Ankahe Dastan (ON HOLD)

Chhipe Jazbaat

This Diary Entry is written on the behalf of our Pandit. He wrote this entry when he came back to Ahmedabad after meeting Tanvi in Mumbai.

Dear diary,

Main...Pandit. Nahi, nahi...koi puja wagera karaane wala pandit nahi. Wo kya hai ki, mere saare dost mujhe pyaar se Pandit bulate hain. Aur aaj hum donon bhi pehli baar mile na, toh socha aise hi batoon ki suruwat ki jaaye.

Waise thoda sa ajeeb bhi lag raha hai tumse baat karneme. Bura mat manna, lekin kabhi socha nahi tha ki zindagi mein kabhi tumse bhi mulaakat hogi. Kya karun? Aaj koi reh hi nahi gaya hai mere paas jisse main apne dil ki baat keh sakun. Ab tumhe lagega ki sayad mera aur mere doston ka jhagda hogaya hai. Lekin aisa bilkul bhi nahi hai. Bhagwan ki kripa se aisi naubat nahi aayi hai, aur prathna karta hun ki aisa kabhi ho bhi na. Tum phir se puchhoge ki agar aisa kuchh hai nahi toh yun apne dil ki baat kehne ke liye maine tumhe kyun chuna? Pata hai pata hai...bohot confuse kar raha hun main tumhe. Ab kaise kahun? Umm...baat kuchh aisi hai ki, jo baat main tumhe kehne aaya hun, wo main aur kisiko bata nahi sakta, sivaye uske. Magar ye 'uske' kaun hai?...yahi hai na tumhara agla sawal? Toh jawab ye hai ki...hehe...abhi tak mujhe bhi nahi pata. Aur iss baare mein, main apne doston se kaise baat karun? Pehle hi wo mujhe 'Ponga Pandit' kehte hai...aur main jo kehna chahta hun wo unhe pata chala, tab toh aur bhi naamon se naamkaran kar denge mera. Toh isliye mujhe lagta hai aaj mujhe tumhara sahara lena hi padega.

Tumne toh bohot se dilon ki baton suni hogi. Tumhe Sameer yaad hai? Arey Sameer...mera dusra jigri yaar. Usne bhi toh tumhare saamne kayi baar apne dil ko khol ke rakh diya tha. Mujhe bada ajeeb lagta tha jab wo tumse ghanton baithke baatein karta rehta tha. Main sochta tha ki aisi kya baatein wo likhta hoga...wo bhi itni der tek. Pata hai main kya kehta tha? Main kehta tha, "Yaar Sameer...ye patle se safed panne mein itna kya dub jaata hai tu har din? Aur kya likhata kya hai itna lamba?" Toh jawab mein wo meri oor dekhta tha aur muskurate huye kehta tha, "tu nahi samjhega yaar...jab teri baari aayegi na, tab tujhe samajh aayega mere dil ka haal." Aur iska atrangi jawab sunke, main bas sar khujaake ye sochta rehta tha ki "kaun se baari ki baat kar raha hai ye?" Par aaj sayad wo 'baari', wo 'waqt' aagaya hai. Naa...iska matlab ye nahi hai ki mujhe kisise pyaar hogaya hai. Haan haan...puri baat bataunga. Suno toh! Aaj Sameer ki wahi baat yaad aagayi...toh socha ki jaise Sameer tumse din raat apne dil ki saari baatein kiya karta tha, aaj main bhi humari iss chhoti si mulakat mein, apna kuchh suna dun.

Par pata hai kya? Ab toh Sameer ko bhi ek jeevan saathi mil gayi hai...Naina, jisse wo khul ke apni dil ki saari baatein keh sakta hai, apne jazbat bayan kar sakta hai. Aur badle mein usko bhi din raat sun sakta hai. Wo toh aisa chahta hi hai ki Naina humesha uske saamne rahe, wo roz use bina palke jhapkaye dekhta rahe...aur wo jo bhi bole, bas use sunta rahe. Kitni achhi baat hai na? Kitna khubsurat rishta hai na donon ka? Main bhi unn donon ko liye bohot khush hun...bohot zyada, humesha se tha bhi, aur roz rahunga.

Ye toh hui inn donon ki baat. Par main? Mere pas toh aaj tak aisa koi hai hi nahi. Pata hai? Aaj bhi double bed pe single hi sota hun main. Mobile phone ka bhi setting hai bas mera nahi hai. Kya kismat hai na meri? Achha baba seriously baat karunga ab...no masti.

Hmm...Waise ek baat kahun? Humesha maine Sameer...aur Munna ko bhi, yahi kehte suna hai ki pyaar ek bohot khubsurat ehsaas hota hai...bohot pyaara hota hai 'pyaar', ek alag hi sukoon hota hai isme. Jab bhi pehle pehle, aur aaj ke time mein bhi, main Naina aur Sameer ko ek saath dekhta hun, tab inn baaton pe sach mein bharosa hone lagta hai. Aur ye baatein sach bhi hain. Kyunki maine apne saamne 'sache pyaar' ko sakaar hote huye dekha hai. Kitne khush kismat hote hai na wo log jinhe sacha pyaar naseeb hota hai? Waise maine logon ko ye kehte huye bhi suna hai ki jinhe sache pyaar ka ek chhota sa ehsaas bhi hojaaye wo bhi utne hi lucky hote hain.