قصص الأنبياء | بقلم إيمان شلبي

صاحب الجنتين

#قصص_الأنبياء
#الحلقة_التاسعة_والأربعون
#صاحب_الجنتين
قصتنا النهاردة ربنا ذكرها في القرآن لرسول الله ﷺ وهي رسالة لكل إللي هيقرأ القرآن على مر السنين،
عشان كفار قريش يعرفوا واحنا كمان نعرف إن العبرة مش بكثرة الأموال ولا بالغنى،
ولكن العبرة بالإيمان لأن الرجل ممكن يكون غني كافر ولا ينفعه ماله مثلكم يا كفار قريش👌
وممكن يكون الإنسان فقير ولكنه مؤمن وهو ده إللي هينفعه يوم القيامة زي فقراء الصحابة إللي انتم طلبتم من رسول الله ﷺ إنه يطردهم عشان تقعدوا معاه وتسمعوا كلامه👌
خلونا نشوف القصة مع بعض😊
القصة عن رجلين يُقال إنهم من بني إسرائيل، منعرفش في زمن أنهي نبي،
لكن إللي يهمنا إن قصتهم بتتكرر في كل زمان، فلازم ناخد بالنا ونعتبر..
الرجلين دول، واحد منهم غني ربنا أعطاله بستانين مليانين شجر من كل الثمرات، وخصوصا شجر العنب، لإنه أفضل الثمار ..
والمسافة إللي بين البستانين كمان مكنتش فاضية،
لأ، ده ربنا جعل فيها كمان زرع ، ده غير إن من الأطراف الخارجية للبستانين النخل محاوط المكان من كل جانب.. فكان شكل البستانين جميل جدا وجذاب وكله نضارة وتناسق..
كمان موقع البساتين كان ممتاز،
يعني  بيدخل له الهوا والشمس بشكل منتظم وصحي.. زي ما بنقول على شقة من الشقق مثلا: الشقة دي شِرحة وبِرحة ، جَوَّها بحري وهواها يرد الروح ويشرح القلب😅
أهه البستانين بتوع صاحبنا ده كانوا من أحسن ما يمكن في كل شيء بالذات الموقع، فعشان كده الثمار طلعت على أحسن ما يكون..
ومش بس كده، ده الثمر إللي كان بيطلع مكنش فيه أي حاجة منه بتبوظ خالص أو تفسد 👌
"وَاضْرِبْ لَهُمْ مَثَلًا رَجُلَيْنِ جَعَلْنَا لِأَحَدِهِمَا جَنَّتَيْنِ مِنْ أَعْنَابٍ وَحَفَفْنَاهُمَا بِنَخْلٍ وَجَعَلْنَا بَيْنَهُمَا زَرْعًا"
وكان لما يسقي الزرع في البستانين مكنش بيحتاج يحفر في الأرض عشان يطلع المياه الجوفية،
ولا كان بيحتاج إنه يجيب عُمال ينقلوا المياه للأرض عنده، ولا أي حاجة من دي،
لأ، ده ربنا كان منعّمه ومريّحه أكتر، فكان مفجّر له نهر منها فيها والنهر ده كان بيمشي في البساتين ويرويها،
وربنا جعل له زي عيون المية كده بتجري وسط البساتين من النهر ،فعلا سبحان الله حاجة تسحر العيون😮
"كِلْتَا الْجَنَّتَيْنِ آتَتْ أُكُلَهَا وَلَمْ تَظْلِمْ مِنْهُ شَيْئًا وَفَجَّرْنَا خِلَالَهُمَا نَهَرًا"
شوفوا النعم إللي ربنا أنعم بيها على الرجل دي كلها،
عمل إيه هو عشان يشكر النعم دي😕
☆شوفوا،
الناس في شكر النعم أنواع:
◇نوع بيتكبر ويطغى بالنعمة وبيعصي ربنا بيها،
ودول ربنا بيصبر عليهم لعلهم يتوبوا، ولما بيستمروا في معاصيهم وتكبّرهم، بيسلب منهم النعم دي أو بيموتهم عليها والعياذ بالله👌
يعني مثلا تلاقي واحد ربنا مديله نِعم زي نعمة البصر ونعمة السمع،
وبعدين تلاقيه بيستعملها في المعاصي ويتفرج على الأفلام والمسلسلات وبيسمع الأغاني..
