ضياع 💔

البارت الرابع

الجزء الخامس

أوس : ايوا جمعي راسك
أنا : راني جامعاه مالو بان ليك مشتت
أوس : هاهاها مضحك جدا، نوضي نوضي نمشيو
كانت شمس طلعات شوية، شفت الساعة كانت تمنية و نص، و انا قارية مع العشرة، مزال الحال، بقينا تنتمشاو حتا رجعنا للمدينة، جلسنا فواحد المحلبة كلينا اتاي و حرشة و وصلني حتال الدار و مشا، دخلت لقيت البنات عاد فايقين
سلوى : اويلي فين كنتي نضت ملقيتكش و تنصوني مكتجاوبيش
أنا : كنت غير نتمشا علاش
سلوى : خلعتينا عليك اصحبتي
أنا : ههه متخافيش، فطرتو ولا مزال
سلوى : باقي عاد خرجات أمينة تجيب الباگيط و درت الحليب يفيض و كنفيق حنان حلفات لا فاقت
نا : ههه ايوا فيقيها، انا غادي نمشي ندوش بزربة و نبدل عليا
سلوى : مغتفطريش!؟
انا : كليت شي حاجة غير بصحتكم
سلوى : ايوا لي بغيتي
خرجنا مع 12 لقيت أوس تيتسناني قدام باب القاعة
أوس : تعطلتي ديما نتي اللخرة
انا :عاد ساليت، و مالك تتسناني واش درنا نتلاقاو؟
أوس : نسيتي ياك اتفقنا لا عرفتك كثر من لي تتوقعي تديري لي بغيت نهار كلو
أنا : ولكن معرفتيش
أوس : سيي عرفت، يالاه زيدي نمشيو
بقاو البنات تيديرو فيا دو الشوفات ديال زعما اش كاين، شفت فيهم و قلت
انا : أراه مكاين والو غير بلاما يمشي بالكم بعيد
أمينة : حتا واحد ما قال شي حاجة
أنا : منعرف لا تنويوها فشكل
أوس : انا غادي نتسلفها منكم هاد النهار حتال العشية و نرجعها لكم "وغمزهم"
ضحكو البنات و انا غير كنشوف هاد دري اش كيصنع، خرجت انا و ياه من لافاك، البنات غيحسابلهم غير بيناتنا شي حاجة و مخبية عليهم، بقينا تنتمشاو شوية حتا وصلنا لقدام واحد الدار، دور ساروت و تحل الباب، أوس : دخلي
أنا : واش داركم هادي؟
أوس : وي
أنا : صافي انا نتسناك حتا تجي
أوس : لي بغيتي
خلا سوارت لاصقين فالقفل و دخل، بقيت مترددة واش ندخل ولا لا، حيدتهم و دفعت الباب و دخلت، كانت مشمشة مزيان، عادية ولكن زوينة، كاين واحد الكولوار و فدخلة ديال دار فليمن كاين دوش و طواليت و كاينة كوزينة مفتوحة على مرح صغير و مقابلة معاه صالة صغيرة و حداهم جوج بيوت و  دروج جاو فجنب، بقيت تندور فعيني ما بانش ليا
أنا : أوس فينك
أوس : انا غير فالبيت
أنا : شنو تدير
أوس : نجيب غير شي حاجة و هانا معاك
أنا : واخا
جاني الفضول سولتو
أنا : واش نقدر نشوف الكوزينة
أوس : خودي راحتك
دخلت لقيتها مجموعة و كلشي مغسول، كاين واحد الرف فيه النباتات بقيت تنشوفهم وحدة وحدة، معرفتش واحد الصوت منين جا ققزني
ضرت براسي لقيتو ببغاء فالقفص ديالو ما نتبهتش ليه فاش دخلت
أوس : تسنيم مالكي غوتي
أنا : خلعني ببغائك
أوس : ههه متخافيش منو
دخل عندي أوس هاز فيديه سلة صغيرة
أنا : اشنو دكشي
أوس : غير شي أمانة غادي نديها لواحد صاحبي
أنا : همم واخا واخا
أوس : عجبوك نباتات؟
أنا : بزاف واش انت لي زرعتيهم؟
أوس : لا كلثوم لي مقابلاهم، انا مرة مرة تنسقيهم و صافي
انا : اااه كلثوم، ديك صحبتك
أوس : وي هي
أنا : مزيان مزيان
أوس : شنو نتحركو؟
انا : واخا
مشينا شدينا طوبيس، كان عامر لقينا بلاصة خاوية
أوس : جلسي هنا
أنا : لا غير كلس انت انا نبقا واقفة
أوس : واش منيتك
أنا : ايوا حتا انت مبغيتيش تجلس
