Ek Afsana (✓)

Itefaaq

Aaj main der se uthi,
School toh aaj band tha
Kyunki aaj ravivaar tha
Iss din ka mujhe kab se rehta intazaar tha.

Khidki ke paas baithi,
Main apni chai ki chuski le rahi thi
Piche se ek awaaz aayi
"Aaj naye padosi aaye hain"
Mere chehre par jo muskaan thi,
wo ye sunkar gayab si ho gayi.

Mujhe naye logo se milna pasand nahin tha,
Mil toh fir bhi leti par unse ghul kar baat karna maine kabhi dhang se sikha hi nahin tha.

Darwaaze ki ghanti baji,
Ghar mein yeh kaam mujhe hi saunpa Gaya tha,
Koi bhi aaye, darwaaza toh mujhe hi kholna padta tha.

Darwaaza kholne par
Mujhe ek Jaana pehchana chehra dikha
Jiski yaha aane ki umeed
Mujhe kabhi thi nahin
Par khwaab zarur tha.

Aur jo muskurahat
Naye padosi aayenge
Ye sunkar gayi thi
Usse bhi badi muskaan
Mere chehre par maano cha si gayi thi.

Itefaaq jitna sunne mein
Acha lagta hain
Usse acha uske
Hone par mehsoos hota hain.