أو تلاقي واحدة ربنا معطيها نعمة زي نعمة الجمال، تقعد تستعرض جمالها قدام الناس وتخرج متبرجة في الشارع وتفتن الشباب..
دول ممكن يفضلوا مستمرين في استعمال النعم في معصية الله لحد ما ربنا يسلبها منهم إن أراد عقابهم ولم يعفو عنهم..
كم مرة سمعتم عن بنت عملت حادثة وهي لابسة لبس مش كويس،
وخرجت من الحادثة وهي مشوّهة أو محروقة أو عندها عاهة مستديمة والعياذ بالله قضت على جماله إللي كانت بتُبَارز ربنا بيه بالمعصية ليل نهار بدل ما تشكر النعمة كما  يحب ويرضى؟
كم مرة سمعتم عن شاب عمل حادثة وهو بيسمع الأغاني وبدأ يطلّع في الروح، فحاولوا يلقنوه الشهادة لكن للأسف ما عرفش يقولها وفِضِل يردد الأغاني المحرمة لحد ما روحه طلعت؟
شوفنا وسمعنا كتير عن حكايات زي دي، وكلهم هيُبعَثوا يوم القيامة وهمّ على المعصية دي، إن لم يعف عنهم الله، لإن من مات على شيء بُعث عليه👌
◇النوع التاني من الناس هو نوع كل ما ربنا يزوّد له في النِّعم يتواضع لربنا ويشكر نعمته ويستعملها في طاعته عز وجل، وده ربنا بيمتّعه بالنعم دي حتى الممات..
كام مرة سمعنا عن واحد مات وهو ساجد أو صائم؟
دي ناس أفنت نعمة الصحة في تسخيرها في طاعة الله، وهو ده شكر النعمة..
كام مرة سمعتم عن بنت ماتت وهي بتقرأ القرآن؟
أو بنت ماتت بحجابها مستورة مش باين منها شعراية حتى، رغم إنها ممكن تكون وقعت من مكان مرتفع مثلا ،
الجزاء من جنس العمل يا جماعة، إللي يشكر نعمة ربنا ..ربنا هيبارك له في النعمة ويزودها له،
واحنا شوفنا مثال على شكر النعم في سليمان عليه السلام وفي ذي القرنين،
وإللي يكفر نعمة ربنا ويستعملها في معصيته ويتكبر بيها ويستغنى، ربنا هيسلبها منه في يوم من الأيام👌
وربنا مهما أمهل الناس، فهو يمهل ولا يهمل..
فالرجل صاحبنا بقى عمل إيه في النِّعم إللي ربنا أعطاها له💁‍♂️
للأسف كان من النوع الأول، تكبّر وطغى 😞
والراجل ده كان له صاحب فقير فلوسه قليلة مش زي صاحبه،
في يوم من الأيام الراجل الغني قال لصاحبه الفقير: تعال نتمشى في البستان عندي شوية كده..
دخلوا البستان على حالته إللي احنا وصفناها دي من الجمال والحُسن، وكان كمان ده وقت الحصاد فتخيلوا جمال المنظر👌
لما دخل مع صاحبه البستان وورّاله الجمال، بدأ يتكلم ويجادله عشان يأثر عليه فقال له  بكل غرور:
شايف أنا عندي أموال كتيرة إزاي؟!
ده غير مركزي الإجتماعي بين الناس ومكانتي بين الناس وقوتي ونفوذي بعشيرتي 😎
" فَقَالَ لِصَاحِبِهِ وَهُوَ يُحَاوِرُهُ أَنَا أَكْثَرُ مِنْكَ مَالًا وَأَعَزُّ نَفَرًا"
☆عارفين زي إيه 🤔
زي مثلا لما تلاقي واحدة مثلا من البنات إللي مش عايشة غير عشان تمتع نفسها بالدنيا،
فعايشة حياتها بالطول والعرض ومش فارق معاها لا حلال ولا حرام، فتلاقي البنت دي لما تشوف واحدة من البنات الملتزمات بطاعة ربنا بما يرضي الله وثابتة على الحجاب الشرعي الساتر المظبوط، فتقول لها:
شايفة أنا عايشة حياتي ومستمتعة بيها وبعمل كل إللي نفسي فيه إزاي💁‍♀️؟!
