ضياع 💔

البارت الثالث

الجزء الرابع

سكت واحد شوية و هو يقول عوتاتي : حتا نتي خصكي تردي البال متبقايش تخرجي بوحدك فداك الوقت، ديما تتمشي للحانوت بليل و دنيا خاوية
انا (بتعجب) : و شكون قالها ليك !
أوس : ديما تنشوفك خارجة منو و هازة سقاطة، دكشي لي حاضية
أنا : بصحتي و راحتي
أوس : اودي بصحتك الآلة
بقينا ساكتين، سبقونا البنات و بقينا انا وياه لور، مرة مرة تنحس بيه تيشوف فيا حتا قنطني
أنا : امالك تتشوف
أوس : غا بنتي ليا ساكنة معرفت أش بيك
أنا : ايوا انا راه ديما ساكتة ماشي أول مرة
أوس : ايييه على ساكتة، نتي مكتقادايش من الهضرة
أنا : اويلي انا تنهضر بزاف !!
أوس : و شكون تيهضر أنا
أنا : لا بالعكس انا مفياش الهضرة
أوس : فلول مكنتيش كتهضري بزاف غير تطلقتي و حيدتي منك الحشمة مبقيتيش تتسكتي مبقاوش عندك الفرانات
انا : ايوا غير انت تتبقا تجبدني بالهضرة تنتفاعل معاك متنبغيش نخليك بلاكة، اما دبا درتيها ليا فبالي مغنبقاش نهضر كاع
أوس : حسن نيت نريح دماغي واحد شوية
انا تعصبت و فقصاتني هضرتو و انا نسكت، بقيت غادا جارا فرجلي و تنحاول نزرب باش نسبقو و هو تيزرب معايا، كنت تنتسناه يقوليا تنضحك ساعا والو يمكن كان تيهضر من نيتو، حتا وصلت للدار، درت الساروت فالباب و قلت له بسلامة بلاما نتسناه يجاوب، حتا هو متسوقش و زاد، دخلت و سديت ورايا، بدلت عليا و دوشت و نعست......... فيقني صوت ديال ميساج فتلفون، واحد مور واحد، كنت مزال مشقلبة، شفت لقيت أوس مسيفط خمسة ديال الميساجات
"صباح النور واش فقتي؟"
"هيهو وا النعاسة فيقي"
"واااا تسنيم واش مغتفيقيش؟ "
"المعگازة لوخرا"
"مهم الا فقتي خلي ليا ميساج انا تنتسناك"
اش بغا هذا عاود على صباح؟ سيفطت له ميساج "شنو؟"
ديك ساعة قراه و جاوب "لبسي و خرجي انا تنتسناك حدا الباب" انا :"كيفاش حدا الباب؟" جاوبني" يعني قدام الباب، غسلي و لبسي على خاطرك انا تنتسناك"، شفت ساعة كانت يالاه ستة و نص، اشنو بغاني فهاد الوقت، قلت له" اوكي" و نضت غسلت و مشطت شعري و غسلت و بدلت حوايجي لبست كيطما و درت كاسكيط و خرجت لقيتو تيتسناني، شافني و هو يتبسم
أوس : صباح النور
أنا (مزال فيا الموت ديال نعاس) : صباح الخير، مالك على صباح جاي مفيقني
أوس : عادي بغيت نخرج نتمشا معاك، فيها شي مشكل؟
انا : فيها مشاكل ماشي غير مشكل، مفيقني على صباح و مخرجني معرفت فين
أوس : اودي زيدي غير نتمشاو، مبغيتيش رجعي لفراشك
أنا : ما بقا نعاس طيرتيه مني دبا
أوس : مزيان نيت، يالاه زيدي
أنا : فين
أوس : فينما كان غير يالاه
بقينا تنتمشاو بزوج، كان النسيم ديال الصباح زوين بزاف، الجو لي تنفضل، وقف ووقفت حتا انا، جاو شي قطيطات بقاو تيلعبو لأوس حدا رجليه، جبد الكروكيط و عطاه لهم و بقينا تنلعبو معاهم حتا كلاو و شبعو عاد مشينا، بعدنا من البلاصة ديال البنايات و خرجنا فداك الحرث لي كنمشي ليه مرة مرة، شاف فيا و قاليا : اجي نجلسو شوية
مشينا تحت ديك شجرة تكيت عليها و رجع ليا نعاس عوتاني، شاف فيا تنكمع و قال : ههه يا النعاسة، ديك المرة فاش شفتك هنا حسابلي تتفيقي بكري، ساعا نتي غير معيگيزة
أنا : راه منعست تال جوج
أوس : و شنو بقيتي سهرانة تديري؟
أنا : غير تنتفرج
أوس : فاش
أنا : فالانيم
أوس : اممم يحساب
انا : شنو؟
أوس : حسابلي مسهرك شي واحد
