قناعتي أنا

الاحساس...

‏"لا يُسأل المرء بإختيارات قلبه"
"ولا يعاتب ويحبط ب اختياراته"
"من كان على خطأ عَلِمَ خطأه
ومن كان على صواب فاز ووصل لِمُرادِه"

كلنة ومن فطرتنة عدنة احساس ولابد ماكو احد ماعندة مشاعر وماعندة قلب يلين

كلنة عدنة هالمشاعر والاحاسيس اللي منسيطر عليهن بوكت الغضب وبوكت الحزن وبوكت الفرح و بكل وكت

كلنة قلبنة قلب بشر ولابد الله زرع بذرة الاحساس بداخلنة حتى تخلينة نعطف على غيرنة وتخلينة نواصل بواهس!!

تمام اني حكلكم شلون
الاحساس من اني احاول احس بغيري ومن انجح بنتيجتي افرح من كلبي ومن تصيبنة مصيبة نحزن من اعماق كلبنة

كل هذا احساس كل هذا مشاعر بداخلنة انخلقت ولابد تتهيج بفد موقف اللي جان موقف بسيط او موقف مؤثر

ولكن اكو اشخاص يعرفون شلون يحاولون يخفون احاسيسهم ويعرفون الاوقات المناسبة اللي تخليهم يذرفون احاسيسهم بقوة
يعرفون يضبطون الوقت اللي المفروض يكونون بيه اقوياء بدل من انو يكونون حالهم حال البقية

🔉اللي رح احجي عن الاشخاص الايجابيين اللي لابد يتواجدون ويانة اما اللي السلبيين وبين(السييئين) ف مااضنهم متواجدين وحيقرون بهذا الكتاب...

ذولة الاشخاص(الايجابيين) عدهم احساس ويمكن احساسهم يفوق كلمة الاحساس بحد ذاتة بس هالشي ميظهرلنة ميظهر بأفعالهم ميظهر بوجهم
لذلك كلنة نطلق عليهم
ماعندك احساس
انت بدون مشاعر
ماعندك قلب
للاسف احنة شاطرين بذني الكلمات ابد متعبنة نفسنة وشفنة الجانب الاخر من هالشخص
اذا احنة تأثرنة بموقف حزين و نشوفة صامد نلقبة ب القاب عكسة ونكون مغتاضين منة

المفروض نعرف سبب صمودة نعرف انو هو مخلة عواطفة تغلبة واحساسة يكسرة كان قوي بالموقف اللي احنة ننهار بيه كان يحاول ينطينة من قوتة

اذا كل الدنيا انهارت وحزنت منو اللي يخلينة نوكف
اذا كلنة حجينة ب احساسنة منو القوي اللي حيحاول بينة؟

مو بس هاي اكو نقطة اخرى
كلنة عدنة احساس وبمعنى هاي الجملة يعني المفروض نحس بمقابيلنة نعرف انو شنو المفروض احجي وشنو المفروض مااحجي
يعني من اني اعرف انو هالكلام يأثر بيه ف مااحجي
واذا اعرف هالكلام يمدة بالطاقة والحيوية اذاً احجي

مثل ما المقابل عندة احساس لابد يعرف انو المقابيل ايضا يحس وعندة قلب
يعني من اني مقبلة على عمل او على فكرة لا تنطيني تجاربك اللي فشلت بيها
وحتى وان فشلت اني بيها المهم انو اني حاولت جداً جداً يكفي انو اني حاولت ولله

لا تستهزأ بية بجملة (انت صدك تحجي)
اذا انت فشلت مو الكل حيفشل
اذا انت مواصل مو معناه تريد الكل ميوصل

اي نعم اني اعرف روحي متينة
نعم اعرف روحي ضعيفة
اعرف اني بشرتي مو ناصعة البياض
اعرف انو اكو غيري احسن مني

لذلك اني مااحتاج انت تذكرني بيهن حتى لو اني جنت راضية على نفسي بس النفس متتقبل الانكسار

ماكو داعي تنصحني بشي هو معروف بنجاحة بس في سبيل تحطمني حتى نصير سوة وثنينة منوصل

لوما شكد جنت حاملة قوة وشكد حابة الشي الاريد اسويه لا تتكلم بكلمات عادية بالنسبة الك بس هي تحطم امال المقابيلك

كل البشر يحس
كل يتيم
وكل من فاقد ام واب
وكل من عندة نقص

حاول تحجي بكلام يخليني دائما اجي واتحمس اسولف وياك واحجيلك انجازاتي اللي من خلال كلامك وتشجيعك احسهن عظيمة

احجي بالامل والتفاؤل والامان والنجاح
لا تحجي باليكسر النفس ويزرف القلب

كالو بوجهي متحسين
وكالولي ماعندج مشاعر وقلب
كالولي شالعين منج الاحساس
صدكت هذا الشي لان فعلا اني ب اكثر المواقف اللي تقهر اني اضل مااتحرك ووكأنو كل القوة تصير بوجهي
وجانت السالفة عادي عندي الحد مصارت هالسالفة تنمر وكامت تتداول انو اني مااحس ونلقب علية من الاغلبية هيج
جنت وحدي وبجيت بس فرحت لان اني لوما عندي احساس ماابجي وعرفت انو يلقبوني هيج لان اني الصغيرة لأهلي واستمديت كل هذا من بابا
اي نعم بابا مصدر قوتي واذا بابا انهار اني تنهار قوتي
ومن هاي النقطة ايضا عرفت انو هذا سبب انو اني مااظهر مشاعري واحساسي بقيت صغيرة بابا وتعمقت بكل شخصيتة عصبيتة قوتة

تعلمت الصلابة والقوة من بيئتي او من نضوجي نضجت واني بعدني بعمر صغير

اسيطر على احساسي نعم
بس مو معناه اني ماعندي احساس حتى تجرحني بكلمة
ماعندج مشاعر؟
شايلين قلبج؟

لا عندي بس اعرف اسيطر عليهن بالوكت المناسب واعرف أظهرهن بالوكت المناسب

.... لا تلتجأون للشخص اليحطمكم التجأو للاشخاص اللي يحسون بيكم ويحسسوك انو انت بشر وهم تحس وعندك قلب التجأ للشخص اللي اذا كلتولة نجحت بدروسي يفتخر بيك
اذا كلتلة اني حلو لولا يكلك احلا واحد شفتة
اذا كلتلة احلامك وطموحك يخليك بكلامة تحس انو انت هاهية وصلت للي تريدة

💓 ويا من تملكين الجنة تحت اقدامك: كنتِ ودمتِ لي سند لا يفارقني
دمتِ لي حضنٌ يحتضنني ويحتضن احلامي معي...

احبك عندما تقولين لي "" يمة حبيبتي هيج واشوفج واصلة الاحلامج، يمة ماشاءلله عليج وعلى كلامج""

ماما احبج يا مصدر تفاؤلي💓

التوفيق للجميع.....

#الكاتبة_هديل_علاء