بخرج مع أصحابي في أي مكان براحتنا ومع أي حد براحتنا وفي أي وقت براحتنا ...
وبسمع الأغاني وبتفرج على السينما والأفلام براحتي وبسافر هنا وهناك ، هي دي السعادة يا بنتي😌
أنا عايشة حياتي أحسن منك.. أنا بستمتع بحياتي صح وانتِ دافنة نفسك بالحيا وهتضيعي عمرك في الخيمة إللي انتِ لابساها دي والحبسة إللي انتِ حطة نفسك فيها دي😎
فهي نفس الحالة بالضبط👌
المهم، صاحبنا قال الكلمتين دول بكل فخر وغرور وتكبر،
وكان داخل البستان من البداية بنفس الغرور ده، فبقى كل ما يبص على المكان وجماله يركبه الغرور أكتر..
وبدأ كلامه ياخد اتجاه واضح للكفر🙊
قال ياسلام عالجمال🤩
الجنة العظيمة دي إللي جذورها في الأرض والنخل إللي عمره سنين طويلة والمية الكثيرة دي مستحيل كده الجنة دي تفنى..إيه إللي يفنيها ..ده لو جراد الدنيا كله اتجمع مش هيقدر ياكلها😏
"وَدَخَلَ جَنَّتَهُ وَهُوَ ظَالِمٌ لِنَفْسِهِ قَالَ مَا أَظُنُّ أَنْ تَبِيدَ هَذِهِ أَبَدًا"
شايفين😐
من كتر غروره واستغناؤه بالنعمة عن المُنعم، بدأ يعتقد إن الجمال الشاسع ده الممتد شرقا وغربا وجذوره في أعماق الأرض وفروعه في عنان السماء، مستحيل إنه يفنى أو ينتهي ويزول👌
طبعا هو بيكلم صاحبه الفقير ..مش يسكت بقى لأ ده كمل
وقال لصاحبه الفقير :
انت بتقول إن في يوم قيامة ويوم القيامة كل شيء بيهلك وينتهي😏
طيب أنا بقولك إن مفيش يوم قيامة ..وحتى لو فرضنا جدلا يعني إن في يوم قيامة إللي أعطاني البساتين دي في الدنيا أكيد بيحبني وهيعطيني أحسن من البساتين يوم القيامة😎
"وَمَا أَظُنُّ السَّاعَةَ قَائِمَةً وَلَئِنْ رُدِدْتُ إِلَى رَبِّي لَأَجِدَنَّ خَيْرًا مِنْهَا مُنْقَلَبًا "
☆للأسف في ناس مفكرة إن لما ربنا بيعطيهم من نعيم الدنيا يبقى هو كده راضي عنهم..ومش فاهمين إن ربنا بيعطي الدنيا لمَن يحب ومَن يكره،  أما الآخرة فلا يعطيها إلا لمَن يحب👌
"وَلَا يَحْسَبَنَّ الَّذِينَ كَفَرُوا أَنَّمَا نُمْلِي لَهُمْ خَيْرٌ لِّأَنفُسِهِمْ ۚ إِنَّمَا نُمْلِي لَهُمْ لِيَزْدَادُوا إِثْمًا ۚ"
ربنا لما يعطي الإنسان بيكون على حسب الشغل إللي بيشتغله ومدى إتقانه ليه، زي الغرب مثلا همّ دُوَل كافرة لكن بيشتغلوا صح في أمور الدنيا على أعلى مستوى،
فربنا مديهم على أد شغلهم، هو أه متاع قليل.. لكنه متاع وأجر مكافيء لجهدهم وسعيهم🤷‍♂️
اليابان مثلا عندهم تقدم رهيب ليه مع إنهم كفار؟
لإن في سنن كونية ..اشتغل واتعب هتلاقي نتيجة حتما ولابد على أد شغلك، بغض النظر انت مؤمن ولّا لأ..
