ضياع 💔

البارت الأول

قصة بعنوان "ضياع"
الكاتبة : khullo
لا احلل النشر بدون ذكر الإسم
⊙قراءة ممتعة⊙

الانكسارات كلها لي عشت فحياتي و خيبات الأمل لي دوزت كلها ولات والو قدام حالتي دبا، معرفتش شي كلمة توصف شعوري، فقط كنت نتمنى نرجع لور ولا نزيد القدام، المهم منكونش فديك ساعة، كان دكشي فوق طاقتي....
معرفتش منين نبدا، واش من طفولتي؟ لا لا بداية مملة، هممم ربما نبدا من فاش طلعت لافاك، ولا ربما نهار لي عرفتو فيه، داك النهار اللي كان استثنائي، لي عمرو يتعاود، و لي فيه عرفت معنى القدر و بلي حاجة بسيطة ممكن تأثر فالعالم كلو... عامين ديال Est دازو بزربة، بحلاوتهم و بالوقيتات صعاب فيهم، المهم دازو، و خرجو النتائج و تلونسات ليسونس و دفعنا ليها، دوزنا شهر و نص ديال الصيف تبحرنا و تبرونزينا مهم حيدنا علينا العيا ديال دوك الامتحانات و تمارة ديال القراية، خرجو الكونكورات دوزناهم كلنا مجموعين، و كانت لافاك ديال مارتيل هي لافاك الوحيدة لي قبلات علينا، كليكتي لي مكونة من خمسة دالبنات و ثلاثة دراري، كنتفكر شحال و أنا نقنع والديا باش يخليوني نمشي لمارتيل حيت و بحكم خرجات ليا لافاك ديال قنيطرة لي أقرب لمدينتي من لافاك ديال مارتيل قالك لا والو مغنمشيش ليها، البكا لي بكيتو ديك الوقت بوحدو ههه، هدشي كامل حيت بقا فيا الحال نتفرق على صحابي و حنا عامين مكنتفرقوش شركنا القراية و الضحك و البكا و الماكلة و الريل الكحل، و دبا يمشيو هوما كاملين و نبقا أنا بوحدي، و بعد معاناة طويلة وافقو حيت عرفو بلي لا مشيت للقنيطرة مغنقرا ما والو، و واعدتهم بلي غنشد ليسونس من داك العام و غنفاليدي كلشي، و هنا كانو الأمور كلها تمام، كان جو آخر مختلف، ولكن زوين، وبدأت القراية و داك الروتين الممل
أنا : حنان عوتاني مجاتش ليوم
أمينة : ههه فين عمر حنان جات فصباح، ديما ناعسة
سلوى : واييه مسخوطة ولات عاطياها غير للغياب عاود
أنا : هي لي صادقة ليها فلخر غتفاليدي كلشي عقلو فين قلتها هه
أمينة : والله الا بصح
سلوى : شنو درنا فالغذا ليوم؟
أنا : انا مفياش جوع تال لعشية عاد غناكل
سلوى : نتي راه ما بقيتي تتاكلي والو
أنا : ههه شوية و تولي فيا ربعين كيلو
أمينة : نهضر فتلفون
سلوى : اهياتا شكون هذا عاود
أنا : ميكون غا شي مونتيف جديد ههه
سلوى : كل مرة جايانا بواحد
أمينة (بعدما سالات لابيل) : هه غا واحد الدري هضرت معاه لبارح و قالك بغا يتلاقا معايا
سلوى : وايلي واش ساكن هنا نيت؟
أمينة : لا ولد طنجة مي قالي نجي عندك فينما كنتي ههه
أنا : شنو سميتو فاش خدام واش بوگوس؟
أمينة : كونطابل سميتو رشيد، و ماعرفت ما فيا لي يتلاقا شي قمقوم
مشينا للدار لقينا حنان عاد فاقت تتفطر هه و كتهضر مع دريس فتلفون (صاحبها) ، مشات سلوى تطيب الغذا مسكينة هي لي مكلفة بالماكلة و الشقا، مرة مرة تنعاونو ولكن هي لي هازة الحمل الكبير، حنان معيگيزة كتسهر بليل و مكتقدرش تفيق صباح، دكشي علاش ديما مغيبة فلافاك، أمينة بنت عادية مكتبغيش تغيب على لافاك الا شي مرات ولكن هي مولات البلانات كل مرة تعرف واحد جديد و يطلع ليها فراسها من اول رونديفو هه، و أنا يمكن أبسط وحدة فيهم، كنقرا و نجي لدار نرتاح شوية و تال لعشية عاد ناكل و نجمع لا كانت نوبتي، و لا خرجنا كنخرجو مجموعين بقينا فدار كنتفرج فشي حاجة حتا كنبغي نعس كنهضر