قصص الأنبياء | بقلم إيمان شلبي

مريم_زكريا_يحى_عيسى (9)

#قصص_الأنبياء
#الحلقة_التاسعة_والخمسون
#مريم_زكريا_الجزء_التاسع
#عيسى_الجزء_الخامس
وقفنا المرة إللي فاتت عند الحواريين لما سألوا عيسى عليه السلام سؤال غريب.. قالوا إيه..؟
"إذْ قَالَ الْحَوَارِيُّونَ يَا عِيسَى ابْنَ مَرْيَمَ هَلْ يَسْتَطِيعُ رَبُّكَ أَن يُنَزِّلَ عَلَيْنَا مَائِدَةً مِّنَ السَّمَاء "
يعني ياعيسى هو ربك يقدر إنه ينزل علينا مائدة من السماء 😅🤔
☆بالضبط كده زي ما قرأتم، مائدة😀
عايزين ترابيزة عليها أكل  تنزل لهم من السماء😶
عيسى عليه السلام قال لهم : اتقوا الله😳
إزاي تطلبوا حاجة زي كده والمفروض إنكم مؤمنين😑
"قَالَ اتَّقُواْ اللَّهَ إِن كُنتُم مُّؤْمِنِينَ"
متسألوش الأسئلة دي وتطلبوا كل شوية آية ومعجزة، عشان مينزلش عليكم العذاب.. كفاية المعجزات إللي شفتوها لحد دلوقتي😕
☆فاكرين ثمود قوم صالح😬
لما طلبوا معجزة الناقة زي ماكانوا عايزين بالضبط وزي ما وصفوها وبعدين كفروا برده فربنا عذبهم 👌
¤ممكن هنا حد يسأل:
هو مش المفروض إن الحواريين أصحاب عيسى عليه السلام دول هم المؤمنين المخلصين إللي على أعلى درجة من الإيمان؟
إزاي بقى يشُكّوا في قُدرة ربنا ويسألوا عن قدرة ربنا، وكمان بصيغة "هل يستطيع ربك" وكأنه هو رب عيسى عليه السلام بس ومش ربهم إللي بيعبدوه🤔
هوّ السؤال هنا يا جماعة مكنش سؤال استفهامي ومستنيين إجابة عليه بأيوة أو لأ،
لكن السؤال هنا كان لغرض إنهم يزدادوا إيمانا، زي إبراهيم عليه السلام لما طلب من ربنا إنه يشوف إزاي عز وجل بيحيي الموتى،
أو إن سؤالهم بالطريقة دي كان من باب التأدب مع الله مش الشك في قدرته،
يعني زي مثلا ولله المثل الأعلى لما يكون حد فينا معزوم عند حد وعايش دور الكسوف شوية😅
فنقول لأي حد من الناس إللي احنا عندهم:
تقدر تجيبلي مناديل؟
أو تقدر تجيبلي كوباية مية؟
هو يقدر أكيد، واحنا معندناش شك في ده،
لكن احنا لما طلبنا الحاجة بعِدنا عن أسلوب الأمر إللي هو: هات لي كوباية مية..  من باب الأدب يعني😁
فالحواريين استعملوا الأدب مع ربنا لما سألوا عيسى عليه السلام،
وقالوا هل ربك يستطيع إنه ينزّل علينا مائدة من السماء؟ يعني بدل ما يقولوا أنزل علينا مائدة من السماء؛ خلوها زي عَرض يا إما يُقبل أو لا يُقبل👌
فلما عيسى عليه السلام تخيل إن ده سوء أدب منهم أو شك منهم، وقال لهم اتقوا الله؛ بدأوا يوضحوا وجهة نظرهم وقالوا:
احنا جعانين وعايزين ناكل فدي فرصة مناسبة لكده،
وكمان بالمرة نطمن بآية جديدة تخص استجابة ربنا لدعاءك وإنك فعلا رسول من عنده ومش بتكذب علينا،
يعني لما تدعي ربنا بحاجة احنا إللي اقترحناها عليك ونشوف إن ربنا عز وجل استجاب لك؛
احنا كده هنبقى مطمنين أكتر إنك صادق بإنك نبي مقرب منه عز وجل💁‍♂️
كمان الناس بتكذّبك ياعيسى فاحنا هنشهد عندهم ونقول لهم إنك حققت لنا معجزة جديدة زي ما طلبنا بالضبط، معجزة مختلفة عن معجزاتك الطبية المعروفة👌
