عشق لا قانوني

🎀 بارت 1 🎀

🚫 عشــــق لا قــانــونـــــي 🚫

⭐ بقلم لمياء الشادلي ⭐

     💄 البارت 1 💄
    

هابطة كتجري موراه ودموعها منهامرة على خدها كتعقد الزيف على عنقها وتنهج بقوة بفعل حركاتها المتوالية إثر نزولها من الدروج. نطقت بنبرة بكاء وقلة حيلة محاولة ما أمكن تقنعو

نادية : عفاك اسي مصطفى رحمنا حنا غير وليات متحكرناش هكا هئ هئ راه معندي حتى بلاصة نمشيولها من غير هاد الركينة اللي جامعانا انا وكبيدتي من ذياب الزنقة

مصطفى تنتر منها ونطق بعصبية : شوفي الالة نادية انا مشي سوقي في هادشي مجايش نسمع قصة حياتك جاي نعلمك تخويلي داري عيقتي 4 شهور مخلصتو حمدي الله الله مدعيتكمش

نادية : اسيدي مصطفى ربي اللي عالم بيا والله خدمة الموقف مبقاتش كافياني حتى لقوتي عاد الكرا وقراية البنت حن فينا يحن فيك ربي

مصطفى : هضرتي قلتها مكيهمنيش هادشي ديالك داري غدا تخوا ولا اندعيكم وديك الساعة توصل فين باغة توصل

نادية حنات راسها بأسف ورجعت لدويرتها اللي كلها مخربة وأركانها شاهدين على معاناتها

__________

سهام : سيمو 200 درهم سالات مبقاتش كتكفيني

سيمو : مفهمتش كيفاش كتديري لهاد الفلوس عاد عطيتها ليك البارح

سهام هزات حاجبها بعدم رضى : وليتي تمن عليا ها اللي مكيعجبنيش راه كتقلب عليا نقلب على الاصل دمك

سيمو : شحال خاصك

سهام : 500 درهم قرفية تنطح ختها ودبا

سيمو : مكتقادايش يلاه اري شي بوسة

سهام خرجت ابتسامة مصطنعة من ثغرها وقربت ليه طابقات شفايفها مع ديالو بكل احترافية مستمتعة في تقبيله

مدة مطويلاش وبعدت منو مدت ليه يدها وغمزاتو : كح

حل الكوفر فور جبد العدد اللي طلبات وعطاه ليها بينما هي خداتهم بسرعة وحلات الباب دلوطو ما إن جرها من يدو موقفها

سيمو : فقاش غدي ندوزو المسكي

سهام تنثرت منو وابتسمت بمكر : فاش يقولها ليا راسي

استمرت في طريقها وزدحت عليه الباب معلية راسها بتكبر تمشت بخطوات متتالية موزونة ما إن عقدت حاجبها من الباب المحلول دخلت مستغربة سدات الباب وراها وطلعت في الدروج بسرعة دقات في الباب ووقفت كتنهج

سهام :ماما حلي

مسمعاتش رد رجعت دقت مرة أخرى دقات قوية

سهام : ونااااااادية حلييييي

تحل الباب في وجهها وواجهاتها بنظرات محطمة

سهام : ماما مالك ؟

نادية مدات ليها يديها مجرد ما تلاحت في حظنها هبطو دموعها

سهام استغربت من شهقاتها ونطقت بتساؤل: متخلعينيش قوليلي مالك

نادية : الدار اللي كانت جامعانا من شر الزنقة بغاونا نخويوها هئ هئ لينا الله ابنتي هئ هئ 

سهام بعدت عليها مصدومة : كفاش اش تتقولي

نادية : كندوي بصح ابنتي مول الدار جا اليوم وقال لينا نخويو ولا غدي يدعينا

سهام : مال هذا مرض في ك/رو

نادية : متزيديش عليا ومتخسريش الهضرة حشومة هادشي اللي كتقولي

سهام حشات يديها في جيبها جبدت 500 درهم حطاتها ليها في يدها : خليها عندك هانا جاية

نادية : منين جبتي هاد الفلوس

سهام : لقيتها

نادية : متكذبيش

سهام هربت عيونها ونطقت كتأكد كلامها : مكنكذبش لقيت واحد البزطام حليتو لقيت فيه 500 درهم هزيتها ولحتو....... لاحظت تردد مها نطقت بصوت عالي شوية .... وصافي اماما شديها رزق جابو ليك سيدي ربي  اصلا دبا محتاجين

نادية: ونتي فين غادة

سهام : نتفاهم مع داك الكلب..... ختمت جملتها وخرجت كتجري

نادية : سهاااااام أجي لهنا براكة من الصداع

يتبع...........