أنا : اويلي شكون، ايلا مسهرت معاك مكاين معامن نسهر
أوس : معرفتش ،أشرف مثلا
أنا : لا مهضرتش معاه لبارح
أوس : يعني تتهضري معاه فالعادة
أنا : بشكل شبه يومي تقريبا
أوس : امم واش تتبغيه؟
أنا (شفت فيه باستغراب) : اويلي لا واش منيتك، أشرف كثر من خويا، من ثاني ابتدائي حتال Est و حنا تنقراو مع بعض، و كنا تنراجعو مع بعضياتنا و تيوصلني للدار حيت طريقو هي طريقي و ايلا حتاجيتو فشي حاجة تيعاوني و هكا، أما شي حاجة أخرى لا، أصلا هو مصاحب مع شيماء واش مفراسكش؟
أوس : واش شيماء صحبتك؟؟؟
أنا : ههه اه، هادي عامين دبا
أوس : و هي عندها عادي تكونو قراب هكا؟
أنا : راه عادي، هي عارفانا كيفاش دايرين و عارفة علاقتنا و عارفة أشرف تيحترمني بزاف، و عاطيينها انا و ياه غير للطنز و أنا عارفاهم كيبغيو بعضياتهم بزاف بزاف و رآها البست فرند ديالي و ديما كتقولي من غيرك نتي مستحيل نخلي أشرف يكون قريب لشي بنت أخرى بحال هكا، مي هي عارفة راسها معامن مصاحبة لا من جهتي ولا من جهتو
أوس : ههه فشكل، انا بعدا البنت لي غتكون معايا مستحيل نتقبل تكون مع شي ولد هكاك
أنا : شنو هكاك مالي كيف جيتك، أصلا أنا عارفة حدودي منحتاجش شي واحد يجي وريني شنو ندير ولا كيفاش يتعامل
أوس : انا هضرت على البنت لي غتكون ديالي ماشي عليك، نتي حرة ديري لي بغيتي
أنا (حسيت بيه عطاني أحسن قمعة) : ايوا انا هضرت غير على راسي و صافي
أوس : واخا الآلة واخا، فراسك هنا هضرنا أول مرة
أنا (عجبني الحال حيت مزال عاقل ولكن مبغيتش نبين ليه اني حتانا مفكرة باش ما يحسابش ليه مسوقة ليه) : لا معقلتش امتاا
أوس : نهار لي كنتي تتبكي، زعما لي كانت فيك الحساسية هه *قالها بطريقة زعما راني عارفك كنتي تتبكي ديك نهار *
أنا : راه فيا الحساسية، ولكن واش انت هذاك؟
أوس : متقوليش ليا معرفتينيش
انا : لا ما عرفتكش، اصلا مشفتش فوجهك ديك ساعة و معقلتش كاع على ملامحك، و حتال دبا عاد تقولها ليا محشمتيش
أوس : حسابلي بقيتي مفكرة ساعا والو معندك ذاكرة
أنا : ايلا شي واحد ممهتماش بيه مكنصدعش راسي نعقل على وجهو
أوس : امم هي مكنتيش مهتمة بيا ديك ساعة
أنا : و حتا دبا، راه غير انت لي لاصقني و جايا دايرة ليك خاطرك
أوس : زعما نتي ماعاجبكش الحال
أنا : لاء عادي
أوس (ضربني ضربة خفيفة فكتفي) : ايوا الله يجعلني نتيق
أنا : أصلا انت متتعرفنيش
أوس : اه نتي حتا واحد متيعرفك، انوضي الله يجيبك على خير
أنا : اه اه دير راسك فاهم كلشي و انت لي تتعرف، يالاه عرفتيني لبارح و تتقول هاد الهضرة وا باز
أوس : نتخاطرو حتا كنعرفك كثر من لي تتوقعي
أنا : نتخاطرو
أوس : ايلا عرفت تديري أي حاجة بغيت
أنا : و الا معرفتيش؟
أوس : ندير أي حاجة بغيتي
أنا : اوكي مشات
أوس : و باش نتفوبر معاك نتي لي غادي تسوليني عليك و انا غنجاوب باش نشوفو واش تنعرفك ولا لا، اه و متكذبيش
أنا : واخا يالاه، نبداو بأسهل حاجة، شنو أفضل لون عندي؟
أوس : الأزرق
أنا : هممم ماشي تماما مي نحسبو صحيح
أوس : وا باز
أنا : تيعجبني الأزرق فالملابس، اما فحوايج اخرين كنفضل الوان أخرى
أوس : مهم جوابي صحيح زيدي
أنا : شنو افضل أكلة عندي
أوس : بيزا و بسطيلة و دجاج بأزير لي تطيبو ليك ماماك، هادو أسئلة مستهلكة بغيت شي حاجة عميقة
أنا : بحالاش هاد عميقة عاود