"قَالُواْ نُرِيدُ أَن نَّأْكُلَ مِنْهَا وَتَطْمَئِنَّ قُلُوبُنَا وَنَعْلَمَ أَن قَدْ صَدَقْتَنَا وَنَكُونَ عَلَيْهَا مِنَ الشَّاهِدِينَ"
☆يعني عيسى عليه السلام لما كان بيَشفي الأعمى مكنتش حاجة مقنعة بالنسبة لهم،
ولما كان بيحيي الموتى ويشفي الأبرص بإذن الله و...و... ده برده مكنش حاجة مقنعة  كفاية، لكن الأكل هو إللي هيقنعهم بقى 😅
☆بالمناسبة ...عقيدة النصارى في إن عيسى عليه السلام كان إله أو ابن إله مكنتش موجودة إطلاقا في وجود عيسى عليه السلام،
وانتم شفتم الحواريين بيقولوا إيه، بيقولوا :
"ربك" مقالوش أباك الذي في السماء والكلام ده🙄
والآية إللي ربنا بيقول فيها:
"وَإِذْ قَالَ اللَّهُ يَا عِيسَى ابْنَ مَرْيَمَ أَأَنتَ قُلْتَ لِلنَّاسِ اتَّخِذُونِي وَأُمِّيَ إِلَٰهَيْنِ مِن دُونِ اللَّهِ"
دي مش في الدنيا، السؤال ده ربنا هيسأله لعيسى عليه السلام في الآخرة من  باب إنه يُشهده على أمته إللي كفرت بالله عز وجل من بعده👌
عيسى عليه السلام بدأ يدعي ربنا إنه ينزل عليهم المائدة إللي طلبوها،
وربنا ذكر الدعاء إللي عيسى عليه السلام دعاه بالنص، مع إنه كان ممكن عز وجل يقول "ودعا عيسى ربه "وبس كده، لكن معنى إن ربنا أخبرنا بالدعاء بألفاظه يبقى ده معناه إن ربنا《يريد》 إنه يقول لنا رسالة 😊
☆بالمناسبة يا جماعة..مينفعش نقول ربنا 《عايز》 نقول ربنا 《يُريد》 كذا، لأن كلمة عِوَز في اللغة العربية بتدل على الحاجة وضيق الحال،
فمينفعش نستخدم كلمة زي كده مع رب العالمين حتى لو منقصدش المعنى السيء😅
أنا عارفة إنها كلمة بتتقال كده واتعودنا عليها،
لكن لازم نتأدب مع ربنا ونستعمل الألفاظ إللي تليق به،
هو لو واحد فينا بيتكلم مع مديره في الشغل ولا بيتكلم مع حد في مركز عالي هيتكلم معاه كده بأيّ كلام ولّا هيستعمل الكلام المناسب💁‍♂️
أهه ربنا أحق إننا نتكلم معاه بأدب 👌
نرجع للرسالة إللي ربنا 《يريد》 إنه يوصلها لنا من خلال دعاء عيسى عليه السلام😊
"قال عيسى بنُ مريم اللَّهُمَّ رَبَّنَا أَنزِلْ عَلَيْنَا مَائِدَةً مِّنَ السَّمَاء تَكُونُ لَنَا عِيداً لِّأَوَّلِنَا وَآخِرِنَا وَآيَةً مِّنكَ وَارْزُقْنَا وَأَنتَ خَيْرُ الرَّازِقِينَ"
ربنا بيقول لنا تعلموا من الأنبياء وبيعلمنا من خلال عيسى عليه السلام إزاي ندعوه ،
مش بس نقول يارب احنا عايزين كذا وكذا مجرد كلام وخلاص😶
عيسى عليه السلام مقلش يارب أنزل علينا مائدة من السماء وخلص الموضوع،
لأ، ده قعَد يفَصّل في الغاية إللي هتحصل لما ربنا يستجيب الدعاء،
وإللي كان من ضمنها إن اليوم ده هيكون يوم عيد لينا يعني هيبقى يوم مشهود...يوم عظيم..
فكإنه بيقول لربنا: يارب لما تعطينا نعمة من نعمك فاحنا هنشكرها ومش هننساها،
وهنوصي حتى الأجيال إللي هتيجي من بعدنا إنهم يفتكروها ويشكروا نعمتك للأبد..