فكثرة الأموال والأولاد أو قلتهم مش دليل أبدا على حب ربنا للإنسان أو كرهه له👌
"وَمَا أَمْوَالُكُمْ وَلَا أَوْلَادُكُم بِالَّتِي تُقَرِّبُكُمْ عِندَنَا زُلْفَىٰ "
وفي سورة الفجر، ربنا قال:
"فَأَمَّا الْإِنسَانُ إِذَا مَا ابْتَلَاهُ رَبُّهُ فَأَكْرَمَهُ وَنَعَّمَهُ فَيَقُولُ رَبِّي أَكْرَمَنِ ۩ وَأَمَّآ إِذَا مَا ابْتَلاهُ فَقَدَرَ عَلَيْهِ رِزْقَهُ فَيَقُولُ رَبِّي أَهَانَنِي ۩كلا"
يعني ربنا بيعلمنا إن الأمر مش كده خالص،
الأمر فتنة واختبار في النّعم والنّقم:
"وَنَبْلُوكُمْ بِالشَّرِّ وَالْخَيْرِ فِتْنَةً"
◇عارفين تبقى علامة حب وتكريم امتى 😁
لما الإنسان يكون مؤمن وبيستعمل الأموال دي كلها في طاعة الله 😊
كان رد فعل الرجل الفقير إيه بقى👌
الرجل الفقير كان مؤمن وكان شجاع..
لما سمع كلام صاحبه الكافر ده مقلش أنا فقير وهو غني ولو اتكلمت ونصحته ممكن يضرني أو يحرجني أكثر ويضايقني بكلامه، ومش بعيد يقهرني بعشيرته😔
بالعكس ده كان معتز بدينه ودافع عن الحق بأسلوب راقي وبعلم وبحكمة وبحجج مُقنعة ومنطقية ومؤثرة👌
والمفروض كل صاحب حق يكون كده.. يتكلم بقوة وعزة بشكل يقع في نفوس الناس موقع مؤثر،
مش يتكلم بخوف وتردد وارتعاش فالناس تستغل ده وترتاب في الحق وترده😑
شوفوا كده الرجل الفقير المؤمن بيقول إيه:
"قَالَ لَهُ صَاحِبُهُ وَهُوَ يُحَاوِرُهُ أَكَفَرْتَ بِالَّذِي خَلَقَكَ مِنْ تُرَابٍ ثُمَّ مِنْ نُطْفَةٍ ثُمَّ سَوَّاكَ رَجُلًا ۩ لَكِنَّا هُوَ اللَّهُ رَبِّي وَلَا أُشْرِكُ بِرَبِّي أَحَدًا"
يعني بيقوله انت كفرت باللي خلقك من تراب وقادر زي ما خلقك من نطفة وخلاك رجل واقف بقوة وغرور كده إنه يهلكك😲
وكمان بتقول مفيش يوم قيامة😱
أما أنا فأنا أؤمن بأن الله ربي ولا أشرك به أحدا سبحانه🤚
ثم ده بدل ما تحس بحياء من ربنا من كتر النعم إللي عندك، وتقول لا حول ولا قوة إلا بالله وما شاء الله كان بحوله وقوته وما لم يشأ لم يكن،
وتقول الأذكار إللي تصون النعمة دي وتحفظها من العين والعُجب والزوال😠
"وَلَوْلَا إِذْ دَخَلْتَ جَنَّتَكَ قُلْتَ مَا شَاءَ اللَّهُ لَا قُوَّةَ إِلَّا بِاللَّهِ "
فكان أول حاجة الرجل المؤمن يعلمها للرجل الغني هي التوحيد لما قاله
"لَكِنَّا هُوَ اللَّهُ رَبِّي وَلَا أُشْرِكُ بِرَبِّي أَحَدًا"
والرجل الغني ده عمل كمية خطايا وكوارث تودي في داهية😬
هناخدهم واحدة واحدة 😅
◇الكارثة الأولى لما شكك في مجيء يوم القيامة،
والشك في يوم القيامة كُفر وتكذيب لله عز وجل😶
لإن ربنا أقسم إن يوم القيامة والجزاء جاي، ومن صفات المؤمنين إنهم مصدقين لكلام ربنا كله بما في ذلك اليقين في يوم القيامة👌
يعني مينفعش واحد مؤمن يقول :والله أنا هعبد ربنا وخلاص، طلع في يوم قيامة بجد يبقى أنا كنت صح وربنا هيجازيني💁‍♂️