بقينا مناگرين انا تنقوليه جلس و هو تيقول ليا جلسي حتا هبط واحد الراجل و خوات البلاصة عاد جلسنا بزوج، الله يستر بزوجنا معكسين، معرفتش فين غادي بيا مهم غير تابعاه و صافي، حبس طوبيس و طلعو شي دراري باينة فيهم مشرملين، شديت صاكي عندي و بقيت تنشوف فزاجة و متبعة الطريق، درت عند أوس لقيتو كيهضر مع البنت لي حداه، اويلي هذا مالو لي لقاه يهضر معاه، دار شاف فيا قلبت وجهي و مديتهاش فيه، حتا لقيتو واقف ليا على راسي
أنا : اش بغيتي
أوس : والو غير عطيت بلاصتي لديك البنت لي كانت واقفة
أنا : قول لي كنتي شاد معاها الحديث
أوس : اه هديك
أنا : تبارك الله عليك البطل
أوس : مالكي
انا : ممليش، دبا قوليا فين غادي بيا
أوس : ويلي ويلي فتنا البلاصة
عيط دغيا على شيفور باش يحبس و نزلنا
أنا : بقيتي ملاهي مع البنت تلفاتك على طريق مبقيتيش عاقل عليها
أوس : واييه سهيت كاع
أنا : دبا انا بغيت غير نسولك
أوس : سولي سولي
أنا : مالك فينما تتشوف شي واحد كيخصك تمشي تعاونو و معرفت شنو واش تشكاو عليك
أوس : لو جا كل شخص يعاون غير عشرة الناس قراب ليه ماديا و معنويا، البشرية غتكون فسعادة و عمر شي شخص مغيعاني فحياتو، حتا واحد ما غادي يموت بالجوع، حتا واحد ما غادي يموت منتحر، و انا تيعجبني نعاون بأبسط الحاجات
أنا : سبحان الله كتعاون غير البنات
أوس : ماشي بالضرورة
أنا : ايوا هدشي لي بان ليا
أوس : و نعاون لي كان فاش ضرك هدشي
أنا : شوف باش نجيك نيشان أنت لي بديتي تهتم بيا حتا ولينا هكا، دكشي علاش منبغيش هاد الاهتمام يكون مع شي واحد آخر
أوس : نهتم بيك آه و لكن هذا متيعنيش أنه خصني نهتم بيك غير نتي
أنا : و علاش ؟
أوس : حيت هادي أنانية، خصكي تفرحي حيت تتشوفيني هكا، و خصكي حتا نتي تديري نفس الحاجة، خصك تعاوني ناس بلي قدرتي عليه، كوني سخية فالمشاعر ديالك، الدنيا صعيبة، و الناس محتاجة حب و اهتمام و عطاء أكثر فهمتيني
أنا : ايه ايه مزيان
أوس : ههه كتصرفي هكا يكما وليتي تتبغيني الزغبية
أنا : ماشي قضية تنبغيك ولكن راه ولينا متقاربين بزاف وليتي فحال خويا ولا كثر
أوس : ههه وايلي، انا بعدا لا سولتيني غتقولي واش وليت تنبغيك غنقولك لا، حيت انا أصلا تنبغيك (هنا قلبي قفز من بلاصتو)
أنا : بحالاش مفهمتش
أوس : الحب راه إحساس تيبدا بالمشاركة، أننا تشاركنا الهضرة و الأحاديث و الماكلة و الضحك و الخروج، ميمكنش شي واحد متتبغيهش غدير معاه هدشي كامل
أنا : معرفتش، جيتيني فحالا تتقولي تنبغيك بحال ختي بطريقة راقية
أوس : تنبغيك بحال اختي اصلا جملة راقية، و باش تقال لشي وحدة خصها تكون مميزة بزاف، على أي ماشي مشكل، حتا نتي راكي عزيزة عندي و كنحس بيك قريبة ليا فحال ختي صغيرة، ولكن هذا متيعنيش أن الاهتمام كلو خص يكون غير ليك و اي حاجة خص تكون غير معاك
أنا : ايوا مزيان
كنت كنتسنا منو يتقلق حيت قلت ليه راه فحال خويا، مي هو عندو عادي، حتا انه حاسبني فحال ختو الصغيرة (و الطريقة باش قالها مكانتش باش يفقصني ولا شي حاجة، قالها منيتو) منكذبش عليكم أوس تيعجبني، و هدشي حسيتو فأول مرة شفتو قبل حتا ما نهضرو، كنت تنتوقع فاش غتعمق الهضرة بيناتنا غيمشي هاد الإعجاب حيت تيبانو مع الوقت العيوب ديال الطرف لاخر، مي وقع العكس، تزادو الأحاسيس ديالي حيت كان ديما تيهتم بيا و يسول فيا، لقيت بلي دغيا تقاربنا ، بحالا تنعرفو بعضنا من وقت بعييد، تنلقا معاه راحتي و كنحس