وكمان تبقى علامة منك يارب للحواريين ولكل الناس إني صادق وإني مُؤيد منك بقوة،
واحنا يارب منستغناش عن رزقك ومحدش بيرزقنا غيرك، فارزقنا وأنت خير الرازقين🤲
فعيسى عليه السلام بيختار الألفاظ وهو بيدعي ربنا، وكمان مُنكسر لله في الدعاء؛
لإن كل ما كان الإنسان منكسر لله وعنده خشوع وتذلل صادق لله في الدعاء، كل ما كان استجابة الدعاء أسرع👌
وحتى عمر بن الخطاب رضي الله عنه قال:
"أنا لا أحمل هم الإجابة ولكن أحمل هم الدعاء"
☆ممكن حد يقول طيب أنا بكون منكسر وبدعي بخشوع وبعمل كل ده بس مفيش استجابة 😔
احنا قلنا قبل كده إن أي دعاء بندعيه ربنا بيستجيبه ١٠٠% لكن الإستجابة بتختلف يا إما بناخده حسنات يوم القيامة،
أو ربنا يحققه لنا زي ما دعينا بالضبط، أو ربنا يبعد عننا مصائب على قدر ما دعينا👌
مش هعيد الكلام تاني ممكن ترجعوا له في قصة الأعمى والأبرص والأقرع😊
لكن في نقطة تانية وهي إن ممكن دعائنا أصلا ربنا لا يستجيبه بسبب موانع ، يعني في حاجة اسمها موانع استجابة الدعاء😀
زي واحد بياكل حرام..فلوسه فيها ربا..بياكل أموال الناس بالباطل ..بيسرق ...فده ربنا لا يستجيب له👌
زي ما الصحابي قال عن رسول الله ﷺ:
"ثُمَّ ذَكَرَ رسول الله ﷺ  الرَّجُلَ يُطِيلُ السَّفَرَ أَشْعَثَ أَغْبَرَ يَمُدُّ يَدَيْهِ إِلَى السَّمَاءِ:
يَا رَبِّ يَا رَبِّ، وَمَطْعَمُهُ حَرَامٌ، وَمَشْرَبُهُ حَرَامٌ، وَمَلْبَسُهُ حَرَامٌ، وَغُذِيَ بِالْحَرَامِ، فَأَنَّى يُسْتَجَابُ لِذَلِكَ؟!
واحد تاني سايب الأمر بالمعروف والنهي عن المنكر وعايش بمنطق وأنا مالي ..دع الخلق للخالق..كل واحد حر..شايف المنكر قصاده وهو عادي ومش بينكره حتى بقلبه😑
ده برده ربنا لا يستجيب له،
قال رسول الله ﷺ :
"والَّذي نَفسي بيدِهِ لتأمُرُنَّ بالمعروفِ ولتَنهوُنَّ عنِ المنكرِ أو ليوشِكَنَّ اللَّهُ أن يبعثَ عليكُم عقابًا منهُ ثمَّ تَدعونَهُ فلا يَستجيبُ لَكُم"
واحد ثالث مستعجل كل شوية يقول دعوت ودعوت وربنا مستجبش لي😞
قال رسول الله ﷺ:
"يُسْتَجابُ لأحَدِكُمْ ما لَمْ يَعْجَلْ، يقولُ: دَعَوْتُ فَلَمْ يُسْتَجَبْ لِي."
واحد غيره بيدعي وهو بيجرّب ..يشوف هل ربنا هيستجيب دعاؤه ولّا لأ، وغير إللي بيدعي وهو عنده شك في استجابة ربنا لدعاؤه و....و...
الكبسة بقى إن الواحد يبقى فيه كل موانع استجابة الدعاء وبعدين ييجي في الآخر ويقول:
هو فين بقى ادعوني استجب لكم😑
هو فين أجيبُ دعوة الداع إذا دعانِ😞
ويوصل لمرحلة معينة بسبب عدم استجابة دعاؤه يقول: وهو فين ربنا بقى من إللي أنا فيه ده😕
وهو السبب أصلا في إللي هو فيه...مش بيكلف نفسه يتعلم ..
مش بيكلف نفسه يسأل...
مش بيكلف نفسه يغير عشان دعاؤه يُستجاب...عايز يعيش الدنيا على هواه بالطول والعرض وكمان عايز الآخرة..طب إزاي 🤓
فلما ندعي ونلاقي استجابة الدعاء تأخرت نراجع نفسنا ونشوف هل في موانع لاستجابة الدعاء ولا كله تمام 👌
لو كله تمام يبقى عندنا بشارة إن دعاءنا مستجاب في الدنيا أو الآخرة من الثلاثة إللي قلنا عليهم من شوية
طيب عندنا أي مانع نعمل إيه ..على طول نصلح ونغير 👌
◇الكلام قاعدة عاااامة 😑
محدش ياخد الكلام على نفسه ويفسره غلط وبعدين يقولي انتِ قلتِ و عيدتي🙃
المهم،
ربنا استجاب لعيسى عليه السلام، وطمنه إنه هينزل المائدة عليهم لكن بشرط :
أي حد هيكفر بعد نزول المائدة، ربنا هيعذبه عذاب شديد جدا؛ لإن همّ إللي طلبوها واشترطوا ..