طلع  مفيش يوم قيامة يبقى مخسرناش حاجة كيبرة 🤷‍♂️
الكلام ده ممكن نقوله فقط في المناظرات مع الملحدين،
من باب النقاش العقلي بالحجة،
لكن عند المؤمنين المسائل دي قاطعة، لاااازم اليقين  100% إن فعلا في يوم قيامة وإن كل واحد هيتحاسب على أعماله السيئة وسيجازَى على أعماله الصالحة👌
¤في هنا ملحوظة مهمة بالنسبة للدعوة😊
هل كل الناس ينفع نحاورهم بالعلم زي ما صاحبنا المؤمن عمل مع الكافر🤔
لو حصل واتفتح قصادنا موضوع واحنا منعرفش عنه حاجة أو مش متأكدين من الكلام يبقى بلاش نتكلم لحد ما نجمع المعلومات الخاصة بالموضوع،
يعني مثلا واحد جاي يتناقش معاك إن الأغاني مش حرام وإن الشيخ فلان قال والتاني قال والثالث..
وانت معندكش العلم الكافي إنك ترد عليه أو معندكش القدرة على إقناعه يبقى متتكلمش،
قول هراجع المسألة وأرد عليك أو استعين بحد تاني يرد عليه..ليه بقى🤔
عشان منضعِفش الحق👌
وخصوصا لو مع ناس عايزة تجادل عشان الجدال ..هم مش عايزين الحق هم بيجادلوا وخلاص عشان التشويش، وبيبانوا على فكرة🙄
فهنا هيكونوا محتاجين لأسلوب أشد وإنك تخليهم يسكتوا خالص👌
مثلا لما واحدة تيجي تسألك هو النقاب فرض ولا سنة وتسكت..دي بتبقى عايزة تعرف وتتعلم..غير إللي تيجي تقولك النقاب أصلا مش فرض ولا هو من الدين أساسا و..و... فالشخصية الأولى محتاجة نقاش معين والثانية محتاجة نقاش تاني خالص😅
◇◇الكارثة الثانية إللي عملها الغني الكافر ده إنه تفاخر على صاحبه الفقير بما ليس عنده، والتفاخر كأصل منهي عنه، والنهي أشد لو هيكون تفاخر على فقير معندوش الأمور دي إللي بتفاخر بيها، فهو ظلم نفسه بسبب معصيته لله.
والإنسان بيظلم غيره لما ياخذ حقوقهم، ويظلم نفسه لما بيخليها تعصي الله👌
فالناس ثلاثة أنواع :
¤ظالم لنفسه بإنه ميعملش الفرائض،
¤والنوع الثاني مُقتصد يعني يادوب بيعمل الفرائض أو الواجبات..يصلي الفرائض يصوم رمضان يؤدي الزكاة وهكذا بيعمل الفرائض إللي ربنا فرضها وبس،
¤النوع الثالث بقى وهو السابق بالخيرات،
والنوع ده من اسمه أي حاجة يعرفها يعملها على طول ميفكرش بقى هي فرض ولا سنة،
وصَل له فضل الصدقة تلاقيه بيتصدق،
وصَل له فضل الذكر تلاقيه بيذكر ربنا على طول..وصل له فضل صلاة السنن تلاقيه ميسبش سنة وهكذا👌
🤲ربنا يجعلنا منهم يارب
◇الكارثة الثالثة إللي عملها: كانت إنه أصاب نفسه بالعين😳
واحنا عارفين إن العين حق.. والعين على فكرة غير الحسد😁
الحسد حاجة وحشة ، وهو إن الإنسان يتمنى زوال النعمة من عند الشخص التاني إللي عنده الحاجة الحلوة دي، عاوزها تزول من عنده وتبقى عندي أنا بس،
أما العين فهي إني أُعجب بحاجة إعجاب شديد جدا ، زي صاحب الجنتين كده لما دخل البستانين بتوعه وأُعجب بيهم جدا ،
دي عين مش حسد لإنه طبعا مش بيتمنى إن البساتين بتاعته دي تزول من عنده وتروح لنفسه تاني😶
