Love Between Serpent Beastman & Cuttie Hamster

👑ရုပ်ရှင်တူတူကြည့်ရင်း အချဥ်အိုးကွဲသွားတယ်👑/👑႐ုပ္ရွင္တူတူၾကည့္ရင္း အခ်ဥ္အိုးက

👑ရုပ်ရှင်တူတူကြည့်ရင်း အချဥ်အိုးကွဲသွားတယ်👑

(Unicode)

ကုန်တင်အာကာသယာဥ်မှ ပြတင်းပေါက်ပါသော အာကာသယာဥ်ဆီသို့​ ပြောင်းစီးခွင့်ရသဖြင့် ရှုရှုအရမ်းပျော်နေရသည်။ သို့သော် ယာဥ်ကြီးအား ယမ်းခါသွား၍ အတိုက်ခိုက်ခံနေရသလားဟု ထင်မိသွားလေသည်။

အာကာသယာဥ်ကြီး လှုပ်ယမ်းနေစဥ် ရှုရှု၏မျက်နှာလေးမှာ ဖြူဆုတ်သွားခဲ့ရ၏။ သူက အနီးအနား တွင်းလေးတူးကာ ပုန်းလိုက်ချင်မိ၏။ ကံကောင်းစွာပင် အာကာသယာဥ်လှုပ်ခါသွားချိန်က သိပ်မကြာလိုက်ပေ။ မကြာမီပင် တစ်စုံတစ်ယောက်က ပိုကောင်းသော အာကာသယာဥ်ကို သိမ်းယူနိုင်ခဲ့ကြောင်း၊ ထိုယာဥ်ကြီးအား ဆေး​ကြောပြီးပါက စိတ်တိုင်းကျ ကစားနိုင်​ကြောင်း ရှုရှုတို့အား အပြေးကလေး လာပြောပြလေသည်။

အော်....ခုနကလှုပ်သွားတာက တခြားအာကာသယာဥ်နဲ့တိုက်ခိုက်နေတာကြောင့်ပေါ့။ ဒီအက်ဂါကတော့ နောက်ထပ်အာကာသယာဥ် ထပ်လုနေပြန်ပြီ...။

ရှုရှုက ရှိုးတို့ရှုန့်တန့်နှင့် ကြောက်တတ်သော ဟမ်းစတားလေးဖြစ်လေရာ သူ၏ခြေထောက်များ တုန်ယင်နေခြင်းအပေါ် ယခုထိ မထိန်းချုပ်နိုင်သေးပေ။

မဟုတ်ဘူး...။ သူဒီလိုဖြစ်မနေသင့်ဘူး။ သားရဲတစ်ပိုင်းလူသား ဖြစ်တဲ့ ဂျွန်းကတောင် မကြောက်သေးတာ...။ သားရဲလူသားဖြစ်တဲ့ ရှုရှုက ဘာလို့ကြောက်ရမှာလဲ။

ရှုရှုက အတတ်နိုင်ဆုံးထိန်းချုပ်နိုင်ခဲ့ပြီး မကြာမီ ပို၍ကြီးမားသော အာကာသယာဥ်ပေါ်သို့ ရောက်ရှိသွားခဲ့လေသည်။

ကုန်တင်ယာဥ်တွင် ကုန်တင်ဖို့ရန် ကြီးမားကျယ်ပြန့်သော နေရာလွတ်ကြီးသာ ရှိသည်။ ကမီရယ်၏ အာကာသယာဥ်မှာလည်း ပစ္စည်းများသိပ်မရှိပဲ အခွံနီးနီးလွတ်နေလေသည်။ သို့သော် ယခုသိမ်းယူထားသည့် အာကာသယာဥ်တွင် ပစ္စည်းအသစ်အဆန်းများစွာရှိနေလေသည်။

နားနေအပန်းဖြေခန်း၊ ရုပ်ရှင်ခန်း၊ အရက်ဘားနှင့် ရေကူးကန်အပါအဝင် ရှုရှုတစ်ခါမျှမတွေးဖူးသော အရာများစွာပါရှိလေသည်။

ရှုရှုက အာကာသယာဥ်အား တစ်ပတ်ပတ်ကြည့်ရင်း အံ့သြတုန်လှုပ်နေရှာ၏။"ဒီမှာ ပစ္စည်းတွေ တကယ့်ကိုအများကြီးပဲဟ"