"لقد تعافيت"

"الفصل الثاني"

"صالحت بيك أيامي، سامحت بيك الزمن 🤍"

"أم كلثوم" وأغانيها ليست مجرد كلمات تنبعث عبر ألحان، بل إنها عالم يسلبك قلبك، تلك القوة في صوتها، الممتزجة بالكثير من الحنان، أُجزم أنك عند سماعك أغانيها إن لم تكن عاشقًا لوددت أن تكون عاشقًا، ولكنني لحسن الحظ عاشقة.

_ حازم، يلا بقا الوقت اتاخر وإحنا هنا.
_ حاضر ي حبيبتي، يلا ي ولاد عشان نروح.
_ لا ي بابا استني شوية عايزة ألعب كمان شويه.
_ حلا، حبيبتي لازم نروح وهنيجي تاني بعدين.
_ ماما، أنا عايز أعرف البحر ده عنده كام سنة.
_ عنده كتير أوي ي يوسف، آلاف السنين.
_ يعني اي ألف السنين؟
_ مش ألف ي حبيبي، آلاف، جمع ألف، مش إنت أخدت ف الحضانة لحد مية، بعد كدا هتاخد الألف، وهو عبارة عن عشر ميات.
_ ياه يا ماما، دا كبير أوي البحر ده، يعني أكبر من جدو صبحي؟
_ هههههه، آه يا يوسف، أكبر من جدو صبحي.

الأطفال، ما أبرأهم!، لحظات الشغب التي يفتعلونها، نظرات الفرحة حينما يرون طائرة تحلق في السماء، الإنبهار عندما تحكي لهم قصة مُلهِمة، كم أنا شاكرة لله علي نعمة هذه الحياة الدافئة التي أعطانيها بعد معاناة طويلة.

وصلنا بيتنا، وكم من الدفء يكمن في كلمة"بيتنا"، تلك الجنة التي بنيناها أنا ودوائي، ذلك الحبيب الذي كان لي كَتِفًا لا يميل، قلبًا لا يمل، تالله إنه لأجمل أنواع العوض من الله.

_ مريومة.
_ عيون مريومة.
_ كلامك ده بيرطب قلبي حرفيًا، بحس إني طاير من الفرحة.
_ تستاهل كل الخير والفرحة اللي ف الدنيا دي.
_ ربنا يخليكي ليا يا حبيبتي وميحرمنيش من وجودك جنبي.
_ يارب ي حبيبي يارب.
_ تعالي بقا يستي أفرجك علي هديتك القديمة.
_ يلا.
_ عشان أكون صريح معاكي، إنتي يعتبر فتحتي نصهم، يعني في حاجات منهم أنا عملتهالك من غير ما تعرفي إنهم كانوا من ضمن المربعات.
_ زي اي؟
_ يعني أول حاجة كانت فيهم هي رحلة أسوان، تاني حاجة ودي أكتر حاجة قريبة من قلبي، أجمل حاجة حصلت، هي إنك وافقتي علي العملية، ف الحقيقة دي مش هدية ليكي قد ما هي هدية ليا أنا ربنا بعتهالي.
_ يلا ابسط، مروقة عليك أهو.
_ وأنا أقول العيال طالعين مشاغبين لمين، لأمهم أكيد.
_ عندك إعتراض؟
_ اي ي مريم أنا جوزك، صلي على النبي كدا.
_ عليه أفضل الصلاة والسلام، طبعاً ي حبيبي وأحلي زوج ف الدنيا كلها.
_ يارب يديم عليا كلامك ده، طيب المربع التالت افتحيه.
_ الله ي حازم، دي جميلة أوي الأوضة دي، تقريباً أحلي هدية عملتهالي ف أول عيد ميلاد ليا وإحنا مع بعض.

تلك الغرفة التي نتحدث عنها هي غرفة زائدة في البيت، قد ملأها"حازم" بكل أدوات الرسم التي أحبها، وقد لوَّنها بالألوان الزاهية التي أعشقها، عندما تزوجنا لم يخبرني عنها حتي جاء يوم ميلادي، تُشبه حديقة تعُمّها الأزهار والفراشات.

_ اعترفي إن ذوقي ف الهدايا لا يُعلي عليه.
_ المربع الرابع لو سمحت.
_ اعترفي الأول ي مريومة.
_ أعترف.
_ بإيه؟
_ إنك إنت ف كل حاجة مختلف.
_ وانك إنتي أجمل بعيدة اللي جابتها الصدف.
_ الله ي أستاذ ماجد المهندس الله.
_ افتحي المربع الرابع ي ست آمال ماهر.
_ مكتوب فيه"ألبوم صور"، استني دا اللي جبتهولي ف شهر العسل صح، عندي جوه ف الأوضة.
_ هو بالظبط، حبيت أحطلك فيه كل الصور بتاعتك وبتاعتنا حتي لو صورة من غير مناسبة، كل حاجة تخصك بتبقي مميزة أوي ي مريم.
_ بقولك وشي احمر ولا لسه؟
_ رمان.
_ تمام اللي بعده.
_ آخر مربع لحد دلوقتي، الخامس.
_"عزومة عائلية"؟
_ آه ودي لسه معملناهاش، تقريباً إحنا عزمنا كل قرايبنا بس مش مع بعض، عايزين نعزمهم كلهم مع بعض.
_ دي فكرة تجنن ي حازم بجد.
_ اي رأيك نعملها الأسبوع الجاي بإذن الله.
_ موافقة جداً، يبقي عمو صبحي وطنط نوال، ورضوي وعماد ويوسف، وفرح أختي وجوزها مروان وآية بنتهم، وأكيد باباك ومامتك.
_ تمام جداً، بس في إضافة بسيطة وأتمني متزعلكيش.
_ مراتك التانية؟
_ ههههه لا مش للدرجادي، بنت خالتي كانت مسافرة إنجلترا بقالها كام سنة وجاية إجازة كام أسبوع ف مصر، وهي هتيجي بكرة وهتقعد عند ماما وبابا، ف هل ممكن تيجي معاهم العزومة؟
_ أكيد طبعاً تنور ف أي وقت.
_ حلو اوي، نروح بكرة إن شاء الله نشتري كل الطلبات، وهاخد يوم العزومة إجازة من الشغل عشان أساعدك ف الطبخ.
_ تاخد بوسة؟
_ بوسة وحضن من فضلك.