تبعثر الكلمات (اسكربتات)

اسكريبت

:دا انت عنيدة

ردت باستفزاز:عارفة ومش محتاجة اطرائك يلا طرقيني بقا

:همشي يا ختي دا انت محدش يعرف ياخد منك لا حق ولا باطل

ومشيت وقفلت الباب وراها بقوة ..سيناريو كل يوم بيني وبين اختي الصغيرة كل يوم تقولي على دكتور تخسيس عشان اخس ..عارفة انها بتحبني وقلبها عليا بس محدش يقولي اعمل اي واسوي اي انا بس اللي عارفة مصلحتي ..وكل ما تكون هوافق خلاص يجيوا يفتحوا الموضوع اعند ..ببساطة مبحبش حد يكون سبب في حاجة صح هعملها مش عارفة دا غباء او اي بس انا بقبل النصيحة والنقد وكل حاجة بالعند مش عارفة لي بس دى طريقتي ..ببساطة لأن رأسي أنشف من قمرة جوز الهند ..اممم حتى وانا بفكر بفكر في الاكل غبية ...والله جعت

قمت وقفت قدام المرايا و بصيت لنفسي بحزن..نفسي اخس بس عاوزة دا بكون قراري وفكرتي مش حد قالها لي ..اسمي ماسة ...عندي ٢٣ سنة ومخلصة كلية تربية بشتغل في مدرسة ..ومش قادرة اقولكم كمية الانتقادات اللي بتقابلني ..بتأثر جوايا بس ببين لا مبالاة .. هو طولى حوالى ١٦٠ ووزني ١٠٠ مش حوار يعني مجتمع جاهل

قاطع تأملي لنفسي صوت ماما وهى بتقول يلااا عشان الغدا

خرجت بكسل وقعدت اكل ...كل ما اكون مدايقة اكل ..زهقانة اكل ..تعبانة اكل ..فرحانة اكل ..امم مش عارفة امتى مباكلش المهم بابا قالي واحنا بناكل:في عريس متقدملك يا ماسة

ماسة بسخرية:اممم ويا ترى يعرفني بقى

الاب:هو ابن واحد صاحبي وقالي والله اتت راجل كويس وانا يشرفني اجوز ابني لبنتك

ماسة وهى تكمل اكلها بلامبالة:امممم طب عندك غدير اهي جوزهاله اصل انا منفعوش بقى

غدير :بس يا ماما انا مش هتجوز انا ورايا مستقبل وبعدين انا لسا تانية طب انا اما اخلص ابقى افكر اتجوز او لا

الام :يلاهووي وتقهريني عليكي يا بنتي

الاب:مش وقته الكلام دا العريس جاي بكرة يا ماسة جهزي نفسك عشان تقابليه

ماسة وهى تقوم من على المائدة:حاضر اي اوامر تانية

الاب برفع حاجب: ماتيجي تديني قلمين احسن

ماسة وهى تزفر:معلس يا بابا مس قصدي عن اذنكم

دخلت غرفتها مخبئها الوحيد بعيد عن العالم وكلام الناس قفلت الباب ووقفت وراه وعنيها دمعت ..وافتكرت كل مرة اتقدم ليها واحد ردة فعله ..مش عارفة الناس بقوا بجحين كدة ازاي

اللى قال:اي دا يا ماما دي اتجوز ها ولا افجرها

واللى قال: لا دي تشوفلها ترلاة تشيلها

واللى امه قالت:اسفين اوي بس انا ممونتش اعرف انها تخينة اوووي كدة

واللى قال: انتو هتجوزوني ولا تذلوني ..اعمل بيها اي دي