Ankahe Dastan (ON HOLD)

Armaan

This diary entry is written by CHACHAJI when Naina, Sameer, and Rakesh shifted to Mumbai.

Priye Dairy,

Aaj main ek baar phir Pooja, Naina aur Preeti, teenon ki shaadiyon ki cassette dekh kar aa raha hun. Abhi abhi Preeti ki shaadi ki cassette dekh kar baaju mein rakhi maine. Jaanta hun ki ye baat iss poore hafte mein chauthi baar tumse kahi hai maine. Par main tumse baatein karta hun iska matlab ye nahi hai ki main dukhi hun ya aisa kuchh. Tum se baat karneki wajah tum achhe se samajhte ho. Mere paas meri Bela hai, jisse main lagbhag har baat karta hun, har chiz share karta hun. Usse bhi kehne ko bahut kuch hai, sab kuchh kehta bhi hun use, wo bhi kehti hai. Par ek baat toh wo bhi humesha bolti hai mujhse aur taajjub ki baat ye hai ki yahi baat mere man mein bhi hoti hai. Arey wahi... ki jo baatein hum apni betiyon se kiya karte the, wo ek dusre se karne mein dil nahi bhar aata hai. Isiliye teenon ke jaane ke baad, hum donon jab bhi kuchh baat karne ko baithte hain, unki kami khalti hai hume...aur bohot zyada khalti hai.

Maine humesha se apni betiyon ke saath ek aisa rishta bana ke rakha tha jisse unlogon ko mujhse koi bhi baat karne mein kabhi takleef na ho. Ek pita se bhi zyada, main apni teenon betiyon ka dost bana. Iss ghar mein kisise agar sabse zyada nazdik tha main, toh wo thi meri betiyan. Aur tumhe pata hai? Hum chaaron milke humesha ek gang banake Bela ki taang khichte the, Aur usse khoob satate the. Aur Bela bhi muh fula ke baith jaati thi. Fir baad mein mujhe hi use manana padhta tha. Par sach kahun, Bela bhi yahi kehti thi ki uski bachchiyon ke chehre pe hasi dekhke uska saara ruthna hawa hojaata tha. Ab toh Bela ko satane mein bhi maza nahi aata unke bina. Pooja ki shaadi 1990 mein hui thi, Naina ki 1994 mein aur Preeti ki 1995 mein. Aur abhi 1996 chal raha hai. Par aaj bhi agar sochne baithun toh lagta hai kal hi ki toh baat hai jab teenon ki baatein aur chahel pahel ki wajah lagta tha ki ghar mein har din koi khushi ka mahaul ban aaya ho. Hum saath saath naache, saath saath gaaye, aur saath saath roye bhi. Apni betiyon par kabhi paabandi nahi rakhi maine. Bas itni azaadi toh di ki agar unke man mein koi bhi baat ho, toh wo mujhse aake keh sake. Sach mein...Jab meri bachichiyan thi na yahan, toh ghar mein ek raunak si lagi rehti thi. Aisa lagta tha ki iss ghar mein kitni chehel pehel hai. Par ab...ab koi bhi nahi hai yahan jiske saath main Bela ki wo tinde ki sabji ki burayi kar sakun. Koi nahi hai jiski alag alag farmayishon pe main thohfe lekar aaun. Jis ghar mein humne itne saal guzare, ab toh wo ghar bhi nahi hai humare paas. Wo ghar, jo maine itni mehnat se banaya, wo ghar jahan Pooja, Naina aur Preeti ke baaton se, unke shararaton se, unki nadaaniyon se, aur unki samajhdaari se bhara reha tha...wo ghar, nahi hai ab humare paas. Wo ghar jise dekhkar man ko behla lun ki isi jagah par maine itne saal saath bitaye hain apni betiyon ke saath. Par jahan hum abhi rehte hain, aisa dhyaan mein aata hai ki, iss ghar mein wo yaadein bhi nahi hain jiske sahare main apni zindagi kaat paunga. Pehle Pooja, fir Preeti; donon Ahemadabad chhod ke chale gaye apne ghar. Magar dil mein ek tasalli thi ki kamsekam meri beti Naina toh hai mere paas, yahin bagal mein toh hai meri Naina aur mere bete jaisa damad; jiske paas main bejhijhak jaa sakta hun. Itni toh khuhsi thi ki agar kabhi apni beti ke sath waqt guzarna chahun toh chala jaaun, usse baat karneka man kare toh chala jaaun, uske saath baith kar fir wo purani baatein yaad karun jiske sahare aane waala din achha kat jaaye. Par ab toh woh bhi chali gayi yahan se dur, mujhse dur. Par thik hi hai, main usse zabardasti apne saath baandh kar toh nahi rakh sakta na, aakhir uski bhi toh apni zindagi hai. Aur mujhe iss baat se koi sikayat nahi hai. Naina...aur Naina hi kyun, meri teenon bachichiyan jahan rahe, bas khush rahe, yahi ek baap roz prathna karta hai bhagwan se.