وعلى فكرة في الغالب بيحصل معانا أو مع غيرنا موضوع العين ده وبنكون فاكرينه حسد😅
وعلى فكرة برده موضوع العين ده مش بيكون له علاقة بحب أو كره بين الناس زي الحسد كده والعياذ بالله،
لأ، هي بتيجي تلقائية من غير ما الإنسان ياخد باله، بتيجي كعقاب على نسيان ذكر المُنعم عز وجل، زي قرصة وِدن كده تفكرنا عشان لو مرة على التانية نسينا نذكر المُنعم هننساه وننسى شكره مع الوقت والعياذ بالله😅
فلما نشوف حاجة تعجبنا نفتكر إننا نقول :
《ما شاء الله اللهم بارك》👌
فلو هي حاجة بتاعتنا احنا شخصيا نقول:
《ما شاء الله لا قوة إلا بالله》ولو هي حاجة بتاعة حد غيرنا نقول :《اللهم بارك》
عشان كد الرجل الفقير المؤمن قال لصاحبه :
"وَلَوْلَا إِذْ دَخَلْتَ جَنَّتَكَ قُلْتَ مَا شَاءَ اللَّهُ لَا قُوَّةَ إِلَّا بِاللَّهِ"
فهو بيعلمه إزاي يتعامل مع النعم ودي تاني حاجة الرجل المؤمن علمها له👌
◇الكارثة الرابعة إللي الراجل ده عملها: إنه أُعجب بماله والبساتين بتاعته 《إعجاب غلط》
في إعجاب صح وفي إعجاب غلط.. الإعجاب الصح إنك تستشعر بالفعل جمال النعمة عادي جدا وتنبسط بيها وتفرح، زي ما الحديث علمنا "ثوبه جميل ونعله جميل"،
ده مفيهوش حاجة،
لكن العُجب الغلط هو إنك تبقى فرحان بالنعمة لإنك شايف إنك تستحقها بشطارتك وانك أهل للنعم لإنك إنسان جميل تستحق كل جميل..
هو ده بقى المرض القلبي المُهلك والمحبط للعمل والعياذ بالله، وإللي لو صاحبه معالجهوش بيؤدي بيه للكفر زي صاحبنا ده والعياذ بالله😞
ومثال على كده إن واحد مثلا ربنا يوفقه لقيام الليل وصيام النهار، فييجي يشوف واحد بيشتكي إنه مبيصليش الفجر مثلا،
فيدخل في قلبه عُجب ويقول بينه وبين نفسه: يا سلام عليّ أنا وعلى عزيمتي 😎
ده مبيصليش الفجر لسه، ده أنا مش بس بصلي الفجر، لأ، ده أنا بقيم الليل وبصوم كمان😌
فالعُجب ده أصلا محرم وفيه هلاك لصاحبه،
والإنسان بيتحرم من الطاعات بسبب إعجابه بنفسه ونسيانه إن إللي أنعم عليه بالطاعات دي هو الله وإن لولا توفيق ربنا مكنش الإنسان عمل أي طاعة👌
المصيبة بقى إن العُجب ده حاجة خفية أخفى من دبيب النمل 😶
فمن رحمة ربنا بينا إننا لما بنقع في العُجب واحنا مش حاسين إنه بيحرمنا من الطاعة دي مثلا ..عارفين ليه😁
تخيلوا كده معايا إنسان عمال يعمل الأعمال الصالحة وقلبه فيه عُجب وجه يوم القيامة لقى معندوش أعمال صالحة خالص وضعه هيكون إيه🙊
بعكس لما الإنسان يتحرم من الطاعات أو النعم يبدأ يدور عن السبب ..يا ترى إيه إللي حصل ..ياترى أنا مبقتش أصلي قيام الليل ليه..مبقتش أصلي الفجر ليه..مبقتش أقرأ قرآن وأحفظ زي الأول ليه...وكل ماكان الإنسان صادق هتلاقي ربنا هداه إنه يعرف السبب ويعالجه👌
الرجل المؤمن بقى لخّص لصاحبه الحوار كله في كلمتين وعلمه درس عظيم ..
