قناعتي أنا

اللحظة...

‏- تأمل التفاصيل اللطيفة في يوُمك وكبرها و اصنع منها لحظاتك الحُلوة، لا تنتظر أن يمنحك إياها اي شخص اخر غير ربك....

دائما اكو شي بداخلنة يجبرنة نقارن نفسنة بغيرنة من ناحية الاشياء الزينة والاشياء المو زينة

اقرب مثال من نشوف شخص فرحان او شخص مبتسم للحياة او شخص متفائل
مباشرةً رح نكول باعو هو وين واحنة وين
حنكول حضة حلو وحنكول هو ماعندة بهالدنيا غير بس الضحك
رح نكول الله عاطيه كل الراحة
رح نكول ليش احنة حياتنة مو مثلة وحنكول ليش احنة معايشين حياتنة مثل الغير

ليش الهم والغم والذم بس بحياتنة ليش المشاكل والتفكير ميروح من بالنة ومن حياتنة
رح نضل نكول الى متى وشوكت الرب يفرجها

... تدرون شي كل شخص بهالحياة الة قصة كل شخص بهالحياة عندة نقص وبكل بساطة لان الكمال لله سبحانه وتعالى
كل شخص بهالحياة يحوي مشاكل ويحوي تفكير ويحوي قهر
ماكو شخص بهالدنيا مرتاح ماكو شخص بالدنيا ماعندة هموم كل واحد من عدنة عندة رياح تودي وتجيبة وهالرياح مرات تتحول عاصفة

بس اكو شي وهو كل واحد يكدر شلون يدير هالرياح ويمشي ب اتجاهها حتى لا تشمرة بعيد وتردة وتجيبة.؟!

يعني هذا الشي راجع الكل انسان
يعني اني اكدر ببدال ما احجي مشاكلي الشخص اكتفي بقول الحمدلله
اكتفي بقول بقت يم الله
اكتفي ب ابتسامة
اكدر اني ابدي يومي ب ابتسامة وتفاؤل
اكدر اعكس طاقتي الايجابية على طاقتي السلبية واتغلب عليها واستمر بحياتي

الدنيا اخذ وعطاء
يعني كل ما الدنيا تاخذ مني شي لازم تنطيني شي ثاني ولازم اقابل هالشي ب رضا لانها عوضتني

خلونة نعيش لحظاتنا الحلوة وننشغل بيها ونتعمقها
وابد منفكر ب اللحظات التعيسة

خلونة نتأمل الفرحة التجينة ونفرح بيها بكل طاقة باقية عدنة خلونا نخلي اي فرحة بسيطة تحتلنة بالكامل ومنخلي اي حزن صار بالماضي يخرب علينة ه اللحظة

الحزن يصيبنة والفرح يصيبنة وكلشي مكتوب بحياتنة نشوفة
_اللي مكتوب عالجبين تشوفة العين_

وبالضبط كلشي مكتوبلنة نشوفة وكلشي مقدرلنة بهالحياة هو من رب العالمين
ودائما رب العالمين كاتبلنة الشي الزين واليفيدنة والمصلحتنة
ولله الحمد..

لحظة الحزن حتروح اي بالضبط تروح..
خلينة منخليها تسيطر على باقي ايامنة وباقي حياتنة خلينة منخليها تنسينة اللحظات والاشياء الثمينة اللي يتمناها غيرنة

تأملو يومكم👇🏻
تأملي عيون امج اللي تحميج وتحبج وكلبها اللي مرافقج بالدعوات وين مجانت
وعيون ابوج اللي تحرسج من كل خطر
وايدة اللي محاوطتكم وين مجان حتى وهو بعيد عنج

باعي الخواتج اللي شكد ميقسون عليج نتيجتها خوفهم عليج
باعي الحنيتهم وطيبتهم اللي يصيرولج ام من بعد امج
وباعي كم شي يقدموه من ايديهم الج قبل ليقدموه الهم

توجهي الاخوج اللي اول متتعبين تلكيه سند الج من بعد كل خرابة

ابتسمي وانتي تشوفين عندج صديقات يصافحون قلبج قبل ايدج وصارولج اكثر من خوات

ومن بعد ذني كلهن ارفعي راسج للرب وكوليلة الحمدلله
الحمدلله انو انتي عايشة وتشمين الهوة وداير مدايرج عائلتج

الحمدلله انتي بمكان امن وعندج وطن
وعندج اليوكفلج
وقبل ذني كلهن عندج ربج اللي حشاه ينسى عبده وميوكفلة

هسة انتي من بعد ذني كلهن عِقْليها وياية
هل من بعد كل شي عددتة الج
يستاهل تخلين نفسج طول اليوم وطول العمر حزينة بسبب موقف لو لحظة حزن صارت وراحت

هل اكو شي يستاهل تقمعين نفسج ومتعيشين لحظة فرح وسعادة دائمة بسبب شي اكدر اني اتخطاه؟!

خلونة بسيطين ونعيش اللحظة بلحظتها خلونة نقتنع ونحمد ربنة بكلشي مكتوب النة
متعرفون شلون ربكم يغير الاقدار ومن لحظة حزن يكلبها لحظات من الفرح دائمة الحياتنة

..سيمر كُل مُر ، سيمهد الطريق وينطوي حزن الأيام سيمر كُل مُر وتتبدل ايامنا فرح واشواق..💛

التوفيق للجميع...

#الكاتبة_هديل_علاء