Log kehte hain ki iss duniya mein sabse bada daan, kanyadan hota hai. Sach hi hai...aakhir isme hum apni zindagi ke ek safar ko jo de dete hain. Safar hi toh hua na? Ek baap banneka safar. Apni chhoti si gudiya ko apni aakhon ke saamne bada hote dekhne ka safar. Mujhe ek baat ki bohot khushi hai ki meri teenon betiyon ko itna acha parivaar mila hai. Jo unka itna khayal rakhte hain, jo inko itna pyaar karte hain. Par ek baat ki khushi hai toh dusre baat ka dard bhi hai. Dard toh hoga hi na? Jab aapke sharir ke hisse ko koi le jaye, tab dard toh hoga hi na? Bohot mushkil ghadiyan thi wo, jab maine apni teenon betiyon ko vida kiya tha. Waise toh maayein hi apni betiyon ki sabse pehli dost hoti hain. Magar meri bachchiyan jitne karib Bela ki thi, utne hi mere bhi thi. Ya kahun ki Bela se thoda zyada mujhse thi. Isiliye main kehta hun ki apni betiyon ka pehla dost toh main hi hun, chahe koi kuchh bhi kahe. Aaj bhi wo din yaad hai mujhe, jab Pooja ka janam hua tha aur mujhe baap banne ka sukh mila tha. Aaj bhi yaad hai ki kaise usne apne muh se pehli baar papa shabd nikala tha. Wo din bhi achhe se yaad hai mujhe jab Naina apna pehla award jeet ke laayi thi aur sabse pehle mujhe dikhaya tha. Aur wo jab pehli baar first aayi thi na, tab yaad hai mujhe ki kaise khilkhilake, apne chhote chhote pairon se daud ke mere god mein aake baith gayi thi apna medal dikhane ke liye. Uss pal uske laaye huye medal se jyada uska chehra chamak raha tha. Aur usko dekhkar mera dil baag baag ho gaya tha. Aur Preeti, uski kya hi baat karun? Wo toh meri sabse chulbuli aur pyaari beti hai, aakhir sabse chhoti jo hai. Waise toh Naina usse sirf kuchh mahine hi badi hai, par Naina ekdum shaant swabav ki hai aur Preeti usse puri ulta edkdum shaitaan. Main toh usse shaitan ki naani kehta tha... (Hahahaha) Kal hi ki baat lagti hai ki, Preeti ke shararat par Bela ne uske kaan khichhe the. Aaj bhi achhe se wo din yaad hai mujhe, Preeti jab pehli baar jhagda karke ghar aayi thi toh uska chhot dekh ke mera dil kitna roya tha. Par jo bhi ho, har baar baat ko kaise sambhalna hai, ye hunar usko bakhubi aata tha. Isiliye toh Naina ki hanuman thi wo, thi kya abhi bhi hai. Ye baat toh hain hi, par aaj jab pichle kuch yaadein ankhon ke saamne aate hain toh lagta hai, kal hi ki toh baat hai jab meri teenon betiyon ke saath main aur Bela saath baith ke gappe maarte the, khana khaate the aur chhoti chhoti baaton par ek dusre ko chidhaya karte the. Aaj bhi agar kabhi Law garden jaana hota hai toh yaad aata hai ki kaise hum sab milke gol gappe khaane aaya karte the. Agar ussi hotel mein aaj main aur Bela khana khane jaate the, tab yaad aata hai ki meri bachchiyan kitni khush hui thi jab unhe pehli baar leke aaya tha. Har wo jagah aur chizein jisko dekh kar teenon khush huyi thi, usse aaj ke din mein dekhta hun toh unki aur yaad aajati hai, aur mere ankhon mein ek nami si aa jati hai.

Mera aisa manna hai ki jitni khushiyan meri betiyon ne mujhe diya hai, shayad utni khushi toh agar mere bete hote tab bhi nahi de paate. Aaj dekhta hun toh Rakesh bhaisahab ko dekhke bohot khushi hoti hai. Kitne bhagyashaali hain bhaisahab, jo unhe apni beti ke saath rehne ka, uske saath waqt guzarne ka mauka mila hai. Jo pal unhone Naina ke bachpan mein kho diye the ab wo unhe wapas jeene ko mil rahe hain. Aur Naina ke saath saath preeti ke paas bhi wo jaa sakte hain aur apne man ki baatein kar sakte hain. Aaj mera ye AKHRI ARMAAN hai ki puri zindagi toh nahi, par kuchh pal ke liye hi, apni teenon betiyon ke saath wapas samay guzaar pata. Unke sath wapas wo pehle ki tarah hasi thitholi kar pata, unke sath wapas Law garden mein jaake wo panipuri khaane ki race laga pata. Unke saath Bela ki khaane ki burayiyan kar pata. Kaash main wo saare pal wapas se jee pata. Kaash....

-Ek Pita

Aaj harr insaan ke kuch Armaan hote hi hain... Magar aaj bhi ek maa-baap ka ek hi armaan hota hai, ki wo apne bachon ke sath wo waqt bita sake. Aap bhi apne parents ke sath thoda sa waqt bitayiye...

Tab tak ke liye hum chalte hain...

Fir milenge ek aur ANKAHI DASTAN ke sath.

Stay Safe, Stay healthy ❤️

-Anushka and Issabella 💕