وكمان لإن لو ربنا مكنش اشترط عليهم الشرط ده كانوا هيكرروا كل شوية طلب تاني ويقولوا طيب عايزين كذا وكذا و..و ...و.... والطلبات مش هتخلص😅
"قَالَ اللَّهُ إِنِّي مُنَزِّلُهَا عَلَيْكُمْ فَمَن يَكْفُرْ بَعْدُ مِنكُمْ فَإِنِّي أُعَذِّبُهُ عَذَابًا لاَّ أُعَذِّبُهُ أَحَدًا مِّنَ الْعَالَمِينَ"
◇السؤال بقى:
هل ربنا أنزل عليهم المائدة فعلا؟
العلماء اختلفوا هل فعلا ربنا أنزل المائدة ولّا لأ،
في علماء قالوا إن الحواريين لما سمعوا الوعيد الإلهي خافوا وقالوا لأ مش عايزينها خلاص..
وفريق ثاني من العلماء قالوا: إن ربنا فعلا نزلها ...
وهو ده ظاهر القرآن إللي ربنا قال فيه "إني مُنَزِّلُها عليكم"،
ومفيش دليل على الرأي الأول🤷‍♂️
فالراجح إن ربنا أنزل عليهم المائدة فعلا👌
وعلى فكرة قصة المائدة دي مش مذكورة في الإنجيل😀
مذكورة في القرآن فقط والنصارى أخذوا القصة من القرآن بعدين،
والحواريين كانوا قالوا إنهم هيوصوا الأجيال إللي بعدهم إنهم يتذكروا نعمة ربنا لما أنزل عليهم المائدة،
وفعلا كانوا بيعملوا كده لحد ما الناس نسيت، ربنا قال:
"ومِنَ الَّذِينَ قَالُواْ إِنَّا نَصَارَى أَخَذْنَا مِيثَاقَهُمْ فَنَسُواْ حَظًّا مِّمَّا ذُكِّرُواْ بِهِ "
بنو إسرائيل بقى مش عاجبهم عيسى عليه السلام ولا الناس إللي آمنت معاه سواء الحواريين أو عامة الناس إللي اتبعوه عليه السلام،
خايفين بقى لياخد منهم المُلك واحنا عارفين تاريخهم مع الأنبياء كان عامل إزاي قبل كده😬
عملوا إيه بقى مع عيسى عليه السلام🤓
احنا عارفين إن الدولة الرومانية هي إللي كانت بتحكم فلسطين في الزمن ده، وفاكرين هيرودس وإللي عمله مع يحيى عليه السلام،
هيرودس في الزمن ده كان مات، وتولى بعده حاكم روماني كافر،
فراح اليهود للملك الروماني، وقعدوا يحرّضوه على قتل عيسى عليه السلام😑
قالوا له كذبا وبهتانا إن عيسى بيخطط عشان يعمل ثورة عليك وياخد منك الحكم،
و وجُوده فيه تهديد على مُلكَك، فانت اصلبه واخلص منه، ودمه في رقبتنا ورقبة عيالنا احنا 😤
وفضلوا وراه يقنعوه إن دي خطط عيسى بن مريم، لحد ما  فعلا الملك الروماني أمر جنوده إنهم يروحوا يقبضوا على عيسى عليه السلام،
راح الجنود وكانوا عارفين إن عيسى معاه اثنى عشر رجل، إللي همّ الحواريين،
وصل الجنود لحد باب البيت وهيقتحموا البيت عشان يقبضوا على عيسى عليه السلام🙊
حصل إيه لعيسى عليه السلام ؟
وهل فعلا الجنود مسكوه ولّا لأ؟
ده إللي هنعرفه إن شاء الله في الجزء الأخير من سلسة قصص الأنبياء 😊
♡ملحوظة
إن شاء الله بعد سلسلة قصص الأنبياء هيكون في سلسلة للسيرة النبوية 😁✌
هي هتبقى سلسلة لوحدها عشان السيرة طويلة😅
فالسيرة هتكون الجزء الثاني من قصص الأنبياء😊
♡ملحوظة:
أي حد عايز يأخذ القصص وينشرها يتفضل أنا معنديش مانع نهائي😊
طبعا أي ملاحظة ياريت تقوليلي فالمؤمن مرآة أخيه😁✌
#Eman_Shalapy