أوس : شي حاجة عليك نتي كشخص، شي حاجة لي تتخصك ماشي لون المفضل و الاكلة المفضلة، شي حاجة فشخصيتك فحياتك
أنا : وا معرفتش بحالاش هاد الأسئلة
أوس : عرفتي شنو غادي نديرو، انا غادي نقول شنو تنعرف عليك و نتي شوفي واش صحيح ولا لا اوكي؟
انا : واخا يالاه قول
أوس : اممم مهم سميتك تسنيم
أنا : واااو حلف بالله، لا صدمتيني كيدرتي عرفتيها
أوس : وا الزمر خليني نكمل
أنا : وا كمل كمل
أوس : مهم نتي حشومية، واخا متتبانش فيك مي كتحشمي بزاف، خصوصا من ناس لي غراب ولا لي تعرفتي عليهم من مدة قصيرة، كتاخدي وقت باش تنسجمي مع الآخرين، عندك صحابات قلال، ولكن عزاز عليك و تتبغيهم، كتهتمي بالآخرين بلا ما تبيني، معرفتش علاش ربما تتحشمي ولا شي سبب آخر، عائلتك أولوية بالنسبة لك، مي نقدر نقول بلي هاز شي جرح من جيهتهم، كتقدري العلاقات، و تنقول بأنك فاش تتبغي تتبغي من نيتك و تقدري تعطي حتال لافان، مي ماشي ساهل باش تبغي شي واحد، حيت مكتيقيش دغيا، تتبغي ديما تخلي الناس ما عارفينش عليك بزاف، يمكن مخبيا شي سر و كتخافي يعرفوه ههه، فيك شوية ديال الأنانية ولكن واخا هكاك كتبغي الخير للناس، و تنقول بأنك ذكية، ذكية بزاف و تتخدمي بعقلك، و هادي حاجة لي زوينة تكون فالبنت، مهم هدشي لي عندي
انا : امممم مهم الاغلبية ديال كلامك صحيح، مي علاش تتقول انا أنانية
أوس : تتخلي الناس يثيقو فيك و نتي مكتيقيش فيهم، يقدر لآخر يعاود لك كلشي ولكن نتي كتومة ما تعاوديش ليه
أنا : ولكن هادي رآها حاجة زوينة ،و متنعتبرهاش أنانية، بالعكس انا إنسانة متشاركة و نقدر نسبق لآخر على راسي
أوس : أنانية ماشي فالماديات، مي فالثقة و الأسرار و كدا
أنا : الثقة حاجة غالية مكتعطاش لكلشي دكشي علاش
أوس : عندك الحق، مهم غلبتك ولا لا
أنا : معرفتش واش نعتبر هذا فوز ولا لا، هدشي لي قلتيه اي واحد عاشرني هاد المدة كان ممكن يعرفو، ماشي شي حاجة سرية
أوس : هي عندك أسرار
انا : ايوا راه اي واحد عندو أسرار، و عندو شي حاجات لي تتبقا بينو و بين نفسو، انت معندكش؟
أوس : لا، نقدر نقوليك اي حاجة معنديش مشكل
أنا : زعما زعما
أوس : وي، بغيتي تسولي شي حاجة سولي
أنا : هممم، قوليا شي حاجة ما عارفها عليك حتا واحد
أوس : همممم معرفتش صراحة، مكاينش
أنا : ايوا ميمكنش
أوس : سي يمكن
أنا :   يالاه قوليا، شكون أقرب شخص ليك
أوس : يونس و كلثوم
أنا : يونس خوك صغير عرفتو، و كلثوم شكون واش ماماك؟
أوس : لا، كلثوم صحبتي، هم هي كبر مني مي عرفتي راه خصكي تعرفي عليها، راها فشكل بزاااف، غادي تعجبيها، تيعجبوها ناس لي صادقين فحالك، و مفروحة كثر منك تاهيا
أنا : واخا ولكن شكون هادي بضبط شنو تتجيك
أوس :  حتا حاجة، كنت كنعرفها من شحال و يونس عزيزة عليه، و فاش كنمشي لافاك كنخليه معاها، و فالعشية تنرجع ليه، و شحال من مرة تيبقا معاها
أنا : يعني متتجيك والو والو
أوس : وي
أنا : واخا واخا، ايوا مزيان راه عندك مع البنات
أوس : عادي راه حنا غير صحاب
أنا : ايوا ياك تتقوليا مكتآمنش بالصداقة بين الولد و البنت و دبا اتقول ليا كلثوم ما كلثوم كطنز عليا؟؟؟
أوس : اودي رآها كبر مني قلت لك
أنا : ايوا حتا انا راه دراري كبر مني نمشي عندهم ياك
اوس (شاف فيا و خنزر) : وليني ضسرتي، تمشي عند شي واحد نفرشخك
أنا : اويلي على تفرشخني الله يهديك