مع دارنا و نيني و صافي، حياتي عاادية معندي حتا واحد فحياتي معنديش صحابات بزاف من غير البنات، ماشي قرااااية ولكن كنجيب نقيطات، و فاش مكنلقا مندير كنرسم ولا نطرز ولا نكتب فالمذكرة ديالي و صافي، و علاش مكنتصاحبش حيت ببساطة معمري بغيت شي واحد ولا حتا بان ليا بأن شي واحد يستاهلني، ماشي غرور و إنما أنا شخصيتي صعيبة و مزاجية و حساسة و مرة تلقاني جدية بزاف مرة تاافهة كثر من القياس و انا براسي عمري فهمت راسي ما عساك يفهمني شي واحد هه، و واخا تيبان فيا العكس ولكن معنديش كاع الثقة فراسي، كنحاول نقنع راسي بأني زوينة ولكن غير كيجي شي حد يلوح ليا شي كلمة واخا غير بضحك مكنبقاش كاع حاملة نشوف راسي فالمراية، و هدشي متيبانش عليا و لله الحمد يعني كلشي تيشوفني كاراكتير و عندي شخصية مي من الداخل كلي مهزوزة ههه و واخا هكاك دافعة السناطح ههه، ايوا هكا الأيام تيدوزو و نفس روتين، شي مرات تنخرجو حنا البنات مع الدراري صحابنا لشي قنت ولا تنتجمعو فالدار نقصرو كعادتنا، هادي هي حياتي المملة جدا و شكرا ههه
فقت صباح كان الجو زوين بزاف، خليت البنات ناعسين لبست حوايجي و درت كاسكيط و خرجت، شمس مزال عاد تتشرق و الحوانت باقين تيحلو، بان ليا غادي تيتمشا، بقيت متبعاه بعيني و تنشوفو هاز فيديه ديك الميكة ديال الكروكيط و غادي باش يوكل القطيطات فحال كل صباح، ديما تنشوفو فنفس البلاصة و نفس التوقيت، تيهز راسو فيا يدير ضحيكة و يكمل المشي ديالو، و أنا قلبي تتحرك فيه شي حاجة فكل مرة تنشوف دوك العينين، متيخليش ليا الفرصة حتا فين نرجع ليه الضحكة، ولا فين نتأمل وجهو مزيان، تندرب دويرة و ندوز الحانوت نشري الحليب و الباگيط و نرجع باش نوجدو الفطور و نمشيو نقراو...
فاش قرب اول امتحان تجمعنا نخدمو فحال ديما، كنضحكو و نخدمو فالمكتبة و دايرين الضجيج هه، لي مفهمش شي حاجة تيسولني، تنحاول تانا نفهم و نشرح ليه، و هكا، كنت ضاحكة ناشطة بخير، مي من الداخل مكنتش هي هديك، ديما تنحس بشي حاجة ناقصة فحياتي، مرة مرة تيرجعو ليا دوك الذكريات و كنتأزم مي مكتبانش عليا، حتا واحد مكيرد البال لا كانت مقلقاني شي حاجة، و هدشي كيزيد يحبطني هه، كنقول راه معندي مندير ببنادم معندي مندير بشي حنان معندي مندير بتا حاجة، مي شي مرات فاش كيضيق بيا الحال بزاف كنولي باغا غير شي واحد نبكي عليه، و ماشي مكنلقاش، و إنما عندي قناعة بلي الناس شحالما صبرو لهمك غيجي شي نهار و يعياو، و بلي حتا حد ما غادي يفهم أحاسيسك بالشكل الصحيح، و هاد الخوف من التخلي من بعد التعلق كانت كافية باش تخليني منعاود لحد هه، ......داك الروتين كان قاتلني، مكنت حاسا بالحلاوة فحتا حاجة، حتا دكشي لي كنت مرة مرة كنديرو باش نحيد به الملل طلع ليا فراسي، مبقاش تيقضي، تنشوف البنات تيبغيو يخرجو يدورو، تيشريو حوايج جداد، تيعرفو دراري، تيديرو بلانات و حاجات بساط تتفرحهم، و انا عندي زايد ناقص، هدشي كلو دوزتو و شبعت منو، الحاجة الوحيدة لي تتريحني هي نتمشا بوحدي فصباح بكري، و الخوف ديالي هي يجي شي نهار نلقا بلي حتا هاد الخرجة ديال صباح ولات مملة، كنقول انا مالي هكا، شنو واقع ليا، علاش حتا انا منكونش فحالهم، علاش منستمتعش بحياتي و نعيش وقت زوين فحالي فحال ناس، مي والو واخا ندير لي درت غير كيتسالا داك الوقت و كنرجع لدار كيولي كلشي عادي....
