قناعتي أنا

الرباط المقدس (الزواج)

الجميع يعرف انو الزواج هو سنة الحياة.
وهو امر اعتيادي لان الزواج اساس تكوين المحبة واساس تكوين اسرة صالحة ومجتمع سليم.

اللي ذكرتة كلة معروف وكلنة نعرفة صغيرنة وكبيرنة

اوجه سؤالي انو شوكت يكون الزواج ناجح؟
واغلب الاجابات حتكون 👈🏻من اكو بينهم تفاهم
.... نعم التفاهم اللي يكون بين الزوجين الثقة اللي تكون اساس الزواج الناجح
الاحترام البينهم اللي يخلي الزواج اكثر ناجح التضحيات اللي يقدمهة كل طرف للثاني والتنازلات اللي تخلي الحب يكبر

كل ذني حتخلي الزواج ناجح ومستمر
فما بالك اذا كان الزواج مو هيج
اذا كان فارق العمر كبير اذا كان زواج قاصر اذا كان زواج غصب
هل رح يستمر الزواج هل حتستمر العلاقة وتتكون اسرة كاملة؟؟

هل يجوز اني ازوج بنتي الشخص اكبر منها بضعف عمرها لان حالتة المادية زينة؟

هل يجوز ازوجها لان اخاف تعنس ومحد يدك بابها؟

هل يجوز ازوجها لان اخاف من حجي العالم ولتروح تسودلي وجهي؟

وماذا عن زواج القاصرات!! اللي متتجاوز اعمارهم ال ١٤ سنة وال ١٥ سنة بعدها طفلة تحتاج لعابتها
بس هنا الاهل خلوها هي اللعابة وسلموها بيد الرجال بحجة الستر

اي ستر هذا؟ هل تسمون نفسكم اهل من تعدمون رأي البنية وتخلوها زوجة قاصرة تغروها بكلمة كلمتين
لو الزواج الغصب؟! تحت مسمى_البنية لابن عمها_
لو تحت مسمى _البنية كبيرة والقسمة زينة_

هل فديوم بمجتعنة استمر هيج زواج كان ولا زال سببة الاهل
اما عن الاهل اللي يكولون الحب يجي من بعد الزواج هذا اكبر غلط
الحب ميجي اذا مجان اكو توافق بين الاثنين وامان واطمئنان مو انتو مسلميها غصب لو انتو مزوجيها طفلة قاصر وتردوها تعيش سعيدة

كل ذني نهايتهن كلمة وحدة وهي _الطلاق_

طفلة تزوج بعمر ال١٤ تطلق بعمر ال١٨ اللي هي حتكون بيه ب ريعان شبابها
الكل يصيحلهة مطلقة وتتحمل الحجي وتصبر بسبب غلطة سببها الاهل!! اللي حيكون مرجعها الهم من بعد مزوجوها

كلنة نحتاج الحب وكلنة نهايتنة زواج صحيح
بس قبلها احنة نحتاج توعية اكثر احنة نريد اهل ينشد بيهم الظهر بيوم النحتاجهم
كلنة نحتاج الام اللي تكون صديقتنة وتنصحنة
نحتاج الاب اللي يسلمنة من امانة وبيتة الى امان وبيت رجل اخر

((وسيعلم اللذين ظلمو اي منقلب ينقلبون))

التوفيق للجميع❤️
#الكاتبة_هديل_علاء