الحياة حلم

البارت الثاني

#الحياة_حلم
منقوله للكاتبه أيام الخفاجي

هَلي وعضات الاصابع كُلها منكم انه المفرهد المنسي الموش ابنكم ..

أي اخذت قراري .. راح اتزوجة بس عندي شروط  ..

سرى ام حياة : بأستهزاء اي عيني وشنو شروطج ..

اول شي اكمل دراسة ..
الثاني مهري اني احددة ..
والثالث زواج ميتزوج عليه وفي حال راد يتزوج يطلگني ..
اخر شي اريد بيت وحدي  ....

سرى ام حياة : بشهكة ضربت على صدرها .. يمة كُل هذا عزة العزاج حياة راح تشردين الرجال بهاي شروطج..

بس يلااا انا سراوي اقنع الف رجال ...

عادي اهم شي تتزوجي واخلص منج ههههههه ضحكتها الشريرة ..

حياة : هزيت راسي بوعيد خوش يمة خوش ..

"تسريع الاحداث"

مرت الايام طبيعية امي بطلت تضربني علمود زواجي ..
وصار يوم الخطبة بتاريخ ٢٠١٤/١/١٥،،،،

اجتي امي كعدتني من الصبح تقريباً ساعة ٨
سرى ام حياة : حياةةة كومي كعدي من عساج لا تهنيتي بهل زواجة .. كومي لج تأخرنا .. اي يمة كمت ..

حياة : ياا هاي شبيها هلكد ضايجة ..! كمت رحت غسلت وسبحت .. وطلعت بدلت لبست صاية خليجية علمود اخذ راحتي ولفيت شالي وامي ضلت تصيح تأخرنا وتأخرنا ..

كملت .. واجة خالي اخذنا للصالون .. فدوة لعمرة طول الطريق مشغل اغاني وفرحان ..  وامي تصطنع الضحكة ..

اما امي وضعها معاجيني ما اعرف شبيها معبسة وضايحة وحتى تباوعلي بحقد شكتتني بنفسي !!!

وصلنا للصالون وخالو صحاني من صفنتي.. انا بية طبيعة اذا صافنة وواحد يصحيني من صفنتي افز بسرعة ..

فمن فزيت خالي انرعب كال شبيج خالو شنو شو بـس تتصفنين صاير شي وضعج ما عاجبني خاف احد جابرج على هذا الزواج احجيلي اني بمثابة ابوج..

حياة : من گال هيج صفنت بوجهه بعيون حزينة مغوركة بالدموع حجيت بقلبي.. ياريت يا خالي لو احجيلك وتخلصني من الجحيم الي عايشة بي خالي ياريت لو اكلك امي ما رحمتني واشوفك جروحي اخخخ لو عندي أب ما كان صار هيج حالي ...

ها خالي لا مبية شي بس شردت افكر بالخطوبة وهل شغلات مال البنات انتَ متعرفهن ههه..

الخال : يصير خيـر خالي بينة وبين نفسة يجي يوم اوكع على علتج..
يلا عيني وصلنا انزلو وشوفولي بيش الساعة تخلصون علمود اجيكم ..

انا رحت نزلت دخلت للصالون ولفحتني برودة السبلت.. وشفت كدامي تقريباً ٢ بنات ..

اجتي امي سألت الكاوفيرة بيش الساعة تخلصون بنتي كاللتها بـ ٣
وراحت كالت لخالي..