دازو أيام و جا داك النهار لي رجعو فيه البنات من لافاك ناشطين، مكنتش مشيت داك صباح مع بقيت ناعسة حيت سهرت ليل كلو كنتفرج مقدرتش نفيق، غير حلو الباب جاو كلهم عندي و انا عاد تنتكسل
أمينة : تسنيم عرفتي واحد البلان واعر خصكي غير تقولي آه
أنا : آه
حنان : وا سمعي بعدا را تقدري متبغيش مي راه بصح زوين
أنا : واخا قولي انا تنسمع
حنان : هضري أ أمينة قولي نتي
أمينة : واخا واخا، هانتي دبا ليوم تلاقيت بداك دري داك رشيد لي دويت معاه ديك المرة
أنا : معرفتوش
أمينة : موهيم قاليا لا بغيتي شي نهار يجي و نمشيو كاملين بينا و صاحبو لشي مدينة ندورو و دكشي اش بان لك
أنا : معنديييش مع هاد البلانات راكم عارفيني
سلوى : كنت عارفاك موحال واش تبغي، حتا انا مبغيتش
حنان : سكتي نتي بعدا نتفاهمو معاها عاد ندوزو ليك
أمينة : هانتي غادي يجي حتال عندنا و نمشيو ندوزو نهار ندورو و دكشي و نرجعو اش فيها
أنا : أراه معنديييش مع هدشي و ما فيا لي يسافر ولا يمشي لشي قنت، و زايدون جوج دراري و حنا بربعة و نسافرو و مكنعرفوهمش حتا مزيان مالنا على حالتنا، بغيتو نتوما تمشيو براحتكم
حنان : ناااري حشومة عليك اصحبتي غير بغيتي تعكسي
دازت واحد ساعة و هوما تيحاولو يقنعو فيا و انا لي فراسي فراسي، كنقول شي نهار غتصمكني شي وحدة على هاد قسوحية راس لي فيا، اش بغيت شي دراري و شي سفر و شي طونوبيل، أنا أصلا مكنتيقش فدراري حيت عارفاهم كلهم استغلاليين، ماشي غير دراري مي حتا البنات، قلت لهم لا بغيتو تمشيو غير سيرو متهزوش ليا الهم، بقاو تيقولو لا حشومة و لا كنا غنمشيو نمشيو كلنا مي أنا مكانش عندي مشكل، و دكشي لي كان تافقو معاهم على نهار و بداو تيبلانيو و كدا و انا غير تنسمع، داك النهار مشاو فصباح بعد عدة محاولات أخرى باش يزيدو يقنعوني مي مبغيتش، رجعت لدار كانت خاوية هزيت تلفون و خرجت، دايرة الكيت فودني كنتصنت لشي أغاني طلعو ليا فراسي من كثرة ما سمعت ليهم، كاسكيط لي ديما خص يكون فاش نبغي نخرج، تنتمشى و الهوا ديال صباح بارد و زوين، هاذي هي اللحظات الوحيدة لي تنحس فيها بالصفاء، إحساس زوين ياكي، وي زوين ،مي مدايمش هه، السعادة عمرها ما تدوم، ضروري تجي شي حاجة تخصر عليا كلشي، درت بعيني تنقلب على "مول الكروكيط" هه كيفما سميتو، مبانش ليا، بعدت فالمشي حتا وصلت لبلاصتي تحت ديك الشجرة، كان قدامي غير الحرث و القمح أخضر مزال عاد تينوض، و فالجهة الأخرى كانت الطريق و مرة مرة تدوز شي طونوبيل، مي كانو بعاد، غمضت عيني و بقاو دموع نازلين، كنت تنظن بلي ايلا تحولت لمدينة أخرى غادي يفوتني هدشي، مي يمكن المشكل ماشي فالمدينة المشكل فيا، معرفتش واش هدشي لي تندير هو الصح ولا لا، كنشوف حياتي كنلقاها فارغة ما فيها حتا حاجة متميزة، كنلقا بلي حتا واحد ما حاس بيا، حتا واحد متيفهمني، و ديما أفكاري مختلفة على أفكار صحاباتي، و حتا وحدة فيهم مكتشبهني، كنحس بالوحدة، الوحدة ماشي هي ميكونوش عندك صحاب، مي الوحدة دبصح هي فاش مكتلقاش لي يفهمك، و لا لي يحس بيك، هي فاش منين تتهضر مع لي تتعتبرهم أقرب الناس ليك تتحس بالبعد و أنه خص الآخر يضرب طريق طويلة عاد يقدر يعرفك، و ربما ميقدرش، ربما غنبقا ديما هكا، غتبقا ديما هاد الفجوة بيني و بين ناس، واخا تنشوف بلي انا شخص متفهم بزاف، و مهتم بالآخرين، و كنحن و نحس و نبغي، مي ناس مقدروش يوصلو ليا، مع الأسف، مي الذنب ماشي ديالهم، ديالي حيت انا لي كنبني حواجز بيني و بين ناس.....