فتحت الباب او دخلت لكيت تبارك او نور بلمطبخ ما حاجيتهن ولا باوع عليهن خاصه تبارك كلت اكيد ما اتحمل او ارتكب بيه جريمه صعدت لميت غراضي او نزلت تلكتني نور تسألني وين رايح ما باوعت عليه كتله مسافر او طلعت بقت تصيح ورايه ما رجعت عليه كملت طريقي عله المطار حجيت وي محمد كلي بعد ساعتين عن الاقلاع دزيت رساله المصطفى ودعته بيه او هوه بقه يطفر من العصبيه حرك الجهاز يتصل او يدز مسجات اني غلقت الجهاز حته ما اضعف او اجاوبه اعرف اذا جاوبته راح يحاول اغير رأيي عليش اتعبه اوصل لهناك او احاجي وياا مرت ساعتين او خلصت الاجرائات او التفتيش او هااي السوالف صعدت الطياره بعد ساعات طويله وصلت تركيه بداية حياتي الجديد
:
:
تبارك* طلع علي او اخذ غراضه بدون ميحجي شي ضليت مصدرمه بي معقوله هذه علي نفسه لو مبدلي
مشت الايام او سحر عله نفس حالته تذب كلام يسم بس اني متجاهلته او ما اهتم لكلامه او هيه من تشوفني ما مهتمه تحترك
ثريه:- ياختي والله اتعجب شون تكدرين تتحملين سمه او تسكتين اني لو مكانج جان كطعته
*عله شنو يمعوده مسامعه مقولة الحكران يكطع المصران خلي مصارينه تتكطع او عله شنو اتعب حالي
:- هم صدك بس اكلج وين سامعه هااي المقوله
* مدريني سمعة البنات بلمدرسه يكولنه او طبقه براسكم هههه
:- هههههه سم او وجع فيران تجارب مو احنه
* لا والج لا طنكرين هسه انتي منو يمج كلبتي خلقتج اني حاركه سحيره انتي شكو طنكرتي
:- هم صدك ناركم تاكل حطبكم
* باوعت عليه صفح اشو صرتي تكولين مقولات خير انشالله صرتي تشتغلين حرامي
:- شبايكه ماتكوليلي هسه عااد كايله الماكو هم مقوله من البنات كالنه سمعته ههههه
* هاا يعني هيج صارت
:-يبووو عله الساااعه االي فكرت احجي بيه
كمت من يمه دخلت الغرفه طلعت جهازي فتحته لكيت الرقم نفسه متصل عليه
يووو هذه ما ناوي اليه الفكه مو زوده
قريت المسج الي راسله
تبارك مو شليتي حالي كافي عاد ردي
حبيبي جاوبي مو بالي مشغول عليج ليش هيج تسوين بحالي شيصير عليج لو سمعتيني صوتج او ريحتيني
زين انطيني اي علامه دل عله انو انتي بخير
مو والله راسي راح ينفجر من التفكير بيج
معقوله هيج ماعندي معزه يمج او مخليتني هذه حالي حبيبي يروحي انتي اذا جاوبتي والله اجي اخطبج من اهلج بس كوليلي انتي بخير حته اعرف اصرف
---------------------------
شوف لك اذا متبطل هااي سوالفك اشتكي عليك او الدرسائل دليلي كافي مو طولته او عرضته كتلك ماريدك او بعدين وين عرفتني حته هيج ميت عليه تره كلشي مكشوف يمي لتحاول تمثل او جذب خلص راح احظرك اخر مره اذا دخلت من حساب ثاني افلش الجهاز ولا اجاوبك
......................... اشو بعدني ممكمله رزايل كتب
هله هله بهل شوفه هله بهل طول هله او كل الهلا يمه فدية صار شكد مسامع رزاله
ليش هيج حبيبي خليتي بالي مشغول عليج شيصير لو راحمه حالي من الاول او مجاوبه
---------------------
انته متفهم اكواك ولي ماريدك صدك تحجي انته بابه فكني منك او من شرك
.................. حظرته
او رديت عله صديقاتي اشوي او غلقته او ضميته بفراشات الخطار لان اعرف محد ينزلهن مكان اٌمن
دخلت عليه سحر تخوزر
ادور عليه الك**ب يبيعن شرف
تخبلت لمن سمعته هيج كالت هجمت عليه بكل ما أوتيت من قوت بدون ما احس بروحي ملخته دخلت ثريه تفاككنه او هااي سحر ضخمه او طويله او اني جني عصفور جواهه او هيه بوكسات عله وجهي جنه متانيه هااي الحظه من زمان ضربتني ببطني تخبلت لان شخصيتي ضعيفه او ساكتتله جريته من شعره او ملخته تملج لحد ما سمعت باباه دخل جرت روحه او راحتله تتبجبج اني لميت شعري او عدلت روحي او طلعت لكيته تبجي او تشكي او ماخذه دور الفقيره او تقبل او متقبل
سمعته تكوله هجمت عليه او صارت تضربني اني او ثريه متنه ضحك عليه بابه كوه ضام الضحكه صاح بينه حته متزعل كلتله
اني العصفور اهجم عله فيله مثلج وين لكيتيه هاي
احمد:- تبااارك احجي عدل بويه سحر مثل امج
*هههههه امي محد يااخد مكانه
ثريه تندس بيه حته اسكت
*بابه الي تطعن بشرفي او تغلط عليه او تضربني او فوك كل هذه تجذب تريده تصير حسبت امي
احمد خزر سحر او كام صاح
سسسححرر ورايه
سحر كامت تتراجف مشت ورى
اني اضحك عليه او دخلت الغرفتي اريد اطلع جهازي سمعت صوت بابه العالي او تكسر اشياء رحت اركض الصوت طالع من غرفة بابه او سحر
احمد:- حقيره هيه هاي الامانه الي امنتج عليه هيج تقهريهن او بعدين منو انتي حته تغلطين عله بناتي نسيتي شون تزوجتج لو اذكرج
سحر مثل الفاره تحت رحمته يضرب بيه او هيه بس صوت شهكاته تنسمع نقهرت عليه بصراحه بس كلت تستاهل مع انو هااي اول مره اشوف بابه يمد ايده عليه او يضربه او يعلي صوته بس لحظه شنو قصده بابه بشون تزوجه ههه لازم اعرف شكو هسه خل افلت رحت يم ثريه بلغرفه لكيت جهازي بيده او اسمع صو.....
.
.
ي
تبع
800 كلمه
للكاتبه eishg alkhafaji