قال له لو انت فرحان بأموالك وأولادك وبتعايرني بفقري  وشايفني أقل منك في كل حاجة،
"إِنْ تَرَنِ أَنَا أَقَلَّ مِنْكَ مَالًا وَوَلَدًا"
وانت بتكفر بإللي أنعم عليك بالنعم دي وحرمني منها لحكمة عظيمة أنا مؤمن بيها بكل يقين؛
فأنا ظني إن ربنا هيعاقبك على تصرفك وكلامك إللي قلته ده، ومش بعيد على ربنا إنه بين يوم وليلة زي ما رزقك يرزقني بنين وبنات وأموال وجنات وزيادة عليهم كمان،
ومش بس كده، لأ، ويرسل صواعق من السماء تحرق بساتينك وتساويها بالأرض لدرجة إن الناس تتزحلق من عليها من شدة ما بقت ملساء جرداء بلا زرع ولا ماء..
"فَعَسَى رَبِّي أَنْ يُؤْتِيَنِ خَيْرًا مِنْ جَنَّتِكَ وَيُرْسِلَ عَلَيْهَا حُسْبَانًا مِنَ السَّمَاءِ فَتُصْبِحَ صَعِيدًا زَلَقًا"
أو حتى من غير صواعق ولا حاجة ممكن في يوم وليلة ربك يجعل الماء إللي بيروي البساتين بتاعتك دي يجف ويغوص في الأرض ويتبخر في السماء،
"أَوْ يُصْبِحَ مَاؤُهَا غَوْرًا فَلَنْ تَسْتَطِيعَ لَهُ طَلَبًا"
ومهما تحفر تاني متلاقيش المية ، فتموت جناتك دي كلها قصاد عينك وانت مش قادر تتصرف لإنك عبد ضعيف وربك هو الرزاق ذو القوة المتين،
فمتتكبرش بنعمة إنت لا تملك حفظها من أمر الله ولا تملك صك إنها ليك انت لوحدك.. واتعلم إزاي تشكر وتصون النعمة، قبل فوات الأوان..
وفعلا نزل العقاب الإلهي👌
"وَأُحِيطَ بِثَمَرِهِ فَأَصْبَحَ يُقَلِّبُ كَفَّيْهِ عَلَى مَا أَنْفَقَ فِيهَا وَهِيَ خَاوِيَةٌ عَلَى عُرُوشِهَا وَيَقُولُ يَا لَيْتَنِي لَمْ أُشْرِكْ بِرَبِّي أَحَدًا "
هلك الثمر كله وهلكت البستانين كلها زي ما المؤمن قال..
والغني الكافر جاحد النعمة بقى واقف مذهول بيضرب كف في كف من الصدمة ،
وبقى يكلم نفسه من شدة الندم ويقول ياريتني ما أشركت بالله ..
يا ريتني سمعت النصيحة الحق..
يا ريتني شكرت ربي على النعم وأيقنت إني لا حول لي ولا قوة من دون الله😔
فين عشيرته؟؟ فين أصحابه؟؟ فين الأغنيا الطاغين إللي زيه؟
"وَلَمْ تَكُنْ لَهُ فِئَةٌ يَنْصُرُونَهُ مِنْ دُونِ اللَّهِ وَمَا كَانَ مُنْتَصِرًا "
مفيش...
كل إللي كان بيفتخر بيهم على الفقير، سواء مال أو أولاد أو عشيرة كله اختفى.. وبقى لوحده تماما...
وحتى لو في حد حواليه فوجوده زي قِلِّته لإن مكنش يقدر يمنع عنه عقاب ربنا له أو ينصره من دونه عز وجل..
"هُنَالِكَ الْوَلَايَةُ لِلَّهِ الْحَقِّ ۚ هُوَ خَيْرٌ ثَوَابًا وَخَيْرٌ عُقْبًا "
يعني ياريته كان سمع كلام صاحبه الفقير المؤمن، لإن نصرة ربنا وثوابه المضاعف بيكونوا فقط لأولياؤه المؤمنين، لكن خلاص فات الأوان..