بلي تنتفاهمو، و واخا بديت تنخاف شوية من هاد الإعجاب، مي ما حاولت نمنع راسي حيت تنقول مع الوقت غيجي شي نهار غيبدا يدير معايا شي تصرفات خايبين ولا يتبدل عليا، و عارفة بلي نهار غيعرف الجزء المظلم فيا مغديش يبقا كيفما دبا، أي واحد غادي نعجبو غيكون فقط لأني تنبان قوية و عندي شخصية زوينة، حيت ضحوكية ولا ذكية ولا اي حاجة، ولكن نهار غيعرف بلي كاينين نقط سوداء فحياتي غادي تهرس ديك الصورة لي كان واخد عليا و مغديش يبقا داك الإعجاب لي كان فلول، و هدشي لي كان ديما مخليني منعاودش للناس عليا و نخلي حياتي لراسي، أوس ولد زوين مي حتا هو نهار غيعرفني كيف دايرة غادي تبدل النظرة ديالو ليا، هدشي علاش بغيت تبقا العلاقة ديالنا هكا و صافي، و من هاد الهضرة لي قال دبا عرفت بلي هو كيتعامل معايا عادي و ربما كيبغي نخرج معاه و دكشي غير حيت تنتفاهمو و تيلقا معايا راحتو لا غير.....بقا غادي حدايا و حنا ساكتين، معرفتش فين، مهم بقيت تابعاه و صافي، و حتا هو ما حاولش يهضر ولا يسول، وصلنا لواحد المحل عاد و اخيرا نطق
أوس : تجي معايا ولا تسنايني حتا نجي؟
أنا : انا جالسة هنا حتا تسالي
أوس : واخا، فيك جوع بزاف ولا شوية؟
أنا : ما فياش كاع
أوس (دار ضحكة خفيفة) : واخا واخا
دخل كنت كنظن غيتعطل مي غير خمسة دقايق و هو يرجع، و قاليا يالاه، بقينا كنتمشاو حتا وصلنا لطريق البحر
أنا : افين غادي بيا
أوس : مزالا معرفتيش؟
أنا : لا
أوس : غنمشيو للبحر
أنا : بزوجنا، و فهاد البرد، اش غنمشيو نديرو فيه
أوس : عادي نجلسو و صافي
أنا : معرفت هاد البلانات ديالك فين غادي يخرجونا مزال
أوس : تفائلي
و جر ليا حنكي بشوية و تيضحك، وصلنا للبحر كانت الرملة باردة، جبد واحد الفراش صغير من ديك السلة فرشو و جلسنا عليه، كان البحر شوية هايج، و تيسوط واحد الهوا بارد علينا، جو زوين بزاف، بقيت تنشوف فالامواج و تنسمع الصوت ديالها، كان واحد الصياد فوق الصخرة شاد صنارتو و مقابلها، درت عند أوس لقيتو تيشوف فيا......تبسم، و حتا انا
أوس : اجي ناكلو قبل ما يبرد هدشي
أنا : شنو جبتي
أوس : عقلتي فاش قلت لك راه كاين واحد المحل تيبيع بسطيلة واعرة، جبت 4 صغار، جبت الفريت و سالاد و مونادا، و شوكولا نواغ و شوية ديال المكسرات خفت لا ميشبعكش هدشي
أنا : هممم كتفكر فيا
أوس : ضروري
حطينا دكشي و كلينا بجوج، بصح كانت الماكلة بنينة بزاف، ولا يمكن غير حيت كنت معاه، فاش سالينا نضنا كنتمشاو، حسيت بإحساس زوين بزاف، شفت فيه و قلت : واش نقدر نقز؟
أوس : ههه علاش
أنا : معرفتش كنحس براسي فرحانة بغيت نقز
أوس : ديري لي بغيتي
بقيت كنجري قدامو و تندور و تنضحك، فاش شافني جاتو ضحكة، مشيت كنجري عندو قلت ليه : حط دكشي من يديك و اجي جري معايا
و ما كانش من العاگزين حط السلة فوق الرملة و شد ليا يدي و بقا تيدورني و تنجريو و تنضحك بأعلى صوتي، كنت فرحانة بزاف، هذا هو الإحساس لي افتقدتو من زمان، بدأت شتا تتنقط، كنا فالنصف ديال شهر واحد و البرد واصل للقمة، درت القب ديال جاكيط و حتا هو، و شتا تتجهد و حنا تنزيدو فالضحك، حتا عيينا، شفت فيه و شاف فيا، و تفرشخنا بالضحك على حالتنا، هز السلة و بقينا تنجريو و حوايجنا عمرو برملة فازگة، تخبعنا تحت واحد السقف بينما هدات شتا شوية، و هي غير ما كتزيد تجهد......