطة يديها جنبها.. و مزيرة عليهم بقوة.. عينيها لامعين تحت ضوء الگمرة.. و نظراتها كيطلقو الشرار.. صورة البنت الي شافت قبل لحظات مبغاتش تحيد من قدام عينيها..
••••• داخل صالة كبيرة.. خالية من الأثاث باستثناء مكتب و جوج كراسي جنبو.. جلس جويعة على سطح المكتب و عينيه مصغرهم كيشوووف فجوليا الي جلسها الرجل الملثم بقوة فوق الكرسي..
انتابه لرجليها و يديها الي كيرجفو.. و راسها الي مهبطة للأرض.. عارف أنها مرعوبة بشكل كبير.. و هادشي خلاه يحس بالنشوة و الانتصار..
جبد سيجارة عادية و فتتها و بدا يقاد وحدة آخرى.. يديه كيتحركو بدون ميركز نظرو عليهم كأنهم حافضين الخطوات بدقة.. بعدما قادها شعلها و حطها فمو.. ربع يديه و قال..
' شنو سميتك؟ '
جوليا متحركاتش و ماهزاتش راسها نهائيا.. الملثم فاش شافها ماجوباتش جرها بعنف من شعرها حتى رفعات راسها و قال..
' راه سولك.. جاوبيه '
ابتاسم جويعة و قال ليه..
' بشوية على السلعة.. خاصة هادي راها غالية '
جوليا شافت فجويعة بعيون غارقين دموع و خط الدم جامد تحت نيفها و ملطخ فمها.. كتألم من الشدة الي داير ليها هداك لشعرها و خايفة تبكي و يجرا فيها ما كثر..
بحركة منو رخى عليها الرجل الملثم و فنفس اللحظة قرب جويعة حتى وقف قدام جوليا.. جلس القرفصاء مقابل مع وجها و عاود السؤال..
' شنو سميتك؟ '
' جـ '
حركات شفايفها بغات تجاوب من خوفها.. و هو يحبسها جويعة بيدو الي حط على فمها.. قال..
' بلاش متقولي.. سميتك ماعندك ماديري بيها دابة و نتي هنا.. و لكن خاصني باش نعيط ليك.. ( دار راسو كيفكر ) شنو بانليك فـ ' جِيجي ' زوينة ياك! '
مرر يدو على شفايف جوليا ببطء و من بعد بعدهم.. وقف فاش سمع لباب تحل و رجال ثانين ملثمين داخلين و معاهم 4 لبنات مغطين ليهم ريوسهم..
أنت تقرأ
الجَــــــــــلاّد : ظَالم أم مظْلوم !
Mystère / Thriller【 الجَــــــــــلاّد : ظَالم أم مظْلوم ! 】 كتـــابة •• رجاء موري •• ❞ نَعم.. انا نِصف قِديسة نصف عَاهرة ❝ ❞ من أنتَ..؟ ملاك لِلبعض، شَيطان للآخرين ❝ ‴ روايتي كلاسيكية الطابع.. غامضة الأحداث.. تشمل العشق و الكراهية بجرعات مضاعفة...