☆وللأسف ده واقع كتير من الناس.. نقعد ننصح الواحد منهم وننبهه ونذكّره بالله، وهو مستمر ومعاند وسادد ودانه عن الحق،
لحد ما في يوم تلاقي ربنا عاقبه في الحاجة إللي كان بيعصي ربنا بيها،
وساعتها يندم أشد الندم، بس أوقات كتير بيبقى ندم حيث لا ينفع الندم وبيكون الإنسان خسر حاجات غالية أوي يفضل طول عمره متحسر عليها ومتألم من أثرها..
فياريت نتعلم من دروس قصص القرآن، بدل ما ندفع التمن غالي من حياتنا..
◇والنوع ده، يعتبر النوع الأول من أنواع العقوبات، إللي هو النوع إللي ربنا بيعجّل له العقوبة في الدنيا👌
◇أما النوع التاني، فده بقى إللي حتى لو ندم فندمه مش هينفعه لإنه بيكون ندم عند الغرغرة وسكرات الموت ،
أو لإنه بيكون من إللي طغى واستكبر على الهداية واستحب الضلال فربنا طبع على قلبه وزاده ضلال على ضلاله لحد ما يموت،و ده إللي بتتأجل عقوبتهم  للآخرة👌
تلاقي واحد ظالم طاغية وعايش زي ماهو عايز،  لحد ما يموت، لكن عقوبته مستنياه في الآخرة..
وتلاقي بنت ولّا شاب ماليين الأرض فجور ومعاصي وفسق وفجأة ربنا يقبض أرواحهم والعياذ بالله قبل ما ينزل بيهم أي عقاب دنيوي 😞
◇وفي نوع ثالث وهو النوع إللي ربنا بيعاقبه وهو مش حاسس،
تلاقي الإنسان ربنا حرمه من الطاعات ومن القرب منه وهو مش واخد باله ومفكر إنه عشان جسمه سليم وبياكل وبيشرب وعنده مُتع الدنيا يبقى هو كده تمام 😑
وناسي إن أهم حاجة هي سلامة القلب لإن يوم القيامة يوم لا ينفع مال ولا بنون إلا من أتى الله بقلب سليم 👌
وده إللي بيسميه العلماء 《الاستدراج بالنعم》
يعني ربنا يُنعم عليك رغم المعاصي، ساعتها لازم تقلق وتراجع نفسك وتعرف إنك مُستَدرَج،
لإن النعم دي هتشغلك عن التوبة ومحاسبة النفس في المعاصي لإنها هتخليك تتخيل إن ربنا راضي عنك وقلبك بفتة بيضاء بقى وكده😅
فييجي الموت فجأة وانت على الحال دي من الغفلة وساعتها مش هينفع الإنسان شيء👌
"فَلَمَّا نَسُوا مَا ذُكِّرُوا بِهِ فَتَحْنَا عَلَيْهِمْ أَبْوَابَ كُلِّ شَيْءٍ حَتَّىٰ إِذَا فَرِحُوا بِمَا أُوتُوا أَخَذْنَاهُم بَغْتَةً فَإِذَا هُم مُّبْلِسُونَ"
ربنا يرزقنا جميعا القلب السليم إللي يكون سبب في دخولنا للجنة🤲
وبكده خلصت قصتنا النهاردة،
وإن شاء الله المرة الجاية نتكلم عن قصة الأعمى والأبرص والأقرع 👌
●ملحوظة:
إن شاء الله هكمل قصص الأنبياء بعد الجزء الجاي فهدخل في قصة يحيى وزكريا وعيسى عليهم السلام، وباقي قصص القرآن والحديث النبوي هتلاقوها في السيرة إن شاء الله😊
☆ملحوظة:
حد عايز يأخذ القصص وينشرها يتفضل أنا معنديش مانع نهائي😊
طبعا أي ملاحظة ياريت تقوليلي فالمؤمن مرآة أخيه😁✌
#Eman_Shalapy